| Library / Tipiṭaka / ติปิฎก • Tipiṭaka / วิมติวิโนทนี-ฎีกา • Vimativinodanī-ṭīkā |
กถินาทิชานิตพฺพวิภาควณฺณนา
Kathinādijānitabbavibhāgavaṇṇanā
๔๑๒. เยสุ รูปาทิธเมฺมสูติ ‘‘ปุริมวสฺสํวุตฺถา ภิกฺขู, ปญฺจหิ อนูโน สโงฺฆ, จีวรมาโส, ธเมฺมน สเมน สมุปฺปนฺนํ จีวร’’นฺติ เอวมาทีสุ เยสุ รูปารูปธเมฺมสุฯ สตีติ สเนฺตสุฯ มิสฺสีภาโวติ สํสคฺคตา สมูหปญฺญตฺติมตฺตํฯ เตนาห ‘‘น ปรมตฺถโต เอโก ธโมฺม อตฺถี’’ติฯ
412.Yesurūpādidhammesūti ‘‘purimavassaṃvutthā bhikkhū, pañcahi anūno saṅgho, cīvaramāso, dhammena samena samuppannaṃ cīvara’’nti evamādīsu yesu rūpārūpadhammesu. Satīti santesu. Missībhāvoti saṃsaggatā samūhapaññattimattaṃ. Tenāha ‘‘na paramatthato eko dhammo atthī’’ti.
๔๑๖. เอกโต อุปฺปชฺชนฺตีติ กถินุทฺธาเรน สห อุปฺปชฺชมานารหา โหนฺตีติ อโตฺถฯ กถินตฺถารโต หิ ปภุติ สเพฺพ กถินุทฺธารา ตํ ตํ การณนฺตรมาคมฺม อุปฺปชฺชนฺติ, ตสฺมา สเพฺพ เอกุปฺปาทา นาม ชาตาฯ เตสุ อนฺตรุพฺภารสหุพฺภารา เทฺว เอว ตํ วิหารํ อนตฺถตกถินวิหารสทิสํ กโรนฺตา สยํ สกเลน กถินตฺถาเรน สห นิรุชฺฌนฺติ อุทฺธารภาวํ ปาปุณนฺติ ฯ อวเสสา ปน ตํ ตํ ปาฎิปุคฺคลิกเมว กถินตฺถารํ ทฺวินฺนํ ปลิโพธานํ อุปจฺฉินฺทนวเสน นิโรเธนฺตา สยํ อุทฺธารภาวํ ปาปุณนฺติ, น สกลํ กถินตฺถารํฯ กถินุทฺธารานญฺจ นิโรโธ นาม ตํ ตํ การณมาคมฺม อุทฺธารภาวปฺปตฺติ, เอวญฺจ อุปฺปตฺติ นาม กถินุทฺธาโร เอวฯ เตนาห ‘‘สเพฺพปิ อตฺถาเรน สทฺธิํ เอกโต อุปฺปชฺชนฺตี’’ติอาทิฯ ตตฺถ ปุริมา เทฺวติ ‘‘เอกุปฺปาทา เอกนิโรธา’’ติ ปาฬิยํ ปฐมํ วุตฺตา อนฺตรุพฺภารสหุพฺภารา เทฺวฯ เตสูติ ปกฺกมนนฺติกาทีสุฯ อุทฺธารภาวํ ปเตฺตสูติ อุทฺธารภาวปฺปตฺติสงฺขาตนิโรธํ ปเตฺตสูติ อโตฺถฯ อตฺถาโร ติฎฺฐตีติ กตจีวรํ อาทาย ปกฺกนฺตาทิปุคฺคลํ ฐเปตฺวา ตทวเสสานํ ปลิโพธสพฺภาวโต กถินตฺถาโร ติฎฺฐติฯ
416.Ekato uppajjantīti kathinuddhārena saha uppajjamānārahā hontīti attho. Kathinatthārato hi pabhuti sabbe kathinuddhārā taṃ taṃ kāraṇantaramāgamma uppajjanti, tasmā sabbe ekuppādā nāma jātā. Tesu antarubbhārasahubbhārā dve eva taṃ vihāraṃ anatthatakathinavihārasadisaṃ karontā sayaṃ sakalena kathinatthārena saha nirujjhanti uddhārabhāvaṃ pāpuṇanti . Avasesā pana taṃ taṃ pāṭipuggalikameva kathinatthāraṃ dvinnaṃ palibodhānaṃ upacchindanavasena nirodhentā sayaṃ uddhārabhāvaṃ pāpuṇanti, na sakalaṃ kathinatthāraṃ. Kathinuddhārānañca nirodho nāma taṃ taṃ kāraṇamāgamma uddhārabhāvappatti, evañca uppatti nāma kathinuddhāro eva. Tenāha ‘‘sabbepi atthārena saddhiṃ ekato uppajjantī’’tiādi. Tattha purimā dveti ‘‘ekuppādā ekanirodhā’’ti pāḷiyaṃ paṭhamaṃ vuttā antarubbhārasahubbhārā dve. Tesūti pakkamanantikādīsu. Uddhārabhāvaṃ pattesūti uddhārabhāvappattisaṅkhātanirodhaṃ pattesūti attho. Atthāro tiṭṭhatīti katacīvaraṃ ādāya pakkantādipuggalaṃ ṭhapetvā tadavasesānaṃ palibodhasabbhāvato kathinatthāro tiṭṭhati.
กถินาทิชานิตพฺพวิภาควณฺณนา นิฎฺฐิตาฯ
Kathinādijānitabbavibhāgavaṇṇanā niṭṭhitā.
ปญฺญตฺติวคฺควณฺณนานโย นิฎฺฐิโตฯ
Paññattivaggavaṇṇanānayo niṭṭhito.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / ปริวารปาฬิ • Parivārapāḷi
๔. กถินาทิชานิตพฺพวิภาโค • 4. Kathinādijānitabbavibhāgo
๖. ปลิโพธปญฺหาพฺยากรณํ • 6. Palibodhapañhābyākaraṇaṃ
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / ปริวาร-อฎฺฐกถา • Parivāra-aṭṭhakathā / กถินาทิชานิตพฺพวิภาควณฺณนา • Kathinādijānitabbavibhāgavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / กถินเภทวณฺณนา • Kathinabhedavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā
กถินาทิชานิตพฺพวิภาควณฺณนา • Kathinādijānitabbavibhāgavaṇṇanā
ปลิโพธปญฺหาพฺยากรณกถาวณฺณนา • Palibodhapañhābyākaraṇakathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / กถินาทิชานิตพฺพวิภาควณฺณนา • Kathinādijānitabbavibhāgavaṇṇanā
