| Library / Tipiṭaka / තිපිටක • Tipiṭaka / විමතිවිනොදනී-ටීකා • Vimativinodanī-ṭīkā |
කතාපත්‌තිවාරවණ්‌ණනා
Katāpattivāravaṇṇanā
277. දුතියෙ පන කතිවාරෙ පඨමසමුට්‌ඨානෙන ආපජ්‌ජිතබ්‌බානං ආපත්‌තීනං ලහුදස්‌සනසුඛත්‌ථං කුටිකාරාදීනි එව සමුද්‌ධටානි, න අඤ්‌ඤෙසං අභාවා, සඤ්‌චරිත්‌තාදීනම්‌පි විජ්‌ජමානත්‌තා. එවං දුතියසමුට්‌ඨානාදීසුපි. ‘‘කප්‌පියසඤ්‌ඤී’’ති ඉමිනා අචිත්‌තකත්‌තං දස්‌සෙති. ‘‘කුටිං කරොතී’’ති ඉමිනා වචීපයොගාභාවං. උභයෙනාපි කෙවලං කායෙනෙව දුක්‌කටාදීනං සම්‌භවං දස්‌සෙති. එවං උපරිපි යථානුරූපං කාතබ්‌බං.
277. Dutiye pana kativāre paṭhamasamuṭṭhānena āpajjitabbānaṃ āpattīnaṃ lahudassanasukhatthaṃ kuṭikārādīni eva samuddhaṭāni, na aññesaṃ abhāvā, sañcarittādīnampi vijjamānattā. Evaṃ dutiyasamuṭṭhānādīsupi. ‘‘Kappiyasaññī’’ti iminā acittakattaṃ dasseti. ‘‘Kuṭiṃ karotī’’ti iminā vacīpayogābhāvaṃ. Ubhayenāpi kevalaṃ kāyeneva dukkaṭādīnaṃ sambhavaṃ dasseti. Evaṃ uparipi yathānurūpaṃ kātabbaṃ.
‘‘එකෙන සමුට්‌ඨානෙන සමුට්‌ඨහන්‌තී’’ති ඉදං ඉධ විසෙසෙත්‌වා දස්‌සිතානං කායතොව සමුට්‌ඨිතානං වසෙන වුත්‌තං, අවිසෙසතො පන තා ආපත්‌තියො ඉතරසමුට්‌ඨානෙහිපි යථාරහං සමුට්‌ඨහන්‌ති එව. එවං උපරිපි.
‘‘Ekenasamuṭṭhānena samuṭṭhahantī’’ti idaṃ idha visesetvā dassitānaṃ kāyatova samuṭṭhitānaṃ vasena vuttaṃ, avisesato pana tā āpattiyo itarasamuṭṭhānehipi yathārahaṃ samuṭṭhahanti eva. Evaṃ uparipi.
‘‘තිණවත්‌ථාරකෙන චා’’ති ඉදං සඞ්‌ඝාදිසෙසවජ්‌ජිතානං චතුන්‌නං ආපත්‌තීනං වසෙන වුත්‌තං.
‘‘Tiṇavatthārakena cā’’ti idaṃ saṅghādisesavajjitānaṃ catunnaṃ āpattīnaṃ vasena vuttaṃ.
279. සංවිදහිත්‌වා කුටිං කරොතීති වාචාය සංවිදහති, සයඤ්‌ච කායෙන කරොතීති අත්‌ථො.
279.Saṃvidahitvākuṭiṃ karotīti vācāya saṃvidahati, sayañca kāyena karotīti attho.
කතාපත්‌තිවාරවණ්‌ණනා නිට්‌ඨිතා.
Katāpattivāravaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 2. කතාපත්‌තිවාරො • 2. Katāpattivāro
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / ඡආපත්‌තිසමුට්‌ඨානවාරාදිවණ්‌ණනා • Chaāpattisamuṭṭhānavārādivaṇṇanā
