| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
কথিনভেদং
Kathinabhedaṃ
কথিনঅত্থতাদিৰণ্ণনা
Kathinaatthatādivaṇṇanā
৪০৩. কথিনে খন্ধকেতি কথিনক্খন্ধকে। পুব্বেতি কথিনক্খন্ধকে।
403.Kathinekhandhaketi kathinakkhandhake. Pubbeti kathinakkhandhake.
৪০৪. পযোগস্সাতি এত্থ পযোগো নাম কোতি আহ ‘‘চীৰরধোৰনাদিনো’’তিআদি। এত্থ আদিসদ্দেন ৰিচারণছেদনবদ্ধনসিব্বনরজনকপ্পবিন্দুআদিযনানি ছ পুব্বকরণানি সঙ্গণ্হাতি। উদকাহরণাদিকো যো পযোগো করীযতীতি যোজনা। অনন্তরো নাম অতীতানন্তরঅনাগতানন্তরৰসেন দুৰিধো, ইধ অনাগতানন্তরোযেৰ অধিপ্পেতোতি আহ ‘‘অনাগতৰসেনা’’তি। উদকাহরণাদিপযোগে হি উপ্পন্নে পচ্ছা ধোৰনাদিপুব্বকরণস্স উপ্পত্তিতো তপ্পযোগস্স অনাগতৰসেনেৰ পচ্চযো। সমনন্তরপচ্চযেনাতি এত্থ সংসদ্দো সুট্ঠুঅত্থোতি আহ ‘‘সুট্ঠু অনন্তরপচ্চযেনা’’তি। ‘‘আসন্নতর’’ন্তি ইমিনা সুট্ঠুভাৰং দস্সেতি। ‘‘পযোগস্সা’’তি পদং ‘‘আধারভাৰ’’ন্তি পদে সামী, ‘‘পচ্চযা হোন্তী’’তি পদে সম্পদানং। ‘‘নিস্সয’’ন্তি পদং ‘‘আধারভাৰ’’ন্তি পদেন সংৰণ্ণেতি। ‘‘উপেতেনা’’তি ইমিনা উপসদ্দস্স উপগমনত্থং দস্সেতি, বলৰত্থং পটিক্খিপতি। পঠমন্তি পযোগতো, পযোগস্স ৰা তাৰ। ইমিনা পুরেজাতপচ্চযেনাতি এত্থ পুরেসদ্দো পঠমত্থোতি দস্সেতি। পচ্ছাতি পযোগতো, পযোগস্স ৰা পরং। অপুব্বং অচরিমন্তি একপহারেন। ইমিনা সহজাতসদ্দস্স অত্থং দস্সেতি।
404.Payogassāti ettha payogo nāma koti āha ‘‘cīvaradhovanādino’’tiādi. Ettha ādisaddena vicāraṇachedanabaddhanasibbanarajanakappabinduādiyanāni cha pubbakaraṇāni saṅgaṇhāti. Udakāharaṇādiko yo payogo karīyatīti yojanā. Anantaro nāma atītānantaraanāgatānantaravasena duvidho, idha anāgatānantaroyeva adhippetoti āha ‘‘anāgatavasenā’’ti. Udakāharaṇādipayoge hi uppanne pacchā dhovanādipubbakaraṇassa uppattito tappayogassa anāgatavaseneva paccayo. Samanantarapaccayenāti ettha saṃsaddo suṭṭhuatthoti āha ‘‘suṭṭhu anantarapaccayenā’’ti. ‘‘Āsannatara’’nti iminā suṭṭhubhāvaṃ dasseti. ‘‘Payogassā’’ti padaṃ ‘‘ādhārabhāva’’nti pade sāmī, ‘‘paccayā hontī’’ti pade sampadānaṃ. ‘‘Nissaya’’nti padaṃ ‘‘ādhārabhāva’’nti padena saṃvaṇṇeti. ‘‘Upetenā’’ti iminā upasaddassa upagamanatthaṃ dasseti, balavatthaṃ paṭikkhipati. Paṭhamanti payogato, payogassa vā tāva. Iminā purejātapaccayenāti ettha puresaddo paṭhamatthoti dasseti. Pacchāti payogato, payogassa vā paraṃ. Apubbaṃ acarimanti ekapahārena. Iminā sahajātasaddassa atthaṃ dasseti.
এৰং পুচ্ছিত্ৰাতি সম্বন্ধো। যন্তি ধম্মজাতং। ইদানি আহাতি সম্বন্ধো। যস্সাতি পযোগাদিকস্স। তদেৰাতি ধম্মজাতমেৰ। তস্সাতি ‘‘পুব্বকরণং পযোগস্সা’’তিআদিৰচনস্স অত্থো এৰং ৰেদিতব্বোতি যোজনা। ‘‘পযোগস্স কতমে ধম্মা’’তিআদি যং ৰচনং ৰুত্তং, তত্থ ৰিস্সজ্জনং মযা ৰুচ্চতেতি যোজনা। ইমিনা পাল়িযং অজ্ঝাহরিত্ৰা যোজেতব্বভাৰং দস্সেতি। চতূহি পচ্চযেহি পচ্চযাকারং ৰিত্থারেন্তো আহ ‘‘পযোগস্স হী’’তিআদি। পযোগস্স পুব্বকরণং পচ্চযো হোতীতি সম্বন্ধো। উদ্দিট্ঠধম্মেসূতি ‘‘অনন্তরপচ্চযেন পচ্চযো’’তিআদিনা উদ্দিট্ঠেসু ধম্মেসু পুরেজাতপচ্চযো পনেসাতি সম্বন্ধো। অথ ৰা উদ্দিট্ঠধম্মেসূতি পুব্বকরণৰসেন উদ্দিট্ঠেসু ধোৰনাদিধম্মেসু একধম্মম্পীতি সম্বন্ধো। ন লভতীতি উদকাহরণাদিপযোগস্স পুব্বে ন লভতি। অযন্তি উদকাহরণাদিপযোগো। পচ্ছাজাতপচ্চযং পন লভতীতি উদকাহরণাদিপযোগো পচ্ছাজাতপচ্চযং লভতি। কস্মা লভতীতি আহ ‘‘পচ্ছা উপ্পজ্জনকস্স হী’’তিআদি। পচ্ছাতি পযোগস্স, পযোগতো ৰা পরং। হি যস্মা কযিরতি, তস্মা লভতীতি যোজনা। সহজাতপচ্চযং পন ন লভতীতি সম্বন্ধো। মাতিকাপলিবোধানিসংসসঙ্খাতেতি অট্ঠমাতিকাদ্ৰেপলিবোধপঞ্চানিসংসসঙ্খাতে। অঞ্ঞোতি পন্নরসহি ধম্মেহি অঞ্ঞো। পযোগাদীসূতিআদিসদ্দেন পুব্বকরণপচ্চুদ্ধারঅধিট্ঠানানি সঙ্গণ্হাতি। এতেনুপাযেনাতি এতেন যথাৰুত্তউপাযেন।
Evaṃ pucchitvāti sambandho. Yanti dhammajātaṃ. Idāni āhāti sambandho. Yassāti payogādikassa. Tadevāti dhammajātameva. Tassāti ‘‘pubbakaraṇaṃ payogassā’’tiādivacanassa attho evaṃ veditabboti yojanā. ‘‘Payogassa katame dhammā’’tiādi yaṃ vacanaṃ vuttaṃ, tattha vissajjanaṃ mayā vuccateti yojanā. Iminā pāḷiyaṃ ajjhāharitvā yojetabbabhāvaṃ dasseti. Catūhi paccayehi paccayākāraṃ vitthārento āha ‘‘payogassa hī’’tiādi. Payogassa pubbakaraṇaṃ paccayo hotīti sambandho. Uddiṭṭhadhammesūti ‘‘anantarapaccayena paccayo’’tiādinā uddiṭṭhesu dhammesu purejātapaccayo panesāti sambandho. Atha vā uddiṭṭhadhammesūti pubbakaraṇavasena uddiṭṭhesu dhovanādidhammesu ekadhammampīti sambandho. Na labhatīti udakāharaṇādipayogassa pubbe na labhati. Ayanti udakāharaṇādipayogo. Pacchājātapaccayaṃ pana labhatīti udakāharaṇādipayogo pacchājātapaccayaṃ labhati. Kasmā labhatīti āha ‘‘pacchā uppajjanakassa hī’’tiādi. Pacchāti payogassa, payogato vā paraṃ. Hi yasmā kayirati, tasmā labhatīti yojanā. Sahajātapaccayaṃ pana na labhatīti sambandho. Mātikāpalibodhānisaṃsasaṅkhāteti aṭṭhamātikādvepalibodhapañcānisaṃsasaṅkhāte. Aññoti pannarasahi dhammehi añño. Payogādīsūtiādisaddena pubbakaraṇapaccuddhāraadhiṭṭhānāni saṅgaṇhāti. Etenupāyenāti etena yathāvuttaupāyena.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi
১. কথিনঅত্থতাদি • 1. Kathinaatthatādi
২. কথিনঅনন্তরপচ্চযাদি • 2. Kathinaanantarapaccayādi
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / কথিনঅত্থতাদিৰণ্ণনা • Kathinaatthatādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / কথিনভেদৰণ্ণনা • Kathinabhedavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / কথিনঅত্থতাদিৰণ্ণনা • Kathinaatthatādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / কথিনঅত্থতাদিৰণ্ণনা • Kathinaatthatādivaṇṇanā
