| Library / Tipiṭaka / திபிடக • Tipiṭaka / வினயவினிச்ச²ய-டீகா • Vinayavinicchaya-ṭīkā |
கதி²னக்க²ந்த⁴ககதா²வண்ணனா
Kathinakkhandhakakathāvaṇṇanā
2697. வுத்த²வஸ்ஸானங் புரிமிகாய வஸ்ஸங் உபக³ந்த்வா யாவ மஹாபவாரணா, தாவ ரத்திச்சே²த³ங் அகத்வா வுத்த²வஸ்ஸானங் பி⁴க்கூ²னங் ஏகஸ்ஸ வா த்³வின்னங் திண்ணங் சதுன்னங் பஞ்சன்னங் அதிரேகானங் வா பி⁴க்கூ²னங் பஞ்சன்னங் ஆனிஸங்ஸானங் வக்க²மானானங் அனாமந்தசாராதீ³னங் பஞ்சன்னங் ஆனிஸங்ஸானங் படிலாப⁴காரணா முனிபுங்க³வோ ஸப்³பே³ஸங் அகா³ரிகாதி³முனீனங் ஸகலகு³ணக³ணேஹி உத்தமோ ப⁴க³வா கதி²னத்தா²ரங் ‘‘அனுஜானாமி, பி⁴க்க²வே, வஸ்ஸங்வுத்தா²னங் பி⁴க்கூ²னங் கதி²னங் அத்த²ரிது’’ந்தி (மஹாவ॰ 306) அப்³ர்வி கதே²ஸீதி யோஜனா.
2697.Vutthavassānaṃ purimikāya vassaṃ upagantvā yāva mahāpavāraṇā, tāva ratticchedaṃ akatvā vutthavassānaṃ bhikkhūnaṃ ekassa vā dvinnaṃ tiṇṇaṃ catunnaṃ pañcannaṃ atirekānaṃ vā bhikkhūnaṃ pañcannaṃ ānisaṃsānaṃ vakkhamānānaṃ anāmantacārādīnaṃ pañcannaṃ ānisaṃsānaṃ paṭilābhakāraṇā munipuṅgavo sabbesaṃ agārikādimunīnaṃ sakalaguṇagaṇehi uttamo bhagavā kathinatthāraṃ ‘‘anujānāmi, bhikkhave, vassaṃvutthānaṃ bhikkhūnaṃ kathinaṃ attharitu’’nti (mahāva. 306) abrvi kathesīti yojanā.
எத்தா²யங் வினிச்ச²யோ – ‘‘கதி²னத்தா²ரங் கே லப⁴ந்தி, கே ந லப⁴ந்தீதி? க³ணனவஸேன தாவ பச்சி²மகோடியா பஞ்ச ஜனா லப⁴ந்தி, உத்³த⁴ங் ஸதஸஹஸ்ஸம்பி, பஞ்சன்னங் ஹெட்டா² ந லப⁴ந்தீ’’தி (மஹாவ॰ அட்ட²॰ 306) இத³ங் அட்ட²கதா²ய அத்தா²ரகஸ்ஸ பி⁴க்கு²னோ ஸங்க⁴ஸ்ஸ கதி²னது³ஸ்ஸதா³னகம்மங் ஸந்தா⁴ய வுத்தங். ‘‘வுத்த²வஸ்ஸவஸேன புரிமிகாய வஸ்ஸங் உபக³ந்த்வா பட²மபவாரணாய பவாரிதா லப⁴ந்தி, சி²ன்னவஸ்ஸா வா பச்சி²மிகாய உபக³தா வா ந லப⁴ந்தி. அஞ்ஞஸ்மிங் விஹாரே வுத்த²வஸ்ஸாபி ந லப⁴ந்தீதி மஹாபச்சரியங் வுத்த’’ந்தி (மஹாவ॰ அட்ட²॰ 306) இத³ங் அட்ட²கதா²ய ஆனிஸங்ஸலாப⁴ங் ஸந்தா⁴ய வுத்தங், ந கம்மங்.
Etthāyaṃ vinicchayo – ‘‘kathinatthāraṃ ke labhanti, ke na labhantīti? Gaṇanavasena tāva pacchimakoṭiyā pañca janā labhanti, uddhaṃ satasahassampi, pañcannaṃ heṭṭhā na labhantī’’ti (mahāva. aṭṭha. 306) idaṃ aṭṭhakathāya atthārakassa bhikkhuno saṅghassa kathinadussadānakammaṃ sandhāya vuttaṃ. ‘‘Vutthavassavasena purimikāya vassaṃ upagantvā paṭhamapavāraṇāya pavāritā labhanti, chinnavassā vā pacchimikāya upagatā vā na labhanti. Aññasmiṃ vihāre vutthavassāpi na labhantīti mahāpaccariyaṃ vutta’’nti (mahāva. aṭṭha. 306) idaṃ aṭṭhakathāya ānisaṃsalābhaṃ sandhāya vuttaṃ, na kammaṃ.
இதா³னி தது³ப⁴யங் விப⁴ஜித்வா த³ஸ்ஸேதி –
Idāni tadubhayaṃ vibhajitvā dasseti –
‘‘புரிமிகாய உபக³தானங் பன ஸப்³பே³ க³ணபூரகா ஹொந்தி, ஆனிஸங்ஸங் ந லப⁴ந்தி, ஆனிஸங்ஸோ இதரேஸங்யேவ ஹோதி. ஸசே புரிமிகாய உபக³தா சத்தாரோ வா ஹொந்தி, தயோ வா த்³வே வா ஏகோ வா, இதரே க³ணபூரகே கத்வா கதி²னங் அத்த²ரிதப்³ப³ங். அத² சத்தாரோ பி⁴க்கூ² உபக³தா, ஏகோ பரிபுண்ணவஸ்ஸோ ஸாமணேரோ, ஸோ சே பச்சி²மிகாய உபஸம்பஜ்ஜதி, க³ணபூரகோ சேவ ஹோதி, ஆனிஸங்ஸஞ்ச லப⁴தி . தயோ பி⁴க்கூ² த்³வே ஸாமணேரா, த்³வே பி⁴க்கூ² தயோ ஸாமணேரா, ஏகோ பி⁴க்கு² சத்தாரோ ஸாமணேராதி எத்தா²பி ஏஸேவ நயோ. ஸசே புரிமிகாய உபக³தா கதி²னத்தா²ரகுஸலா ந ஹொந்தி, அத்தா²ரகுஸலா க²ந்த⁴கபா⁴ணகத்தே²ரா பரியேஸித்வா ஆனேதப்³பா³, கம்மவாசங் ஸாவெத்வா கதி²னங் அத்த²ராபெத்வா தா³னஞ்ச பு⁴ஞ்ஜித்வா க³மிஸ்ஸந்தி, ஆனிஸங்ஸோ பன இதரேஸங்யேவ ஹோதீ’’தி (மஹாவ॰ அட்ட²॰ 306).
‘‘Purimikāya upagatānaṃ pana sabbe gaṇapūrakā honti, ānisaṃsaṃ na labhanti, ānisaṃso itaresaṃyeva hoti. Sace purimikāya upagatā cattāro vā honti, tayo vā dve vā eko vā, itare gaṇapūrake katvā kathinaṃ attharitabbaṃ. Atha cattāro bhikkhū upagatā, eko paripuṇṇavasso sāmaṇero, so ce pacchimikāya upasampajjati, gaṇapūrako ceva hoti, ānisaṃsañca labhati . Tayo bhikkhū dve sāmaṇerā, dve bhikkhū tayo sāmaṇerā, eko bhikkhu cattāro sāmaṇerāti etthāpi eseva nayo. Sace purimikāya upagatā kathinatthārakusalā na honti, atthārakusalā khandhakabhāṇakattherā pariyesitvā ānetabbā, kammavācaṃ sāvetvā kathinaṃ attharāpetvā dānañca bhuñjitvā gamissanti, ānisaṃso pana itaresaṃyeva hotī’’ti (mahāva. aṭṭha. 306).
கதி²னங் கேன தி³ன்னங் வட்டதீதி? யேன கேனசி தே³வேன வா மனுஸ்ஸேன வா பஞ்சன்னங் வா ஸஹத⁴ம்மிகானங் அஞ்ஞதரேன தி³ன்னங் வட்டதி. கதி²னதா³யகஸ்ஸ வத்தங் அத்தி², ஸசே ஸோ தங் அஜானந்தோ புச்ச²தி ‘‘ப⁴ந்தே, கத²ங் கதி²னங் தா³தப்³ப³’’ந்தி, தஸ்ஸ ஏவங் ஆசிக்கி²தப்³ப³ங் ‘‘திண்ணங் சீவரானங் அஞ்ஞதரப்பஹோனகங் ஸூரியுக்³க³மனஸமயே வத்த²ங் ‘கதி²னசீவரங் தே³மா’தி தா³துங் வட்டதி, தஸ்ஸ பரிகம்மத்த²ங் எத்தகா நாம ஸூசியோ, எத்தகங் ஸுத்தங், எத்தகங் ரஜனங், பரிகம்மங் கரொந்தானங் எத்தகானங் பி⁴க்கூ²னங் யாகு³ப⁴த்தஞ்ச தா³துங் வட்டதீ’’தி.
Kathinaṃ kena dinnaṃ vaṭṭatīti? Yena kenaci devena vā manussena vā pañcannaṃ vā sahadhammikānaṃ aññatarena dinnaṃ vaṭṭati. Kathinadāyakassa vattaṃ atthi, sace so taṃ ajānanto pucchati ‘‘bhante, kathaṃ kathinaṃ dātabba’’nti, tassa evaṃ ācikkhitabbaṃ ‘‘tiṇṇaṃ cīvarānaṃ aññatarappahonakaṃ sūriyuggamanasamaye vatthaṃ ‘kathinacīvaraṃ demā’ti dātuṃ vaṭṭati, tassa parikammatthaṃ ettakā nāma sūciyo, ettakaṃ suttaṃ, ettakaṃ rajanaṃ, parikammaṃ karontānaṃ ettakānaṃ bhikkhūnaṃ yāgubhattañca dātuṃ vaṭṭatī’’ti.
கதி²னத்தா²ரகேனாபி த⁴ம்மேன ஸமேன உப்பன்னங் கதி²னங் அத்த²ரந்தேன வத்தங் ஜானிதப்³ப³ங். தந்தவாயகே³ஹதோ ஹி ஆப⁴தஸந்தானேனேவ க²லிமக்கி²தஸாடகோபி ந வட்டதி, மலீனஸாடகோபி ந வட்டதி, தஸ்மா கதி²னத்தா²ரஸாடகங் லபி⁴த்வா ஸுத்³த⁴ங் தோ⁴வித்வா ஸூசிஆதீ³னி சீவரகம்மூபகரணானி ஸஜ்ஜெத்வா ப³ஹூஹி பி⁴க்கூ²ஹி ஸத்³தி⁴ங் தத³ஹேவ ஸிப்³பி³த்வா நிட்டி²தஸூசிகம்மங் ரஜித்வா கப்பபி³ந்து³ங் த³த்வா கதி²னங் அத்த²ரிதப்³ப³ங். ஸசே தஸ்மிங் அனத்த²தேயேவ அஞ்ஞோ கதி²னஸாடகங் அத்த²ரிதப்³ப³கங் ஆஹரதி, அஞ்ஞானி ச ப³ஹூனி கதி²னானிஸங்ஸவத்தா²னி தே³தி, யோ ஆனிஸங்ஸங் ப³ஹுங் தே³தி, தஸ்ஸ ஸந்தகேனேவ அத்த²ரிதப்³ப³ங். இதரோ யதா² ததா² ஓவதி³த்வா ஸஞ்ஞாபேதப்³போ³.
Kathinatthārakenāpi dhammena samena uppannaṃ kathinaṃ attharantena vattaṃ jānitabbaṃ. Tantavāyagehato hi ābhatasantāneneva khalimakkhitasāṭakopi na vaṭṭati, malīnasāṭakopi na vaṭṭati, tasmā kathinatthārasāṭakaṃ labhitvā suddhaṃ dhovitvā sūciādīni cīvarakammūpakaraṇāni sajjetvā bahūhi bhikkhūhi saddhiṃ tadaheva sibbitvā niṭṭhitasūcikammaṃ rajitvā kappabinduṃ datvā kathinaṃ attharitabbaṃ. Sace tasmiṃ anatthateyeva añño kathinasāṭakaṃ attharitabbakaṃ āharati, aññāni ca bahūni kathinānisaṃsavatthāni deti, yo ānisaṃsaṃ bahuṃ deti, tassa santakeneva attharitabbaṃ. Itaro yathā tathā ovaditvā saññāpetabbo.
கதி²னங் பன கேன அத்த²ரிதப்³ப³ங்? யஸ்ஸ ஸங்கோ⁴ கதி²னசீவரங் தே³தி. ஸங்கே⁴ன பன கஸ்ஸ தா³தப்³ப³ங்? யோ ஜிண்ணசீவரோ ஹோதி. ஸசே ப³ஹூ ஜிண்ணசீவரா ஹொந்தி, வுட்³ட⁴ஸ்ஸ தா³தப்³ப³ங். வுட்³டே⁴ஸுபி யோ மஹாபரிவாரோ தத³ஹேவ சீவரங் கத்வா அத்த²ரிதுங் ஸக்கோதி, தஸ்ஸ தா³தப்³ப³ங். ஸசே வுட்³டோ⁴ ந ஸக்கோதி, நவகதரோ ஸக்கோதி, தஸ்ஸ தா³தப்³ப³ங். அபி ச ஸங்கே⁴ன மஹாதே²ரஸ்ஸ ஸங்க³ஹங் காதுங் வட்டதி, தஸ்மா ‘‘தும்ஹே, ப⁴ந்தே, க³ண்ஹத², மயங் கத்வா த³ஸ்ஸாமா’’தி வத்தப்³ப³ங்.
Kathinaṃ pana kena attharitabbaṃ? Yassa saṅgho kathinacīvaraṃ deti. Saṅghena pana kassa dātabbaṃ? Yo jiṇṇacīvaro hoti. Sace bahū jiṇṇacīvarā honti, vuḍḍhassa dātabbaṃ. Vuḍḍhesupi yo mahāparivāro tadaheva cīvaraṃ katvā attharituṃ sakkoti, tassa dātabbaṃ. Sace vuḍḍho na sakkoti, navakataro sakkoti, tassa dātabbaṃ. Api ca saṅghena mahātherassa saṅgahaṃ kātuṃ vaṭṭati, tasmā ‘‘tumhe, bhante, gaṇhatha, mayaṃ katvā dassāmā’’ti vattabbaṃ.
தீஸு சீவரேஸு யங் ஜிண்ணங் ஹோதி, தத³த்தா²ய தா³தப்³ப³ங். பகதியா து³பட்டசீவரஸ்ஸ து³பட்டத்தா²யேவ தா³தப்³ப³ங். ஸசேபிஸ்ஸ ஏகபட்டசீவரங் க⁴னங் ஹோதி, கதி²னஸாடகோ ச பேலவோ, ஸாருப்பத்தா²ய து³பட்டப்பஹோனகமேவ தா³தப்³ப³ங். ‘‘அஹங் அலப⁴ந்தோ ஏகபட்டங் பாருபாமீ’’தி வத³ந்தஸ்ஸாபி து³பட்டங் தா³துங் வட்டதி. யோ பன லோப⁴பகதிகோ ஹோதி, தஸ்ஸ ந தா³தப்³ப³ங். தேனாபி கதி²னங் அத்த²ரித்வா ‘‘பச்சா² விஸிப்³பி³த்வா த்³வே சீவரானி கரிஸ்ஸாமீ’’தி ந க³ஹேதப்³ப³ங்.
Tīsu cīvaresu yaṃ jiṇṇaṃ hoti, tadatthāya dātabbaṃ. Pakatiyā dupaṭṭacīvarassa dupaṭṭatthāyeva dātabbaṃ. Sacepissa ekapaṭṭacīvaraṃ ghanaṃ hoti, kathinasāṭako ca pelavo, sāruppatthāya dupaṭṭappahonakameva dātabbaṃ. ‘‘Ahaṃ alabhanto ekapaṭṭaṃ pārupāmī’’ti vadantassāpi dupaṭṭaṃ dātuṃ vaṭṭati. Yo pana lobhapakatiko hoti, tassa na dātabbaṃ. Tenāpi kathinaṃ attharitvā ‘‘pacchā visibbitvā dve cīvarāni karissāmī’’ti na gahetabbaṃ.
யஸ்ஸ பன தி³ய்யதி, தஸ்ஸ –
Yassa pana diyyati, tassa –
‘‘ஸுணாது மே, ப⁴ந்தே ஸங்கோ⁴, இத³ங் ஸங்க⁴ஸ்ஸ கதி²னது³ஸ்ஸங் உப்பன்னங், யதி³ ஸங்க⁴ஸ்ஸ பத்தகல்லங், ஸங்கோ⁴ இமங் கதி²னது³ஸ்ஸங் இத்த²ன்னாமஸ்ஸ பி⁴க்கு²னோ த³தெ³ய்ய கதி²னங் அத்த²ரிதுங், ஏஸா ஞத்தி.
‘‘Suṇātu me, bhante saṅgho, idaṃ saṅghassa kathinadussaṃ uppannaṃ, yadi saṅghassa pattakallaṃ, saṅgho imaṃ kathinadussaṃ itthannāmassa bhikkhuno dadeyya kathinaṃ attharituṃ, esā ñatti.
‘‘ஸுணாது மே, ப⁴ந்தே ஸங்கோ⁴, இத³ங் ஸங்க⁴ஸ்ஸ கதி²னது³ஸ்ஸங் உப்பன்னங், ஸங்கோ⁴ இமங் கதி²னது³ஸ்ஸங் இத்த²ன்னாமஸ்ஸ பி⁴க்கு²னோ தே³தி கதி²னங் அத்த²ரிதுங், யஸ்ஸாயஸ்மதோ க²மதி இமஸ்ஸ கதி²னது³ஸ்ஸஸ்ஸ இத்த²ன்னாமஸ்ஸ பி⁴க்கு²னோ தா³னங் கதி²னங் அத்த²ரிதுங், ஸோ துண்ஹஸ்ஸ, யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante saṅgho, idaṃ saṅghassa kathinadussaṃ uppannaṃ, saṅgho imaṃ kathinadussaṃ itthannāmassa bhikkhuno deti kathinaṃ attharituṃ, yassāyasmato khamati imassa kathinadussassa itthannāmassa bhikkhuno dānaṃ kathinaṃ attharituṃ, so tuṇhassa, yassa nakkhamati, so bhāseyya.
‘‘தி³ன்னங் இத³ங் ஸங்கே⁴ன கதி²னது³ஸ்ஸங் இத்த²ன்னாமஸ்ஸ பி⁴க்கு²னோ கதி²னங் அத்த²ரிதுங், க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி (மஹாவ॰ 307) –
‘‘Dinnaṃ idaṃ saṅghena kathinadussaṃ itthannāmassa bhikkhuno kathinaṃ attharituṃ, khamati saṅghassa, tasmā tuṇhī, evametaṃ dhārayāmī’’ti (mahāva. 307) –
ஏவங் ஞத்திது³தியாய கம்மவாசாய தா³தப்³ப³ந்தி ஏவங் தி³ன்னங்.
Evaṃ ñattidutiyāya kammavācāya dātabbanti evaṃ dinnaṃ.
2698-9. ந உல்லிகி²தமத்தாதி³-சதுவீஸதிவஜ்ஜிதந்தி பாளியங் ஆக³தேஹி ‘‘ந உல்லிகி²தமத்தேன அத்த²தங் ஹோதி கதி²ன’’ந்தி (மஹாவ॰ 308) உல்லிகி²தமத்தாதீ³ஹி சதுவீஸதியா ஆகாரேஹி வஜ்ஜிதங். சீவரந்தி ‘‘அஹதேன அத்த²தங் ஹோதி கதி²ன’’ந்தி (மஹாவ॰ 309) பாளியங் ஆக³தானங் ஸோளஸன்னங் ஆகாரானங் அஞ்ஞதரேன யுத்தங் கதபரியோஸிதங் தி³ன்னங் கப்பபி³ந்து³ங் திண்ணங் சீவரானங் அஞ்ஞதரசீவரங். தே பன சதுவீஸதி ஆகாரா, ஸோளஸாகாரா ச பாளிதோ (மஹாவ॰ 308), அட்ட²கதா²தோ (மஹாவ॰ அட்ட²॰ 308) ச க³ஹேதப்³பா³. க³ந்த²கா³ரவபரிஹாரத்த²மித⁴ ந வுத்தா.
2698-9.Na ullikhitamattādi-catuvīsativajjitanti pāḷiyaṃ āgatehi ‘‘na ullikhitamattena atthataṃ hoti kathina’’nti (mahāva. 308) ullikhitamattādīhi catuvīsatiyā ākārehi vajjitaṃ. Cīvaranti ‘‘ahatena atthataṃ hoti kathina’’nti (mahāva. 309) pāḷiyaṃ āgatānaṃ soḷasannaṃ ākārānaṃ aññatarena yuttaṃ katapariyositaṃ dinnaṃ kappabinduṃ tiṇṇaṃ cīvarānaṃ aññataracīvaraṃ. Te pana catuvīsati ākārā, soḷasākārā ca pāḷito (mahāva. 308), aṭṭhakathāto (mahāva. aṭṭha. 308) ca gahetabbā. Ganthagāravaparihāratthamidha na vuttā.
பி⁴க்கு²னா வக்க²மானே அட்ட²த⁴ம்மே ஜானந்தேன அத்த²ரகேன ஆதா³ய க³ஹெத்வா புராணகங் அத்தனா பரிபு⁴ஞ்ஜியமானங் அத்த²ரிதப்³ப³சீவரேன ஏகனாமகங் புராணசீவரங் உத்³த⁴ரித்வா பச்சுத்³த⁴ரித்வா நவங் அத்த²ரிதப்³ப³ங் சீவரங் அதி⁴ட்ட²ஹித்வா புராணபச்சுத்³த⁴டசீவரஸ்ஸ நாமேன அதி⁴ட்ட²ஹித்வாவ தங் அந்தரவாஸகங் சே, ‘‘இமினா அந்தரவாஸகேன கதி²னங் அத்த²ராமி’’இதி வசஸா வத்தப்³ப³ந்தி யோஜனா. ஸசே உத்தராஸங்கோ³ ஹோதி, ‘‘இமினா உத்தராஸங்கே³ன கதி²னங் அத்த²ராமி’’, ஸசே ஸங்கா⁴டி ஹோதி, ‘‘இமாய ஸங்கா⁴டியா கதி²னங் அத்த²ராமீ’’தி வத்தப்³ப³ங்.
Bhikkhunā vakkhamāne aṭṭhadhamme jānantena attharakena ādāya gahetvā purāṇakaṃ attanā paribhuñjiyamānaṃ attharitabbacīvarena ekanāmakaṃ purāṇacīvaraṃ uddharitvā paccuddharitvā navaṃ attharitabbaṃ cīvaraṃ adhiṭṭhahitvā purāṇapaccuddhaṭacīvarassa nāmena adhiṭṭhahitvāva taṃ antaravāsakaṃ ce, ‘‘iminā antaravāsakena kathinaṃ attharāmi’’iti vacasā vattabbanti yojanā. Sace uttarāsaṅgo hoti, ‘‘iminā uttarāsaṅgena kathinaṃ attharāmi’’, sace saṅghāṭi hoti, ‘‘imāya saṅghāṭiyā kathinaṃ attharāmī’’ti vattabbaṃ.
2700-1. இச்சேவங் திக்க²த்துங் வுத்தே கதி²னங் அத்த²தங் ஹோதீதி யோஜனா. தேன பன பி⁴க்கு²னா நவகேன கதி²னசீவரங் ஆதா³ய ஸங்க⁴ங் உபஸங்கம்ம ‘‘அத்த²தங், ப⁴ந்தே, ஸங்க⁴ஸ்ஸ கதி²னங், த⁴ம்மிகோ கதி²னத்தா²ரோ, அனுமோத³த²’’இதி வத்தப்³ப³ந்தி யோஜனா.
2700-1. Iccevaṃ tikkhattuṃ vutte kathinaṃ atthataṃ hotīti yojanā. Tena pana bhikkhunā navakena kathinacīvaraṃ ādāya saṅghaṃ upasaṅkamma ‘‘atthataṃ, bhante, saṅghassa kathinaṃ, dhammiko kathinatthāro, anumodatha’’iti vattabbanti yojanā.
2702. அனுமோத³கேஸு ச தே²ரேஹி ‘‘அத்த²தங், ஆவுஸோ, ஸங்க⁴ஸ்ஸ கதி²னங், த⁴ம்மிகோ கதி²னத்தா²ரோ, அனுமோதா³மா’’தி வத்தப்³ப³ங், நவேன பன ‘‘அத்த²தங், ப⁴ந்தே, ஸங்க⁴ஸ்ஸ கதி²னங், த⁴ம்மிகோ கதி²னத்தா²ரோ, அனுமோதா³மீ’’தி இதி புன ஈரயே கதெ²ய்யாதி யோஜனா. கா³தா²ய பன அனுமோத³னபாட²ஸ்ஸ அத்த²த³ஸ்ஸனமுகே²ன ‘‘ஸுஅத்த²தங் தயா ப⁴ந்தே’’தி வுத்தங், ந பாட²க்கமத³ஸ்ஸனவஸேனாதி வேதி³தப்³ப³ங்.
2702. Anumodakesu ca therehi ‘‘atthataṃ, āvuso, saṅghassa kathinaṃ, dhammiko kathinatthāro, anumodāmā’’ti vattabbaṃ, navena pana ‘‘atthataṃ, bhante, saṅghassa kathinaṃ, dhammiko kathinatthāro, anumodāmī’’ti iti puna īraye katheyyāti yojanā. Gāthāya pana anumodanapāṭhassa atthadassanamukhena ‘‘suatthataṃ tayā bhante’’ti vuttaṃ, na pāṭhakkamadassanavasenāti veditabbaṃ.
அத்தா²ரகேஸு ச அனுமோத³கேஸு ச நவேஹி வுட்³டா⁴னங் வசனக்கமோ வுத்தோ, வுட்³டே⁴ஹி நவானங் வசனக்கமோ பன தத³னுஸாரேன யதா²ரஹங் யோஜெத்வா வத்தப்³போ³தி கா³தா²ஸு ந வுத்தோதி வேதி³தப்³போ³. அத்தா²ரகேன தே²ரேன வா நவேன வா க³ணபுக்³க³லானங் வசனக்கமோ ச க³ணபுக்³க³லேஹி அத்தா²ரகஸ்ஸ வசனக்கமோ ச வுத்தனயேன யதா²ரஹங் யோஜேதுங் ஸக்காதி ந வுத்தோ.
Atthārakesu ca anumodakesu ca navehi vuḍḍhānaṃ vacanakkamo vutto, vuḍḍhehi navānaṃ vacanakkamo pana tadanusārena yathārahaṃ yojetvā vattabboti gāthāsu na vuttoti veditabbo. Atthārakena therena vā navena vā gaṇapuggalānaṃ vacanakkamo ca gaṇapuggalehi atthārakassa vacanakkamo ca vuttanayena yathārahaṃ yojetuṃ sakkāti na vutto.
ஏவங் அத்த²தே பன கதி²னே ஸசே கதி²னசீவரேன ஸத்³தி⁴ங் ஆப⁴தங் ஆனிஸங்ஸங் தா³யகா ‘‘யேன அம்ஹாகங் கதி²னங் க³ஹிதங், தஸ்ஸேவ ச தே³மா’’தி தெ³ந்தி, பி⁴க்கு²ஸங்கோ⁴ அனிஸ்ஸரோ. அத² அவிசாரெத்வாவ த³த்வா க³ச்ச²ந்தி, பி⁴க்கு²ஸங்கோ⁴ இஸ்ஸரோ. தஸ்மா ஸசே கதி²னத்தா²ரகஸ்ஸ ஸேஸசீவரானிபி து³ப்³ப³லானி ஹொந்தி, ஸங்கே⁴ன அபலோகெத்வா தேஸம்பி அத்தா²ய வத்தா²னி தா³தப்³பா³னி, கம்மவாசாய பன ஏகாயேவ வட்டதி. அவஸேஸே கதி²னானிஸங்ஸே ப³லவவத்தா²னி வஸ்ஸாவாஸிகடி²திகாய தா³தப்³பா³னி, டி²திகாய அபா⁴வே தே²ராஸனதோ பட்டா²ய தா³தப்³பா³னி, க³ருப⁴ண்ட³ங் ந பா⁴ஜேதப்³ப³ங். ஸசே பன ஏகஸீமாய ப³ஹூ விஹாரா ஹொந்தி, ஸப்³பே³ பி⁴க்கூ² ஸன்னிபாதெத்வா ஏகத்த² கதி²னங் அத்த²ரிதப்³ப³ங், விஸுங் விஸுங் அத்த²ரிதுங் ந வட்டதி.
Evaṃ atthate pana kathine sace kathinacīvarena saddhiṃ ābhataṃ ānisaṃsaṃ dāyakā ‘‘yena amhākaṃ kathinaṃ gahitaṃ, tasseva ca demā’’ti denti, bhikkhusaṅgho anissaro. Atha avicāretvāva datvā gacchanti, bhikkhusaṅgho issaro. Tasmā sace kathinatthārakassa sesacīvarānipi dubbalāni honti, saṅghena apaloketvā tesampi atthāya vatthāni dātabbāni, kammavācāya pana ekāyeva vaṭṭati. Avasese kathinānisaṃse balavavatthāni vassāvāsikaṭhitikāya dātabbāni, ṭhitikāya abhāve therāsanato paṭṭhāya dātabbāni, garubhaṇḍaṃ na bhājetabbaṃ. Sace pana ekasīmāya bahū vihārā honti, sabbe bhikkhū sannipātetvā ekattha kathinaṃ attharitabbaṃ, visuṃ visuṃ attharituṃ na vaṭṭati.
2703. ‘‘கதி²னஸ்ஸ ச கிங் மூல’’ந்திஆதீ³னி ஸயமேவ விவரிஸ்ஸதி.
2703.‘‘Kathinassa ca kiṃ mūla’’ntiādīni sayameva vivarissati.
2706. அட்ட²த⁴ம்முத்³தே³ஸகா³தா²ய புப்³ப³கிச்சங் புப்³ப³-வசனேனேவ உத்தரபத³லோபேன வுத்தங். தேனேவ வக்க²தி ‘‘புப்³ப³கிச்சந்தி வுச்சதீ’’தி. ‘‘பச்சுத்³தா⁴ர’’இதி வத்தப்³பே³ ‘‘பச்சுத்³த⁴ர’’இதி கா³தா²ப³ந்த⁴வஸேன ரஸ்ஸோ. தேனேவ வக்க²தி ‘‘பச்சுத்³தா⁴ரோ’’தி. அதி⁴ட்ட²ஹனங் அதி⁴ட்டா²னங். பச்சுத்³தா⁴ரோ ச அதி⁴ட்டா²னஞ்ச பச்சுத்³த⁴ராதி⁴ட்டா²னா. இதரீதரயோகே³ன த்³வந்த³ஸமாஸோ. அத்தா²ரோதி எத்த² ‘‘கதி²னத்தா²ரோ’’தி பகரணதோ லப்³ப⁴தி.
2706. Aṭṭhadhammuddesagāthāya pubbakiccaṃ pubba-vacaneneva uttarapadalopena vuttaṃ. Teneva vakkhati ‘‘pubbakiccanti vuccatī’’ti. ‘‘Paccuddhāra’’iti vattabbe ‘‘paccuddhara’’iti gāthābandhavasena rasso. Teneva vakkhati ‘‘paccuddhāro’’ti. Adhiṭṭhahanaṃ adhiṭṭhānaṃ. Paccuddhāro ca adhiṭṭhānañca paccuddharādhiṭṭhānā. Itarītarayogena dvandasamāso. Atthāroti ettha ‘‘kathinatthāro’’ti pakaraṇato labbhati.
‘‘மாதிகா’’தி இமினா ‘‘அட்ட² கதி²னுப்³பா⁴ரமாதிகா’’தி பகரணதோ விஞ்ஞாயதி. யதா²ஹ – ‘‘அட்டி²மா, பி⁴க்க²வே, மாதிகா கதி²னஸ்ஸ உப்³பா⁴ராயா’’தி (மஹாவ॰ 310). மாதிகாதி மாதரோ ஜனெத்தியோ, கதி²னுப்³பா⁴ரங் ஏதா அட்ட² ஜனெந்தீதி அத்தோ². உத்³தா⁴ரோதி கதி²னஸ்ஸ உத்³தா⁴ரோ. ஆனிஸங்ஸாதி எத்த² ‘‘கதி²னஸ்ஸா’’தி பகரணதோ லப்³ப⁴தி. கதி²னஸ்ஸ ஆனிஸங்ஸாதி இமே அட்ட² த⁴ம்மாதி யோஜனா. யதா²ஹ ‘‘அத்த²தகதி²னானங் வோ, பி⁴க்க²வே, பஞ்ச கப்பிஸ்ஸந்தீ’’திஆதி³ (மஹாவ॰ 306). ‘‘ஆனிஸங்ஸேனா’’திபி பாடோ². ஆனிஸங்ஸேன ஸஹ இமே அட்ட² த⁴ம்மாதி யோஜனா.
‘‘Mātikā’’ti iminā ‘‘aṭṭha kathinubbhāramātikā’’ti pakaraṇato viññāyati. Yathāha – ‘‘aṭṭhimā, bhikkhave, mātikā kathinassa ubbhārāyā’’ti (mahāva. 310). Mātikāti mātaro janettiyo, kathinubbhāraṃ etā aṭṭha janentīti attho. Uddhāroti kathinassa uddhāro. Ānisaṃsāti ettha ‘‘kathinassā’’ti pakaraṇato labbhati. Kathinassa ānisaṃsāti ime aṭṭha dhammāti yojanā. Yathāha ‘‘atthatakathinānaṃ vo, bhikkhave, pañca kappissantī’’tiādi (mahāva. 306). ‘‘Ānisaṃsenā’’tipi pāṭho. Ānisaṃsena saha ime aṭṭha dhammāti yojanā.
2707. ‘‘ந உல்லிகி²தமத்தாதி³-சதுவீஸதிவஜ்ஜித’’ந்திஆதி³னா கதி²னங் அத்த²ரிதுங் கதபரியோஸிதங் சீவரங் சே லத்³த⁴ங், தத்த² படிபஜ்ஜனவிதி⁴ங் த³ஸ்ஸெத்வா ஸசே அகதஸிப்³ப³னாதி³கம்மங் வத்த²மேவ லத்³த⁴ங், தத்த² படிபஜ்ஜனவிதி⁴ங் புப்³ப³கிச்சவஸேன த³ஸ்ஸேதுமாஹ ‘‘தோ⁴வன’’ந்திஆதி³. தத்த² தோ⁴வனந்தி கதி²னது³ஸ்ஸஸ்ஸ ஸேதபா⁴வகரணங். விசாரோதி ‘‘பஞ்சகங் வா ஸத்தகங் வா நவகங் வா ஏகாத³ஸகங் வா ஹோதூ’’தி விசாரணங். சே²த³னந்தி யதா²விசாரிதஸ்ஸ வத்த²ஸ்ஸ சே²த³னங். ப³ந்த⁴னந்தி மோக⁴ஸுத்தகாரோபனங். ஸிப்³ப³னந்தி ஸப்³ப³ஸூசிகம்மங். ரஜனந்தி ரஜனகம்மங். கப்பந்தி கப்பபி³ந்து³தா³னங். ‘‘புப்³ப³கிச்ச’’ந்தி வுச்சதி இத³ங் ஸப்³ப³ங் கதி²னத்தா²ரஸ்ஸ பட²மமேவ கத்தப்³ப³த்தா.
2707. ‘‘Na ullikhitamattādi-catuvīsativajjita’’ntiādinā kathinaṃ attharituṃ katapariyositaṃ cīvaraṃ ce laddhaṃ, tattha paṭipajjanavidhiṃ dassetvā sace akatasibbanādikammaṃ vatthameva laddhaṃ, tattha paṭipajjanavidhiṃ pubbakiccavasena dassetumāha ‘‘dhovana’’ntiādi. Tattha dhovananti kathinadussassa setabhāvakaraṇaṃ. Vicāroti ‘‘pañcakaṃ vā sattakaṃ vā navakaṃ vā ekādasakaṃ vā hotū’’ti vicāraṇaṃ. Chedananti yathāvicāritassa vatthassa chedanaṃ. Bandhananti moghasuttakāropanaṃ. Sibbananti sabbasūcikammaṃ. Rajananti rajanakammaṃ. Kappanti kappabindudānaṃ. ‘‘Pubbakicca’’nti vuccati idaṃ sabbaṃ kathinatthārassa paṭhamameva kattabbattā.
2708. அந்தரவாஸகோதி எத்த² இதி-ஸத்³தோ³ லுத்தனித்³தி³ட்டோ². ஸங்கா⁴டி, உத்தராஸங்கோ³, அதோ² அந்தரவாஸகோதி ஏஸமேவ து பச்சுத்³தா⁴ரோபி அதி⁴ட்டா²னம்பி அத்தா²ரோபி வுத்தோதி யோஜனா.
2708.Antaravāsakoti ettha iti-saddo luttaniddiṭṭho. Saṅghāṭi, uttarāsaṅgo, atho antaravāsakoti esameva tu paccuddhāropi adhiṭṭhānampi atthāropi vuttoti yojanā.
2709. அட்ட²மாதிகா (மஹாவ॰ 310-311; பரி॰ 415; மஹாவ॰ அட்ட²॰ 310-311) த³ஸ்ஸேதுமாஹ ‘‘பக்கமனஞ்சா’’திஆதி³. பக்கமனங் அந்தோ ஏதஸ்ஸாதி பக்கமனந்திகாதி வத்தப்³பே³ உத்தரபத³லோபேன ‘‘பக்கமன’’ந்தி வுத்தங். ஏஸ நயோ ஸப்³ப³த்த². அட்டி²மாதி எத்த² ‘‘மாதிகா’’தி பகரணதோ லப்³ப⁴தி. இமா அட்ட² மாதிகாதி யோஜனா.
2709. Aṭṭhamātikā (mahāva. 310-311; pari. 415; mahāva. aṭṭha. 310-311) dassetumāha ‘‘pakkamanañcā’’tiādi. Pakkamanaṃ anto etassāti pakkamanantikāti vattabbe uttarapadalopena ‘‘pakkamana’’nti vuttaṃ. Esa nayo sabbattha. Aṭṭhimāti ettha ‘‘mātikā’’ti pakaraṇato labbhati. Imā aṭṭha mātikāti yojanā.
2710. உத்³தே³ஸானுக்கமேன நித்³தி³ஸிதுமாஹ ‘‘கதசீவரமாதா³யா’’திஆதி³. ‘‘கதசீவரமாதா³யா’’தி இமினா சீவரபலிபோ³து⁴பச்சே²தோ³ த³ஸ்ஸிதோ. ‘‘ஆவாஸே நிரபெக்க²கோ’’தி இமினா து³தியோ ஆவாஸபலிபோ³து⁴பச்சே²தோ³ த³ஸ்ஸிதோ. எத்த² ஸப்³ப³வாக்யேஸு ‘‘அத்த²தகதி²னோ யோ பி⁴க்கு² ஸசே பக்கமதீ’’தி ஸேஸோ. அதிக்கந்தாய ஸீமாயாதி விஹாரஸீமாய அதிக்கந்தாய. ஹோதி பக்கமனந்திகாதி எத்த² ‘‘தஸ்ஸ பி⁴க்கு²னோ’’தி ஸேஸோ, தஸ்ஸ பி⁴க்கு²னோ பக்கமனந்திகா நாம மாதிகா ஹோதீதி அத்தோ².
2710. Uddesānukkamena niddisitumāha ‘‘katacīvaramādāyā’’tiādi. ‘‘Katacīvaramādāyā’’ti iminā cīvarapalibodhupacchedo dassito. ‘‘Āvāse nirapekkhako’’ti iminā dutiyo āvāsapalibodhupacchedo dassito. Ettha sabbavākyesu ‘‘atthatakathino yo bhikkhu sace pakkamatī’’ti seso. Atikkantāya sīmāyāti vihārasīmāya atikkantāya. Hoti pakkamanantikāti ettha ‘‘tassa bhikkhuno’’ti seso, tassa bhikkhuno pakkamanantikā nāma mātikā hotīti attho.
2711-2. ஆனிஸங்ஸங் நாம வுத்த²வஸ்ஸேன லத்³த⁴ங் அகதஸூசிகம்மவத்த²ங். தேனேவ வக்க²தி ‘‘கரோதீ’’திஆதி³. ‘‘விஹாரே அனபெக்க²கோ’’தி இமினா எத்த² பட²மங் ஆவாஸபலிபோ³து⁴பச்சே²தோ³ த³ஸ்ஸிதோ. ஸுக²விஹரணங் பயோஜனமஸ்ஸாதி ஸுக²விஹாரிகோ, விஹாரோதி. தத்த² தஸ்மிங் விஹாரே விஹரந்தோவ தங் சீவரங் யதி³ கரோதி, தஸ்மிங் சீவரே நிட்டி²தே நிட்டா²னந்தா நிட்டா²னந்திகாதி வுச்சதீதி யோஜனா. ‘‘நிட்டி²தேசீவரே’’தி இமினா சீவரபலிபோ³து⁴பச்சே²தோ³ த³ஸ்ஸிதோ.
2711-2.Ānisaṃsaṃ nāma vutthavassena laddhaṃ akatasūcikammavatthaṃ. Teneva vakkhati ‘‘karotī’’tiādi. ‘‘Vihāre anapekkhako’’ti iminā ettha paṭhamaṃ āvāsapalibodhupacchedo dassito. Sukhaviharaṇaṃ payojanamassāti sukhavihāriko, vihāroti. Tattha tasmiṃ vihāre viharantova taṃ cīvaraṃ yadi karoti, tasmiṃ cīvare niṭṭhite niṭṭhānantā niṭṭhānantikāti vuccatīti yojanā. ‘‘Niṭṭhitecīvare’’ti iminā cīvarapalibodhupacchedo dassito.
2713. தமஸ்ஸமந்தி தங் வுத்த²வஸ்ஸாவாஸங். து⁴ரனிக்கே²பேதி உப⁴யது⁴ரனிக்கே²பவஸேன சித்தப்பவத்தக்க²ணே. ஸன்னிட்டா²னங் நாம து⁴ரனிக்கே²போ. எத்த² பலிபோ³த⁴த்³வயஸ்ஸ ஏகக்க²ணேயேவ உபச்சே²தோ³ அட்ட²கதா²யங் வுத்தோ ‘‘ஸன்னிட்டா²னந்திகே த்³வேபி பலிபோ³தா⁴ ‘நேவிமங் சீவரங் காரெஸ்ஸங், ந பச்செஸ்ஸ’ந்தி சிந்திதமத்தேயேவ ஏகதோ சி²ஜ்ஜந்தீ’’தி (மஹாவ॰ அட்ட²॰ 311).
2713.Tamassamanti taṃ vutthavassāvāsaṃ. Dhuranikkhepeti ubhayadhuranikkhepavasena cittappavattakkhaṇe. Sanniṭṭhānaṃ nāma dhuranikkhepo. Ettha palibodhadvayassa ekakkhaṇeyeva upacchedo aṭṭhakathāyaṃ vutto ‘‘sanniṭṭhānantike dvepi palibodhā ‘nevimaṃ cīvaraṃ kāressaṃ, na paccessa’nti cintitamatteyeva ekato chijjantī’’ti (mahāva. aṭṭha. 311).
2714. கதி²னச்சா²த³னந்தி கதி²னானிஸங்ஸங் சீவரவத்து²ங். ந பச்செஸ்ஸந்தி ந பச்சாக³மிஸ்ஸாமி. கரொந்தஸ்ஸேவாதி எத்த² ‘‘சீவர’’ந்தி பகரணதோ லப்³ப⁴தி. ‘‘கதி²னச்சா²த³ன’’ந்தி இத³ங் வா ஸம்ப³ந்த⁴னீயங். கரொந்தஸ்ஸாதி அனாத³ரே ஸாமிவசனங். நட்ட²ந்தி சோரேஹி ஹடத்தா வா உபசிகாதீ³ஹி கா²தி³தத்தா வா நட்ட²ங். த³ட்³ட⁴ங் வாதி அக்³கி³னா த³ட்³ட⁴ங் வா. நாஸனந்திகாதி ஏவங் சீவரஸ்ஸ நாஸனந்தே லப்³ப⁴மானா அயங் மாதிகா நாஸனந்திகா நாமாதி அத்தோ². எத்த² ‘‘ந பச்செஸ்ஸ’’ந்தி இமினா பட²மங் ஆவாஸபலிபோ³து⁴பச்சே²தோ³ த³ஸ்ஸிதோ. ‘‘கரொந்தஸ்ஸேவா’’தி இமினா து³தியங் சீவரபலிபோ³து⁴பச்சே²தோ³ த³ஸ்ஸிதோ.
2714.Kathinacchādananti kathinānisaṃsaṃ cīvaravatthuṃ. Na paccessanti na paccāgamissāmi. Karontassevāti ettha ‘‘cīvara’’nti pakaraṇato labbhati. ‘‘Kathinacchādana’’nti idaṃ vā sambandhanīyaṃ. Karontassāti anādare sāmivacanaṃ. Naṭṭhanti corehi haṭattā vā upacikādīhi khāditattā vā naṭṭhaṃ. Daḍḍhaṃ vāti agginā daḍḍhaṃ vā. Nāsanantikāti evaṃ cīvarassa nāsanante labbhamānā ayaṃ mātikā nāsanantikā nāmāti attho. Ettha ‘‘na paccessa’’nti iminā paṭhamaṃ āvāsapalibodhupacchedo dassito. ‘‘Karontassevā’’ti iminā dutiyaṃ cīvarapalibodhupacchedo dassito.
2715. லத்³தா⁴னிஸங்ஸோதி லத்³த⁴கதி²னானிஸங்ஸசீவரோ. ஆனிஸங்ஸே சீவரே ஸாபெக்கோ² அபெக்க²வா ப³ஹிஸீமக³தோ வஸ்ஸங்வுத்த²ஸீமாய ப³ஹிஸீமக³தோ தங் சீவரங் கரோதி, ஸோ கதசீவரோ அந்தருப்³பா⁴ரங் அந்தரா உப்³பா⁴ரங் ஸுணாதி சே, ஸவனந்திகா நாம ஹோதீதி யோஜனா. ‘‘ப³ஹிஸீமக³தோ’’திஆதி³னா து³தியபலிபோ³து⁴பச்சே²தோ³ த³ஸ்ஸிதோ. எத்த² ‘‘கதசீவரோ’’தி வுத்தத்தா சீவரபலிபோ³து⁴பச்சே²தோ³ பட²மங் ஹோதி, இதரோ பன ‘‘ஸஹ ஸவனேன ஆவாஸபலிபோ³தோ⁴ சி²ஜ்ஜதீ’’தி (மஹாவ॰ அட்ட²॰ 311) அட்ட²கதா²ய வுத்தத்தா பச்சா² ஹோதி.
2715.Laddhānisaṃsoti laddhakathinānisaṃsacīvaro. Ānisaṃse cīvare sāpekkho apekkhavā bahisīmagato vassaṃvutthasīmāya bahisīmagato taṃ cīvaraṃ karoti, so katacīvaro antarubbhāraṃ antarā ubbhāraṃ suṇāti ce, savanantikā nāma hotīti yojanā. ‘‘Bahisīmagato’’tiādinā dutiyapalibodhupacchedo dassito. Ettha ‘‘katacīvaro’’ti vuttattā cīvarapalibodhupacchedo paṭhamaṃ hoti, itaro pana ‘‘saha savanena āvāsapalibodho chijjatī’’ti (mahāva. aṭṭha. 311) aṭṭhakathāya vuttattā pacchā hoti.
2716-7. சீவராஸாய வஸ்ஸங்வுத்தோ² ஆவாஸதோ பக்கந்தோ ‘‘துய்ஹங் சீவரங் த³ஸ்ஸாமீ’’தி கேனசி வுத்தோ ப³ஹிஸீமக³தோ பன ஸவதி, புன ‘‘தவ சீவரங் தா³துங் ந ஸக்கோமீ’’தி வுத்தோ ஆஸாய சி²ன்னமத்தாய சீவரே பச்சாஸாய உபச்சி²ன்னமத்தாய ஆஸாவச்சே²தி³கா நாம மாதிகாதி மதா ஞாதாதி யோஜனா. ஆஸாவச்சா²தி³கே கதி²னுப்³பா⁴ரே ஆவாஸபலிபோ³தோ⁴ பட²மங் சி²ஜ்ஜதி, சீவராஸாய உபச்சி²ன்னாய சீவரபலிபோ³தோ⁴ சி²ஜ்ஜதி.
2716-7. Cīvarāsāya vassaṃvuttho āvāsato pakkanto ‘‘tuyhaṃ cīvaraṃ dassāmī’’ti kenaci vutto bahisīmagato pana savati, puna ‘‘tava cīvaraṃ dātuṃ na sakkomī’’ti vutto āsāya chinnamattāya cīvare paccāsāya upacchinnamattāya āsāvacchedikā nāma mātikāti matā ñātāti yojanā. Āsāvacchādike kathinubbhāre āvāsapalibodho paṭhamaṃ chijjati, cīvarāsāya upacchinnāya cīvarapalibodho chijjati.
2718-20. யோ வஸ்ஸங்வுத்த²விஹாரம்ஹா அஞ்ஞங் விஹாரங் க³தோ ஹோதி, ஸோ ஆக³ச்ச²ங் ஆக³ச்ச²ந்தோ அந்தராமக்³கே³ கதி²னுத்³தா⁴ரங் அதிக்கமெய்ய, தஸ்ஸ ஸோ கதி²னுத்³தா⁴ரோ ஸீமாதிக்கந்திகோ மதோதி யோஜனா. தத்த² ஸீமாதிக்கந்திகே கதி²னுப்³பா⁴ரே சீவரபலிபோ³தோ⁴ பட²மங் சி²ஜ்ஜதி, தஸ்ஸ ப³ஹிஸீமே ஆவாஸபலிபோ³தோ⁴ சி²ஜ்ஜதி.
2718-20. Yo vassaṃvutthavihāramhā aññaṃ vihāraṃ gato hoti, so āgacchaṃ āgacchanto antarāmagge kathinuddhāraṃ atikkameyya, tassa so kathinuddhāro sīmātikkantiko matoti yojanā. Tattha sīmātikkantike kathinubbhāre cīvarapalibodho paṭhamaṃ chijjati, tassa bahisīme āvāsapalibodho chijjati.
எத்த² ச ‘‘ஸீமாதிக்கந்திகோ நாம சீவரகாலஸீமாதிக்கந்திகோ’’தி கேனசி வுத்தங். ‘‘ப³ஹிஸீமாயங் சீவரகாலஸமயஸ்ஸ அதிக்கந்தத்தா ஸீமாதிக்கந்திகோ’’தி (ஸாரத்த²॰ டீ॰ மஹாவ॰ 311) ஸாரத்த²தீ³பனியங் வுத்தங். ‘‘ஆக³ச்ச²ங் அந்தராமக்³கே³, தது³த்³தா⁴ரமதிக்கமே’’தி வுத்தத்தா பன ஸங்கே⁴ன கரியமானங் அந்தருப்³பா⁴ரங் ஆக³ச்ச²ந்தோ விஹாரஸீமங் அஸம்பத்தேயேவ கதி²னுப்³பா⁴ரஸ்ஸ ஜாதத்தா தங் ந ஸம்பு⁴ணெய்ய, தஸ்ஸேவங் ஸீமமதிக்கந்தஸ்ஸேவ ஸதோ புன ஆக³ச்ச²தோ அந்தராமக்³கே³ ஜாதோ கதி²னுப்³பா⁴ரோ ஸீமாதிக்கந்திகோதி அம்ஹாகங் க²ந்தி.
Ettha ca ‘‘sīmātikkantiko nāma cīvarakālasīmātikkantiko’’ti kenaci vuttaṃ. ‘‘Bahisīmāyaṃ cīvarakālasamayassa atikkantattā sīmātikkantiko’’ti (sārattha. ṭī. mahāva. 311) sāratthadīpaniyaṃ vuttaṃ. ‘‘Āgacchaṃ antarāmagge, taduddhāramatikkame’’ti vuttattā pana saṅghena kariyamānaṃ antarubbhāraṃ āgacchanto vihārasīmaṃ asampatteyeva kathinubbhārassa jātattā taṃ na sambhuṇeyya, tassevaṃ sīmamatikkantasseva sato puna āgacchato antarāmagge jāto kathinubbhāro sīmātikkantikoti amhākaṃ khanti.
கதி²னானிஸங்ஸசீவரங் ஆதா³ய ஸசே ஆவாஸே ஸாபெக்கோ²வ க³தோ ஹோதி, புன ஆக³ந்த்வா கதி²னுத்³தா⁴ரங் கதி²னஸ்ஸ அந்தருப்³பா⁴ரமேவ ஸம்பு⁴ணாதி சே யதி³ பாபுணெய்ய, தஸ்ஸ ஸோ கதி²னுத்³தா⁴ரோ ஹோதி, ஸோ ‘‘ஸஹுப்³பா⁴ரோ’’தி வுச்சதீதி யோஜனா. ஸஹுப்³பா⁴ரே த்³வே பலிபோ³தா⁴ அபுப்³ப³ங் அசரிமங் சி²ஜ்ஜந்தி.
Kathinānisaṃsacīvaraṃ ādāya sace āvāse sāpekkhova gato hoti, puna āgantvā kathinuddhāraṃ kathinassa antarubbhārameva sambhuṇāti ce yadi pāpuṇeyya, tassa so kathinuddhāro hoti, so ‘‘sahubbhāro’’ti vuccatīti yojanā. Sahubbhāre dve palibodhā apubbaṃ acarimaṃ chijjanti.
2721. ‘‘ஸீமாதிக்கந்திகேனா’’தி வத்தப்³பே³ உத்தரபத³லோபேன ‘‘ஸீமதோ’’தி வுத்தங். பக்கமனஞ்ச நிட்டா²னஞ்ச ஸன்னிட்டா²னஞ்ச ஸீமதோ ஸீமாதிக்கந்திகேன ஸஹ இமே சத்தாரோ கதி²னுப்³பா⁴ரா புக்³க³லாதீ⁴னா புக்³க³லாயத்தா ஸஹுப்³பா⁴ரஸங்கா²தோ அந்தருப்³பா⁴ரோ ஸங்கா⁴தீ⁴னோதி யோஜனா. ‘‘அந்தருப்³ப⁴ரோ’’தி கா³தா²ப³ந்த⁴வஸேன ரஸ்ஸத்தங்.
2721. ‘‘Sīmātikkantikenā’’ti vattabbe uttarapadalopena ‘‘sīmato’’ti vuttaṃ. Pakkamanañca niṭṭhānañca sanniṭṭhānañca sīmato sīmātikkantikena saha ime cattāro kathinubbhārā puggalādhīnā puggalāyattā sahubbhārasaṅkhāto antarubbhāro saṅghādhīnoti yojanā. ‘‘Antarubbharo’’ti gāthābandhavasena rassattaṃ.
2722. நாஸனந்தி நாஸனந்திகோ. ஸவனந்தி ஸவனந்திகோ. ஆஸாவச்சே²தி³காபி சாதி தயோபி கதி²னுப்³பா⁴ரா. ந து ஸங்கா⁴ ந பி⁴க்கு²தோதி ஸங்க⁴தோபி ந ஹொந்தி, புக்³க³லதோபி ந ஹொந்தீதி அத்தோ². சீவரஸ்ஸ வினாஸோ ஸங்க⁴ஸ்ஸ வா சீவரஸாமிகஸ்ஸ வா பயோகே³ன ந ஜாதோதி நாஸனகோ தாவ கதி²னுப்³பா⁴ரோ உப⁴தோபி ந ஹோதீதி வுத்தோ. ஸவனஞ்ச உப⁴யேஸங் பயோக³தோ ந ஜாதந்தி ததா² வுத்தங். ததா² ஆஸாவச்சே²தி³காபி.
2722.Nāsananti nāsanantiko. Savananti savanantiko. Āsāvacchedikāpi cāti tayopi kathinubbhārā. Na tu saṅghā na bhikkhutoti saṅghatopi na honti, puggalatopi na hontīti attho. Cīvarassa vināso saṅghassa vā cīvarasāmikassa vā payogena na jātoti nāsanako tāva kathinubbhāro ubhatopi na hotīti vutto. Savanañca ubhayesaṃ payogato na jātanti tathā vuttaṃ. Tathā āsāvacchedikāpi.
2723. ஆவாஸோயேவ பலிபோ³தோ⁴தி விக்³க³ஹோ. பலிபோ³தோ⁴ ச சீவரேதி எத்த² சீவரேதி பே⁴த³வசனிச்சா²ய நிமித்தத்தே² பு⁴ம்மங், சீவரனிமித்தபலிபோ³தோ⁴தி அத்தோ², சீவரஸங்கா²தோ பலிபோ³தோ⁴தி வுத்தங் ஹோதி. ஸச்சாதி³கு³ணயுத்தங் முஸாவாதா³தி³தோ³ஸவிமுத்தங் அத்த²ங் வத³தி ஸீலேனாதி யுத்தமுத்தத்த²வாதீ³, தேன.
2723. Āvāsoyeva palibodhoti viggaho. Palibodho ca cīvareti ettha cīvareti bhedavacanicchāya nimittatthe bhummaṃ, cīvaranimittapalibodhoti attho, cīvarasaṅkhāto palibodhoti vuttaṃ hoti. Saccādiguṇayuttaṃ musāvādādidosavimuttaṃ atthaṃ vadati sīlenāti yuttamuttatthavādī, tena.
2724. அட்ட²ன்னங் மாதிகானந்தி ப³ஹிஸீமக³தானங் வஸேன வுத்தா பக்கமனந்திகாத³யோ ஸத்த மாதிகா, ப³ஹிஸீமங் க³ந்த்வா அந்தருப்³பா⁴ரங் ஸம்பு⁴ணந்தஸ்ஸ வஸேன வுத்தோ ஸஹுப்³பா⁴ரோதி இமாஸங் அட்ட²ன்னங் மாதிகானங் வஸேன ச. அந்தருப்³பா⁴ரதோபி வாதி ப³ஹிஸீமங் அக³ந்த்வா தத்தே²வ வஸித்வா கதி²னுப்³பா⁴ரகம்மேன உப்³பா⁴ரகதி²னானங் வஸேன லப்³ப⁴னதோ அந்தருப்³பா⁴ரதோ சாதி மஹேஸினா கதி²னஸ்ஸ து³வே உப்³பா⁴ராபி வுத்தாதி யோஜனா. ப³ஹிஸீமங் க³ந்த்வா ஆக³தஸ்ஸ வஸேன ஸஹுப்³பா⁴ரோ, ப³ஹிஸீமங் ஆக³தானங் வஸேன அந்தருப்³பா⁴ரோதி ஏகோயேவ உப்³பா⁴ரோ த்³விதா⁴ வுத்தோ, தஸ்மா அந்தருப்³பா⁴ரங் விஸுங் அக்³க³ஹெத்வா அட்டே²வ மாதிகா பாளியங் (மஹாவ॰ 310) விப⁴த்தாதி வேதி³தப்³பா³.
2724.Aṭṭhannaṃmātikānanti bahisīmagatānaṃ vasena vuttā pakkamanantikādayo satta mātikā, bahisīmaṃ gantvā antarubbhāraṃ sambhuṇantassa vasena vutto sahubbhāroti imāsaṃ aṭṭhannaṃ mātikānaṃ vasena ca. Antarubbhāratopi vāti bahisīmaṃ agantvā tattheva vasitvā kathinubbhārakammena ubbhārakathinānaṃ vasena labbhanato antarubbhārato cāti mahesinā kathinassa duve ubbhārāpi vuttāti yojanā. Bahisīmaṃ gantvā āgatassa vasena sahubbhāro, bahisīmaṃ āgatānaṃ vasena antarubbhāroti ekoyeva ubbhāro dvidhā vutto, tasmā antarubbhāraṃ visuṃ aggahetvā aṭṭheva mātikā pāḷiyaṃ (mahāva. 310) vibhattāti veditabbā.
2725. அனாமந்தசாரோ உத்தரபத³லோபவஸேன ‘‘அனாமந்தா’’ இதி வுத்தோ. யாவ கதி²னங் ந உத்³த⁴ரீயதி, தாவ அனாமந்தெத்வா சரணங் கப்பிஸ்ஸதி, சாரித்தஸிக்கா²பதே³ன அனாபத்தி ப⁴விஸ்ஸதீதி அத்தோ².
2725. Anāmantacāro uttarapadalopavasena ‘‘anāmantā’’ iti vutto. Yāva kathinaṃ na uddharīyati, tāva anāmantetvā caraṇaṃ kappissati, cārittasikkhāpadena anāpatti bhavissatīti attho.
அஸமாதா³னசாரோ ‘‘அஸமாதா³ன’’ந்தி உத்தரபத³லோபேன வுத்தோ. அஸமாதா³னசாரோதி திசீவரங் அஸமாதா³ய சரணங், சீவரவிப்பவாஸோ கப்பிஸ்ஸதீதி அத்தோ².
Asamādānacāro ‘‘asamādāna’’nti uttarapadalopena vutto. Asamādānacāroti ticīvaraṃ asamādāya caraṇaṃ, cīvaravippavāso kappissatīti attho.
‘‘க³ணதோ’’தி இமினா உத்தரபத³லோபேன க³ணபோ⁴ஜனங் த³ஸ்ஸிதங். க³ணபோ⁴ஜனம்பி கப்பிஸ்ஸதி, தங் ஸரூபதோ பாசித்தியகண்டே³ வுத்தங்.
‘‘Gaṇato’’ti iminā uttarapadalopena gaṇabhojanaṃ dassitaṃ. Gaṇabhojanampi kappissati, taṃ sarūpato pācittiyakaṇḍe vuttaṃ.
‘‘யாவத³த்தி²க’’ந்தி இமினா யாவத³த்த²சீவரங் வுத்தங். யாவத³த்த²சீவரந்தி யாவதகேன சீவரேன அத்தோ², தாவதகங் அனதி⁴ட்டி²தங் அவிகப்பிதங் கப்பிஸ்ஸதீதி அத்தோ².
‘‘Yāvadatthika’’nti iminā yāvadatthacīvaraṃ vuttaṃ. Yāvadatthacīvaranti yāvatakena cīvarena attho, tāvatakaṃ anadhiṭṭhitaṃ avikappitaṃ kappissatīti attho.
‘‘தத்த² யோ சீவருப்பாதோ³’’தி இமினா ‘‘யோ ச தத்த² சீவருப்பாதோ³’’தி (மஹாவ॰ 306) வுத்தோ ஆனிஸங்ஸோ த³ஸ்ஸிதோ. யோ ச தத்த² சீவருப்பாதோ³தி தத்த² கதி²னத்த²தஸீமாயங் மதகசீவரங் வா ஹோது ஸங்க⁴ஸ்ஸ உத்³தி³ஸ்ஸ தி³ன்னங் வா ஸங்கி⁴கேன தத்ருப்பாதே³ன ஆப⁴தங் வா, யேன கேனசி ஆகாரேன யங் ஸங்கி⁴கங் சீவரங் உப்பஜ்ஜதி, தங் தேஸங் ப⁴விஸ்ஸதீதி அத்தோ². இமே பஞ்ச கதி²னானிஸங்ஸா ச வுத்தாதி ஸம்ப³ந்தோ⁴.
‘‘Tattha yo cīvaruppādo’’ti iminā ‘‘yo ca tattha cīvaruppādo’’ti (mahāva. 306) vutto ānisaṃso dassito. Yo ca tattha cīvaruppādoti tattha kathinatthatasīmāyaṃ matakacīvaraṃ vā hotu saṅghassa uddissa dinnaṃ vā saṅghikena tatruppādena ābhataṃ vā, yena kenaci ākārena yaṃ saṅghikaṃ cīvaraṃ uppajjati, taṃ tesaṃ bhavissatīti attho. Ime pañca kathinānisaṃsā ca vuttāti sambandho.
கதி²னக்க²ந்த⁴ககதா²வண்ணனா.
Kathinakkhandhakakathāvaṇṇanā.
