| Library / Tipiṭaka / တိပိဋက • Tipiṭaka / ပရိဝာရ-အဋ္ဌကထာ • Parivāra-aṭṭhakathā |
ကတာပတ္တိဝာရာဒိဝဏ္ဏနာ
Katāpattivārādivaṇṇanā
၁၅၇. ဣတော ပရံ ‘‘မေထုနံ ဓမ္မံ ပဋိသေဝန္တော ကတိ အာပတ္တိယော အာပဇ္ဇတီ’’တိ အာဒိပ္ပဘေဒော ကတာပတ္တိဝာရော, ‘‘မေထုနံ ဓမ္မံ ပဋိသေဝန္တသ္သ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တီ’’တိ အာဒိပ္ပဘေဒော ဝိပတ္တိဝာရော, ‘‘မေထုနံ ဓမ္မံ ပဋိသေဝန္တသ္သ အာပတ္တိယော သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင္ဂဟိတာ’’တိ အာဒိပ္ပဘေဒော သင္ဂဟဝာရော, ‘‘မေထုနံ ဓမ္မံ ပဋိသေဝန္တသ္သ အာပတ္တိယော ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌဟန္တီ’’တိ အာဒိပ္ပဘေဒော သမုဋ္ဌာနဝာရော, ‘‘မေထုနံ ဓမ္မံ ပဋိသေဝန္တသ္သ အာပတ္တိယော စတုန္နံ အဓိကရဏာနံ ကတမံ အဓိကရဏ’’န္တိ အာဒိပ္ပဘေဒော အဓိကရဏဝာရော, ‘‘မေထုနံ ဓမ္မံ ပဋိသေဝန္တသ္သ အာပတ္တိယော သတ္တန္နံ သမထာနံ ကတိဟိ သမထေဟိ သမ္မန္တီ’’တိ အာဒိပ္ပဘေဒော သမထဝာရော, တဒနန္တရော သမုစ္စယဝာရော စာတိ ဣမေ သတ္တ ဝာရာ ဥတ္တာနတ္ထာ ဧဝ။
157. Ito paraṃ ‘‘methunaṃ dhammaṃ paṭisevanto kati āpattiyo āpajjatī’’ti ādippabhedo katāpattivāro, ‘‘methunaṃ dhammaṃ paṭisevantassa āpattiyo catunnaṃ vipattīnaṃ kati vipattiyo bhajantī’’ti ādippabhedo vipattivāro, ‘‘methunaṃ dhammaṃ paṭisevantassa āpattiyo sattannaṃ āpattikkhandhānaṃ katihi āpattikkhandhehi saṅgahitā’’ti ādippabhedo saṅgahavāro, ‘‘methunaṃ dhammaṃ paṭisevantassa āpattiyo channaṃ āpattisamuṭṭhānānaṃ katihi samuṭṭhānehi samuṭṭhahantī’’ti ādippabhedo samuṭṭhānavāro, ‘‘methunaṃ dhammaṃ paṭisevantassa āpattiyo catunnaṃ adhikaraṇānaṃ katamaṃ adhikaraṇa’’nti ādippabhedo adhikaraṇavāro, ‘‘methunaṃ dhammaṃ paṭisevantassa āpattiyo sattannaṃ samathānaṃ katihi samathehi sammantī’’ti ādippabhedo samathavāro, tadanantaro samuccayavāro cāti ime satta vārā uttānatthā eva.
၁၈၈. တတော ပရံ ‘‘မေထုနံ ဓမ္မံ ပဋိသေဝနပစ္စယာ ပာရာဇိကံ ကတ္ထ ပညတ္တ’’န္တိအာဒိနာ နယေန ပုန ပစ္စယဝသေန ဧကော ပညတ္တိဝာရော, တသ္သ ဝသေန ပုရိမသဒိသာ ဧဝ ကတာပတ္တိဝာရာဒယော သတ္တ ဝာရာတိ ဧဝံ အပရေပိ အဋ္ဌ ဝာရာ ဝုတ္တာ, တေပိ ဥတ္တာနတ္ထာ ဧဝ။ ဣတိ ဣမေ အဋ္ဌ, ပုရိမာ အဋ္ဌာတိ မဟာဝိဘင္ဂေ သောဠသ ဝာရာ ဒသ္သိတာ။ တတော ပရံ တေနေဝ နယေန ဘိက္ခုနိဝိဘင္ဂေပိ သောဠသ ဝာရာ အာဂတာတိ ဧဝမိမေ ဥဘတောဝိဘင္ဂေ ဒ္ဝတ္တိံသ ဝာရာ ပာဠိနယေနေဝ ဝေဒိတဗ္ဗာ။ န ဟေတ္ထ ကိဉ္စိ ပုဗ္ဗေ အဝိနိစ္ဆိတံ နာမ အတ္ထိ။
188. Tato paraṃ ‘‘methunaṃ dhammaṃ paṭisevanapaccayā pārājikaṃ kattha paññatta’’ntiādinā nayena puna paccayavasena eko paññattivāro, tassa vasena purimasadisā eva katāpattivārādayo satta vārāti evaṃ aparepi aṭṭha vārā vuttā, tepi uttānatthā eva. Iti ime aṭṭha, purimā aṭṭhāti mahāvibhaṅge soḷasa vārā dassitā. Tato paraṃ teneva nayena bhikkhunivibhaṅgepi soḷasa vārā āgatāti evamime ubhatovibhaṅge dvattiṃsa vārā pāḷinayeneva veditabbā. Na hettha kiñci pubbe avinicchitaṃ nāma atthi.
မဟာဝိဘင္ဂေ စ ဘိက္ခုနိဝိဘင္ဂေ စ
Mahāvibhaṅge ca bhikkhunivibhaṅge ca
သောဠသမဟာဝာရဝဏ္ဏနာ နိဋ္ဌိတာ။
Soḷasamahāvāravaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / ပရိဝာရပာဠိ • Parivārapāḷi
၁. ပာရာဇိကကဏ္ဍံ • 1. Pārājikakaṇḍaṃ
၁. ပာရာဇိကကဏ္ဍံ • 1. Pārājikakaṇḍaṃ
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ပညတ္တိဝာရဝဏ္ဏနာ • Paññattivāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ကတာပတ္တိဝာရာဒိဝဏ္ဏနာ • Katāpattivārādivaṇṇanā
