| Library / Tipiṭaka / д̇ибидага • Tipiṭaka / винаяавинижчаяа-дийгаа • Vinayavinicchaya-ṭīkā |
гат̇инагканд̇хагагат̇ааван̣н̣анаа
Kathinakkhandhakakathāvaṇṇanā
2697. вуд̇т̇авассаанам̣ буримигааяа вассам̣ убаг̇анд̇ваа яаава махаабавааран̣аа, д̇аава рад̇д̇ижчзд̣̇ам̣ агад̇ваа вуд̇т̇авассаанам̣ бхигкуунам̣ згасса ваа д̣̇виннам̣ д̇ин̣н̣ам̣ жад̇уннам̣ бан̃жаннам̣ ад̇ирзгаанам̣ ваа бхигкуунам̣ бан̃жаннам̣ аанисам̣саанам̣ вагкамаанаанам̣ анааманд̇ажаараад̣̇ийнам̣ бан̃жаннам̣ аанисам̣саанам̣ бадилаабхагааран̣аа мунибун̇г̇аво саб̣б̣зсам̣ аг̇ааригаад̣̇имунийнам̣ сагалаг̇ун̣аг̇ан̣зхи уд̇д̇амо бхаг̇аваа гат̇инад̇т̇аарам̣ ‘‘ануж̇аанаами, бхигкавз, вассам̣вуд̇т̇аанам̣ бхигкуунам̣ гат̇инам̣ ад̇т̇арид̇у’’нд̇и (махаава. 306) аб̣рви гат̇зсийд̇и яож̇анаа.
2697.Vutthavassānaṃ purimikāya vassaṃ upagantvā yāva mahāpavāraṇā, tāva ratticchedaṃ akatvā vutthavassānaṃ bhikkhūnaṃ ekassa vā dvinnaṃ tiṇṇaṃ catunnaṃ pañcannaṃ atirekānaṃ vā bhikkhūnaṃ pañcannaṃ ānisaṃsānaṃ vakkhamānānaṃ anāmantacārādīnaṃ pañcannaṃ ānisaṃsānaṃ paṭilābhakāraṇā munipuṅgavo sabbesaṃ agārikādimunīnaṃ sakalaguṇagaṇehi uttamo bhagavā kathinatthāraṃ ‘‘anujānāmi, bhikkhave, vassaṃvutthānaṃ bhikkhūnaṃ kathinaṃ attharitu’’nti (mahāva. 306) abrvi kathesīti yojanā.
зд̇т̇ааяам̣ винижчаяо – ‘‘гат̇инад̇т̇аарам̣ гз лабханд̇и, гз на лабханд̇ийд̇и? г̇ан̣анавасзна д̇аава бажчимагодияаа бан̃жа ж̇анаа лабханд̇и, уд̣̇д̇хам̣ сад̇асахассамби, бан̃жаннам̣ хздтаа на лабханд̇ий’’д̇и (махаава. адта. 306) ид̣̇ам̣ адтагат̇ааяа ад̇т̇аарагасса бхигкуно сан̇гхасса гат̇инад̣̇уссад̣̇аанагаммам̣ санд̇хааяа вуд̇д̇ам̣. ‘‘вуд̇т̇авассавасзна буримигааяа вассам̣ убаг̇анд̇ваа батамабавааран̣ааяа баваарид̇аа лабханд̇и, чиннавассаа ваа бажчимигааяа убаг̇ад̇аа ваа на лабханд̇и. ан̃н̃асмим̣ вихаарз вуд̇т̇авассааби на лабханд̇ийд̇и махаабажжарияам̣ вуд̇д̇а’’нд̇и (махаава. адта. 306) ид̣̇ам̣ адтагат̇ааяа аанисам̣салаабхам̣ санд̇хааяа вуд̇д̇ам̣, на гаммам̣.
Etthāyaṃ vinicchayo – ‘‘kathinatthāraṃ ke labhanti, ke na labhantīti? Gaṇanavasena tāva pacchimakoṭiyā pañca janā labhanti, uddhaṃ satasahassampi, pañcannaṃ heṭṭhā na labhantī’’ti (mahāva. aṭṭha. 306) idaṃ aṭṭhakathāya atthārakassa bhikkhuno saṅghassa kathinadussadānakammaṃ sandhāya vuttaṃ. ‘‘Vutthavassavasena purimikāya vassaṃ upagantvā paṭhamapavāraṇāya pavāritā labhanti, chinnavassā vā pacchimikāya upagatā vā na labhanti. Aññasmiṃ vihāre vutthavassāpi na labhantīti mahāpaccariyaṃ vutta’’nti (mahāva. aṭṭha. 306) idaṃ aṭṭhakathāya ānisaṃsalābhaṃ sandhāya vuttaṃ, na kammaṃ.
ид̣̇аани д̇ад̣̇убхаяам̣ вибхаж̇ид̇ваа д̣̇ассзд̇и –
Idāni tadubhayaṃ vibhajitvā dasseti –
‘‘буримигааяа убаг̇ад̇аанам̣ бана саб̣б̣з г̇ан̣абуурагаа хонд̇и, аанисам̣сам̣ на лабханд̇и, аанисам̣со ид̇арзсам̣язва ход̇и. сажз буримигааяа убаг̇ад̇аа жад̇д̇ааро ваа хонд̇и, д̇аяо ваа д̣̇вз ваа зго ваа, ид̇арз г̇ан̣абуурагз гад̇ваа гат̇инам̣ ад̇т̇арид̇аб̣б̣ам̣. ат̇а жад̇д̇ааро бхигкуу убаг̇ад̇аа, зго барибун̣н̣авассо сааман̣зро, со жз бажчимигааяа убасамбаж̇ж̇ад̇и, г̇ан̣абуураго жзва ход̇и, аанисам̣сан̃жа лабхад̇и . д̇аяо бхигкуу д̣̇вз сааман̣зраа, д̣̇вз бхигкуу д̇аяо сааман̣зраа, зго бхигку жад̇д̇ааро сааман̣зраад̇и зд̇т̇ааби зсзва наяо. сажз буримигааяа убаг̇ад̇аа гат̇инад̇т̇аарагусалаа на хонд̇и, ад̇т̇аарагусалаа канд̇хагабхаан̣агад̇т̇зраа бариязсид̇ваа аанзд̇аб̣б̣аа, гаммаваажам̣ саавзд̇ваа гат̇инам̣ ад̇т̇араабзд̇ваа д̣̇аанан̃жа бхун̃ж̇ид̇ваа г̇амиссанд̇и, аанисам̣со бана ид̇арзсам̣язва ход̇ий’’д̇и (махаава. адта. 306).
‘‘Purimikāya upagatānaṃ pana sabbe gaṇapūrakā honti, ānisaṃsaṃ na labhanti, ānisaṃso itaresaṃyeva hoti. Sace purimikāya upagatā cattāro vā honti, tayo vā dve vā eko vā, itare gaṇapūrake katvā kathinaṃ attharitabbaṃ. Atha cattāro bhikkhū upagatā, eko paripuṇṇavasso sāmaṇero, so ce pacchimikāya upasampajjati, gaṇapūrako ceva hoti, ānisaṃsañca labhati . Tayo bhikkhū dve sāmaṇerā, dve bhikkhū tayo sāmaṇerā, eko bhikkhu cattāro sāmaṇerāti etthāpi eseva nayo. Sace purimikāya upagatā kathinatthārakusalā na honti, atthārakusalā khandhakabhāṇakattherā pariyesitvā ānetabbā, kammavācaṃ sāvetvā kathinaṃ attharāpetvā dānañca bhuñjitvā gamissanti, ānisaṃso pana itaresaṃyeva hotī’’ti (mahāva. aṭṭha. 306).
гат̇инам̣ гзна д̣̇иннам̣ ваддад̇ийд̇и? язна гзнажи д̣̇звзна ваа мануссзна ваа бан̃жаннам̣ ваа сахад̇хаммигаанам̣ ан̃н̃ад̇арзна д̣̇иннам̣ ваддад̇и. гат̇инад̣̇ааяагасса вад̇д̇ам̣ ад̇т̇и, сажз со д̇ам̣ аж̇аананд̇о бужчад̇и ‘‘бханд̇з, гат̇ам̣ гат̇инам̣ д̣̇аад̇аб̣б̣а’’нд̇и, д̇асса звам̣ аажигкид̇аб̣б̣ам̣ ‘‘д̇ин̣н̣ам̣ жийвараанам̣ ан̃н̃ад̇араббахонагам̣ суурияуг̇г̇аманасамаяз вад̇т̇ам̣ ‘гат̇инажийварам̣ д̣̇змаа’д̇и д̣̇аад̇ум̣ ваддад̇и, д̇асса баригаммад̇т̇ам̣ зд̇д̇агаа наама суужияо, зд̇д̇агам̣ суд̇д̇ам̣, зд̇д̇агам̣ раж̇анам̣, баригаммам̣ гаронд̇аанам̣ зд̇д̇агаанам̣ бхигкуунам̣ яааг̇убхад̇д̇ан̃жа д̣̇аад̇ум̣ ваддад̇ий’’д̇и.
Kathinaṃ kena dinnaṃ vaṭṭatīti? Yena kenaci devena vā manussena vā pañcannaṃ vā sahadhammikānaṃ aññatarena dinnaṃ vaṭṭati. Kathinadāyakassa vattaṃ atthi, sace so taṃ ajānanto pucchati ‘‘bhante, kathaṃ kathinaṃ dātabba’’nti, tassa evaṃ ācikkhitabbaṃ ‘‘tiṇṇaṃ cīvarānaṃ aññatarappahonakaṃ sūriyuggamanasamaye vatthaṃ ‘kathinacīvaraṃ demā’ti dātuṃ vaṭṭati, tassa parikammatthaṃ ettakā nāma sūciyo, ettakaṃ suttaṃ, ettakaṃ rajanaṃ, parikammaṃ karontānaṃ ettakānaṃ bhikkhūnaṃ yāgubhattañca dātuṃ vaṭṭatī’’ti.
гат̇инад̇т̇аарагзнааби д̇хаммзна самзна уббаннам̣ гат̇инам̣ ад̇т̇аранд̇зна вад̇д̇ам̣ ж̇аанид̇аб̣б̣ам̣. д̇анд̇авааяаг̇зхад̇о хи аабхад̇асанд̇аанзнзва калимагкид̇асаадагоби на ваддад̇и, малийнасаадагоби на ваддад̇и, д̇асмаа гат̇инад̇т̇аарасаадагам̣ лабхид̇ваа суд̣̇д̇хам̣ д̇ховид̇ваа суужиаад̣̇ийни жийварагаммуубагаран̣аани саж̇ж̇зд̇ваа б̣ахуухи бхигкуухи сад̣̇д̇хим̣ д̇ад̣̇ахзва сиб̣б̣ид̇ваа нидтид̇асуужигаммам̣ раж̇ид̇ваа габбаб̣инд̣̇ум̣ д̣̇ад̇ваа гат̇инам̣ ад̇т̇арид̇аб̣б̣ам̣. сажз д̇асмим̣ анад̇т̇ад̇зязва ан̃н̃о гат̇инасаадагам̣ ад̇т̇арид̇аб̣б̣агам̣ аахарад̇и, ан̃н̃аани жа б̣ахууни гат̇инаанисам̣савад̇т̇аани д̣̇зд̇и, яо аанисам̣сам̣ б̣ахум̣ д̣̇зд̇и, д̇асса санд̇агзнзва ад̇т̇арид̇аб̣б̣ам̣. ид̇аро яат̇аа д̇ат̇аа овад̣̇ид̇ваа сан̃н̃аабзд̇аб̣б̣о.
Kathinatthārakenāpi dhammena samena uppannaṃ kathinaṃ attharantena vattaṃ jānitabbaṃ. Tantavāyagehato hi ābhatasantāneneva khalimakkhitasāṭakopi na vaṭṭati, malīnasāṭakopi na vaṭṭati, tasmā kathinatthārasāṭakaṃ labhitvā suddhaṃ dhovitvā sūciādīni cīvarakammūpakaraṇāni sajjetvā bahūhi bhikkhūhi saddhiṃ tadaheva sibbitvā niṭṭhitasūcikammaṃ rajitvā kappabinduṃ datvā kathinaṃ attharitabbaṃ. Sace tasmiṃ anatthateyeva añño kathinasāṭakaṃ attharitabbakaṃ āharati, aññāni ca bahūni kathinānisaṃsavatthāni deti, yo ānisaṃsaṃ bahuṃ deti, tassa santakeneva attharitabbaṃ. Itaro yathā tathā ovaditvā saññāpetabbo.
гат̇инам̣ бана гзна ад̇т̇арид̇аб̣б̣ам̣? яасса сан̇гхо гат̇инажийварам̣ д̣̇зд̇и. сан̇гхзна бана гасса д̣̇аад̇аб̣б̣ам̣? яо ж̇ин̣н̣ажийваро ход̇и. сажз б̣ахуу ж̇ин̣н̣ажийвараа хонд̇и, вуд̣дхасса д̣̇аад̇аб̣б̣ам̣. вуд̣дхзсуби яо махаабаривааро д̇ад̣̇ахзва жийварам̣ гад̇ваа ад̇т̇арид̇ум̣ саггод̇и, д̇асса д̣̇аад̇аб̣б̣ам̣. сажз вуд̣дхо на саггод̇и, навагад̇аро саггод̇и, д̇асса д̣̇аад̇аб̣б̣ам̣. аби жа сан̇гхзна махаат̇зрасса сан̇г̇ахам̣ гаад̇ум̣ ваддад̇и, д̇асмаа ‘‘д̇умхз, бханд̇з, г̇ан̣хат̇а, маяам̣ гад̇ваа д̣̇ассаамаа’’д̇и вад̇д̇аб̣б̣ам̣.
Kathinaṃ pana kena attharitabbaṃ? Yassa saṅgho kathinacīvaraṃ deti. Saṅghena pana kassa dātabbaṃ? Yo jiṇṇacīvaro hoti. Sace bahū jiṇṇacīvarā honti, vuḍḍhassa dātabbaṃ. Vuḍḍhesupi yo mahāparivāro tadaheva cīvaraṃ katvā attharituṃ sakkoti, tassa dātabbaṃ. Sace vuḍḍho na sakkoti, navakataro sakkoti, tassa dātabbaṃ. Api ca saṅghena mahātherassa saṅgahaṃ kātuṃ vaṭṭati, tasmā ‘‘tumhe, bhante, gaṇhatha, mayaṃ katvā dassāmā’’ti vattabbaṃ.
д̇ийсу жийварзсу яам̣ ж̇ин̣н̣ам̣ ход̇и, д̇ад̣̇ад̇т̇ааяа д̣̇аад̇аб̣б̣ам̣. багад̇ияаа д̣̇убаддажийварасса д̣̇убаддад̇т̇ааязва д̣̇аад̇аб̣б̣ам̣. сажзбисса згабаддажийварам̣ гханам̣ ход̇и, гат̇инасаадаго жа бзлаво, сааруббад̇т̇ааяа д̣̇убаддаббахонагамзва д̣̇аад̇аб̣б̣ам̣. ‘‘ахам̣ алабханд̇о згабаддам̣ баарубаамий’’д̇и вад̣̇анд̇ассааби д̣̇убаддам̣ д̣̇аад̇ум̣ ваддад̇и. яо бана лобхабагад̇иго ход̇и, д̇асса на д̣̇аад̇аб̣б̣ам̣. д̇знааби гат̇инам̣ ад̇т̇арид̇ваа ‘‘бажчаа висиб̣б̣ид̇ваа д̣̇вз жийвараани гариссаамий’’д̇и на г̇ахзд̇аб̣б̣ам̣.
Tīsu cīvaresu yaṃ jiṇṇaṃ hoti, tadatthāya dātabbaṃ. Pakatiyā dupaṭṭacīvarassa dupaṭṭatthāyeva dātabbaṃ. Sacepissa ekapaṭṭacīvaraṃ ghanaṃ hoti, kathinasāṭako ca pelavo, sāruppatthāya dupaṭṭappahonakameva dātabbaṃ. ‘‘Ahaṃ alabhanto ekapaṭṭaṃ pārupāmī’’ti vadantassāpi dupaṭṭaṃ dātuṃ vaṭṭati. Yo pana lobhapakatiko hoti, tassa na dātabbaṃ. Tenāpi kathinaṃ attharitvā ‘‘pacchā visibbitvā dve cīvarāni karissāmī’’ti na gahetabbaṃ.
яасса бана д̣̇ияяад̇и, д̇асса –
Yassa pana diyyati, tassa –
‘‘сун̣аад̇у мз, бханд̇з сан̇гхо, ид̣̇ам̣ сан̇гхасса гат̇инад̣̇уссам̣ уббаннам̣, яад̣̇и сан̇гхасса бад̇д̇агаллам̣, сан̇гхо имам̣ гат̇инад̣̇уссам̣ ид̇т̇аннаамасса бхигкуно д̣̇ад̣̇зяяа гат̇инам̣ ад̇т̇арид̇ум̣, зсаа н̃ад̇д̇и.
‘‘Suṇātu me, bhante saṅgho, idaṃ saṅghassa kathinadussaṃ uppannaṃ, yadi saṅghassa pattakallaṃ, saṅgho imaṃ kathinadussaṃ itthannāmassa bhikkhuno dadeyya kathinaṃ attharituṃ, esā ñatti.
‘‘сун̣аад̇у мз, бханд̇з сан̇гхо, ид̣̇ам̣ сан̇гхасса гат̇инад̣̇уссам̣ уббаннам̣, сан̇гхо имам̣ гат̇инад̣̇уссам̣ ид̇т̇аннаамасса бхигкуно д̣̇зд̇и гат̇инам̣ ад̇т̇арид̇ум̣, яассааяасмад̇о камад̇и имасса гат̇инад̣̇уссасса ид̇т̇аннаамасса бхигкуно д̣̇аанам̣ гат̇инам̣ ад̇т̇арид̇ум̣, со д̇ун̣хасса, яасса нагкамад̇и, со бхаасзяяа.
‘‘Suṇātu me, bhante saṅgho, idaṃ saṅghassa kathinadussaṃ uppannaṃ, saṅgho imaṃ kathinadussaṃ itthannāmassa bhikkhuno deti kathinaṃ attharituṃ, yassāyasmato khamati imassa kathinadussassa itthannāmassa bhikkhuno dānaṃ kathinaṃ attharituṃ, so tuṇhassa, yassa nakkhamati, so bhāseyya.
‘‘д̣̇иннам̣ ид̣̇ам̣ сан̇гхзна гат̇инад̣̇уссам̣ ид̇т̇аннаамасса бхигкуно гат̇инам̣ ад̇т̇арид̇ум̣, камад̇и сан̇гхасса, д̇асмаа д̇ун̣хий, звамзд̇ам̣ д̇хаараяаамий’’д̇и (махаава. 307) –
‘‘Dinnaṃ idaṃ saṅghena kathinadussaṃ itthannāmassa bhikkhuno kathinaṃ attharituṃ, khamati saṅghassa, tasmā tuṇhī, evametaṃ dhārayāmī’’ti (mahāva. 307) –
звам̣ н̃ад̇д̇ид̣̇уд̇ияааяа гаммаваажааяа д̣̇аад̇аб̣б̣анд̇и звам̣ д̣̇иннам̣.
Evaṃ ñattidutiyāya kammavācāya dātabbanti evaṃ dinnaṃ.
2698-9. на улликид̇амад̇д̇аад̣̇и-жад̇увийсад̇иваж̇ж̇ид̇анд̇и баал̣ияам̣ ааг̇ад̇зхи ‘‘на улликид̇амад̇д̇зна ад̇т̇ад̇ам̣ ход̇и гат̇ина’’нд̇и (махаава. 308) улликид̇амад̇д̇аад̣̇ийхи жад̇увийсад̇ияаа аагаарзхи важ̇ж̇ид̇ам̣. жийваранд̇и ‘‘ахад̇зна ад̇т̇ад̇ам̣ ход̇и гат̇ина’’нд̇и (махаава. 309) баал̣ияам̣ ааг̇ад̇аанам̣ сол̣асаннам̣ аагаараанам̣ ан̃н̃ад̇арзна яуд̇д̇ам̣ гад̇абарияосид̇ам̣ д̣̇иннам̣ габбаб̣инд̣̇ум̣ д̇ин̣н̣ам̣ жийвараанам̣ ан̃н̃ад̇аражийварам̣. д̇з бана жад̇увийсад̇и аагаараа, сол̣асаагаараа жа баал̣ид̇о (махаава. 308), адтагат̇аад̇о (махаава. адта. 308) жа г̇ахзд̇аб̣б̣аа. г̇ант̇аг̇ааравабарихаарад̇т̇амид̇ха на вуд̇д̇аа.
2698-9.Na ullikhitamattādi-catuvīsativajjitanti pāḷiyaṃ āgatehi ‘‘na ullikhitamattena atthataṃ hoti kathina’’nti (mahāva. 308) ullikhitamattādīhi catuvīsatiyā ākārehi vajjitaṃ. Cīvaranti ‘‘ahatena atthataṃ hoti kathina’’nti (mahāva. 309) pāḷiyaṃ āgatānaṃ soḷasannaṃ ākārānaṃ aññatarena yuttaṃ katapariyositaṃ dinnaṃ kappabinduṃ tiṇṇaṃ cīvarānaṃ aññataracīvaraṃ. Te pana catuvīsati ākārā, soḷasākārā ca pāḷito (mahāva. 308), aṭṭhakathāto (mahāva. aṭṭha. 308) ca gahetabbā. Ganthagāravaparihāratthamidha na vuttā.
бхигкунаа вагкамаанз адтад̇хаммз ж̇аананд̇зна ад̇т̇арагзна аад̣̇ааяа г̇ахзд̇ваа бураан̣агам̣ ад̇д̇анаа барибхун̃ж̇ияамаанам̣ ад̇т̇арид̇аб̣б̣ажийварзна зганаамагам̣ бураан̣ажийварам̣ уд̣̇д̇харид̇ваа бажжуд̣̇д̇харид̇ваа навам̣ ад̇т̇арид̇аб̣б̣ам̣ жийварам̣ ад̇хидтахид̇ваа бураан̣абажжуд̣̇д̇хадажийварасса наамзна ад̇хидтахид̇ваава д̇ам̣ анд̇араваасагам̣ жз, ‘‘иминаа анд̇араваасагзна гат̇инам̣ ад̇т̇араами’’ид̇и важасаа вад̇д̇аб̣б̣анд̇и яож̇анаа. сажз уд̇д̇араасан̇г̇о ход̇и, ‘‘иминаа уд̇д̇араасан̇г̇зна гат̇инам̣ ад̇т̇араами’’, сажз сан̇гхаади ход̇и, ‘‘имааяа сан̇гхаадияаа гат̇инам̣ ад̇т̇араамий’’д̇и вад̇д̇аб̣б̣ам̣.
Bhikkhunā vakkhamāne aṭṭhadhamme jānantena attharakena ādāya gahetvā purāṇakaṃ attanā paribhuñjiyamānaṃ attharitabbacīvarena ekanāmakaṃ purāṇacīvaraṃ uddharitvā paccuddharitvā navaṃ attharitabbaṃ cīvaraṃ adhiṭṭhahitvā purāṇapaccuddhaṭacīvarassa nāmena adhiṭṭhahitvāva taṃ antaravāsakaṃ ce, ‘‘iminā antaravāsakena kathinaṃ attharāmi’’iti vacasā vattabbanti yojanā. Sace uttarāsaṅgo hoti, ‘‘iminā uttarāsaṅgena kathinaṃ attharāmi’’, sace saṅghāṭi hoti, ‘‘imāya saṅghāṭiyā kathinaṃ attharāmī’’ti vattabbaṃ.
2700-1. ижжзвам̣ д̇игкад̇д̇ум̣ вуд̇д̇з гат̇инам̣ ад̇т̇ад̇ам̣ ход̇ийд̇и яож̇анаа. д̇зна бана бхигкунаа навагзна гат̇инажийварам̣ аад̣̇ааяа сан̇гхам̣ убасан̇гамма ‘‘ад̇т̇ад̇ам̣, бханд̇з, сан̇гхасса гат̇инам̣, д̇хаммиго гат̇инад̇т̇ааро, анумод̣̇ат̇а’’ид̇и вад̇д̇аб̣б̣анд̇и яож̇анаа.
2700-1. Iccevaṃ tikkhattuṃ vutte kathinaṃ atthataṃ hotīti yojanā. Tena pana bhikkhunā navakena kathinacīvaraṃ ādāya saṅghaṃ upasaṅkamma ‘‘atthataṃ, bhante, saṅghassa kathinaṃ, dhammiko kathinatthāro, anumodatha’’iti vattabbanti yojanā.
2702. анумод̣̇агзсу жа т̇зрзхи ‘‘ад̇т̇ад̇ам̣, аавусо, сан̇гхасса гат̇инам̣, д̇хаммиго гат̇инад̇т̇ааро, анумод̣̇аамаа’’д̇и вад̇д̇аб̣б̣ам̣, навзна бана ‘‘ад̇т̇ад̇ам̣, бханд̇з, сан̇гхасса гат̇инам̣, д̇хаммиго гат̇инад̇т̇ааро, анумод̣̇аамий’’д̇и ид̇и буна ийраяз гат̇зяяаад̇и яож̇анаа. г̇аат̇ааяа бана анумод̣̇анабаатасса ад̇т̇ад̣̇ассанамукзна ‘‘суад̇т̇ад̇ам̣ д̇аяаа бханд̇з’’д̇и вуд̇д̇ам̣, на баатаггамад̣̇ассанавасзнаад̇и взд̣̇ид̇аб̣б̣ам̣.
2702. Anumodakesu ca therehi ‘‘atthataṃ, āvuso, saṅghassa kathinaṃ, dhammiko kathinatthāro, anumodāmā’’ti vattabbaṃ, navena pana ‘‘atthataṃ, bhante, saṅghassa kathinaṃ, dhammiko kathinatthāro, anumodāmī’’ti iti puna īraye katheyyāti yojanā. Gāthāya pana anumodanapāṭhassa atthadassanamukhena ‘‘suatthataṃ tayā bhante’’ti vuttaṃ, na pāṭhakkamadassanavasenāti veditabbaṃ.
ад̇т̇аарагзсу жа анумод̣̇агзсу жа навзхи вуд̣дхаанам̣ важанаггамо вуд̇д̇о, вуд̣дхзхи наваанам̣ важанаггамо бана д̇ад̣̇анусаарзна яат̇аарахам̣ яож̇зд̇ваа вад̇д̇аб̣б̣од̇и г̇аат̇аасу на вуд̇д̇од̇и взд̣̇ид̇аб̣б̣о. ад̇т̇аарагзна т̇зрзна ваа навзна ваа г̇ан̣абуг̇г̇алаанам̣ важанаггамо жа г̇ан̣абуг̇г̇алзхи ад̇т̇аарагасса важанаггамо жа вуд̇д̇анаязна яат̇аарахам̣ яож̇зд̇ум̣ саггаад̇и на вуд̇д̇о.
Atthārakesu ca anumodakesu ca navehi vuḍḍhānaṃ vacanakkamo vutto, vuḍḍhehi navānaṃ vacanakkamo pana tadanusārena yathārahaṃ yojetvā vattabboti gāthāsu na vuttoti veditabbo. Atthārakena therena vā navena vā gaṇapuggalānaṃ vacanakkamo ca gaṇapuggalehi atthārakassa vacanakkamo ca vuttanayena yathārahaṃ yojetuṃ sakkāti na vutto.
звам̣ ад̇т̇ад̇з бана гат̇инз сажз гат̇инажийварзна сад̣̇д̇хим̣ аабхад̇ам̣ аанисам̣сам̣ д̣̇ааяагаа ‘‘язна амхаагам̣ гат̇инам̣ г̇ахид̇ам̣, д̇ассзва жа д̣̇змаа’’д̇и д̣̇знд̇и, бхигкусан̇гхо аниссаро. ат̇а авижаарзд̇ваава д̣̇ад̇ваа г̇ажчанд̇и, бхигкусан̇гхо иссаро. д̇асмаа сажз гат̇инад̇т̇аарагасса сзсажийварааниби д̣̇уб̣б̣алаани хонд̇и, сан̇гхзна абалогзд̇ваа д̇зсамби ад̇т̇ааяа вад̇т̇аани д̣̇аад̇аб̣б̣аани, гаммаваажааяа бана згааязва ваддад̇и. авасзсз гат̇инаанисам̣сз б̣алававад̇т̇аани вассааваасигатид̇игааяа д̣̇аад̇аб̣б̣аани, тид̇игааяа абхаавз т̇зраасанад̇о бадтааяа д̣̇аад̇аб̣б̣аани, г̇арубхан̣д̣ам̣ на бхааж̇зд̇аб̣б̣ам̣. сажз бана згасиймааяа б̣ахуу вихаараа хонд̇и, саб̣б̣з бхигкуу саннибаад̇зд̇ваа згад̇т̇а гат̇инам̣ ад̇т̇арид̇аб̣б̣ам̣, висум̣ висум̣ ад̇т̇арид̇ум̣ на ваддад̇и.
Evaṃ atthate pana kathine sace kathinacīvarena saddhiṃ ābhataṃ ānisaṃsaṃ dāyakā ‘‘yena amhākaṃ kathinaṃ gahitaṃ, tasseva ca demā’’ti denti, bhikkhusaṅgho anissaro. Atha avicāretvāva datvā gacchanti, bhikkhusaṅgho issaro. Tasmā sace kathinatthārakassa sesacīvarānipi dubbalāni honti, saṅghena apaloketvā tesampi atthāya vatthāni dātabbāni, kammavācāya pana ekāyeva vaṭṭati. Avasese kathinānisaṃse balavavatthāni vassāvāsikaṭhitikāya dātabbāni, ṭhitikāya abhāve therāsanato paṭṭhāya dātabbāni, garubhaṇḍaṃ na bhājetabbaṃ. Sace pana ekasīmāya bahū vihārā honti, sabbe bhikkhū sannipātetvā ekattha kathinaṃ attharitabbaṃ, visuṃ visuṃ attharituṃ na vaṭṭati.
2703. ‘‘гат̇инасса жа гим̣ муула’’нд̇иаад̣̇ийни саяамзва вивариссад̇и.
2703.‘‘Kathinassa ca kiṃ mūla’’ntiādīni sayameva vivarissati.
2706. адтад̇хаммуд̣̇д̣̇зсаг̇аат̇ааяа буб̣б̣агижжам̣ буб̣б̣а-важанзнзва уд̇д̇арабад̣̇алобзна вуд̇д̇ам̣. д̇знзва вагкад̇и ‘‘буб̣б̣агижжанд̇и вужжад̇ий’’д̇и. ‘‘бажжуд̣̇д̇хаара’’ид̇и вад̇д̇аб̣б̣з ‘‘бажжуд̣̇д̇хара’’ид̇и г̇аат̇ааб̣анд̇хавасзна рассо. д̇знзва вагкад̇и ‘‘бажжуд̣̇д̇хааро’’д̇и. ад̇хидтаханам̣ ад̇хидтаанам̣. бажжуд̣̇д̇хааро жа ад̇хидтаанан̃жа бажжуд̣̇д̇хараад̇хидтаанаа. ид̇арийд̇араяог̇зна д̣̇ванд̣̇асамаасо. ад̇т̇аарод̇и зд̇т̇а ‘‘гат̇инад̇т̇ааро’’д̇и багаран̣ад̇о лаб̣бхад̇и.
2706. Aṭṭhadhammuddesagāthāya pubbakiccaṃ pubba-vacaneneva uttarapadalopena vuttaṃ. Teneva vakkhati ‘‘pubbakiccanti vuccatī’’ti. ‘‘Paccuddhāra’’iti vattabbe ‘‘paccuddhara’’iti gāthābandhavasena rasso. Teneva vakkhati ‘‘paccuddhāro’’ti. Adhiṭṭhahanaṃ adhiṭṭhānaṃ. Paccuddhāro ca adhiṭṭhānañca paccuddharādhiṭṭhānā. Itarītarayogena dvandasamāso. Atthāroti ettha ‘‘kathinatthāro’’ti pakaraṇato labbhati.
‘‘маад̇игаа’’д̇и иминаа ‘‘адта гат̇инуб̣бхаарамаад̇игаа’’д̇и багаран̣ад̇о вин̃н̃ааяад̇и. яат̇ааха – ‘‘адтимаа, бхигкавз, маад̇игаа гат̇инасса уб̣бхаарааяаа’’д̇и (махаава. 310). маад̇игаад̇и маад̇аро ж̇анзд̇д̇ияо, гат̇инуб̣бхаарам̣ зд̇аа адта ж̇анзнд̇ийд̇и ад̇т̇о. уд̣̇д̇хаарод̇и гат̇инасса уд̣̇д̇хааро. аанисам̣саад̇и зд̇т̇а ‘‘гат̇инассаа’’д̇и багаран̣ад̇о лаб̣бхад̇и. гат̇инасса аанисам̣саад̇и имз адта д̇хаммаад̇и яож̇анаа. яат̇ааха ‘‘ад̇т̇ад̇агат̇инаанам̣ во, бхигкавз, бан̃жа габбиссанд̇ий’’д̇иаад̣̇и (махаава. 306). ‘‘аанисам̣сзнаа’’д̇иби баато. аанисам̣сзна саха имз адта д̇хаммаад̇и яож̇анаа.
‘‘Mātikā’’ti iminā ‘‘aṭṭha kathinubbhāramātikā’’ti pakaraṇato viññāyati. Yathāha – ‘‘aṭṭhimā, bhikkhave, mātikā kathinassa ubbhārāyā’’ti (mahāva. 310). Mātikāti mātaro janettiyo, kathinubbhāraṃ etā aṭṭha janentīti attho. Uddhāroti kathinassa uddhāro. Ānisaṃsāti ettha ‘‘kathinassā’’ti pakaraṇato labbhati. Kathinassa ānisaṃsāti ime aṭṭha dhammāti yojanā. Yathāha ‘‘atthatakathinānaṃ vo, bhikkhave, pañca kappissantī’’tiādi (mahāva. 306). ‘‘Ānisaṃsenā’’tipi pāṭho. Ānisaṃsena saha ime aṭṭha dhammāti yojanā.
2707. ‘‘на улликид̇амад̇д̇аад̣̇и-жад̇увийсад̇иваж̇ж̇ид̇а’’нд̇иаад̣̇инаа гат̇инам̣ ад̇т̇арид̇ум̣ гад̇абарияосид̇ам̣ жийварам̣ жз лад̣̇д̇хам̣, д̇ад̇т̇а бадибаж̇ж̇анавид̇хим̣ д̣̇ассзд̇ваа сажз агад̇асиб̣б̣анаад̣̇игаммам̣ вад̇т̇амзва лад̣̇д̇хам̣, д̇ад̇т̇а бадибаж̇ж̇анавид̇хим̣ буб̣б̣агижжавасзна д̣̇ассзд̇умааха ‘‘д̇хована’’нд̇иаад̣̇и. д̇ад̇т̇а д̇ховананд̇и гат̇инад̣̇уссасса сзд̇абхаавагаран̣ам̣. вижаарод̇и ‘‘бан̃жагам̣ ваа сад̇д̇агам̣ ваа навагам̣ ваа згаад̣̇асагам̣ ваа ход̇уу’’д̇и вижааран̣ам̣. чзд̣̇ананд̇и яат̇аавижаарид̇асса вад̇т̇асса чзд̣̇анам̣. б̣анд̇хананд̇и могхасуд̇д̇агааробанам̣. сиб̣б̣ананд̇и саб̣б̣асуужигаммам̣. раж̇ананд̇и раж̇анагаммам̣. габбанд̇и габбаб̣инд̣̇уд̣̇аанам̣. ‘‘буб̣б̣агижжа’’нд̇и вужжад̇и ид̣̇ам̣ саб̣б̣ам̣ гат̇инад̇т̇аарасса батамамзва гад̇д̇аб̣б̣ад̇д̇аа.
2707. ‘‘Na ullikhitamattādi-catuvīsativajjita’’ntiādinā kathinaṃ attharituṃ katapariyositaṃ cīvaraṃ ce laddhaṃ, tattha paṭipajjanavidhiṃ dassetvā sace akatasibbanādikammaṃ vatthameva laddhaṃ, tattha paṭipajjanavidhiṃ pubbakiccavasena dassetumāha ‘‘dhovana’’ntiādi. Tattha dhovananti kathinadussassa setabhāvakaraṇaṃ. Vicāroti ‘‘pañcakaṃ vā sattakaṃ vā navakaṃ vā ekādasakaṃ vā hotū’’ti vicāraṇaṃ. Chedananti yathāvicāritassa vatthassa chedanaṃ. Bandhananti moghasuttakāropanaṃ. Sibbananti sabbasūcikammaṃ. Rajananti rajanakammaṃ. Kappanti kappabindudānaṃ. ‘‘Pubbakicca’’nti vuccati idaṃ sabbaṃ kathinatthārassa paṭhamameva kattabbattā.
2708. анд̇араваасагод̇и зд̇т̇а ид̇и-сад̣̇д̣̇о луд̇д̇анид̣̇д̣̇идто. сан̇гхаади, уд̇д̇араасан̇г̇о, ат̇о анд̇араваасагод̇и зсамзва д̇у бажжуд̣̇д̇хаароби ад̇хидтаанамби ад̇т̇аароби вуд̇д̇од̇и яож̇анаа.
2708.Antaravāsakoti ettha iti-saddo luttaniddiṭṭho. Saṅghāṭi, uttarāsaṅgo, atho antaravāsakoti esameva tu paccuddhāropi adhiṭṭhānampi atthāropi vuttoti yojanā.
2709. адтамаад̇игаа (махаава. 310-311; бари. 415; махаава. адта. 310-311) д̣̇ассзд̇умааха ‘‘баггаманан̃жаа’’д̇иаад̣̇и. баггаманам̣ анд̇о зд̇ассаад̇и баггамананд̇игаад̇и вад̇д̇аб̣б̣з уд̇д̇арабад̣̇алобзна ‘‘баггамана’’нд̇и вуд̇д̇ам̣. зса наяо саб̣б̣ад̇т̇а. адтимаад̇и зд̇т̇а ‘‘маад̇игаа’’д̇и багаран̣ад̇о лаб̣бхад̇и. имаа адта маад̇игаад̇и яож̇анаа.
2709. Aṭṭhamātikā (mahāva. 310-311; pari. 415; mahāva. aṭṭha. 310-311) dassetumāha ‘‘pakkamanañcā’’tiādi. Pakkamanaṃ anto etassāti pakkamanantikāti vattabbe uttarapadalopena ‘‘pakkamana’’nti vuttaṃ. Esa nayo sabbattha. Aṭṭhimāti ettha ‘‘mātikā’’ti pakaraṇato labbhati. Imā aṭṭha mātikāti yojanā.
2710. уд̣̇д̣̇зсаануггамзна нид̣̇д̣̇исид̇умааха ‘‘гад̇ажийварамаад̣̇ааяаа’’д̇иаад̣̇и. ‘‘гад̇ажийварамаад̣̇ааяаа’’д̇и иминаа жийварабалиб̣од̇хубажчзд̣̇о д̣̇ассид̇о. ‘‘ааваасз нирабзгкаго’’д̇и иминаа д̣̇уд̇ияо ааваасабалиб̣од̇хубажчзд̣̇о д̣̇ассид̇о. зд̇т̇а саб̣б̣аваагязсу ‘‘ад̇т̇ад̇агат̇ино яо бхигку сажз баггамад̇ий’’д̇и сзсо. ад̇игганд̇ааяа сиймааяаад̇и вихаарасиймааяа ад̇игганд̇ааяа. ход̇и баггамананд̇игаад̇и зд̇т̇а ‘‘д̇асса бхигкуно’’д̇и сзсо, д̇асса бхигкуно баггамананд̇игаа наама маад̇игаа ход̇ийд̇и ад̇т̇о.
2710. Uddesānukkamena niddisitumāha ‘‘katacīvaramādāyā’’tiādi. ‘‘Katacīvaramādāyā’’ti iminā cīvarapalibodhupacchedo dassito. ‘‘Āvāse nirapekkhako’’ti iminā dutiyo āvāsapalibodhupacchedo dassito. Ettha sabbavākyesu ‘‘atthatakathino yo bhikkhu sace pakkamatī’’ti seso. Atikkantāya sīmāyāti vihārasīmāya atikkantāya. Hoti pakkamanantikāti ettha ‘‘tassa bhikkhuno’’ti seso, tassa bhikkhuno pakkamanantikā nāma mātikā hotīti attho.
2711-2. аанисам̣сам̣ наама вуд̇т̇авассзна лад̣̇д̇хам̣ агад̇асуужигаммавад̇т̇ам̣. д̇знзва вагкад̇и ‘‘гарод̇ий’’д̇иаад̣̇и. ‘‘вихаарз анабзгкаго’’д̇и иминаа зд̇т̇а батамам̣ ааваасабалиб̣од̇хубажчзд̣̇о д̣̇ассид̇о. сукавихаран̣ам̣ баяож̇анамассаад̇и сукавихаариго, вихаарод̇и. д̇ад̇т̇а д̇асмим̣ вихаарз вихаранд̇ова д̇ам̣ жийварам̣ яад̣̇и гарод̇и, д̇асмим̣ жийварз нидтид̇з нидтаананд̇аа нидтаананд̇игаад̇и вужжад̇ийд̇и яож̇анаа. ‘‘нидтид̇зжийварз’’д̇и иминаа жийварабалиб̣од̇хубажчзд̣̇о д̣̇ассид̇о.
2711-2.Ānisaṃsaṃ nāma vutthavassena laddhaṃ akatasūcikammavatthaṃ. Teneva vakkhati ‘‘karotī’’tiādi. ‘‘Vihāre anapekkhako’’ti iminā ettha paṭhamaṃ āvāsapalibodhupacchedo dassito. Sukhaviharaṇaṃ payojanamassāti sukhavihāriko, vihāroti. Tattha tasmiṃ vihāre viharantova taṃ cīvaraṃ yadi karoti, tasmiṃ cīvare niṭṭhite niṭṭhānantā niṭṭhānantikāti vuccatīti yojanā. ‘‘Niṭṭhitecīvare’’ti iminā cīvarapalibodhupacchedo dassito.
2713. д̇амассаманд̇и д̇ам̣ вуд̇т̇авассааваасам̣. д̇хуранигкзбзд̇и убхаяад̇хуранигкзбавасзна жид̇д̇аббавад̇д̇агкан̣з. саннидтаанам̣ наама д̇хуранигкзбо. зд̇т̇а балиб̣од̇хад̣̇ваяасса згагкан̣зязва убажчзд̣̇о адтагат̇ааяам̣ вуд̇д̇о ‘‘саннидтаананд̇игз д̣̇взби балиб̣од̇хаа ‘нзвимам̣ жийварам̣ гаарзссам̣, на бажжзсса’нд̇и жинд̇ид̇амад̇д̇зязва згад̇о чиж̇ж̇анд̇ий’’д̇и (махаава. адта. 311).
2713.Tamassamanti taṃ vutthavassāvāsaṃ. Dhuranikkhepeti ubhayadhuranikkhepavasena cittappavattakkhaṇe. Sanniṭṭhānaṃ nāma dhuranikkhepo. Ettha palibodhadvayassa ekakkhaṇeyeva upacchedo aṭṭhakathāyaṃ vutto ‘‘sanniṭṭhānantike dvepi palibodhā ‘nevimaṃ cīvaraṃ kāressaṃ, na paccessa’nti cintitamatteyeva ekato chijjantī’’ti (mahāva. aṭṭha. 311).
2714. гат̇инажчаад̣̇ананд̇и гат̇инаанисам̣сам̣ жийваравад̇т̇ум̣. на бажжзссанд̇и на бажжааг̇амиссаами. гаронд̇ассзваад̇и зд̇т̇а ‘‘жийвара’’нд̇и багаран̣ад̇о лаб̣бхад̇и. ‘‘гат̇инажчаад̣̇ана’’нд̇и ид̣̇ам̣ ваа самб̣анд̇ханийяам̣. гаронд̇ассаад̇и анаад̣̇арз саамиважанам̣. надтанд̇и жорзхи хадад̇д̇аа ваа убажигаад̣̇ийхи каад̣̇ид̇ад̇д̇аа ваа надтам̣. д̣̇ад̣дхам̣ ваад̇и аг̇г̇инаа д̣̇ад̣дхам̣ ваа. наасананд̇игаад̇и звам̣ жийварасса наасананд̇з лаб̣бхамаанаа аяам̣ маад̇игаа наасананд̇игаа наамаад̇и ад̇т̇о. зд̇т̇а ‘‘на бажжзсса’’нд̇и иминаа батамам̣ ааваасабалиб̣од̇хубажчзд̣̇о д̣̇ассид̇о. ‘‘гаронд̇ассзваа’’д̇и иминаа д̣̇уд̇ияам̣ жийварабалиб̣од̇хубажчзд̣̇о д̣̇ассид̇о.
2714.Kathinacchādananti kathinānisaṃsaṃ cīvaravatthuṃ. Na paccessanti na paccāgamissāmi. Karontassevāti ettha ‘‘cīvara’’nti pakaraṇato labbhati. ‘‘Kathinacchādana’’nti idaṃ vā sambandhanīyaṃ. Karontassāti anādare sāmivacanaṃ. Naṭṭhanti corehi haṭattā vā upacikādīhi khāditattā vā naṭṭhaṃ. Daḍḍhaṃ vāti agginā daḍḍhaṃ vā. Nāsanantikāti evaṃ cīvarassa nāsanante labbhamānā ayaṃ mātikā nāsanantikā nāmāti attho. Ettha ‘‘na paccessa’’nti iminā paṭhamaṃ āvāsapalibodhupacchedo dassito. ‘‘Karontassevā’’ti iminā dutiyaṃ cīvarapalibodhupacchedo dassito.
2715. лад̣̇д̇хаанисам̣сод̇и лад̣̇д̇хагат̇инаанисам̣сажийваро. аанисам̣сз жийварз саабзгко абзгкаваа б̣ахисиймаг̇ад̇о вассам̣вуд̇т̇асиймааяа б̣ахисиймаг̇ад̇о д̇ам̣ жийварам̣ гарод̇и, со гад̇ажийваро анд̇аруб̣бхаарам̣ анд̇араа уб̣бхаарам̣ сун̣аад̇и жз, савананд̇игаа наама ход̇ийд̇и яож̇анаа. ‘‘б̣ахисиймаг̇ад̇о’’д̇иаад̣̇инаа д̣̇уд̇ияабалиб̣од̇хубажчзд̣̇о д̣̇ассид̇о. зд̇т̇а ‘‘гад̇ажийваро’’д̇и вуд̇д̇ад̇д̇аа жийварабалиб̣од̇хубажчзд̣̇о батамам̣ ход̇и, ид̇аро бана ‘‘саха саванзна ааваасабалиб̣од̇хо чиж̇ж̇ад̇ий’’д̇и (махаава. адта. 311) адтагат̇ааяа вуд̇д̇ад̇д̇аа бажчаа ход̇и.
2715.Laddhānisaṃsoti laddhakathinānisaṃsacīvaro. Ānisaṃse cīvare sāpekkho apekkhavā bahisīmagato vassaṃvutthasīmāya bahisīmagato taṃ cīvaraṃ karoti, so katacīvaro antarubbhāraṃ antarā ubbhāraṃ suṇāti ce, savanantikā nāma hotīti yojanā. ‘‘Bahisīmagato’’tiādinā dutiyapalibodhupacchedo dassito. Ettha ‘‘katacīvaro’’ti vuttattā cīvarapalibodhupacchedo paṭhamaṃ hoti, itaro pana ‘‘saha savanena āvāsapalibodho chijjatī’’ti (mahāva. aṭṭha. 311) aṭṭhakathāya vuttattā pacchā hoti.
2716-7. жийвараасааяа вассам̣вуд̇т̇о ааваасад̇о багганд̇о ‘‘д̇уяхам̣ жийварам̣ д̣̇ассаамий’’д̇и гзнажи вуд̇д̇о б̣ахисиймаг̇ад̇о бана савад̇и, буна ‘‘д̇ава жийварам̣ д̣̇аад̇ум̣ на саггомий’’д̇и вуд̇д̇о аасааяа чиннамад̇д̇ааяа жийварз бажжаасааяа убажчиннамад̇д̇ааяа аасааважчзд̣̇игаа наама маад̇игаад̇и мад̇аа н̃аад̇аад̇и яож̇анаа. аасааважчаад̣̇игз гат̇инуб̣бхаарз ааваасабалиб̣од̇хо батамам̣ чиж̇ж̇ад̇и, жийвараасааяа убажчиннааяа жийварабалиб̣од̇хо чиж̇ж̇ад̇и.
2716-7. Cīvarāsāya vassaṃvuttho āvāsato pakkanto ‘‘tuyhaṃ cīvaraṃ dassāmī’’ti kenaci vutto bahisīmagato pana savati, puna ‘‘tava cīvaraṃ dātuṃ na sakkomī’’ti vutto āsāya chinnamattāya cīvare paccāsāya upacchinnamattāya āsāvacchedikā nāma mātikāti matā ñātāti yojanā. Āsāvacchādike kathinubbhāre āvāsapalibodho paṭhamaṃ chijjati, cīvarāsāya upacchinnāya cīvarapalibodho chijjati.
2718-20. яо вассам̣вуд̇т̇авихаарамхаа ан̃н̃ам̣ вихаарам̣ г̇ад̇о ход̇и, со ааг̇ажчам̣ ааг̇ажчанд̇о анд̇араамаг̇г̇з гат̇инуд̣̇д̇хаарам̣ ад̇иггамзяяа, д̇асса со гат̇инуд̣̇д̇хааро сиймаад̇игганд̇иго мад̇од̇и яож̇анаа. д̇ад̇т̇а сиймаад̇игганд̇игз гат̇инуб̣бхаарз жийварабалиб̣од̇хо батамам̣ чиж̇ж̇ад̇и, д̇асса б̣ахисиймз ааваасабалиб̣од̇хо чиж̇ж̇ад̇и.
2718-20. Yo vassaṃvutthavihāramhā aññaṃ vihāraṃ gato hoti, so āgacchaṃ āgacchanto antarāmagge kathinuddhāraṃ atikkameyya, tassa so kathinuddhāro sīmātikkantiko matoti yojanā. Tattha sīmātikkantike kathinubbhāre cīvarapalibodho paṭhamaṃ chijjati, tassa bahisīme āvāsapalibodho chijjati.
зд̇т̇а жа ‘‘сиймаад̇игганд̇иго наама жийварагааласиймаад̇игганд̇иго’’д̇и гзнажи вуд̇д̇ам̣. ‘‘б̣ахисиймааяам̣ жийварагааласамаяасса ад̇игганд̇ад̇д̇аа сиймаад̇игганд̇иго’’д̇и (саарад̇т̇а. дий. махаава. 311) саарад̇т̇ад̣̇ийбанияам̣ вуд̇д̇ам̣. ‘‘ааг̇ажчам̣ анд̇араамаг̇г̇з, д̇ад̣̇уд̣̇д̇хаарамад̇иггамз’’д̇и вуд̇д̇ад̇д̇аа бана сан̇гхзна гарияамаанам̣ анд̇аруб̣бхаарам̣ ааг̇ажчанд̇о вихаарасиймам̣ асамбад̇д̇зязва гат̇инуб̣бхаарасса ж̇аад̇ад̇д̇аа д̇ам̣ на самбхун̣зяяа, д̇ассзвам̣ сиймамад̇игганд̇ассзва сад̇о буна ааг̇ажчад̇о анд̇араамаг̇г̇з ж̇аад̇о гат̇инуб̣бхааро сиймаад̇игганд̇игод̇и амхаагам̣ канд̇и.
Ettha ca ‘‘sīmātikkantiko nāma cīvarakālasīmātikkantiko’’ti kenaci vuttaṃ. ‘‘Bahisīmāyaṃ cīvarakālasamayassa atikkantattā sīmātikkantiko’’ti (sārattha. ṭī. mahāva. 311) sāratthadīpaniyaṃ vuttaṃ. ‘‘Āgacchaṃ antarāmagge, taduddhāramatikkame’’ti vuttattā pana saṅghena kariyamānaṃ antarubbhāraṃ āgacchanto vihārasīmaṃ asampatteyeva kathinubbhārassa jātattā taṃ na sambhuṇeyya, tassevaṃ sīmamatikkantasseva sato puna āgacchato antarāmagge jāto kathinubbhāro sīmātikkantikoti amhākaṃ khanti.
гат̇инаанисам̣сажийварам̣ аад̣̇ааяа сажз ааваасз саабзгкова г̇ад̇о ход̇и, буна ааг̇анд̇ваа гат̇инуд̣̇д̇хаарам̣ гат̇инасса анд̇аруб̣бхаарамзва самбхун̣аад̇и жз яад̣̇и баабун̣зяяа, д̇асса со гат̇инуд̣̇д̇хааро ход̇и, со ‘‘сахуб̣бхааро’’д̇и вужжад̇ийд̇и яож̇анаа. сахуб̣бхаарз д̣̇вз балиб̣од̇хаа абуб̣б̣ам̣ ажаримам̣ чиж̇ж̇анд̇и.
Kathinānisaṃsacīvaraṃ ādāya sace āvāse sāpekkhova gato hoti, puna āgantvā kathinuddhāraṃ kathinassa antarubbhārameva sambhuṇāti ce yadi pāpuṇeyya, tassa so kathinuddhāro hoti, so ‘‘sahubbhāro’’ti vuccatīti yojanā. Sahubbhāre dve palibodhā apubbaṃ acarimaṃ chijjanti.
2721. ‘‘сиймаад̇игганд̇игзнаа’’д̇и вад̇д̇аб̣б̣з уд̇д̇арабад̣̇алобзна ‘‘сиймад̇о’’д̇и вуд̇д̇ам̣. баггаманан̃жа нидтаанан̃жа саннидтаанан̃жа сиймад̇о сиймаад̇игганд̇игзна саха имз жад̇д̇ааро гат̇инуб̣бхаараа буг̇г̇алаад̇хийнаа буг̇г̇алааяад̇д̇аа сахуб̣бхаарасан̇каад̇о анд̇аруб̣бхааро сан̇гхаад̇хийнод̇и яож̇анаа. ‘‘анд̇аруб̣бхаро’’д̇и г̇аат̇ааб̣анд̇хавасзна рассад̇д̇ам̣.
2721. ‘‘Sīmātikkantikenā’’ti vattabbe uttarapadalopena ‘‘sīmato’’ti vuttaṃ. Pakkamanañca niṭṭhānañca sanniṭṭhānañca sīmato sīmātikkantikena saha ime cattāro kathinubbhārā puggalādhīnā puggalāyattā sahubbhārasaṅkhāto antarubbhāro saṅghādhīnoti yojanā. ‘‘Antarubbharo’’ti gāthābandhavasena rassattaṃ.
2722. наасананд̇и наасананд̇иго. савананд̇и савананд̇иго. аасааважчзд̣̇игааби жаад̇и д̇аяоби гат̇инуб̣бхаараа. на д̇у сан̇гхаа на бхигкуд̇од̇и сан̇гхад̇оби на хонд̇и, буг̇г̇алад̇оби на хонд̇ийд̇и ад̇т̇о. жийварасса винаасо сан̇гхасса ваа жийварасаамигасса ваа баяог̇зна на ж̇аад̇од̇и наасанаго д̇аава гат̇инуб̣бхааро убхад̇оби на ход̇ийд̇и вуд̇д̇о. саванан̃жа убхаязсам̣ баяог̇ад̇о на ж̇аад̇анд̇и д̇ат̇аа вуд̇д̇ам̣. д̇ат̇аа аасааважчзд̣̇игааби.
2722.Nāsananti nāsanantiko. Savananti savanantiko. Āsāvacchedikāpi cāti tayopi kathinubbhārā. Na tu saṅghā na bhikkhutoti saṅghatopi na honti, puggalatopi na hontīti attho. Cīvarassa vināso saṅghassa vā cīvarasāmikassa vā payogena na jātoti nāsanako tāva kathinubbhāro ubhatopi na hotīti vutto. Savanañca ubhayesaṃ payogato na jātanti tathā vuttaṃ. Tathā āsāvacchedikāpi.
2723. ааваасоязва балиб̣од̇ход̇и виг̇г̇ахо. балиб̣од̇хо жа жийварзд̇и зд̇т̇а жийварзд̇и бхзд̣̇аважанижчааяа нимид̇д̇ад̇т̇з бхуммам̣, жийваранимид̇д̇абалиб̣од̇ход̇и ад̇т̇о, жийварасан̇каад̇о балиб̣од̇ход̇и вуд̇д̇ам̣ ход̇и. сажжаад̣̇иг̇ун̣аяуд̇д̇ам̣ мусааваад̣̇аад̣̇ид̣̇осавимуд̇д̇ам̣ ад̇т̇ам̣ вад̣̇ад̇и сийлзнаад̇и яуд̇д̇амуд̇д̇ад̇т̇аваад̣̇ий, д̇зна.
2723. Āvāsoyeva palibodhoti viggaho. Palibodho ca cīvareti ettha cīvareti bhedavacanicchāya nimittatthe bhummaṃ, cīvaranimittapalibodhoti attho, cīvarasaṅkhāto palibodhoti vuttaṃ hoti. Saccādiguṇayuttaṃ musāvādādidosavimuttaṃ atthaṃ vadati sīlenāti yuttamuttatthavādī, tena.
2724. адтаннам̣ маад̇игаананд̇и б̣ахисиймаг̇ад̇аанам̣ васзна вуд̇д̇аа баггамананд̇игаад̣̇аяо сад̇д̇а маад̇игаа, б̣ахисиймам̣ г̇анд̇ваа анд̇аруб̣бхаарам̣ самбхун̣анд̇асса васзна вуд̇д̇о сахуб̣бхаарод̇и имаасам̣ адтаннам̣ маад̇игаанам̣ васзна жа. анд̇аруб̣бхаарад̇оби ваад̇и б̣ахисиймам̣ аг̇анд̇ваа д̇ад̇т̇зва васид̇ваа гат̇инуб̣бхаарагаммзна уб̣бхаарагат̇инаанам̣ васзна лаб̣бханад̇о анд̇аруб̣бхаарад̇о жаад̇и махзсинаа гат̇инасса д̣̇увз уб̣бхаарааби вуд̇д̇аад̇и яож̇анаа. б̣ахисиймам̣ г̇анд̇ваа ааг̇ад̇асса васзна сахуб̣бхааро, б̣ахисиймам̣ ааг̇ад̇аанам̣ васзна анд̇аруб̣бхаарод̇и згоязва уб̣бхааро д̣̇вид̇хаа вуд̇д̇о, д̇асмаа анд̇аруб̣бхаарам̣ висум̣ аг̇г̇ахзд̇ваа адтзва маад̇игаа баал̣ияам̣ (махаава. 310) вибхад̇д̇аад̇и взд̣̇ид̇аб̣б̣аа.
2724.Aṭṭhannaṃmātikānanti bahisīmagatānaṃ vasena vuttā pakkamanantikādayo satta mātikā, bahisīmaṃ gantvā antarubbhāraṃ sambhuṇantassa vasena vutto sahubbhāroti imāsaṃ aṭṭhannaṃ mātikānaṃ vasena ca. Antarubbhāratopi vāti bahisīmaṃ agantvā tattheva vasitvā kathinubbhārakammena ubbhārakathinānaṃ vasena labbhanato antarubbhārato cāti mahesinā kathinassa duve ubbhārāpi vuttāti yojanā. Bahisīmaṃ gantvā āgatassa vasena sahubbhāro, bahisīmaṃ āgatānaṃ vasena antarubbhāroti ekoyeva ubbhāro dvidhā vutto, tasmā antarubbhāraṃ visuṃ aggahetvā aṭṭheva mātikā pāḷiyaṃ (mahāva. 310) vibhattāti veditabbā.
2725. анааманд̇ажааро уд̇д̇арабад̣̇алобавасзна ‘‘анааманд̇аа’’ ид̇и вуд̇д̇о. яаава гат̇инам̣ на уд̣̇д̇харийяад̇и, д̇аава анааманд̇зд̇ваа жаран̣ам̣ габбиссад̇и, жаарид̇д̇асигкаабад̣̇зна анаабад̇д̇и бхависсад̇ийд̇и ад̇т̇о.
2725. Anāmantacāro uttarapadalopavasena ‘‘anāmantā’’ iti vutto. Yāva kathinaṃ na uddharīyati, tāva anāmantetvā caraṇaṃ kappissati, cārittasikkhāpadena anāpatti bhavissatīti attho.
асамаад̣̇аанажааро ‘‘асамаад̣̇аана’’нд̇и уд̇д̇арабад̣̇алобзна вуд̇д̇о. асамаад̣̇аанажаарод̇и д̇ижийварам̣ асамаад̣̇ааяа жаран̣ам̣, жийваравиббаваасо габбиссад̇ийд̇и ад̇т̇о.
Asamādānacāro ‘‘asamādāna’’nti uttarapadalopena vutto. Asamādānacāroti ticīvaraṃ asamādāya caraṇaṃ, cīvaravippavāso kappissatīti attho.
‘‘г̇ан̣ад̇о’’д̇и иминаа уд̇д̇арабад̣̇алобзна г̇ан̣абхож̇анам̣ д̣̇ассид̇ам̣. г̇ан̣абхож̇анамби габбиссад̇и, д̇ам̣ саруубад̇о баажид̇д̇ияаган̣д̣з вуд̇д̇ам̣.
‘‘Gaṇato’’ti iminā uttarapadalopena gaṇabhojanaṃ dassitaṃ. Gaṇabhojanampi kappissati, taṃ sarūpato pācittiyakaṇḍe vuttaṃ.
‘‘яаавад̣̇ад̇т̇ига’’нд̇и иминаа яаавад̣̇ад̇т̇ажийварам̣ вуд̇д̇ам̣. яаавад̣̇ад̇т̇ажийваранд̇и яаавад̇агзна жийварзна ад̇т̇о, д̇аавад̇агам̣ анад̇хидтид̇ам̣ авигаббид̇ам̣ габбиссад̇ийд̇и ад̇т̇о.
‘‘Yāvadatthika’’nti iminā yāvadatthacīvaraṃ vuttaṃ. Yāvadatthacīvaranti yāvatakena cīvarena attho, tāvatakaṃ anadhiṭṭhitaṃ avikappitaṃ kappissatīti attho.
‘‘д̇ад̇т̇а яо жийваруббаад̣̇о’’д̇и иминаа ‘‘яо жа д̇ад̇т̇а жийваруббаад̣̇о’’д̇и (махаава. 306) вуд̇д̇о аанисам̣со д̣̇ассид̇о. яо жа д̇ад̇т̇а жийваруббаад̣̇од̇и д̇ад̇т̇а гат̇инад̇т̇ад̇асиймааяам̣ мад̇агажийварам̣ ваа ход̇у сан̇гхасса уд̣̇д̣̇исса д̣̇иннам̣ ваа сан̇гхигзна д̇ад̇руббаад̣̇зна аабхад̇ам̣ ваа, язна гзнажи аагаарзна яам̣ сан̇гхигам̣ жийварам̣ уббаж̇ж̇ад̇и, д̇ам̣ д̇зсам̣ бхависсад̇ийд̇и ад̇т̇о. имз бан̃жа гат̇инаанисам̣саа жа вуд̇д̇аад̇и самб̣анд̇хо.
‘‘Tattha yo cīvaruppādo’’ti iminā ‘‘yo ca tattha cīvaruppādo’’ti (mahāva. 306) vutto ānisaṃso dassito. Yo ca tattha cīvaruppādoti tattha kathinatthatasīmāyaṃ matakacīvaraṃ vā hotu saṅghassa uddissa dinnaṃ vā saṅghikena tatruppādena ābhataṃ vā, yena kenaci ākārena yaṃ saṅghikaṃ cīvaraṃ uppajjati, taṃ tesaṃ bhavissatīti attho. Ime pañca kathinānisaṃsā ca vuttāti sambandho.
гат̇инагканд̇хагагат̇ааван̣н̣анаа.
Kathinakkhandhakakathāvaṇṇanā.
