| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
7. கதி²னக்க²ந்த⁴கோ
7. Kathinakkhandhako
187. கதி²னானுஜானநா
187. Kathinānujānanā
306. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன திங்ஸமத்தா பாவெய்யகா 1 பி⁴க்கூ², ஸப்³பே³ ஆரஞ்ஞிகா ஸப்³பே³ பிண்ட³பாதிகா ஸப்³பே³ பங்ஸுகூலிகா ஸப்³பே³ தேசீவரிகா ஸாவத்தி²ங் ஆக³ச்ச²ந்தா ப⁴க³வந்தங் த³ஸ்ஸனாய உபகட்டா²ய வஸ்ஸூபனாயிகாய நாஸக்கி²ங்ஸு ஸாவத்தி²யங் வஸ்ஸூபனாயிகங் ஸம்பா⁴வேதுங்; அந்தராமக்³கே³ ஸாகேதே வஸ்ஸங் உபக³ச்சி²ங்ஸு. தே உக்கண்டி²தரூபா வஸ்ஸங் வஸிங்ஸு – ஆஸன்னேவ நோ ப⁴க³வா விஹரதி இதோ ச²ஸு யோஜனேஸு, ந ச மயங் லபா⁴ம ப⁴க³வந்தங் த³ஸ்ஸனாயாதி. அத² கோ² தே பி⁴க்கூ² வஸ்ஸங்வுட்டா², தேமாஸச்சயேன கதாய பவாரணாய, தே³வே வஸ்ஸந்தே, உத³கஸங்க³ஹே உத³கசிக்க²ல்லே ஓகபுண்ணேஹி சீவரேஹி கிலந்தரூபா யேன ஸாவத்தி² ஜேதவனங் அனாத²பிண்டி³கஸ்ஸ ஆராமோ, யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஆசிண்ணங் கோ² பனேதங் பு³த்³தா⁴னங் ப⁴க³வந்தானங் ஆக³ந்துகேஹி பி⁴க்கூ²ஹி ஸத்³தி⁴ங் படிஸம்மோதி³துங். அத² கோ² ப⁴க³வா தே பி⁴க்கூ² ஏதத³வோச – ‘‘கச்சி, பி⁴க்க²வே, க²மனீயங், கச்சி யாபனீயங், கச்சி ஸமக்³கா³ ஸம்மோத³மானா அவிவத³மானா பா²ஸுகங் வஸ்ஸங் வஸித்த², ந ச பிண்ட³கேன கிலமித்தா²’’தி? ‘‘க²மனீயங், ப⁴க³வா; யாபனீயங், ப⁴க³வா; ஸமக்³கா³ ச மயங், ப⁴ந்தே, ஸம்மோத³மானா அவிவத³மானா வஸ்ஸங் வஸிம்ஹா, ந ச பிண்ட³கேன கிலமிம்ஹா . இத⁴ மயங், ப⁴ந்தே, திங்ஸமத்தா பாவெய்யகா பி⁴க்கூ² ஸாவத்தி²ங் ஆக³ச்ச²ந்தா ப⁴க³வந்தங் த³ஸ்ஸனாய உபகட்டா²ய வஸ்ஸூபனாயிகாய நாஸக்கி²ம்ஹா ஸாவத்தி²யங் வஸ்ஸூபனாயிகங் ஸம்பா⁴வேதுங், அந்தராமக்³கே³ ஸாகேதே வஸ்ஸங் உபக³ச்சி²ம்ஹா. தே மயங், ப⁴ந்தே, உக்கண்டி²தரூபா வஸ்ஸங் வஸிம்ஹா – ‘ஆஸன்னேவ நோ ப⁴க³வா விஹரதி இதோ ச²ஸு யோஜனேஸு, ந ச மயங் லபா⁴ம ப⁴க³வந்தங் த³ஸ்ஸனாயா’தி. அத² கோ² மயங், ப⁴ந்தே, வஸ்ஸங்வுட்டா², தேமாஸச்சயேன கதாய பவாரணாய, தே³வே வஸ்ஸந்தே, உத³கஸங்க³ஹே உத³கசிக்க²ல்லே ஓகபுண்ணேஹி சீவரேஹி கிலந்தரூபா அத்³தா⁴னங் ஆக³தாதி. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, வஸ்ஸங்வுட்டா²னங் பி⁴க்கூ²னங் கதி²னங் 2 அத்த²ரிதுங். அத்த²தகதி²னானங் வோ, பி⁴க்க²வே, பஞ்ச கப்பிஸ்ஸந்தி – அனாமந்தசாரோ, அஸமாதா³னசாரோ, க³ணபோ⁴ஜனங், யாவத³த்த²சீவரங், யோ ச தத்த² சீவருப்பாதோ³ ஸோ நேஸங் ப⁴விஸ்ஸதீதி. அத்த²தகதி²னானங் வோ, பி⁴க்க²வே, இமானி பஞ்ச கப்பிஸ்ஸந்தி. ஏவஞ்ச பன, பி⁴க்க²வே, கதி²னங் அத்த²ரிதப்³ப³ங். ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
306. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena tiṃsamattā pāveyyakā 3 bhikkhū, sabbe āraññikā sabbe piṇḍapātikā sabbe paṃsukūlikā sabbe tecīvarikā sāvatthiṃ āgacchantā bhagavantaṃ dassanāya upakaṭṭhāya vassūpanāyikāya nāsakkhiṃsu sāvatthiyaṃ vassūpanāyikaṃ sambhāvetuṃ; antarāmagge sākete vassaṃ upagacchiṃsu. Te ukkaṇṭhitarūpā vassaṃ vasiṃsu – āsanneva no bhagavā viharati ito chasu yojanesu, na ca mayaṃ labhāma bhagavantaṃ dassanāyāti. Atha kho te bhikkhū vassaṃvuṭṭhā, temāsaccayena katāya pavāraṇāya, deve vassante, udakasaṅgahe udakacikkhalle okapuṇṇehi cīvarehi kilantarūpā yena sāvatthi jetavanaṃ anāthapiṇḍikassa ārāmo, yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Āciṇṇaṃ kho panetaṃ buddhānaṃ bhagavantānaṃ āgantukehi bhikkhūhi saddhiṃ paṭisammodituṃ. Atha kho bhagavā te bhikkhū etadavoca – ‘‘kacci, bhikkhave, khamanīyaṃ, kacci yāpanīyaṃ, kacci samaggā sammodamānā avivadamānā phāsukaṃ vassaṃ vasittha, na ca piṇḍakena kilamitthā’’ti? ‘‘Khamanīyaṃ, bhagavā; yāpanīyaṃ, bhagavā; samaggā ca mayaṃ, bhante, sammodamānā avivadamānā vassaṃ vasimhā, na ca piṇḍakena kilamimhā . Idha mayaṃ, bhante, tiṃsamattā pāveyyakā bhikkhū sāvatthiṃ āgacchantā bhagavantaṃ dassanāya upakaṭṭhāya vassūpanāyikāya nāsakkhimhā sāvatthiyaṃ vassūpanāyikaṃ sambhāvetuṃ, antarāmagge sākete vassaṃ upagacchimhā. Te mayaṃ, bhante, ukkaṇṭhitarūpā vassaṃ vasimhā – ‘āsanneva no bhagavā viharati ito chasu yojanesu, na ca mayaṃ labhāma bhagavantaṃ dassanāyā’ti. Atha kho mayaṃ, bhante, vassaṃvuṭṭhā, temāsaccayena katāya pavāraṇāya, deve vassante, udakasaṅgahe udakacikkhalle okapuṇṇehi cīvarehi kilantarūpā addhānaṃ āgatāti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, vassaṃvuṭṭhānaṃ bhikkhūnaṃ kathinaṃ 4 attharituṃ. Atthatakathinānaṃ vo, bhikkhave, pañca kappissanti – anāmantacāro, asamādānacāro, gaṇabhojanaṃ, yāvadatthacīvaraṃ, yo ca tattha cīvaruppādo so nesaṃ bhavissatīti. Atthatakathinānaṃ vo, bhikkhave, imāni pañca kappissanti. Evañca pana, bhikkhave, kathinaṃ attharitabbaṃ. Byattena bhikkhunā paṭibalena saṅgho ñāpetabbo –
307. ‘‘ஸுணாது மே, ப⁴ந்தே, ஸங்கோ⁴. இத³ங் ஸங்க⁴ஸ்ஸ கதி²னது³ஸ்ஸங் உப்பன்னங். யதி³ ஸங்க⁴ஸ்ஸ பத்தகல்லங், ஸங்கோ⁴ இமங் கதி²னது³ஸ்ஸங் இத்த²ன்னாமஸ்ஸ பி⁴க்கு²னோ த³தெ³ய்ய கதி²னங் அத்த²ரிதுங். ஏஸா ஞத்தி.
307. ‘‘Suṇātu me, bhante, saṅgho. Idaṃ saṅghassa kathinadussaṃ uppannaṃ. Yadi saṅghassa pattakallaṃ, saṅgho imaṃ kathinadussaṃ itthannāmassa bhikkhuno dadeyya kathinaṃ attharituṃ. Esā ñatti.
‘‘ஸுணாது மே, ப⁴ந்தே, ஸங்கோ⁴. இத³ங் ஸங்க⁴ஸ்ஸ கதி²னது³ஸ்ஸங் உப்பன்னங். ஸங்கோ⁴ இமங் கதி²னது³ஸ்ஸங் இத்த²ன்னாமஸ்ஸ பி⁴க்கு²னோ தே³தி கதி²னங் அத்த²ரிதுங். யஸ்ஸாயஸ்மதோ க²மதி இமஸ்ஸ கதி²னது³ஸ்ஸஸ்ஸ இத்த²ன்னாமஸ்ஸ பி⁴க்கு²னோ தா³னங் கதி²னங் அத்த²ரிதுங், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Idaṃ saṅghassa kathinadussaṃ uppannaṃ. Saṅgho imaṃ kathinadussaṃ itthannāmassa bhikkhuno deti kathinaṃ attharituṃ. Yassāyasmato khamati imassa kathinadussassa itthannāmassa bhikkhuno dānaṃ kathinaṃ attharituṃ, so tuṇhassa; yassa nakkhamati, so bhāseyya.
‘‘தி³ன்னங் இத³ங் ஸங்கே⁴ன கதி²னது³ஸ்ஸங் இத்த²ன்னாமஸ்ஸ பி⁴க்கு²னோ கதி²னங் அத்த²ரிதுங். க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Dinnaṃ idaṃ saṅghena kathinadussaṃ itthannāmassa bhikkhuno kathinaṃ attharituṃ. Khamati saṅghassa, tasmā tuṇhī, evametaṃ dhārayāmī’’ti.
308. ‘‘ஏவங் கோ², பி⁴க்க²வே, அத்த²தங் ஹோதி கதி²னங், ஏவங் அனத்த²தங். கத²ஞ்ச பன, பி⁴க்க²வே, அனத்த²தங் ஹோதி கதி²னங்? ந உல்லிகி²தமத்தேன அத்த²தங் ஹோதி கதி²னங், ந தோ⁴வனமத்தேன அத்த²தங் ஹோதி கதி²னங், ந சீவரவிசாரணமத்தேன 5 அத்த²தங் ஹோதி கதி²னங், ந சே²த³னமத்தேன அத்த²தங் ஹோதி கதி²னங், ந ப³ந்த⁴னமத்தேன அத்த²தங் ஹோதி கதி²னங், ந ஓவட்டியகரணமத்தேன 6 அத்த²தங் ஹோதி கதி²னங், ந கண்டு³ஸகரணமத்தேன அத்த²தங் ஹோதி கதி²னங், ந த³ள்ஹீகம்மகரணமத்தேன அத்த²தங் ஹோதி கதி²னங், ந அனுவாதகரணமத்தேன அத்த²தங் ஹோதி கதி²னங், ந பரிப⁴ண்ட³கரணமத்தேன அத்த²தங் ஹோதி கதி²னங், ந ஓவத்³தெ⁴ய்யகரணமத்தேன அத்த²தங் ஹோதி கதி²னங், ந கம்ப³லமத்³த³னமத்தேன அத்த²தங் ஹோதி கதி²னங், ந நிமித்தகதேன அத்த²தங் ஹோதி கதி²னங், ந பரிகதா²கதேன அத்த²தங் ஹோதி கதி²னங், ந குக்குகதேன அத்த²தங் ஹோதி கதி²னங், ந ஸன்னிதி⁴கதேன அத்த²தங் ஹோதி கதி²னங், ந நிஸ்ஸக்³கி³யேன அத்த²தங் ஹோதி கதி²னங், ந அகப்பகதேன அத்த²தங் ஹோதி கதி²னங் , ந அஞ்ஞத்ர ஸங்கா⁴டியா அத்த²தங் ஹோதி கதி²னங், ந அஞ்ஞத்ர உத்தராஸங்கே³ன அத்த²தங் ஹோதி கதி²னங், ந அஞ்ஞத்ர அந்தரவாஸகேன அத்த²தங் ஹோதி கதி²னங், ந அஞ்ஞத்ர பஞ்சகேன வா அதிரேகபஞ்சகேன வா தத³ஹேவ ஸஞ்சி²ன்னேன ஸமண்ட³லீகதேன அத்த²தங் ஹோதி கதி²னங், ந அஞ்ஞத்ர புக்³க³லஸ்ஸ அத்தா²ரா அத்த²தங் ஹோதி கதி²னங்; ஸம்மா சேவ அத்த²தங் ஹோதி கதி²னங், தஞ்சே நிஸ்ஸீமட்டோ² அனுமோத³தி, ஏவம்பி அனத்த²தங் ஹோதி கதி²னங். ஏவங் கோ², பி⁴க்க²வே, அனத்த²தங் ஹோதி கதி²னங்.
308. ‘‘Evaṃ kho, bhikkhave, atthataṃ hoti kathinaṃ, evaṃ anatthataṃ. Kathañca pana, bhikkhave, anatthataṃ hoti kathinaṃ? Na ullikhitamattena atthataṃ hoti kathinaṃ, na dhovanamattena atthataṃ hoti kathinaṃ, na cīvaravicāraṇamattena 7 atthataṃ hoti kathinaṃ, na chedanamattena atthataṃ hoti kathinaṃ, na bandhanamattena atthataṃ hoti kathinaṃ, na ovaṭṭiyakaraṇamattena 8 atthataṃ hoti kathinaṃ, na kaṇḍusakaraṇamattena atthataṃ hoti kathinaṃ, na daḷhīkammakaraṇamattena atthataṃ hoti kathinaṃ, na anuvātakaraṇamattena atthataṃ hoti kathinaṃ, na paribhaṇḍakaraṇamattena atthataṃ hoti kathinaṃ, na ovaddheyyakaraṇamattena atthataṃ hoti kathinaṃ, na kambalamaddanamattena atthataṃ hoti kathinaṃ, na nimittakatena atthataṃ hoti kathinaṃ, na parikathākatena atthataṃ hoti kathinaṃ, na kukkukatena atthataṃ hoti kathinaṃ, na sannidhikatena atthataṃ hoti kathinaṃ, na nissaggiyena atthataṃ hoti kathinaṃ, na akappakatena atthataṃ hoti kathinaṃ , na aññatra saṅghāṭiyā atthataṃ hoti kathinaṃ, na aññatra uttarāsaṅgena atthataṃ hoti kathinaṃ, na aññatra antaravāsakena atthataṃ hoti kathinaṃ, na aññatra pañcakena vā atirekapañcakena vā tadaheva sañchinnena samaṇḍalīkatena atthataṃ hoti kathinaṃ, na aññatra puggalassa atthārā atthataṃ hoti kathinaṃ; sammā ceva atthataṃ hoti kathinaṃ, tañce nissīmaṭṭho anumodati, evampi anatthataṃ hoti kathinaṃ. Evaṃ kho, bhikkhave, anatthataṃ hoti kathinaṃ.
309. ‘‘கத²ஞ்ச, பி⁴க்க²வே, அத்த²தங் ஹோதி கதி²னங்? அஹதேன அத்த²தங் ஹோதி கதி²னங், அஹதகப்பேன அத்த²தங் ஹோதி கதி²னங், பிலோதிகாய அத்த²தங் ஹோதி கதி²னங், பங்ஸுகூலேன அத்த²தங் ஹோதி கதி²னங், பாபணிகேன அத்த²தங் ஹோதி கதி²னங், அனிமித்தகதேன அத்த²தங் ஹோதி கதி²னங், அபரிகதா²கதேன அத்த²தங் ஹோதி கதி²னங், அகுக்குகதேன அத்த²தங் ஹோதி கதி²னங், அஸன்னிதி⁴கதேன அத்த²தங் ஹோதி கதி²னங், அனிஸ்ஸக்³கி³யேன அத்த²தங் ஹோதி கதி²னங், கப்பகதேன அத்த²தங் ஹோதி கதி²னங், ஸங்கா⁴டியா அத்த²தங் ஹோதி கதி²னங், உத்தராஸங்கே³ன அத்த²தங் ஹோதி கதி²னங், அந்தரவாஸகேன அத்த²தங் ஹோதி கதி²னங், பஞ்சகேன வா அதிரேகபஞ்சகேன வா தத³ஹேவ ஸஞ்சி²ன்னேன ஸமண்ட³லீகதேன அத்த²தங் ஹோதி கதி²னங், புக்³க³லஸ்ஸ அத்தா²ரா அத்த²தங் ஹோதி கதி²னங்; ஸம்மா சே அத்த²தங் ஹோதி கதி²னங், தஞ்சே ஸீமட்டோ² அனுமோத³தி, ஏவம்பி அத்த²தங் ஹோதி கதி²னங் . ஏவங் கோ², பி⁴க்க²வே, அத்த²தங் ஹோதி கதி²னங்.
309. ‘‘Kathañca, bhikkhave, atthataṃ hoti kathinaṃ? Ahatena atthataṃ hoti kathinaṃ, ahatakappena atthataṃ hoti kathinaṃ, pilotikāya atthataṃ hoti kathinaṃ, paṃsukūlena atthataṃ hoti kathinaṃ, pāpaṇikena atthataṃ hoti kathinaṃ, animittakatena atthataṃ hoti kathinaṃ, aparikathākatena atthataṃ hoti kathinaṃ, akukkukatena atthataṃ hoti kathinaṃ, asannidhikatena atthataṃ hoti kathinaṃ, anissaggiyena atthataṃ hoti kathinaṃ, kappakatena atthataṃ hoti kathinaṃ, saṅghāṭiyā atthataṃ hoti kathinaṃ, uttarāsaṅgena atthataṃ hoti kathinaṃ, antaravāsakena atthataṃ hoti kathinaṃ, pañcakena vā atirekapañcakena vā tadaheva sañchinnena samaṇḍalīkatena atthataṃ hoti kathinaṃ, puggalassa atthārā atthataṃ hoti kathinaṃ; sammā ce atthataṃ hoti kathinaṃ, tañce sīmaṭṭho anumodati, evampi atthataṃ hoti kathinaṃ . Evaṃ kho, bhikkhave, atthataṃ hoti kathinaṃ.
310. ‘‘கத²ஞ்ச, பி⁴க்க²வே, உப்³ப⁴தங் ஹோதி கதி²னங்? அட்டி²மா, பி⁴க்க²வே, மாதிகா கதி²னஸ்ஸ உப்³பா⁴ராய – பக்கமனந்திகா, நிட்டா²னந்திகா, ஸன்னிட்டா²னந்திகா, நாஸனந்திகா, ஸவனந்திகா, ஆஸாவச்சே²தி³கா, ஸீமாதிக்கந்திகா, ஸஹுப்³பா⁴ரா’’தி 9.
310. ‘‘Kathañca, bhikkhave, ubbhataṃ hoti kathinaṃ? Aṭṭhimā, bhikkhave, mātikā kathinassa ubbhārāya – pakkamanantikā, niṭṭhānantikā, sanniṭṭhānantikā, nāsanantikā, savanantikā, āsāvacchedikā, sīmātikkantikā, sahubbhārā’’ti 10.
கதி²னானுஜானநா நிட்டி²தா.
Kathinānujānanā niṭṭhitā.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / கதி²னானுஜானநகதா² • Kathinānujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / கதி²னானுஜானநகதா²வண்ணனா • Kathinānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / கதி²னானுஜானநகதா²வண்ணனா • Kathinānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / கதி²னானுஜானநகதா²வண்ணனா • Kathinānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 187. கதி²னானுஜானநகதா² • 187. Kathinānujānanakathā
