| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
কথিনভেদং
Kathinabhedaṃ
কথিনঅত্থতাদিৰণ্ণনা
Kathinaatthatādivaṇṇanā
৪০৪. কথিনে অনাগতৰসেনাতি উদকাহরণাদিপযোগে উপ্পন্নে পচ্ছা ধোৰনাদিপুব্বকরণস্স উপ্পত্তিতো তপ্পযোগস্স অনাগতৰসেনেৰ অনন্তরপচ্চযো। পচ্চযত্তঞ্চস্স কারিযভূতস্স যস্মা নিপ্ফাদেতব্বতং নিস্সায পচ্চযা পৰত্তা, ন ৰিনা তেন, তস্মা তেন পরিযাযেন ৰুত্তং, ন সভাৰতো সব্বত্থ। তেনাহ ‘‘পযোগস্স হী’’তিআদি। তত্থ পযোগস্স সত্তৰিধম্পি পুব্বকরণং পচ্চযো হোতীতি সম্বন্ধো। কারণমাহ ‘‘যস্মা’’তিআদি। পুব্বকরণস্সত্থাযাতি পুব্বকরণস্স নিপ্ফাদনত্থায। পুরেজাতপচ্চযেতি পুরেজাতপচ্চযস্স ৰিসযে। এসাতি পযোগো। ধোৰনাদিধম্মেসু একম্পি অত্তনো পুরেজাতপচ্চযভূতং ধম্মং ন লভতি, অত্তনো উপ্পত্তিতো পুরেজাতস্স পুব্বকরণস্স অভাৰাতি অত্থো। লভতীতি পচ্ছাজাতপচ্চযং পুব্বকরণং লভতি, পচ্ছাজাতপচ্চযো হোতীতি অত্থো।
404. Kathine anāgatavasenāti udakāharaṇādipayoge uppanne pacchā dhovanādipubbakaraṇassa uppattito tappayogassa anāgatavaseneva anantarapaccayo. Paccayattañcassa kāriyabhūtassa yasmā nipphādetabbataṃ nissāya paccayā pavattā, na vinā tena, tasmā tena pariyāyena vuttaṃ, na sabhāvato sabbattha. Tenāha ‘‘payogassa hī’’tiādi. Tattha payogassa sattavidhampi pubbakaraṇaṃ paccayo hotīti sambandho. Kāraṇamāha ‘‘yasmā’’tiādi. Pubbakaraṇassatthāyāti pubbakaraṇassa nipphādanatthāya. Purejātapaccayeti purejātapaccayassa visaye. Esāti payogo. Dhovanādidhammesu ekampi attano purejātapaccayabhūtaṃ dhammaṃ na labhati, attano uppattito purejātassa pubbakaraṇassa abhāvāti attho. Labhatīti pacchājātapaccayaṃ pubbakaraṇaṃ labhati, pacchājātapaccayo hotīti attho.
পাল়িযং পন্নরস ধম্মা সহজাতপচ্চযেন পচ্চযোতি এত্থ পুব্বকরণস্সাতি ৰা পযোগস্সাতি ৰা অঞ্ঞস্স কস্সচি পচ্চযুপ্পন্নস্স অপরামট্ঠত্তা পন্নরস ধম্মা সযং অঞ্ঞমঞ্ঞসহজাতপচ্চযেন পচ্চযোতি এৰমত্থো গহেতব্বো, তেহি সহ উপ্পজ্জনকস্স অঞ্ঞস্স অভাৰা। এৰং উপরি সব্বত্থ। তেনাহ ‘‘সহজাতপচ্চযং পনা’’তিআদি। মাতিকা চ পলিবোধা চাতি এত্থ চ-সদ্দেন পঞ্চানিসংসানি গহিতানীতি দট্ঠব্বং। এৰং মাতিকানঞ্চ পলিবোধানঞ্চাতি এত্থাপি। তেহিপি অত্থো অনন্তরমেৰ মাতিকাদীহি সহ জাযন্তি। তেনেৰ ‘‘পন্নরস ধম্মা সহজাতপচ্চযেন পচ্চযো’’তি ৰুত্তা। আসাতি চীৰরাসা। ৰত্থূতি আসায নিমিত্তভূতং অনুপ্পন্নচীৰরং। ‘‘দস্সাম করিস্সামা’’তি হি দাযকেহি পটিঞ্ঞাতচীৰরং নিস্সায অনন্তরং উপ্পজ্জমানা চীৰরাসা অনন্তরপচ্চযাদিভাৰেন ৰুত্তা। আসানঞ্চ অনাসানঞ্চাতি লব্ভমানকচীৰরে উপ্পজ্জনকচীৰরাসানঞ্চেৰ অলব্ভমানে চীৰরে উপ্পজ্জনকঅনাসানঞ্চ, আসানং, তব্বিগমানঞ্চাতি অত্থো। খণে খণে উপ্পত্তিভেদং সন্ধায ‘‘আসান’’ন্তি বহুৰচনং কতং, আসায , অনাসায চাতি অত্থো। তেনাহ ‘‘আসা চ অনাসা চা’’তি।
Pāḷiyaṃ pannarasa dhammā sahajātapaccayena paccayoti ettha pubbakaraṇassāti vā payogassāti vā aññassa kassaci paccayuppannassa aparāmaṭṭhattā pannarasa dhammā sayaṃ aññamaññasahajātapaccayena paccayoti evamattho gahetabbo, tehi saha uppajjanakassa aññassa abhāvā. Evaṃ upari sabbattha. Tenāha ‘‘sahajātapaccayaṃ panā’’tiādi. Mātikā ca palibodhā cāti ettha ca-saddena pañcānisaṃsāni gahitānīti daṭṭhabbaṃ. Evaṃ mātikānañca palibodhānañcāti etthāpi. Tehipi attho anantarameva mātikādīhi saha jāyanti. Teneva ‘‘pannarasa dhammā sahajātapaccayena paccayo’’ti vuttā. Āsāti cīvarāsā. Vatthūti āsāya nimittabhūtaṃ anuppannacīvaraṃ. ‘‘Dassāma karissāmā’’ti hi dāyakehi paṭiññātacīvaraṃ nissāya anantaraṃ uppajjamānā cīvarāsā anantarapaccayādibhāvena vuttā. Āsānañca anāsānañcāti labbhamānakacīvare uppajjanakacīvarāsānañceva alabbhamāne cīvare uppajjanakaanāsānañca, āsānaṃ, tabbigamānañcāti attho. Khaṇe khaṇe uppattibhedaṃ sandhāya ‘‘āsāna’’nti bahuvacanaṃ kataṃ, āsāya , anāsāya cāti attho. Tenāha ‘‘āsā ca anāsā cā’’ti.
কথিনঅত্থতাদিৰণ্ণনা নিট্ঠিতা।
Kathinaatthatādivaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ২. কথিনঅনন্তরপচ্চযাদি • 2. Kathinaanantarapaccayādi
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / কথিনঅত্থতাদিৰণ্ণনা • Kathinaatthatādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / কথিনভেদৰণ্ণনা • Kathinabhedavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / কথিনঅত্থতাদিৰণ্ণনা • Kathinaatthatādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / কথিনঅত্থতাদিৰণ্ণনা • Kathinaatthatādivaṇṇanā
