| Library / Tipiṭaka / තිපිටක • Tipiṭaka / වජිරබුද්‌ධි-ටීකා • Vajirabuddhi-ṭīkā |
කතාපත්‌තිවාරාදිවණ්‌ණනා
Katāpattivārādivaṇṇanā
166. කතාපත්‌තිවාරෙ ‘‘සඞ්‌ඝිකං මඤ්‌චං වා’’තිආදි අජ්‌ඣොකාසත්‌තා විහාරබ්‌භන්‌තරෙපි ආපජ්‌ජනතො ලෙඩ්‌ඩුපාතාතික්‌කමවසෙන වුත්‌තං. දුතියෙ සෙය්‍යං සන්‌ථරිත්‌වාති අබ්‌භන්‌තරෙ සන්‌ථරිතභාවතො විහාරතො බහිගමනෙපි තංදිවසානාගමෙ ආපජ්‌ජනතො ‘‘පරික්‌ඛෙපං අතික්‌කාමෙතී’’ති වුත්‌තං.
166. Katāpattivāre ‘‘saṅghikaṃ mañcaṃ vā’’tiādi ajjhokāsattā vihārabbhantarepi āpajjanato leḍḍupātātikkamavasena vuttaṃ. Dutiye seyyaṃ santharitvāti abbhantare santharitabhāvato vihārato bahigamanepi taṃdivasānāgame āpajjanato ‘‘parikkhepaṃ atikkāmetī’’ti vuttaṃ.
171. සඤ්‌චිච්‌ච පාණං ජීවිතා වොරොපෙන්‌තො චතස්‌සො ආපත්‌තියොති එත්‌ථ කිඤ්‌චාපි තස්‌මිං සික්‌ඛාපදෙ තිරච්‌ඡානගතපාණොව අධිප්‌පෙතො, අථ ඛො පාණොති වොහාරසාමඤ්‌ඤතො අත්‌ථුද්‌ධාරවසෙන ‘‘චතස්‌සො’’ති වුත්‌තං. එස නයො අඤ්‌ඤෙසුපි එවරූපෙසු ඨානෙසු.
171.Sañcicca pāṇaṃ jīvitā voropento catasso āpattiyoti ettha kiñcāpi tasmiṃ sikkhāpade tiracchānagatapāṇova adhippeto, atha kho pāṇoti vohārasāmaññato atthuddhāravasena ‘‘catasso’’ti vuttaṃ. Esa nayo aññesupi evarūpesu ṭhānesu.
173. විකාලෙ ගාමප්‌පවෙසනෙ ‘‘පඨමං පාදං පරික්‌ඛෙපං අතික්‌කාමෙති, ආපත්‌ති දුක්‌කටස්‌සා’ති වුත්‌තත්‌තා උපචාරෙ නාපජ්‌ජති, පරික්‌ඛෙපං අතික්‌කමිත්‌වාව ආපජ්‌ජතීති සිද්‌ධමෙවා’’ති වදන්‌ති.
173. Vikāle gāmappavesane ‘‘paṭhamaṃ pādaṃ parikkhepaṃ atikkāmeti, āpatti dukkaṭassā’ti vuttattā upacāre nāpajjati, parikkhepaṃ atikkamitvāva āpajjatīti siddhamevā’’ti vadanti.
193. පච්‌චයවාරෙ පුරිමවාරතො විසෙසො අත්‌ථියෙව, ‘‘මෙථුනං ධම්‌මං පටිසෙවන්‌තො කති ආපත්‌තියො ආපජ්‌ජතී’’ති වුත්‌තෙ ජතුමට්‌ඨකස්‌සොකාසො න ජාතො, ඉධ පන ‘‘මෙථුනං ධම්‌මං පටිසෙවනපච්‌චයා’’ති වුත්‌තෙ පුග්‌ගලනිද්‌දෙසාභාවා ජතුමට්‌ඨකඤ්‌ච පවිට්‌ඨං, එවං විසෙසො අත්‌ථි. තථා එවරූපෙසු ඨානෙසු.
193. Paccayavāre purimavārato viseso atthiyeva, ‘‘methunaṃ dhammaṃ paṭisevanto kati āpattiyo āpajjatī’’ti vutte jatumaṭṭhakassokāso na jāto, idha pana ‘‘methunaṃ dhammaṃ paṭisevanapaccayā’’ti vutte puggalaniddesābhāvā jatumaṭṭhakañca paviṭṭhaṃ, evaṃ viseso atthi. Tathā evarūpesu ṭhānesu.
මහාවිභඞ්‌ගෙ ච භික්‌ඛුනිවිභඞ්‌ගෙ සොළසමහාවාරවණ්‌ණනා නිට්‌ඨිතා.
Mahāvibhaṅge ca bhikkhunivibhaṅge soḷasamahāvāravaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi
2. භූතගාමවග්‌ගො • 2. Bhūtagāmavaggo
7. සප්‌පාණකවග්‌ගො • 7. Sappāṇakavaggo
9. රාජවග්‌ගො • 9. Rājavaggo
1. පාරාජිකකණ්‌ඩං • 1. Pārājikakaṇḍaṃ
