| Library / Tipiṭaka / တိပိဋက • Tipiṭaka / ပရိဝာရ-အဋ္ဌကထာ • Parivāra-aṭṭhakathā |
ကထိနာဒိဇာနိတဗ္ဗဝိဘာဂဝဏ္ဏနာ
Kathinādijānitabbavibhāgavaṇṇanā
၄၁၂. ကထိနံ ဇာနိတဗ္ဗန္တိအာဒိပုစ္ဆာယ ဝိသ္သဇ္ဇနေ – တေသညေဝ ဓမ္မာနန္တိ ယေသု ရူပာဒိဓမ္မေသု သတိ ကထိနံ နာမ ဟောတိ, တေသံ သမောဓာနံ မိသ္သီဘာဝော။ နာမံ နာမကမ္မန္တိအာဒိနာ ပန ‘‘ကထိန’’န္တိ ဣဒံ ဗဟူသု ဓမ္မေသု နာမမတ္တံ, န ပရမတ္ထတော ဧကော ဓမ္မော အတ္ထီတိ ဒသ္သေတိ။
412. Kathinaṃ jānitabbantiādipucchāya vissajjane – tesaññeva dhammānanti yesu rūpādidhammesu sati kathinaṃ nāma hoti, tesaṃ samodhānaṃ missībhāvo. Nāmaṃ nāmakammantiādinā pana ‘‘kathina’’nti idaṃ bahūsu dhammesu nāmamattaṃ, na paramatthato eko dhammo atthīti dasseti.
စတုဝီသတိယာ အာကာရေဟီတိ ‘‘န ဥလ္လိခိတမတ္တေနာ’’တိအာဒီဟိ ပုဗ္ဗေ ဝုတ္တကာရဏေဟိ။ သတ္တရသဟိ အာကာရေဟီတိ ‘‘အဟတေန အတ္ထတံ ဟောတိ ကထိန’’န္တိအာဒီဟိ ပုဗ္ဗေ ဝုတ္တကာရဏေဟိ။ နိမိတ္တကမ္မာဒီသု ယံ ဝတ္တဗ္ဗံ သဗ္ဗံ ကထိနက္ခန္ဓကဝဏ္ဏနာယံ ဝုတ္တံ။
Catuvīsatiyā ākārehīti ‘‘na ullikhitamattenā’’tiādīhi pubbe vuttakāraṇehi. Sattarasahi ākārehīti ‘‘ahatena atthataṃ hoti kathina’’ntiādīhi pubbe vuttakāraṇehi. Nimittakammādīsu yaṃ vattabbaṃ sabbaṃ kathinakkhandhakavaṇṇanāyaṃ vuttaṃ.
၄၁၆. ဧကုပ္ပာဒာ ဧကနိရောဓာတိ ဥပ္ပဇ္ဇမာနာပိ ဧကတော ဥပ္ပဇ္ဇန္တိ, နိရုဇ္ဈမာနာပိ ဧကတော နိရုဇ္ဈန္တိ။ ဧကုပ္ပာဒာ နာနာနိရောဓာတိ ဥပ္ပဇ္ဇမာနာ ဧကတော ဥပ္ပဇ္ဇန္တိ, နိရုဇ္ဈမာနာ နာနာ နိရုဇ္ဈန္တိ။ ကိံ ဝုတ္တံ ဟောတိ ? သဗ္ဗေပိ အတ္ထာရေန သဒ္ဓိံ ဧကတော ဥပ္ပဇ္ဇန္တိ, အတ္ထာရေ ဟိ သတိ ဥဒ္ဓာရော နာမ။ နိရုဇ္ဈမာနာ ပနေတ္ထ ပုရိမာ ဒ္ဝေ အတ္ထာရေန သဒ္ဓိံ ဧကတော နိရုဇ္ဈန္တိ, ဥဒ္ဓာရဘာဝံ ပာပုဏန္တိ။ အတ္ထာရသ္သ ဟိ နိရောဓော ဧတေသဉ္စ ဥဒ္ဓာရဘာဝော ဧကက္ခဏေ ဟောတိ, ဣတရေ နာနာ နိရုဇ္ဈန္တိ။ တေသု ဥဒ္ဓာရဘာဝံ ပတ္တေသုပိ အတ္ထာရော တိဋ္ဌတိယေဝ။ သေသံ သဗ္ဗတ္ထ ဥတ္တာနမေဝာတိ။
416.Ekuppādā ekanirodhāti uppajjamānāpi ekato uppajjanti, nirujjhamānāpi ekato nirujjhanti. Ekuppādā nānānirodhāti uppajjamānā ekato uppajjanti, nirujjhamānā nānā nirujjhanti. Kiṃ vuttaṃ hoti ? Sabbepi atthārena saddhiṃ ekato uppajjanti, atthāre hi sati uddhāro nāma. Nirujjhamānā panettha purimā dve atthārena saddhiṃ ekato nirujjhanti, uddhārabhāvaṃ pāpuṇanti. Atthārassa hi nirodho etesañca uddhārabhāvo ekakkhaṇe hoti, itare nānā nirujjhanti. Tesu uddhārabhāvaṃ pattesupi atthāro tiṭṭhatiyeva. Sesaṃ sabbattha uttānamevāti.
သမန္တပာသာဒိကာယ ဝိနယသံဝဏ္ဏနာယ
Samantapāsādikāya vinayasaṃvaṇṇanāya
ကထိနဘေဒဝဏ္ဏနာ နိဋ္ဌိတာ။
Kathinabhedavaṇṇanā niṭṭhitā.
ပညတ္တိဝဂ္ဂဝဏ္ဏနာ နိဋ္ဌိတာ။
Paññattivaggavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / ပရိဝာရပာဠိ • Parivārapāḷi
၄. ကထိနာဒိဇာနိတဗ္ဗဝိဘာဂော • 4. Kathinādijānitabbavibhāgo
၆. ပလိဗောဓပဉ္ဟာဗ္ယာကရဏံ • 6. Palibodhapañhābyākaraṇaṃ
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ကထိနဘေဒဝဏ္ဏနာ • Kathinabhedavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā
ကထိနာဒိဇာနိတဗ္ဗဝိဘာဂဝဏ္ဏနာ • Kathinādijānitabbavibhāgavaṇṇanā
ပလိဗောဓပဉ္ဟာဗ္ယာကရဏကထာဝဏ္ဏနာ • Palibodhapañhābyākaraṇakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ကထိနာဒိဇာနိတဗ္ဗဝိဘာဂဝဏ္ဏနာ • Kathinādijānitabbavibhāgavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ကထိနာဒိဇာနိတဗ္ဗဝိဘာဂဝဏ္ဏနာ • Kathinādijānitabbavibhāgavaṇṇanā
