| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੭. ਕਥਾવਤ੍ਥੁਸੁਤ੍ਤવਣ੍ਣਨਾ
7. Kathāvatthusuttavaṇṇanā
੬੮. ਸਤ੍ਤਮੇ ਕਥਾવਤ੍ਥੂਨੀਤਿ ਕਥਾਕਾਰਣਾਨਿ, ਕਥਾਯ ਭੂਮਿਯੋ ਪਤਿਟ੍ਠਾਯੋਤਿ ਅਤ੍ਥੋ। ਅਤੀਤਂ વਾ, ਭਿਕ੍ਖવੇ, ਅਦ੍ਧਾਨਨ੍ਤਿ ਅਤੀਤਮਦ੍ਧਾਨਂ ਨਾਮ ਕਾਲੋਪਿ વਟ੍ਟਤਿ ਖਨ੍ਧਾਪਿ। ਅਨਾਗਤਪਚ੍ਚੁਪ੍ਪਨ੍ਨੇਸੁਪਿ ਏਸੇવ ਨਯੋ। ਤਤ੍ਥ ਅਤੀਤੇ ਕਸ੍ਸਪੋ ਨਾਮ ਸਮ੍ਮਾਸਮ੍ਬੁਦ੍ਧੋ ਅਹੋਸਿ, ਤਸ੍ਸ ਕਿਕੀ ਨਾਮ ਕਾਸਿਕਰਾਜਾ ਅਗ੍ਗੁਪਟ੍ਠਾਕੋ ਅਹੋਸਿ, વੀਸਤਿ વਸ੍ਸਸਹਸ੍ਸਾਨਿ ਆਯੁ ਅਹੋਸੀਤਿ ਇਮਿਨਾ ਨਯੇਨ ਕਥੇਨ੍ਤੋ ਅਤੀਤਂ ਆਰਬ੍ਭ ਕਥਂ ਕਥੇਤਿ ਨਾਮ। ਅਨਾਗਤੇ ਮੇਤ੍ਤੇਯ੍ਯੋ ਨਾਮ ਬੁਦ੍ਧੋ ਭવਿਸ੍ਸਤਿ, ਤਸ੍ਸ ਸਙ੍ਖੋ ਨਾਮ ਰਾਜਾ ਅਗ੍ਗੁਪਟ੍ਠਾਕੋ ਭવਿਸ੍ਸਤਿ, ਅਸੀਤਿ વਸ੍ਸਸਹਸ੍ਸਾਨਿ ਆਯੁ ਭવਿਸ੍ਸਤੀਤਿ ਇਮਿਨਾ ਨਯੇਨ ਕਥੇਨ੍ਤੋ ਅਨਾਗਤਂ ਆਰਬ੍ਭ ਕਥਂ ਕਥੇਤਿ ਨਾਮ। ਏਤਰਹਿ ਅਸੁਕੋ ਨਾਮ ਰਾਜਾ ਧਮ੍ਮਿਕੋਤਿ ਇਮਿਨਾ ਨਯੇਨ ਕਥੇਨ੍ਤੋ ਪਚ੍ਚੁਪ੍ਪਨ੍ਨਂ ਆਰਬ੍ਭ ਕਥਂ ਕਥੇਤਿ ਨਾਮ।
68. Sattame kathāvatthūnīti kathākāraṇāni, kathāya bhūmiyo patiṭṭhāyoti attho. Atītaṃ vā, bhikkhave, addhānanti atītamaddhānaṃ nāma kālopi vaṭṭati khandhāpi. Anāgatapaccuppannesupi eseva nayo. Tattha atīte kassapo nāma sammāsambuddho ahosi, tassa kikī nāma kāsikarājā aggupaṭṭhāko ahosi, vīsati vassasahassāni āyu ahosīti iminā nayena kathento atītaṃ ārabbha kathaṃ katheti nāma. Anāgate metteyyo nāma buddho bhavissati, tassa saṅkho nāma rājā aggupaṭṭhāko bhavissati, asīti vassasahassāni āyu bhavissatīti iminā nayena kathento anāgataṃ ārabbha kathaṃ katheti nāma. Etarahi asuko nāma rājā dhammikoti iminā nayena kathento paccuppannaṃ ārabbha kathaṃ katheti nāma.
ਕਥਾਸਮ੍ਪਯੋਗੇਨਾਤਿ ਕਥਾਸਮਾਗਮੇਨ। ਕਚ੍ਛੋਤਿ ਕਥੇਤੁਂ ਯੁਤ੍ਤੋ। ਅਕਚ੍ਛੋਤਿ ਕਥੇਤੁਂ ਨ ਯੁਤ੍ਤੋ। ਏਕਂਸਬ੍ਯਾਕਰਣੀਯਂ ਪਞ੍ਹਨ੍ਤਿਆਦੀਸੁ, ‘‘ਚਕ੍ਖੁ, ਅਨਿਚ੍ਚ’’ਨ੍ਤਿ ਪੁਟ੍ਠੇਨ, ‘‘ਆਮ, ਅਨਿਚ੍ਚ’’ਨ੍ਤਿ ਏਕਂਸੇਨੇવ ਬ੍ਯਾਕਾਤਬ੍ਬਂ। ਏਸੇવ ਨਯੋ ਸੋਤਾਦੀਸੁ। ਅਯਂ ਏਕਂਸਬ੍ਯਾਕਰਣੀਯੋ ਪਞ੍ਹੋ। ‘‘ਅਨਿਚ੍ਚਂ ਨਾਮ ਚਕ੍ਖੂ’’ਤਿ ਪੁਟ੍ਠੇਨ ਪਨ ‘‘ਨ ਚਕ੍ਖੁਮੇવ, ਸੋਤਮ੍ਪਿ ਅਨਿਚ੍ਚਂ, ਘਾਨਮ੍ਪਿ ਅਨਿਚ੍ਚ’’ਨ੍ਤਿ ਏવਂ વਿਭਜਿਤ੍વਾ ਬ੍ਯਾਕਾਤਬ੍ਬਂ। ਅਯਂ વਿਭਜ੍ਜਬ੍ਯਾਕਰਣੀਯੋ ਪਞ੍ਹੋ। ‘‘ਯਥਾ ਚਕ੍ਖੁ, ਤਥਾ ਸੋਤਂ। ਯਥਾ ਸੋਤਂ, ਤਥਾ ਚਕ੍ਖੂ’’ਤਿ ਪੁਟ੍ਠੇਨ ‘‘ਕੇਨਟ੍ਠੇਨ ਪੁਚ੍ਛਸੀ’’ਤਿ ਪਟਿਪੁਚ੍ਛਿਤ੍વਾ ‘‘ਦਸ੍ਸਨਟ੍ਠੇਨ ਪੁਚ੍ਛਾਮੀ’’ਤਿ વੁਤ੍ਤੇ ‘‘ਨ ਹੀ’’ਤਿ ਬ੍ਯਾਕਾਤਬ੍ਬਂ। ‘‘ਅਨਿਚ੍ਚਟ੍ਠੇਨ ਪੁਚ੍ਛਾਮੀ’’ਤਿ વੁਤ੍ਤੇ, ‘‘ਆਮਾ’’ਤਿ ਬ੍ਯਾਕਾਤਬ੍ਬਂ। ਅਯਂ ਪਟਿਪੁਚ੍ਛਾਬ੍ਯਾਕਰਣੀਯੋ ਪਞ੍ਹੋ। ‘‘ਤਂ ਜੀવਂ ਤਂ ਸਰੀਰ’’ਨ੍ਤਿਆਦੀਨਿ ਪੁਟ੍ਠੇਨ ਪਨ ‘‘ਅਬ੍ਯਾਕਤਮੇਤਂ ਭਗવਤਾ’’ਤਿ ਠਪੇਤਬ੍ਬੋ, ਏਸ ਪਞ੍ਹੋ ਨ ਬ੍ਯਾਕਾਤਬ੍ਬੋ। ਅਯਂ ਠਪਨੀਯੋ ਪਞ੍ਹੋ।
Kathāsampayogenāti kathāsamāgamena. Kacchoti kathetuṃ yutto. Akacchoti kathetuṃ na yutto. Ekaṃsabyākaraṇīyaṃ pañhantiādīsu, ‘‘cakkhu, anicca’’nti puṭṭhena, ‘‘āma, anicca’’nti ekaṃseneva byākātabbaṃ. Eseva nayo sotādīsu. Ayaṃ ekaṃsabyākaraṇīyo pañho. ‘‘Aniccaṃ nāma cakkhū’’ti puṭṭhena pana ‘‘na cakkhumeva, sotampi aniccaṃ, ghānampi anicca’’nti evaṃ vibhajitvā byākātabbaṃ. Ayaṃ vibhajjabyākaraṇīyo pañho. ‘‘Yathā cakkhu, tathā sotaṃ. Yathā sotaṃ, tathā cakkhū’’ti puṭṭhena ‘‘kenaṭṭhena pucchasī’’ti paṭipucchitvā ‘‘dassanaṭṭhena pucchāmī’’ti vutte ‘‘na hī’’ti byākātabbaṃ. ‘‘Aniccaṭṭhena pucchāmī’’ti vutte, ‘‘āmā’’ti byākātabbaṃ. Ayaṃ paṭipucchābyākaraṇīyo pañho. ‘‘Taṃ jīvaṃ taṃ sarīra’’ntiādīni puṭṭhena pana ‘‘abyākatametaṃ bhagavatā’’ti ṭhapetabbo, esa pañho na byākātabbo. Ayaṃ ṭhapanīyo pañho.
ਠਾਨਾਠਾਨੇ ਨ ਸਣ੍ਠਾਤੀਤਿ ਕਾਰਣਾਕਾਰਣੇ ਨ ਸਣ੍ਠਾਤਿ। ਤਤ੍ਰਾਯਂ ਨਯੋ – ਸਸ੍ਸਤવਾਦੀ ਯੁਤ੍ਤੇਨ ਕਾਰਣੇਨ ਪਹੋਤਿ ਉਚ੍ਛੇਦવਾਦਿਂ ਨਿਗ੍ਗਹੇਤੁਂ, ਉਚ੍ਛੇਦવਾਦੀ ਤੇਨ ਨਿਗ੍ਗਯ੍ਹਮਾਨੋ ‘‘ਕਿਂ ਪਨਾਹਂ ਉਚ੍ਛੇਦਂ વਦਾਮੀ’’ਤਿ ਸਸ੍ਸਤવਾਦਿਭਾવਮੇવ ਦੀਪੇਤਿ, ਅਤ੍ਤਨੋ વਾਦੇ ਪਤਿਟ੍ਠਾਤੁਂ ਨ ਸਕ੍ਕੋਤਿ। ਏવਂ ਉਚ੍ਛੇਦવਾਦਿਮ੍ਹਿ ਪਹੋਨ੍ਤੇ ਸਸ੍ਸਤવਾਦੀ, ਪੁਗ੍ਗਲવਾਦਿਮ੍ਹਿ ਪਹੋਨ੍ਤੇ ਸੁਞ੍ਞਤવਾਦੀ, ਸੁਞ੍ਞਤવਾਦਿਮ੍ਹਿ ਪਹੋਨ੍ਤੇ ਪੁਗ੍ਗਲવਾਦੀਤਿ ਏવਂ ਠਾਨਾਠਾਨੇ ਨ ਸਣ੍ਠਾਤਿ ਨਾਮ।
Ṭhānāṭhāne na saṇṭhātīti kāraṇākāraṇe na saṇṭhāti. Tatrāyaṃ nayo – sassatavādī yuttena kāraṇena pahoti ucchedavādiṃ niggahetuṃ, ucchedavādī tena niggayhamāno ‘‘kiṃ panāhaṃ ucchedaṃ vadāmī’’ti sassatavādibhāvameva dīpeti, attano vāde patiṭṭhātuṃ na sakkoti. Evaṃ ucchedavādimhi pahonte sassatavādī, puggalavādimhi pahonte suññatavādī, suññatavādimhi pahonte puggalavādīti evaṃ ṭhānāṭhāne na saṇṭhāti nāma.
ਪਰਿਕਪ੍ਪੇ ਨ ਸਣ੍ਠਾਤੀਤਿ ਇਦਂ ਪਞ੍ਹਪੁਚ੍ਛਨੇਪਿ ਪਞ੍ਹਕਥਨੇਪਿ ਲਬ੍ਭਤਿ। ਕਥਂ? ਏਕਚ੍ਚੋ ਹਿ ‘‘ਪਞ੍ਹਂ ਪੁਚ੍ਛਿਸ੍ਸਾਮੀ’’ਤਿ ਕਣ੍ਠਂ ਸੋਧੇਤਿ, ਸੋ ਇਤਰੇਨ ‘‘ਇਦਂ ਨਾਮ ਤ੍વਂ ਪੁਚ੍ਛਿਸ੍ਸਸੀ’’ਤਿ વੁਤ੍ਤੋ ਞਾਤਭਾવਂ ਞਤ੍વਾ ‘‘ਨ ਏਤਂ, ਅਞ੍ਞਂ ਪੁਚ੍ਛਿਸ੍ਸਾਮੀ’’ਤਿ વਦਤਿ। ਪਞ੍ਹਂ ਪੁਟ੍ਠੋਪਿ ‘‘ਪਞ੍ਹਂ ਕਥੇਸ੍ਸਾਮੀ’’ਤਿ ਹਨੁਂ ਸਂਸੋਧੇਤਿ, ਸੋ ਇਤਰੇਨ ‘‘ਇਦਂ ਨਾਮ ਕਥੇਸ੍ਸਸੀ’’ਤਿ વੁਤ੍ਤੋ ਞਾਤਭਾવਂ ਞਤ੍વਾ ‘‘ਨ ਏਤਂ, ਅਞ੍ਞਂ ਕਥੇਸ੍ਸਾਮੀ’’ਤਿ વਦਤਿ। ਏવਂ ਪਰਿਕਪ੍ਪੇ ਨ ਸਣ੍ਠਾਤਿ ਨਾਮ।
Parikappena saṇṭhātīti idaṃ pañhapucchanepi pañhakathanepi labbhati. Kathaṃ? Ekacco hi ‘‘pañhaṃ pucchissāmī’’ti kaṇṭhaṃ sodheti, so itarena ‘‘idaṃ nāma tvaṃ pucchissasī’’ti vutto ñātabhāvaṃ ñatvā ‘‘na etaṃ, aññaṃ pucchissāmī’’ti vadati. Pañhaṃ puṭṭhopi ‘‘pañhaṃ kathessāmī’’ti hanuṃ saṃsodheti, so itarena ‘‘idaṃ nāma kathessasī’’ti vutto ñātabhāvaṃ ñatvā ‘‘na etaṃ, aññaṃ kathessāmī’’ti vadati. Evaṃ parikappe na saṇṭhāti nāma.
ਅਞ੍ਞਾਤવਾਦੇ ਨ ਸਣ੍ਠਾਤੀਤਿ ਅਞ੍ਞਾਤવਾਦੇ ਜਾਨਿਤવਾਦੇ ਨ ਸਣ੍ਠਾਤਿ। ਕਥਂ? ਏਕਚ੍ਚੋ ਪਞ੍ਹਂ ਪੁਚ੍ਛਤਿ, ਤਂ ਇਤਰੋ ‘‘ਮਨਾਪੋ ਤਯਾ ਪਞ੍ਹੋ ਪੁਚ੍ਛਿਤੋ, ਕਹਂ ਤੇ ਏਸ ਉਗ੍ਗਹਿਤੋ’’ਤਿ વਦਤਿ। ਇਤਰੋ ਪੁਚ੍ਛਿਤਬ੍ਬਨਿਯਾਮੇਨੇવ ਪਞ੍ਹਂ ਪੁਚ੍ਛਿਤ੍વਾਪਿ ਤਸ੍ਸ ਕਥਾਯ ‘‘ਅਪਞ੍ਹਂ ਨੁ ਖੋ ਪੁਚ੍ਛਿਤ’’ਨ੍ਤਿ વਿਮਤਿਂ ਕਰੋਤਿ। ਅਪਰੋ ਪਞ੍ਹਂ ਪੁਟ੍ਠੋ ਕਥੇਤਿ, ਤਮਞ੍ਞੋ ‘‘ਸੁਟ੍ਠੁ ਤੇ ਪਞ੍ਹੋ ਕਥਿਤੋ, ਕਤ੍ਥ ਤੇ ਉਗ੍ਗਹਿਤੋ, ਪਞ੍ਹਂ ਕਥੇਨ੍ਤੇਨ ਨਾਮ ਏવਂ ਕਥੇਤਬ੍ਬੋ’’ਤਿ વਦਤਿ। ਇਤਰੋ ਕਥੇਤਬ੍ਬਨਿਯਾਮੇਨੇવ ਪਞ੍ਹਂ ਕਥੇਤ੍વਾਪਿ ਤਸ੍ਸ ਕਥਾਯ ‘‘ਅਪਞ੍ਹੋ ਨੁ ਖੋ ਮਯਾ ਕਥਿਤੋ’’ਤਿ વਿਮਤਿਂ ਕਰੋਤਿ।
Aññātavāde na saṇṭhātīti aññātavāde jānitavāde na saṇṭhāti. Kathaṃ? Ekacco pañhaṃ pucchati, taṃ itaro ‘‘manāpo tayā pañho pucchito, kahaṃ te esa uggahito’’ti vadati. Itaro pucchitabbaniyāmeneva pañhaṃ pucchitvāpi tassa kathāya ‘‘apañhaṃ nu kho pucchita’’nti vimatiṃ karoti. Aparo pañhaṃ puṭṭho katheti, tamañño ‘‘suṭṭhu te pañho kathito, kattha te uggahito, pañhaṃ kathentena nāma evaṃ kathetabbo’’ti vadati. Itaro kathetabbaniyāmeneva pañhaṃ kathetvāpi tassa kathāya ‘‘apañho nu kho mayā kathito’’ti vimatiṃ karoti.
ਪਟਿਪਦਾਯ ਨ ਸਣ੍ਠਾਤੀਤਿ ਪਟਿਪਤ੍ਤਿਯਂ ਨ ਤਿਟ੍ਠਤਿ, વਤ੍ਤਂ ਅਜਾਨਿਤ੍વਾ ਅਪੁਚ੍ਛਿਤਬ੍ਬਟ੍ਠਾਨੇ ਪੁਚ੍ਛਤੀਤਿ ਅਤ੍ਥੋ। ਅਯਂ ਪਞ੍ਹੋ ਨਾਮ ਚੇਤਿਯਙ੍ਗਣੇ ਪੁਚ੍ਛਿਤੇਨ ਨ ਕਥੇਤਬ੍ਬੋ, ਤਥਾ ਭਿਕ੍ਖਾਚਾਰਮਗ੍ਗੇ ਗਾਮਂ ਪਿਣ੍ਡਾਯ ਚਰਣਕਾਲੇ। ਆਸਨਸਾਲਾਯ ਨਿਸਿਨ੍ਨਕਾਲੇ ਯਾਗੁਂ વਾ ਭਤ੍ਤਂ વਾ ਗਹੇਤ੍વਾ ਨਿਸਿਨ੍ਨਕਾਲੇ ਪਰਿਭੁਞ੍ਜਿਤ੍વਾ ਨਿਸਿਨ੍ਨਕਾਲੇ ਦਿવਾવਿਹਾਰਟ੍ਠਾਨਗਮਨਕਾਲੇਪਿ। ਦਿવਾਟ੍ਠਾਨੇ ਨਿਸਿਨ੍ਨਕਾਲੇ ਪਨ ਓਕਾਸਂ ਕਾਰੇਤ੍વਾવ ਪੁਚ੍ਛਨ੍ਤਸ੍ਸ ਕਥੇਤਬ੍ਬੋ, ਅਕਾਰੇਤ੍વਾ ਪੁਚ੍ਛਨ੍ਤਸ੍ਸ ਨ ਕਥੇਤਬ੍ਬੋ। ਇਦਂ વਤ੍ਤਂ ਅਜਾਨਿਤ੍વਾ ਪੁਚ੍ਛਨ੍ਤੋ ਪਟਿਪਦਾਯ ਨ ਸਣ੍ਠਾਤਿ ਨਾਮ। ਏવਂ ਸਨ੍ਤਾਯਂ, ਭਿਕ੍ਖવੇ, ਪੁਗ੍ਗਲੋ ਅਕਚ੍ਛੋ ਹੋਤੀਤਿ, ਭਿਕ੍ਖવੇ, ਏਤਂ ਇਮਸ੍ਮਿਂ ਚ ਕਾਰਣੇ ਸਤਿ ਅਯਂ ਪੁਗ੍ਗਲੋ ਨ ਕਥੇਤੁਂ ਯੁਤ੍ਤੋ ਨਾਮ ਹੋਤਿ।
Paṭipadāya na saṇṭhātīti paṭipattiyaṃ na tiṭṭhati, vattaṃ ajānitvā apucchitabbaṭṭhāne pucchatīti attho. Ayaṃ pañho nāma cetiyaṅgaṇe pucchitena na kathetabbo, tathā bhikkhācāramagge gāmaṃ piṇḍāya caraṇakāle. Āsanasālāya nisinnakāle yāguṃ vā bhattaṃ vā gahetvā nisinnakāle paribhuñjitvā nisinnakāle divāvihāraṭṭhānagamanakālepi. Divāṭṭhāne nisinnakāle pana okāsaṃ kāretvāva pucchantassa kathetabbo, akāretvā pucchantassa na kathetabbo. Idaṃ vattaṃ ajānitvā pucchanto paṭipadāya na saṇṭhāti nāma. Evaṃ santāyaṃ, bhikkhave, puggalo akaccho hotīti, bhikkhave, etaṃ imasmiṃ ca kāraṇe sati ayaṃ puggalo na kathetuṃ yutto nāma hoti.
ਠਾਨਾਠਾਨੇ ਸਣ੍ਠਾਤੀਤਿ ਸਸ੍ਸਤવਾਦੀ ਯੁਤ੍ਤੇਨ ਕਾਰਣੇਨ ਪਹੋਤਿ ਉਚ੍ਛੇਦવਾਦਿਂ ਨਿਗ੍ਗਹੇਤੁਂ, ਉਚ੍ਛੇਦવਾਦੀ ਤੇਨ ਨਿਗ੍ਗਯ੍ਹਮਾਨੋਪਿ ‘‘ਅਹਂ ਤਯਾ ਸਤਕ੍ਖਤ੍ਤੁਂ ਨਿਗ੍ਗਯ੍ਹਮਾਨੋਪਿ ਉਚ੍ਛੇਦવਾਦੀਯੇવਾ’’ਤਿ વਦਤਿ। ਇਮਿਨਾ ਨਯੇਨ ਸਸ੍ਸਤਪੁਗ੍ਗਲਸੁਞ੍ਞਤવਾਦਾਦੀਸੁਪਿ ਨਯੋ ਨੇਤਬ੍ਬੋ। ਏવਂ ਠਾਨਾਠਾਨੇ ਸਣ੍ਠਾਤਿ ਨਾਮ। ਪਰਿਕਪ੍ਪੇ ਸਣ੍ਠਾਤੀਤਿ ‘‘ਪਞ੍ਹਂ ਪੁਚ੍ਛਿਸ੍ਸਾਮੀ’’ਤਿ ਕਣ੍ਠਂ ਸੋਧੇਨ੍ਤੋ ‘‘ਤ੍વਂ ਇਮਂ ਨਾਮ ਪੁਚ੍ਛਿਸ੍ਸਸੀ’’ਤਿ વੁਤ੍ਤੇ, ‘‘ਆਮ, ਏਤਂਯੇવ ਪੁਚ੍ਛਿਸ੍ਸਾਮੀ’’ਤਿ વਦਤਿ। ਪਞ੍ਹਂ ਕਥੇਸ੍ਸਾਮੀਤਿ ਹਨੁਂ ਸਂਸੋਧੇਨ੍ਤੋਪਿ ‘‘ਤ੍વਂ ਇਮਂ ਨਾਮ ਕਥੇਸ੍ਸਸੀ’’ਤਿ વੁਤ੍ਤੇ, ‘‘ਆਮ, ਏਤਂਯੇવ ਕਥੇਸ੍ਸਾਮੀ’’ਤਿ વਦਤਿ। ਏવਂ ਪਰਿਕਪ੍ਪੇ ਸਣ੍ਠਾਤਿ ਨਾਮ।
Ṭhānāṭhāne saṇṭhātīti sassatavādī yuttena kāraṇena pahoti ucchedavādiṃ niggahetuṃ, ucchedavādī tena niggayhamānopi ‘‘ahaṃ tayā satakkhattuṃ niggayhamānopi ucchedavādīyevā’’ti vadati. Iminā nayena sassatapuggalasuññatavādādīsupi nayo netabbo. Evaṃ ṭhānāṭhāne saṇṭhāti nāma. Parikappe saṇṭhātīti ‘‘pañhaṃ pucchissāmī’’ti kaṇṭhaṃ sodhento ‘‘tvaṃ imaṃ nāma pucchissasī’’ti vutte, ‘‘āma, etaṃyeva pucchissāmī’’ti vadati. Pañhaṃ kathessāmīti hanuṃ saṃsodhentopi ‘‘tvaṃ imaṃ nāma kathessasī’’ti vutte, ‘‘āma, etaṃyeva kathessāmī’’ti vadati. Evaṃ parikappe saṇṭhāti nāma.
ਅਞ੍ਞਾਤવਾਦੇ ਸਣ੍ਠਾਤੀਤਿ ਇਮਂ ਪਞ੍ਹਂ ਪੁਚ੍ਛਿਤ੍વਾ ‘‘ਸੁਟ੍ਠੁ ਤੇ ਪਞ੍ਹੋ ਪੁਚ੍ਛਿਤੋ, ਪੁਚ੍ਛਨ੍ਤੇਨ ਨਾਮ ਏવਂ ਪੁਚ੍ਛਿਤਬ੍ਬ’’ਨ੍ਤਿ વੁਤ੍ਤੇ ਸਮ੍ਪਟਿਚ੍ਛਤਿ, વਿਮਤਿਂ ਨ ਉਪ੍ਪਾਦੇਤਿ। ਪਞ੍ਹਂ ਕਥੇਤ੍વਾਪਿ ‘‘ਸੁਟ੍ਠੁ ਤੇ ਪਞ੍ਹੋ ਕਥਿਤੋ, ਕਥੇਨ੍ਤੇਨ ਨਾਮ ਏવਂ ਕਥੇਤਬ੍ਬ’’ਨ੍ਤਿ વੁਤ੍ਤੇ ਸਮ੍ਪਟਿਚ੍ਛਤਿ, વਿਮਤਿਂ ਨ ਉਪ੍ਪਾਦੇਤਿ। ਪਟਿਪਦਾਯ ਸਣ੍ਠਾਤੀਤਿ ਗੇਹੇ ਨਿਸੀਦਾਪੇਤ੍વਾ ਯਾਗੁਖਜ੍ਜਕਾਦੀਨਿ ਦਤ੍વਾ ਯਾવ ਭਤ੍ਤਂ ਨਿਟ੍ਠਾਤਿ, ਤਸ੍ਮਿਂ ਅਨ੍ਤਰੇ ਨਿਸਿਨ੍ਨੋ ਪਞ੍ਹਂ ਪੁਚ੍ਛਤਿ । ਸਪ੍ਪਿਆਦੀਨਿ ਭੇਸਜ੍ਜਾਨਿ ਅਟ੍ਠવਿਧਾਨਿ ਪਾਨਕਾਨਿ વਤ੍ਥਚ੍ਛਾਦਨਮਾਲਾਗਨ੍ਧਾਦੀਨਿ વਾ ਆਦਾਯ વਿਹਾਰਂ ਗਨ੍ਤ੍વਾ ਤਾਨਿ ਦਤ੍વਾ ਦਿવਾਟ੍ਠਾਨਂ ਪવਿਸਿਤ੍વਾ ਓਕਾਸਂ ਕਾਰੇਤ੍વਾ ਪਞ੍ਹਂ ਪੁਚ੍ਛਤਿ। ਏવਞ੍ਹਿ વਤ੍ਤਂ ਞਤ੍વਾ ਪੁਚ੍ਛਨ੍ਤੋ ਪਟਿਪਦਾਯ ਸਣ੍ਠਾਤਿ ਨਾਮ। ਤਸ੍ਸ ਪਞ੍ਹਂ ਕਥੇਤੁਂ વਟ੍ਟਤਿ।
Aññātavāde saṇṭhātīti imaṃ pañhaṃ pucchitvā ‘‘suṭṭhu te pañho pucchito, pucchantena nāma evaṃ pucchitabba’’nti vutte sampaṭicchati, vimatiṃ na uppādeti. Pañhaṃ kathetvāpi ‘‘suṭṭhu te pañho kathito, kathentena nāma evaṃ kathetabba’’nti vutte sampaṭicchati, vimatiṃ na uppādeti. Paṭipadāya saṇṭhātīti gehe nisīdāpetvā yāgukhajjakādīni datvā yāva bhattaṃ niṭṭhāti, tasmiṃ antare nisinno pañhaṃ pucchati . Sappiādīni bhesajjāni aṭṭhavidhāni pānakāni vatthacchādanamālāgandhādīni vā ādāya vihāraṃ gantvā tāni datvā divāṭṭhānaṃ pavisitvā okāsaṃ kāretvā pañhaṃ pucchati. Evañhi vattaṃ ñatvā pucchanto paṭipadāya saṇṭhāti nāma. Tassa pañhaṃ kathetuṃ vaṭṭati.
ਅਞ੍ਞੇਨਞ੍ਞਂ ਪਟਿਚਰਤੀਤਿ ਅਞ੍ਞੇਨ વਚਨੇਨ ਅਞ੍ਞਂ ਪਟਿਚ੍ਛਾਦੇਤਿ, ਅਞ੍ਞਂ વਾ ਪੁਚ੍ਛਿਤੋ ਅਞ੍ਞਂ ਕਥੇਤਿ। ਬਹਿਦ੍ਧਾ ਕਥਂ ਅਪਨਾਮੇਤੀਤਿ ਆਗਨ੍ਤੁਕਕਥਂ ਓਤਾਰੇਨ੍ਤੋ ਪੁਰਿਮਕਥਂ ਬਹਿਦ੍ਧਾ ਅਪਨਾਮੇਤਿ। ਤਤ੍ਰਿਦਂ વਤ੍ਥੁ – ਭਿਕ੍ਖੂ ਕਿਰ ਸਨ੍ਨਿਪਤਿਤ੍વਾ ਏਕਂ ਦਹਰਂ, ‘‘ਆવੁਸੋ, ਤ੍વਂ ਇਮਞ੍ਚਿਮਞ੍ਚ ਆਪਤ੍ਤਿਂ ਆਪਨ੍ਨੋ’’ਤਿ ਆਹਂਸੁ। ਸੋ ਆਹ – ‘‘ਭਨ੍ਤੇ, ਨਾਗਦੀਪਂ ਗਤੋਮ੍ਹੀ’’ਤਿ। ਆવੁਸੋ , ਨ ਮਯਂ ਤવ ਨਾਗਦੀਪਗਮਨੇਨ ਅਤ੍ਥਿਕਾ, ਆਪਤ੍ਤਿਂ ਪਨ ਆਪਨ੍ਨੋਤਿ ਪੁਚ੍ਛਾਮਾਤਿ। ਭਨ੍ਤੇ, ਨਾਗਦੀਪਂ ਗਨ੍ਤ੍વਾ ਮਚ੍ਛੇ ਖਾਦਿਨ੍ਤਿ। ਆવੁਸੋ, ਤવ ਮਚ੍ਛਖਾਦਨੇਨ ਕਮ੍ਮਂ ਨਤ੍ਥਿ, ਆਪਤ੍ਤਿਂ ਕਿਰਸਿ ਆਪਨ੍ਨੋਤਿ। ਸੋ ‘‘ਨਾਤਿਸੁਪਕ੍ਕੋ ਮਚ੍ਛੋ ਮਯ੍ਹਂ ਅਫਾਸੁਕਮਕਾਸਿ, ਭਨ੍ਤੇ’’ਤਿ। ਆવੁਸੋ, ਤੁਯ੍ਹਂ ਫਾਸੁਕੇਨ વਾ ਅਫਾਸੁਕੇਨ વਾ ਕਮ੍ਮਂ ਨਤ੍ਥਿ, ਆਪਤ੍ਤਿਂ ਆਪਨ੍ਨੋਸੀਤਿ। ਭਨ੍ਤੇ, ਯਾવ ਤਤ੍ਥ વਸਿਂ, ਤਾવ ਮੇ ਅਫਾਸੁਕਮੇવ ਜਾਤਨ੍ਤਿ। ਏવਂ ਆਗਨ੍ਤੁਕਕਥਾવਸੇਨ ਬਹਿਦ੍ਧਾ ਕਥਂ ਅਪਨਾਮੇਤੀਤਿ વੇਦਿਤਬ੍ਬਂ।
Aññenaññaṃ paṭicaratīti aññena vacanena aññaṃ paṭicchādeti, aññaṃ vā pucchito aññaṃ katheti. Bahiddhā kathaṃ apanāmetīti āgantukakathaṃ otārento purimakathaṃ bahiddhā apanāmeti. Tatridaṃ vatthu – bhikkhū kira sannipatitvā ekaṃ daharaṃ, ‘‘āvuso, tvaṃ imañcimañca āpattiṃ āpanno’’ti āhaṃsu. So āha – ‘‘bhante, nāgadīpaṃ gatomhī’’ti. Āvuso , na mayaṃ tava nāgadīpagamanena atthikā, āpattiṃ pana āpannoti pucchāmāti. Bhante, nāgadīpaṃ gantvā macche khādinti. Āvuso, tava macchakhādanena kammaṃ natthi, āpattiṃ kirasi āpannoti. So ‘‘nātisupakko maccho mayhaṃ aphāsukamakāsi, bhante’’ti. Āvuso, tuyhaṃ phāsukena vā aphāsukena vā kammaṃ natthi, āpattiṃ āpannosīti. Bhante, yāva tattha vasiṃ, tāva me aphāsukameva jātanti. Evaṃ āgantukakathāvasena bahiddhā kathaṃ apanāmetīti veditabbaṃ.
ਅਭਿਹਰਤੀਤਿ ਇਤੋ ਚਿਤੋ ਚ ਸੁਤ੍ਤਂ ਆਹਰਿਤ੍વਾ ਅવਤ੍ਥਰਤਿ। ਤੇਪਿਟਕਤਿਸ੍ਸਤ੍ਥੇਰੋ વਿਯ। ਪੁਬ੍ਬੇ ਕਿਰ ਭਿਕ੍ਖੂ ਮਹਾਚੇਤਿਯਙ੍ਗਣੇ ਸਨ੍ਨਿਪਤਿਤ੍વਾ ਸਙ੍ਘਕਿਚ੍ਚਂ ਕਤ੍વਾ ਭਿਕ੍ਖੂਨਂ ਓવਾਦਂ ਦਤ੍વਾ ਅਞ੍ਞਮਞ੍ਞਂ ਪਞ੍ਹਸਾਕਚ੍ਛਂ ਕਰੋਨ੍ਤਿ। ਤਤ੍ਥਾਯਂ ਥੇਰੋ ਤੀਹਿ ਪਿਟਕੇਹਿ ਤਤੋ ਤਤੋ ਸੁਤ੍ਤਂ ਆਹਰਿਤ੍વਾ ਦਿવਸਭਾਗੇ ਏਕਮ੍ਪਿ ਪਞ੍ਹਂ ਨਿਟ੍ਠਾਪੇਤੁਂ ਨ ਦੇਤਿ। ਅਭਿਮਦ੍ਦਤੀਤਿ ਕਾਰਣਂ ਆਹਰਿਤ੍વਾ ਮਦ੍ਦਤਿ। ਅਨੁਪਜਗ੍ਘਤੀਤਿ ਪਰੇਨ ਪਞ੍ਹੇ ਪੁਚ੍ਛਿਤੇਪਿ ਕਥਿਤੇਪਿ ਪਾਣਿਂ ਪਹਰਿਤ੍વਾ ਮਹਾਹਸਿਤਂ ਹਸਤਿ, ਯੇਨ ਪਰਸ੍ਸ ‘‘ਅਪੁਚ੍ਛਿਤਬ੍ਬਂ ਨੁ ਖੋ ਪੁਚ੍ਛਿਂ, ਅਕਥੇਤਬ੍ਬਂ ਨੁ ਖੋ ਕਥੇਸਿ’’ਨ੍ਤਿ વਿਮਤਿ ਉਪ੍ਪਜ੍ਜਤਿ। ਖਲਿਤਂ ਗਣ੍ਹਾਤੀਤਿ ਅਪ੍ਪਮਤ੍ਤਕਂ ਮੁਖਦੋਸਮਤ੍ਤਂ ਗਣ੍ਹਾਤਿ , ਅਕ੍ਖਰੇ વਾ ਪਦੇ વਾ ਬ੍ਯਞ੍ਜਨੇ વਾ ਦੁਰੁਤ੍ਤੇ ‘‘ਏવਂ ਨਾਮੇਤਂ વਤ੍ਤਬ੍ਬ’’ਨ੍ਤਿ ਉਜ੍ਝਾਯਮਾਨੋ વਿਚਰਤਿ। ਸਉਪਨਿਸੋਤਿ ਸਉਪਨਿਸ੍ਸਯੋ ਸਪਚ੍ਚਯੋ।
Abhiharatīti ito cito ca suttaṃ āharitvā avattharati. Tepiṭakatissatthero viya. Pubbe kira bhikkhū mahācetiyaṅgaṇe sannipatitvā saṅghakiccaṃ katvā bhikkhūnaṃ ovādaṃ datvā aññamaññaṃ pañhasākacchaṃ karonti. Tatthāyaṃ thero tīhi piṭakehi tato tato suttaṃ āharitvā divasabhāge ekampi pañhaṃ niṭṭhāpetuṃ na deti. Abhimaddatīti kāraṇaṃ āharitvā maddati. Anupajagghatīti parena pañhe pucchitepi kathitepi pāṇiṃ paharitvā mahāhasitaṃ hasati, yena parassa ‘‘apucchitabbaṃ nu kho pucchiṃ, akathetabbaṃ nu kho kathesi’’nti vimati uppajjati. Khalitaṃ gaṇhātīti appamattakaṃ mukhadosamattaṃ gaṇhāti , akkhare vā pade vā byañjane vā durutte ‘‘evaṃ nāmetaṃ vattabba’’nti ujjhāyamāno vicarati. Saupanisoti saupanissayo sapaccayo.
ਓਹਿਤਸੋਤੋਤਿ ਠਪਿਤਸੋਤੋ। ਅਭਿਜਾਨਾਤਿ ਏਕਂ ਧਮ੍ਮਨ੍ਤਿ ਏਕਂ ਕੁਸਲਧਮ੍ਮਂ ਅਭਿਜਾਨਾਤਿ ਅਰਿਯਮਗ੍ਗਂ। ਪਰਿਜਾਨਾਤਿ ਏਕਂ ਧਮ੍ਮਨ੍ਤਿ ਏਕਂ ਦੁਕ੍ਖਸਚ੍ਚਧਮ੍ਮਂ ਤੀਰਣਪਰਿਞ੍ਞਾਯ ਪਰਿਜਾਨਾਤਿ। ਪਜਹਤਿ ਏਕਂ ਧਮ੍ਮਨ੍ਤਿ ਏਕਂ ਸਬ੍ਬਾਕੁਸਲਧਮ੍ਮਂ ਪਜਹਤਿ વਿਨੋਦੇਤਿ ਬ੍ਯਨ੍ਤੀਕਰੋਤਿ। ਸਚ੍ਛਿਕਰੋਤਿ ਏਕਂ ਧਮ੍ਮਨ੍ਤਿ ਏਕਂ ਅਰਹਤ੍ਤਫਲਧਮ੍ਮਂ ਨਿਰੋਧਮੇવ વਾ ਪਚ੍ਚਕ੍ਖਂ ਕਰੋਤਿ। ਸਮ੍ਮਾવਿਮੁਤ੍ਤਿਂ ਫੁਸਤੀਤਿ ਸਮ੍ਮਾ ਹੇਤੁਨਾ ਨਯੇਨ ਕਾਰਣੇਨ ਅਰਹਤ੍ਤਫਲવਿਮੋਕ੍ਖਂ ਞਾਣਫਸ੍ਸੇਨ ਫੁਸਤਿ।
Ohitasototi ṭhapitasoto. Abhijānāti ekaṃ dhammanti ekaṃ kusaladhammaṃ abhijānāti ariyamaggaṃ. Parijānāti ekaṃ dhammanti ekaṃ dukkhasaccadhammaṃ tīraṇapariññāya parijānāti. Pajahati ekaṃ dhammanti ekaṃ sabbākusaladhammaṃ pajahati vinodeti byantīkaroti. Sacchikaroti ekaṃ dhammanti ekaṃ arahattaphaladhammaṃ nirodhameva vā paccakkhaṃ karoti. Sammāvimuttiṃ phusatīti sammā hetunā nayena kāraṇena arahattaphalavimokkhaṃ ñāṇaphassena phusati.
ਏਤਦਤ੍ਥਾ, ਭਿਕ੍ਖવੇ, ਕਥਾਤਿ, ਭਿਕ੍ਖવੇ, ਯਾ ਏਸਾ ਕਥਾਸਮ੍ਪਯੋਗੇਨਾਤਿ ਕਥਾ ਦਸ੍ਸਿਤਾ, ਸਾ ਏਤਦਤ੍ਥਾ, ਅਯਂ ਤਸ੍ਸਾ ਕਥਾਯ ਭੂਮਿ ਪਤਿਟ੍ਠਾ। ਇਦਂ વਤ੍ਥੁ ਯਦਿਦਂ ਅਨੁਪਾਦਾ ਚਿਤ੍ਤਸ੍ਸ વਿਮੋਕ੍ਖੋਤਿ ਏવਂ ਸਬ੍ਬਪਦੇਸੁ ਯੋਜਨਾ વੇਦਿਤਬ੍ਬਾ। ਏਤਦਤ੍ਥਾ ਮਨ੍ਤਨਾਤਿ ਯਾ ਅਯਂ ਕਚ੍ਛਾਕਚ੍ਛੇਸੁ ਪੁਗ੍ਗਲੇਸੁ ਕਚ੍ਛੇਨ ਸਦ੍ਧਿਂ ਮਨ੍ਤਨਾ, ਸਾਪਿ ਏਤਦਤ੍ਥਾਯੇવ। ਏਤਦਤ੍ਥਾ ਉਪਨਿਸਾਤਿ ਓਹਿਤਸੋਤੋ ਸਉਪਨਿਸੋਤਿ ਏવਂ વੁਤ੍ਤਾ ਉਪਨਿਸਾਪਿ ਏਤਦਤ੍ਥਾਯੇવ। ਏਤਦਤ੍ਥਂ ਸੋਤਾવਧਾਨਨ੍ਤਿ ਤਸ੍ਸਾ ਉਪਨਿਸਾਯ ਸੋਤਾવਧਾਨਂ , ਤਮ੍ਪਿ ਏਤਦਤ੍ਥਮੇવ। ਅਨੁਪਾਦਾਤਿ ਚਤੂਹਿ ਉਪਾਦਾਨੇਹਿ ਅਗ੍ਗਹੇਤ੍વਾ। ਚਿਤ੍ਤਸ੍ਸ વਿਮੋਕ੍ਖੋਤਿ ਅਰਹਤ੍ਤਫਲવਿਮੋਕ੍ਖੋ। ਅਰਹਤ੍ਤਫਲਤ੍ਥਾਯ ਹਿ ਸਬ੍ਬਮੇਤਨ੍ਤਿ ਸੁਤ੍ਤਨ੍ਤਂ વਿਨਿવਤ੍ਤੇਤ੍વਾ ਉਪਰਿ ਗਾਥਾਹਿ ਕੂਟਂ ਗਣ੍ਹਨ੍ਤੋ ਯੇ વਿਰੁਦ੍ਧਾਤਿਆਦਿਮਾਹ।
Etadatthā, bhikkhave, kathāti, bhikkhave, yā esā kathāsampayogenāti kathā dassitā, sā etadatthā, ayaṃ tassā kathāya bhūmi patiṭṭhā. Idaṃ vatthu yadidaṃ anupādā cittassa vimokkhoti evaṃ sabbapadesu yojanā veditabbā. Etadatthā mantanāti yā ayaṃ kacchākacchesu puggalesu kacchena saddhiṃ mantanā, sāpi etadatthāyeva. Etadatthā upanisāti ohitasoto saupanisoti evaṃ vuttā upanisāpi etadatthāyeva. Etadatthaṃ sotāvadhānanti tassā upanisāya sotāvadhānaṃ , tampi etadatthameva. Anupādāti catūhi upādānehi aggahetvā. Cittassa vimokkhoti arahattaphalavimokkho. Arahattaphalatthāya hi sabbametanti suttantaṃ vinivattetvā upari gāthāhi kūṭaṃ gaṇhanto ye viruddhātiādimāha.
ਤਤ੍ਥ વਿਰੁਦ੍ਧਾਤਿ વਿਰੋਧਸਙ੍ਖਾਤੇਨ ਕੋਪੇਨ વਿਰੁਦ੍ਧਾ। ਸਲ੍ਲਪਨ੍ਤੀਤਿ ਸਲ੍ਲਾਪਂ ਕਰੋਨ੍ਤਿ। વਿਨਿવਿਟ੍ਠਾਤਿ ਅਭਿਨਿવਿਟ੍ਠਾ ਹੁਤ੍વਾ। ਸਮੁਸ੍ਸਿਤਾਤਿ ਮਾਨੁਸ੍ਸਯੇਨ ਸੁਟ੍ਠੁ ਉਸ੍ਸਿਤਾ। ਅਨਰਿਯਗੁਣਮਾਸਜ੍ਜਾਤਿ ਅਨਰਿਯਗੁਣਕਥਂ ਗੁਣਮਾਸਜ੍ਜ ਕਥੇਨ੍ਤਿ। ਗੁਣਂ ਘਟ੍ਟੇਤ੍વਾ ਕਥਾ ਹਿ ਅਨਰਿਯਕਥਾ ਨਾਮ, ਨ ਅਰਿਯਕਥਾ, ਤਂ ਕਥੇਨ੍ਤੀਤਿ ਅਤ੍ਥੋ। ਅਞ੍ਞੋਞ੍ਞવਿવਰੇਸਿਨੋਤਿ ਅਞ੍ਞਮਞ੍ਞਸ੍ਸ ਛਿਦ੍ਦਂ ਅਪਰਾਧਂ ਗવੇਸਮਾਨਾ। ਦੁਬ੍ਭਾਸਿਤਨ੍ਤਿ ਦੁਕ੍ਕਥਿਤਂ। વਿਕ੍ਖਲਿਤਨ੍ਤਿ ਅਪ੍ਪਮਤ੍ਤਕਂ ਮੁਖਦੋਸਖਲਿਤਂ। ਸਮ੍ਪਮੋਹਂ ਪਰਾਜਯਨ੍ਤਿ ਅਞ੍ਞਮਞ੍ਞਸ੍ਸ ਅਪ੍ਪਮਤ੍ਤੇਨ ਮੁਖਦੋਸੇਨ ਸਮ੍ਪਮੋਹਞ੍ਚ ਪਰਾਜਯਞ੍ਚ। ਅਭਿਨਨ੍ਦਨ੍ਤੀਤਿ ਤੁਸ੍ਸਨ੍ਤਿ। ਨਾਚਰੇਤਿ ਨ ਚਰਤਿ ਨ ਕਥੇਤਿ। ਧਮ੍ਮਟ੍ਠਪਟਿਸਂਯੁਤ੍ਤਾਤਿ ਯਾ ਚ ਧਮ੍ਮੇ ਠਿਤੇਨ ਕਥਿਤਕਥਾ, ਸਾ ਧਮ੍ਮਟ੍ਠਾ ਚੇવ ਹੋਤਿ ਤੇਨ ਚ ਧਮ੍ਮੇਨ ਪਟਿਸਂਯੁਤ੍ਤਾਤਿ ਧਮ੍ਮਟ੍ਠਪਟਿਸਂਯੁਤ੍ਤਾ। ਅਨੁਨ੍ਨਤੇਨ ਮਨਸਾਤਿ ਅਨੁਦ੍ਧਤੇਨ ਚੇਤਸਾ। ਅਪਲ਼ਾਸੋਤਿ ਯੁਗਗ੍ਗਾਹਪਲ਼ਾਸવਸੇਨ ਅਪਲ਼ਾਸੋ ਹੁਤ੍વਾ। ਅਸਾਹਸੋਤਿ ਰਾਗਦੋਸਮੋਹਸਾਹਸਾਨਂ વਸੇਨ ਅਸਾਹਸੋ ਹੁਤ੍વਾ।
Tattha viruddhāti virodhasaṅkhātena kopena viruddhā. Sallapantīti sallāpaṃ karonti. Viniviṭṭhāti abhiniviṭṭhā hutvā. Samussitāti mānussayena suṭṭhu ussitā. Anariyaguṇamāsajjāti anariyaguṇakathaṃ guṇamāsajja kathenti. Guṇaṃ ghaṭṭetvā kathā hi anariyakathā nāma, na ariyakathā, taṃ kathentīti attho. Aññoññavivaresinoti aññamaññassa chiddaṃ aparādhaṃ gavesamānā. Dubbhāsitanti dukkathitaṃ. Vikkhalitanti appamattakaṃ mukhadosakhalitaṃ. Sampamohaṃ parājayanti aññamaññassa appamattena mukhadosena sampamohañca parājayañca. Abhinandantīti tussanti. Nācareti na carati na katheti. Dhammaṭṭhapaṭisaṃyuttāti yā ca dhamme ṭhitena kathitakathā, sā dhammaṭṭhā ceva hoti tena ca dhammena paṭisaṃyuttāti dhammaṭṭhapaṭisaṃyuttā. Anunnatena manasāti anuddhatena cetasā. Apaḷāsoti yugaggāhapaḷāsavasena apaḷāso hutvā. Asāhasoti rāgadosamohasāhasānaṃ vasena asāhaso hutvā.
ਅਨੁਸੂਯਾਯਮਾਨੋਤਿ ਨ ਉਸੂਯਮਾਨੋ। ਦੁਬ੍ਭਟ੍ਠੇ ਨਾਪਸਾਦਯੇਤਿ ਦੁਕ੍ਕਥਿਤਸ੍ਮਿਂ ਨ ਅਪਸਾਦੇਯ੍ਯ। ਉਪਾਰਮ੍ਭਂ ਨ ਸਿਕ੍ਖੇਯ੍ਯਾਤਿ ਕਾਰਣੁਤ੍ਤਰਿਯਲਕ੍ਖਣਂ ਉਪਾਰਮ੍ਭਂ ਨ ਸਿਕ੍ਖੇਯ੍ਯ। ਖਲਿਤਞ੍ਚ ਨ ਗਾਹਯੇਤਿ ਅਪ੍ਪਮਤ੍ਤਕਂ ਮੁਖਖਲਿਤਂ ‘‘ਅਯਂ ਤੇ ਦੋਸੋ’’ਤਿ ਨ ਗਾਹਯੇਯ੍ਯ। ਨਾਭਿਹਰੇਤਿ ਨਾવਤ੍ਥਰੇਯ੍ਯ। ਨਾਭਿਮਦ੍ਦੇਤਿ ਏਕਂ ਕਾਰਣਂ ਆਹਰਿਤ੍વਾ ਨ ਮਦ੍ਦੇਯ੍ਯ। ਨ વਾਚਂ ਪਯੁਤਂ ਭਣੇਤਿ ਸਚ੍ਚਾਲਿਕਪਟਿਸਂਯੁਤ੍ਤਂ વਾਚਂ ਨ ਭਣੇਯ੍ਯ। ਅਞ੍ਞਾਤਤ੍ਥਨ੍ਤਿ ਜਾਨਨਤ੍ਥਂ। ਪਸਾਦਤ੍ਥਨ੍ਤਿ ਪਸਾਦਜਨਨਤ੍ਥਂ। ਨ ਸਮੁਸ੍ਸੇਯ੍ਯ ਮਨ੍ਤਯੇਤਿ ਨ ਮਾਨੁਸ੍ਸਯੇਨ ਸਮੁਸ੍ਸਿਤੋ ਭવੇਯ੍ਯ। ਨ ਹਿ ਮਾਨੁਸ੍ਸਿਤਾ ਹੁਤ੍વਾ ਪਣ੍ਡਿਤਾ ਕਥਯਨ੍ਤਿ, ਮਾਨੇਨ ਪਨ ਅਨੁਸ੍ਸਿਤੋવ ਹੁਤ੍વਾ ਮਨ੍ਤਯੇ ਕਥੇਯ੍ਯ ਭਾਸੇਯ੍ਯਾਤਿ।
Anusūyāyamānoti na usūyamāno. Dubbhaṭṭhe nāpasādayeti dukkathitasmiṃ na apasādeyya. Upārambhaṃ na sikkheyyāti kāraṇuttariyalakkhaṇaṃ upārambhaṃ na sikkheyya. Khalitañca na gāhayeti appamattakaṃ mukhakhalitaṃ ‘‘ayaṃ te doso’’ti na gāhayeyya. Nābhihareti nāvatthareyya. Nābhimaddeti ekaṃ kāraṇaṃ āharitvā na maddeyya. Navācaṃ payutaṃ bhaṇeti saccālikapaṭisaṃyuttaṃ vācaṃ na bhaṇeyya. Aññātatthanti jānanatthaṃ. Pasādatthanti pasādajananatthaṃ. Na samusseyya mantayeti na mānussayena samussito bhaveyya. Na hi mānussitā hutvā paṇḍitā kathayanti, mānena pana anussitova hutvā mantaye katheyya bhāseyyāti.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੭. ਕਥਾવਤ੍ਥੁਸੁਤ੍ਤਂ • 7. Kathāvatthusuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੭. ਕਥਾવਤ੍ਥੁਸੁਤ੍ਤવਣ੍ਣਨਾ • 7. Kathāvatthusuttavaṇṇanā
