| Library / Tipiṭaka / තිපිටක • Tipiṭaka / පරිවාර-අට්‌ඨකථා • Parivāra-aṭṭhakathā |
කතාපත්‌තිවාරාදිවණ්‌ණනා
Katāpattivārādivaṇṇanā
157. ඉතො පරං ‘‘මෙථුනං ධම්‌මං පටිසෙවන්‌තො කති ආපත්‌තියො ආපජ්‌ජතී’’ති ආදිප්‌පභෙදො කතාපත්‌තිවාරො, ‘‘මෙථුනං ධම්‌මං පටිසෙවන්‌තස්‌ස ආපත්‌තියො චතුන්‌නං විපත්‌තීනං කති විපත්‌තියො භජන්‌තී’’ති ආදිප්‌පභෙදො විපත්‌තිවාරො, ‘‘මෙථුනං ධම්‌මං පටිසෙවන්‌තස්‌ස ආපත්‌තියො සත්‌තන්‌නං ආපත්‌තික්‌ඛන්‌ධානං කතිහි ආපත්‌තික්‌ඛන්‌ධෙහි සඞ්‌ගහිතා’’ති ආදිප්‌පභෙදො සඞ්‌ගහවාරො, ‘‘මෙථුනං ධම්‌මං පටිසෙවන්‌තස්‌ස ආපත්‌තියො ඡන්‌නං ආපත්‌තිසමුට්‌ඨානානං කතිහි සමුට්‌ඨානෙහි සමුට්‌ඨහන්‌තී’’ති ආදිප්‌පභෙදො සමුට්‌ඨානවාරො, ‘‘මෙථුනං ධම්‌මං පටිසෙවන්‌තස්‌ස ආපත්‌තියො චතුන්‌නං අධිකරණානං කතමං අධිකරණ’’න්‌ති ආදිප්‌පභෙදො අධිකරණවාරො, ‘‘මෙථුනං ධම්‌මං පටිසෙවන්‌තස්‌ස ආපත්‌තියො සත්‌තන්‌නං සමථානං කතිහි සමථෙහි සම්‌මන්‌තී’’ති ආදිප්‌පභෙදො සමථවාරො, තදනන්‌තරො සමුච්‌චයවාරො චාති ඉමෙ සත්‌ත වාරා උත්‌තානත්‌ථා එව.
157. Ito paraṃ ‘‘methunaṃ dhammaṃ paṭisevanto kati āpattiyo āpajjatī’’ti ādippabhedo katāpattivāro, ‘‘methunaṃ dhammaṃ paṭisevantassa āpattiyo catunnaṃ vipattīnaṃ kati vipattiyo bhajantī’’ti ādippabhedo vipattivāro, ‘‘methunaṃ dhammaṃ paṭisevantassa āpattiyo sattannaṃ āpattikkhandhānaṃ katihi āpattikkhandhehi saṅgahitā’’ti ādippabhedo saṅgahavāro, ‘‘methunaṃ dhammaṃ paṭisevantassa āpattiyo channaṃ āpattisamuṭṭhānānaṃ katihi samuṭṭhānehi samuṭṭhahantī’’ti ādippabhedo samuṭṭhānavāro, ‘‘methunaṃ dhammaṃ paṭisevantassa āpattiyo catunnaṃ adhikaraṇānaṃ katamaṃ adhikaraṇa’’nti ādippabhedo adhikaraṇavāro, ‘‘methunaṃ dhammaṃ paṭisevantassa āpattiyo sattannaṃ samathānaṃ katihi samathehi sammantī’’ti ādippabhedo samathavāro, tadanantaro samuccayavāro cāti ime satta vārā uttānatthā eva.
188. තතො පරං ‘‘මෙථුනං ධම්‌මං පටිසෙවනපච්‌චයා පාරාජිකං කත්‌ථ පඤ්‌ඤත්‌ත’’න්‌තිආදිනා නයෙන පුන පච්‌චයවසෙන එකො පඤ්‌ඤත්‌තිවාරො, තස්‌ස වසෙන පුරිමසදිසා එව කතාපත්‌තිවාරාදයො සත්‌ත වාරාති එවං අපරෙපි අට්‌ඨ වාරා වුත්‌තා, තෙපි උත්‌තානත්‌ථා එව. ඉති ඉමෙ අට්‌ඨ, පුරිමා අට්‌ඨාති මහාවිභඞ්‌ගෙ සොළස වාරා දස්‌සිතා. තතො පරං තෙනෙව නයෙන භික්‌ඛුනිවිභඞ්‌ගෙපි සොළස වාරා ආගතාති එවමිමෙ උභතොවිභඞ්‌ගෙ ද්‌වත්‌තිංස වාරා පාළිනයෙනෙව වෙදිතබ්‌බා. න හෙත්‌ථ කිඤ්‌චි පුබ්‌බෙ අවිනිච්‌ඡිතං නාම අත්‌ථි.
188. Tato paraṃ ‘‘methunaṃ dhammaṃ paṭisevanapaccayā pārājikaṃ kattha paññatta’’ntiādinā nayena puna paccayavasena eko paññattivāro, tassa vasena purimasadisā eva katāpattivārādayo satta vārāti evaṃ aparepi aṭṭha vārā vuttā, tepi uttānatthā eva. Iti ime aṭṭha, purimā aṭṭhāti mahāvibhaṅge soḷasa vārā dassitā. Tato paraṃ teneva nayena bhikkhunivibhaṅgepi soḷasa vārā āgatāti evamime ubhatovibhaṅge dvattiṃsa vārā pāḷinayeneva veditabbā. Na hettha kiñci pubbe avinicchitaṃ nāma atthi.
මහාවිභඞ්‌ගෙ ච භික්‌ඛුනිවිභඞ්‌ගෙ ච
Mahāvibhaṅge ca bhikkhunivibhaṅge ca
සොළසමහාවාරවණ්‌ණනා නිට්‌ඨිතා.
Soḷasamahāvāravaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi
1. පාරාජිකකණ්‌ඩං • 1. Pārājikakaṇḍaṃ
1. පාරාජිකකණ්‌ඩං • 1. Pārājikakaṇḍaṃ
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / පඤ්‌ඤත්‌තිවාරවණ්‌ණනා • Paññattivāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / කතාපත්‌තිවාරාදිවණ්‌ණනා • Katāpattivārādivaṇṇanā
