கதி²னானுஜானநகதா²

Kathinānujānanakathā

306. கதி²னக்க²ந்த⁴கே – பாவெய்யகாதி பாவெய்யரட்ட²வாஸினோ. பாவெய்யங் நாம கோஸலேஸு பச்சி²மதி³ஸாபா⁴கே³ ரட்ட²ங்; தத்த² வாஸினோதி வுத்தங் ஹோதி. கோஸலரஞ்ஞோ ஏகபிதுகபா⁴தூனங் ப⁴த்³த³வக்³கி³யத்தே²ரானங் ஏதங் அதி⁴வசனங். தேஸு ஸப்³ப³ஜெட்ட²கோ அனாகா³மீ, ஸப்³ப³பச்சி²மகோ ஸோதாபன்னோ, ஏகோபி அரஹா வா புது²ஜ்ஜனோ வா நத்தி². ஆரஞ்ஞிகாதி து⁴தங்க³ஸமாதா³னவஸேன ஆரஞ்ஞிகா; ந அரஞ்ஞவாஸமத்தேன. பிண்ட³பாதிகாதி³பா⁴வேபி தேஸங் ஏஸேவ நயோ. ஸீஸவஸேன சேதங் வுத்தங். இமே பன தேரஸாபி து⁴தங்கா³னி ஸமாதா³யேவ வத்தந்தி. உத³கஸங்க³ஹேதி உத³கேன ஸங்க³ஹிதே க⁴டிதே ஸங்ஸட்டே²; த²லே ச நின்னே ச ஏகோத³கீபூ⁴தேதி அத்தோ².

306. Kathinakkhandhake – pāveyyakāti pāveyyaraṭṭhavāsino. Pāveyyaṃ nāma kosalesu pacchimadisābhāge raṭṭhaṃ; tattha vāsinoti vuttaṃ hoti. Kosalarañño ekapitukabhātūnaṃ bhaddavaggiyattherānaṃ etaṃ adhivacanaṃ. Tesu sabbajeṭṭhako anāgāmī, sabbapacchimako sotāpanno, ekopi arahā vā puthujjano vā natthi. Āraññikāti dhutaṅgasamādānavasena āraññikā; na araññavāsamattena. Piṇḍapātikādibhāvepi tesaṃ eseva nayo. Sīsavasena cetaṃ vuttaṃ. Ime pana terasāpi dhutaṅgāni samādāyeva vattanti. Udakasaṅgaheti udakena saṅgahite ghaṭite saṃsaṭṭhe; thale ca ninne ca ekodakībhūteti attho.

உத³கசிக்க²ல்லேதி அக்கந்தஅக்கந்தட்டா²னே உத³கசிக்க²ல்லோ உட்ட²ஹித்வா யாவ ஆனிஸதா³ பஹரதி, ஈதி³ஸே சிக்க²ல்லேதி அத்தோ². ஓகபுண்ணேஹீதி உத³கபுண்ணேஹி. தேஸங் கிர சீவரானி க⁴னானி, தேஸு பதிதங் உத³கங் ந பக்³க⁴ரதி க⁴னத்தா புடப³த்³த⁴ங் விய திட்ட²தி. தேன வுத்தங் – ‘‘ஓகபுண்ணேஹி சீவரேஹீ’’தி. ‘‘ஓக⁴புண்ணேஹீ’’திபி பாடோ².

Udakacikkhalleti akkantaakkantaṭṭhāne udakacikkhallo uṭṭhahitvā yāva ānisadā paharati, īdise cikkhalleti attho. Okapuṇṇehīti udakapuṇṇehi. Tesaṃ kira cīvarāni ghanāni, tesu patitaṃ udakaṃ na paggharati ghanattā puṭabaddhaṃ viya tiṭṭhati. Tena vuttaṃ – ‘‘okapuṇṇehi cīvarehī’’ti. ‘‘Oghapuṇṇehī’’tipi pāṭho.

அவிவத³மானா வஸ்ஸங் வஸிம்ஹாதி எத்த² ஆக³ந்துகட்டா²னே ஸேனாஸனபா²ஸுதாய அபா⁴வேன ச ப⁴க³வதோ த³ஸ்ஸனாலாபே⁴ன உக்கண்டி²ததாய ச தே பி⁴க்கூ² பா²ஸுங் ந வஸிங்ஸு, தஸ்மா ‘‘அவிவத³மானா பா²ஸுகங் வஸ்ஸங் வஸிம்ஹா’’தி நாவோசுங். த⁴ம்மிங் கத²ங் கத்வாதி ப⁴க³வா தேஸங் பி⁴க்கூ²னங் அனமதக்³கி³யகத²ங் கதே²ஸி. தே ஸப்³பே³பி கதா²பரியோஸானே அரஹத்தங் பாபுணித்வா நிஸின்னட்டா²னதோயேவ ஆகாஸே உப்பதித்வா அக³மங்ஸு, தங் ஸந்தா⁴ய வுத்தங் – ‘‘த⁴ம்மிங் கத²ங் கத்வா’’தி. ததோ ப⁴க³வா ‘‘ஸசே கதி²னத்தா²ரோ பஞ்ஞத்தோ அப⁴விஸ்ஸ, ஏதே பி⁴க்கூ² ஏகங் சீவரங் ட²பெத்வா ஸந்தருத்தரேன ஆக³ச்ச²ந்தா ந ஏவங் கிலந்தா அஸ்ஸு, கதி²னத்தா²ரோ ச நாமேஸ ஸப்³ப³பு³த்³தே⁴ஹி அனுஞ்ஞாதோ’’தி சிந்தெத்வா கதி²னத்தா²ரங் அனுஜானிதுகாமோ பி⁴க்கூ² ஆமந்தேஸி, ஆமந்தெத்வா ச பன ‘‘அனுஜானாமி பி⁴க்க²வே’’திஆதி³மாஹ.

Avivadamānā vassaṃ vasimhāti ettha āgantukaṭṭhāne senāsanaphāsutāya abhāvena ca bhagavato dassanālābhena ukkaṇṭhitatāya ca te bhikkhū phāsuṃ na vasiṃsu, tasmā ‘‘avivadamānā phāsukaṃ vassaṃ vasimhā’’ti nāvocuṃ. Dhammiṃ kathaṃ katvāti bhagavā tesaṃ bhikkhūnaṃ anamataggiyakathaṃ kathesi. Te sabbepi kathāpariyosāne arahattaṃ pāpuṇitvā nisinnaṭṭhānatoyeva ākāse uppatitvā agamaṃsu, taṃ sandhāya vuttaṃ – ‘‘dhammiṃ kathaṃ katvā’’ti. Tato bhagavā ‘‘sace kathinatthāro paññatto abhavissa, ete bhikkhū ekaṃ cīvaraṃ ṭhapetvā santaruttarena āgacchantā na evaṃ kilantā assu, kathinatthāro ca nāmesa sabbabuddhehi anuññāto’’ti cintetvā kathinatthāraṃ anujānitukāmo bhikkhū āmantesi, āmantetvā ca pana ‘‘anujānāmi bhikkhave’’tiādimāha.

தத்த² அத்த²தகதி²னானங் வோதி நிபாதமத்தங் வோகாரோ; அத்த²தகதி²னானந்தி அத்தோ². ஏவஞ்ஹி ஸதி பரதோ ‘‘ஸோ நேஸங் ப⁴விஸ்ஸதீ’’தி யுஜ்ஜதி. அத² வா வோதி ஸாமிவசனமேவேதங். ஸோ நேஸந்தி எத்த² பன ஸோ சீவருப்பாதோ³ யே அத்த²தகதி²னா, தேஸங் ப⁴விஸ்ஸதீதி அத்தோ².

Tattha atthatakathinānaṃ voti nipātamattaṃ vokāro; atthatakathinānanti attho. Evañhi sati parato ‘‘so nesaṃ bhavissatī’’ti yujjati. Atha vā voti sāmivacanamevetaṃ. So nesanti ettha pana so cīvaruppādo ye atthatakathinā, tesaṃ bhavissatīti attho.

தத்த² அனாமந்தசாரோதி யாவ கதி²னங் ந உத்³த⁴ரியதி, தாவ அனாமந்தெத்வா சரணங் கப்பிஸ்ஸதி , சாரித்தஸிக்கா²பதே³ன அனாபத்தி ப⁴விஸ்ஸதீதி அத்தோ². அஸமாதா³னசாரோதி திசீவரங் அஸமாதா³ய சரணங்; சீவரவிப்பவாஸோ கப்பிஸ்ஸதீதி அத்தோ². க³ணபோ⁴ஜனந்தி க³ணபோ⁴ஜனம்பி கப்பிஸ்ஸதி. யாவத³த்த²சீவரந்தி யாவத்தகேன சீவரேன அத்தோ², தாவத்தகங் அனதி⁴ட்டி²தங் அவிகப்பிதங் கப்பிஸ்ஸதீதி அத்தோ². யோ ச தத்த² சீவருப்பாதோ³தி தத்த² கதி²னத்த²தஸீமாயங் மதகசீவரங் வா ஹோது ஸங்க⁴ங் உத்³தி³ஸ்ஸ தி³ன்னங் வா ஸங்கி⁴கேன தத்ருப்பாதே³ன ஆப⁴தங் வா, யேன கேனசி ஆகாரேன யங் ஸங்கி⁴கசீவரங் உப்பஜ்ஜதி, தங் தேஸங் ப⁴விஸ்ஸதீதி அத்தோ².

Tattha anāmantacāroti yāva kathinaṃ na uddhariyati, tāva anāmantetvā caraṇaṃ kappissati , cārittasikkhāpadena anāpatti bhavissatīti attho. Asamādānacāroti ticīvaraṃ asamādāya caraṇaṃ; cīvaravippavāso kappissatīti attho. Gaṇabhojananti gaṇabhojanampi kappissati. Yāvadatthacīvaranti yāvattakena cīvarena attho, tāvattakaṃ anadhiṭṭhitaṃ avikappitaṃ kappissatīti attho. Yo ca tattha cīvaruppādoti tattha kathinatthatasīmāyaṃ matakacīvaraṃ vā hotu saṅghaṃ uddissa dinnaṃ vā saṅghikena tatruppādena ābhataṃ vā, yena kenaci ākārena yaṃ saṅghikacīvaraṃ uppajjati, taṃ tesaṃ bhavissatīti attho.

ஏவஞ்ச பன பி⁴க்க²வே கதி²னங் அத்த²ரிதப்³ப³ந்தி எத்த² கதி²னத்தா²ரங் கே லப⁴ந்தி, கே ந லப⁴ந்தீதி? க³ணனவஸேன தாவ பச்சி²மகோடியா பஞ்ச ஜனா லப⁴ந்தி, உத்³த⁴ங் ஸதஸஹஸ்ஸம்பி, பஞ்சன்னங் ஹெட்டா² ந லப⁴ந்தி. வுத்த²வஸ்ஸவஸேன புரிமிகாய வஸ்ஸங் உபக³ந்த்வா பட²மபவாரணாய பவாரிதா லப⁴ந்தி, சி²ன்னவஸ்ஸா வா பச்சி²மிகாய உபக³தா வா ந லப⁴ந்தி, அஞ்ஞஸ்மிங் விஹாரே வுத்த²வஸ்ஸாபி ந லப⁴ந்தீதி மஹாபச்சரியங் வுத்தங். புரிமிகாய உபக³தானங் பன ஸப்³பே³ க³ணபூரகா ஹொந்தி, ஆனிஸங்ஸங் ந லப⁴ந்தி, ஆனிஸங்ஸோ இதரேஸங்யேவ ஹோதி. ஸசே புரிமிகாய உபக³தா சத்தாரோ வா ஹொந்தி தயோ வா த்³வே வா ஏகோ வா, இதரே க³ணபூரகே கத்வா கதி²னங் அத்த²ரிதப்³ப³ங். அத² சத்தாரோ பி⁴க்கூ² உபக³தா, ஏகோ பரிபுண்ணவஸ்ஸோ ஸாமணேரோ, ஸோ சே பச்சி²மிகாய உபஸம்பஜ்ஜதி, க³ணபூரகோ சேவ ஹோதி, ஆனிஸங்ஸஞ்ச லப⁴தி. தயோ பி⁴க்கூ² த்³வே ஸாமணேரா, த்³வே பி⁴க்கூ² தயோ ஸாமணேரா, ஏகோ பி⁴க்கு² சத்தாரோ ஸாமணேராதி எத்தா²பி ஏஸேவ நயோ. ஸசே புரிமிகாய உபக³தா கதி²னத்தா²ரகுஸலா ந ஹொந்தி, அத்தா²ரகுஸலா க²ந்த⁴கபா⁴ணகதே²ரா பரியேஸித்வா ஆனேதப்³பா³. கம்மவாசங் ஸாவெத்வா கதி²னங் அத்த²ராபெத்வா தா³னஞ்ச பு⁴ஞ்ஜித்வா க³மிஸ்ஸந்தி. ஆனிஸங்ஸோ பன இதரேஸங்யேவ ஹோதி.

Evañca pana bhikkhave kathinaṃ attharitabbanti ettha kathinatthāraṃ ke labhanti, ke na labhantīti? Gaṇanavasena tāva pacchimakoṭiyā pañca janā labhanti, uddhaṃ satasahassampi, pañcannaṃ heṭṭhā na labhanti. Vutthavassavasena purimikāya vassaṃ upagantvā paṭhamapavāraṇāya pavāritā labhanti, chinnavassā vā pacchimikāya upagatā vā na labhanti, aññasmiṃ vihāre vutthavassāpi na labhantīti mahāpaccariyaṃ vuttaṃ. Purimikāya upagatānaṃ pana sabbe gaṇapūrakā honti, ānisaṃsaṃ na labhanti, ānisaṃso itaresaṃyeva hoti. Sace purimikāya upagatā cattāro vā honti tayo vā dve vā eko vā, itare gaṇapūrake katvā kathinaṃ attharitabbaṃ. Atha cattāro bhikkhū upagatā, eko paripuṇṇavasso sāmaṇero, so ce pacchimikāya upasampajjati, gaṇapūrako ceva hoti, ānisaṃsañca labhati. Tayo bhikkhū dve sāmaṇerā, dve bhikkhū tayo sāmaṇerā, eko bhikkhu cattāro sāmaṇerāti etthāpi eseva nayo. Sace purimikāya upagatā kathinatthārakusalā na honti, atthārakusalā khandhakabhāṇakatherā pariyesitvā ānetabbā. Kammavācaṃ sāvetvā kathinaṃ attharāpetvā dānañca bhuñjitvā gamissanti. Ānisaṃso pana itaresaṃyeva hoti.

கதி²னங் கேன தி³ன்னங் வட்டதி? யேன கேனசி தே³வேன வா மனுஸ்ஸேன வா பஞ்சன்னங் வா ஸஹத⁴ம்மிகானங் அஞ்ஞதரேன தி³ன்னங் வட்டதி. கதி²னதா³யகஸ்ஸ வத்தங் அத்தி², ஸசே ஸோ தங் அஜானந்தோ புச்ச²தி – ‘‘ப⁴ந்தே கத²ங் கதி²னங் தா³தப்³ப³’’ந்தி தஸ்ஸ ஏவங் ஆசிக்கி²தப்³ப³ங் – ‘‘திண்ணங் சீவரானங் அஞ்ஞதரப்பஹோனகங் ஸூரியுக்³க³மனஸமயே வத்த²ங் ‘கதி²னசீவரங் தே³மா’தி தா³துங் வட்டதி , தஸ்ஸ பரிகம்மத்த²ங் எத்தகா நாம ஸூசியோ, எத்தகங் ஸுத்தங், எத்தகங் ரஜனங், பரிகம்மங் கரொந்தானங் எத்தகானங் பி⁴க்கூ²னங் யாகு³ப⁴த்தஞ்ச தா³துங் வட்டதீ’’தி.

Kathinaṃ kena dinnaṃ vaṭṭati? Yena kenaci devena vā manussena vā pañcannaṃ vā sahadhammikānaṃ aññatarena dinnaṃ vaṭṭati. Kathinadāyakassa vattaṃ atthi, sace so taṃ ajānanto pucchati – ‘‘bhante kathaṃ kathinaṃ dātabba’’nti tassa evaṃ ācikkhitabbaṃ – ‘‘tiṇṇaṃ cīvarānaṃ aññatarappahonakaṃ sūriyuggamanasamaye vatthaṃ ‘kathinacīvaraṃ demā’ti dātuṃ vaṭṭati , tassa parikammatthaṃ ettakā nāma sūciyo, ettakaṃ suttaṃ, ettakaṃ rajanaṃ, parikammaṃ karontānaṃ ettakānaṃ bhikkhūnaṃ yāgubhattañca dātuṃ vaṭṭatī’’ti.

கதி²னத்தா²ரகேனாபி த⁴ம்மேன ஸமேன உப்பன்னங் கதி²னங் அத்த²ரந்தேன வத்தங் ஜானிதப்³ப³ங். தந்தவாயகே³ஹதோ ஹி ஆப⁴தஸந்தானேனேவ க²லிமக்கி²தஸாடகோ ந வட்டதி, மலீனஸாடகோபி ந வட்டதி, தஸ்மா கதி²னத்தா²ரஸாடகங் லபி⁴த்வா ஸுட்டு² தோ⁴வித்வா ஸூசிஆதீ³னி சீவரகம்மூபகரணானி ஸஜ்ஜெத்வா ப³ஹூஹி பி⁴க்கூ²ஹி ஸத்³தி⁴ங் தத³ஹேவ ஸிப்³பி³த்வா நிட்டி²தஸூசிகம்மங் ரஜித்வா கப்பபி³ந்து³ங் த³த்வா கதி²னங் அத்த²ரிதப்³ப³ங். ஸசே தஸ்மிங் அனத்த²தேயேவ அஞ்ஞங் கதி²னஸாடகங் ஆஹரதி, அஞ்ஞானி ச ப³ஹூனி கதி²னானிஸங்ஸவத்தா²னி தே³தி, யோ ஆனிஸங்ஸங் ப³ஹுங் தே³தி, தஸ்ஸ ஸந்தகேனேவ அத்த²ரிதப்³ப³ங். இதரோ யதா² ததா² ஓவதி³த்வா ஸஞ்ஞாபேதப்³போ³.

Kathinatthārakenāpi dhammena samena uppannaṃ kathinaṃ attharantena vattaṃ jānitabbaṃ. Tantavāyagehato hi ābhatasantāneneva khalimakkhitasāṭako na vaṭṭati, malīnasāṭakopi na vaṭṭati, tasmā kathinatthārasāṭakaṃ labhitvā suṭṭhu dhovitvā sūciādīni cīvarakammūpakaraṇāni sajjetvā bahūhi bhikkhūhi saddhiṃ tadaheva sibbitvā niṭṭhitasūcikammaṃ rajitvā kappabinduṃ datvā kathinaṃ attharitabbaṃ. Sace tasmiṃ anatthateyeva aññaṃ kathinasāṭakaṃ āharati, aññāni ca bahūni kathinānisaṃsavatthāni deti, yo ānisaṃsaṃ bahuṃ deti, tassa santakeneva attharitabbaṃ. Itaro yathā tathā ovaditvā saññāpetabbo.

கதி²னங் பன கேன அத்த²ரிதப்³ப³ங்? யஸ்ஸ ஸங்கோ⁴ கதி²னசீவரங் தே³தி. ஸங்கே⁴ன பன கஸ்ஸ தா³தப்³ப³ங்? யோ ஜிண்ணசீவரோ ஹோதி. ஸசே ப³ஹூ ஜிண்ணசீவரா ஹொந்தி, வுட்³ட⁴ஸ்ஸ தா³தப்³ப³ங். வுட்³டே⁴ஸுபி யோ மஹாபரிஸோ தத³ஹேவ சீவரங் கத்வா அத்த²ரிதுங் ஸக்கோதி, தஸ்ஸ தா³தப்³ப³ங். ஸசே வுட்³டோ⁴ ந ஸக்கோதி நவகதரோ ஸக்கோதி, தஸ்ஸ தா³தப்³ப³ங். அபிச ஸங்கே⁴ன மஹாதே²ரஸ்ஸ ஸங்க³ஹங் காதுங் வட்டதி, தஸ்மா ‘‘தும்ஹே ப⁴ந்தே க³ண்ஹத², மயங் கத்வா த³ஸ்ஸாமா’’தி வத்தப்³ப³ங். தீஸு சீவரேஸு யங் ஜிண்ணங் ஹோதி, தத³த்தா²ய தா³தப்³ப³ங். பகதியா து³பட்டசீவரஸ்ஸ து³பட்டத்தா²யேவ தா³தப்³ப³ங். ஸசேபிஸ்ஸ ஏகபட்டசீவரங் க⁴னங் ஹோதி, கதி²னஸாடகோ ச பேலவோ, ஸாருப்பத்தா²ய து³பட்டப்பஹோனகமேவ தா³தப்³ப³ங், ‘‘அஹங் அலப⁴ந்தோ ஏகபட்டங் பாருபாமீ’’தி வத³ந்தஸ்ஸாபி து³பட்டங் தா³துங் வட்டதி. யோ பன லோப⁴பகதிகோ ஹோதி, தஸ்ஸ ந தா³தப்³ப³ங். தேனாபி ‘‘கதி²னங் அத்த²ரித்வா பச்சா² ஸிப்³பி³த்வா த்³வே சீவரானி கரிஸ்ஸாமீ’’தி ந க³ஹேதப்³ப³ங். யஸ்ஸ பன தீ³யதி, தஸ்ஸ யேன விதி⁴னா தா³தப்³ப³ங், தங் த³ஸ்ஸேதுங் ‘‘ஏவஞ்ச பன பி⁴க்க²வே கதி²னங் அத்த²ரிதப்³ப³’’ந்தி ஆரபி⁴த்வா ஸுணாது மே ப⁴ந்தேதிஆதி³கா தா³னகம்மவாசா தாவ வுத்தா.

Kathinaṃ pana kena attharitabbaṃ? Yassa saṅgho kathinacīvaraṃ deti. Saṅghena pana kassa dātabbaṃ? Yo jiṇṇacīvaro hoti. Sace bahū jiṇṇacīvarā honti, vuḍḍhassa dātabbaṃ. Vuḍḍhesupi yo mahāpariso tadaheva cīvaraṃ katvā attharituṃ sakkoti, tassa dātabbaṃ. Sace vuḍḍho na sakkoti navakataro sakkoti, tassa dātabbaṃ. Apica saṅghena mahātherassa saṅgahaṃ kātuṃ vaṭṭati, tasmā ‘‘tumhe bhante gaṇhatha, mayaṃ katvā dassāmā’’ti vattabbaṃ. Tīsu cīvaresu yaṃ jiṇṇaṃ hoti, tadatthāya dātabbaṃ. Pakatiyā dupaṭṭacīvarassa dupaṭṭatthāyeva dātabbaṃ. Sacepissa ekapaṭṭacīvaraṃ ghanaṃ hoti, kathinasāṭako ca pelavo, sāruppatthāya dupaṭṭappahonakameva dātabbaṃ, ‘‘ahaṃ alabhanto ekapaṭṭaṃ pārupāmī’’ti vadantassāpi dupaṭṭaṃ dātuṃ vaṭṭati. Yo pana lobhapakatiko hoti, tassa na dātabbaṃ. Tenāpi ‘‘kathinaṃ attharitvā pacchā sibbitvā dve cīvarāni karissāmī’’ti na gahetabbaṃ. Yassa pana dīyati, tassa yena vidhinā dātabbaṃ, taṃ dassetuṃ ‘‘evañca pana bhikkhave kathinaṃ attharitabba’’nti ārabhitvā suṇātu me bhantetiādikā dānakammavācā tāva vuttā.

ஏவங் தி³ன்னே பன கதி²னே ஸசே தங் கதி²னது³ஸ்ஸங் நிட்டி²தபரிகம்மமேவ ஹோதி , இச்சேதங் குஸலங். நோ சே நிட்டி²தபரிகம்மங் ஹோதி, ‘‘அஹங் தே²ரோ’’தி வா ‘‘ப³ஹுஸ்ஸுதோ’’தி வா ஏகேனாபி அகாதுங் ந லப்³ப⁴தி, ஸப்³பே³ஹேவ ஸன்னிபதித்வா தோ⁴வனஸிப்³ப³னரஜனானி நிட்டா²பேதப்³பா³னி. இத³ஞ்ஹி கதி²னவத்தங் நாம பு³த்³த⁴ப்பஸத்த²ங். அதீதே பது³முத்தரோபி ப⁴க³வா கதி²னவத்தங் அகாஸி. தஸ்ஸ கிர அக்³க³ஸாவகோ ஸுஜாதத்தே²ரோ நாம கதி²னங் க³ண்ஹி, தங் ஸத்தா² அட்ட²ஸட்டி²யா பி⁴க்கு²ஸதஸஹஸ்ஸேஹி ஸத்³தி⁴ங் நிஸீதி³த்வா அகாஸி.

Evaṃ dinne pana kathine sace taṃ kathinadussaṃ niṭṭhitaparikammameva hoti , iccetaṃ kusalaṃ. No ce niṭṭhitaparikammaṃ hoti, ‘‘ahaṃ thero’’ti vā ‘‘bahussuto’’ti vā ekenāpi akātuṃ na labbhati, sabbeheva sannipatitvā dhovanasibbanarajanāni niṭṭhāpetabbāni. Idañhi kathinavattaṃ nāma buddhappasatthaṃ. Atīte padumuttaropi bhagavā kathinavattaṃ akāsi. Tassa kira aggasāvako sujātatthero nāma kathinaṃ gaṇhi, taṃ satthā aṭṭhasaṭṭhiyā bhikkhusatasahassehi saddhiṃ nisīditvā akāsi.

கதபரியோஸிதங் பன கதி²னங் க³ஹெத்வா அத்தா²ரகேன பி⁴க்கு²னா ‘‘ஸசே ஸங்கா⁴டியா கதி²னங் அத்த²ரிதுகாமோ ஹோதி, போராணிகா ஸங்கா⁴டி பச்சுத்³த⁴ரிதப்³பா³, நவா ஸங்கா⁴டி அதி⁴ட்டா²தப்³பா³. ‘இமாய ஸங்கா⁴டியா கதி²னங் அத்த²ராமீ’தி வாசா பி⁴ந்தி³தப்³பா³’’திஆதி³னா பரிவாரே வுத்தவிதா⁴னேன கதி²னங் அத்த²ரிதப்³ப³ங். அத்த²ரித்வா ச பன ‘‘தேன கதி²னத்தா²ரகேன பி⁴க்கு²னா ஸங்க⁴ங் உபஸங்கமித்வா ஏகங்ஸங் உத்தராஸங்க³ங் கரித்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ‘அத்த²தங் ப⁴ந்தே ஸங்க⁴ஸ்ஸ கதி²னங், த⁴ம்மிகோ கதி²னத்தா²ரோ, அனுமோத³தா²’தி தேஹி அனுமோத³கேஹி பி⁴க்கூ²ஹி ஏகங்ஸங் உத்தராஸங்க³ங் கரித்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ‘அத்த²தங் ஆவுஸோ ஸங்க⁴ஸ்ஸ கதி²னங், த⁴ம்மிகோ கதி²னத்தா²ரோ, அனுமோதா³மா’’தி ஏவமாதி³னா பரிவாரே வுத்தவிதா⁴னேனேவ அனுமோதா³பேதப்³ப³ங், இதரேஹி ச அனுமோதி³தப்³ப³ங். ஏவங் ஸப்³பே³ஸங் அத்த²தங் ஹோதி கதி²னங். வுத்தஞ்ஹேதங் பரிவாரே ‘‘த்³வின்னங் புக்³க³லானங் அத்த²தங் ஹோதி கதி²னங் – அத்தா²ரகஸ்ஸ ச அனுமோத³கஸ்ஸ சா’’தி (பரி॰ 403). புனபி வுத்தங் – ‘‘ந ஸங்கோ⁴ கதி²னங் அத்த²ரதி, ந க³ணோ கதி²னங் அத்த²ரதி, புக்³க³லோ கதி²னங் அத்த²ரதி, ஸங்க⁴ஸ்ஸ அனுமோத³னா க³ணஸ்ஸ அனுமோத³னா புக்³க³லஸ்ஸ அத்தா²ரா ஸங்க⁴ஸ்ஸ அத்த²தங் ஹோதி கதி²னங், க³ணஸ்ஸ அத்த²தங் ஹோதி கதி²னங், புக்³க³லஸ்ஸ அத்த²தங் ஹோதி கதி²னங்’’தி (பரி॰ 414).

Katapariyositaṃ pana kathinaṃ gahetvā atthārakena bhikkhunā ‘‘sace saṅghāṭiyā kathinaṃ attharitukāmo hoti, porāṇikā saṅghāṭi paccuddharitabbā, navā saṅghāṭi adhiṭṭhātabbā. ‘Imāya saṅghāṭiyā kathinaṃ attharāmī’ti vācā bhinditabbā’’tiādinā parivāre vuttavidhānena kathinaṃ attharitabbaṃ. Attharitvā ca pana ‘‘tena kathinatthārakena bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā añjaliṃ paggahetvā evamassa vacanīyo – ‘atthataṃ bhante saṅghassa kathinaṃ, dhammiko kathinatthāro, anumodathā’ti tehi anumodakehi bhikkhūhi ekaṃsaṃ uttarāsaṅgaṃ karitvā añjaliṃ paggahetvā evamassa vacanīyo – ‘atthataṃ āvuso saṅghassa kathinaṃ, dhammiko kathinatthāro, anumodāmā’’ti evamādinā parivāre vuttavidhāneneva anumodāpetabbaṃ, itarehi ca anumoditabbaṃ. Evaṃ sabbesaṃ atthataṃ hoti kathinaṃ. Vuttañhetaṃ parivāre ‘‘dvinnaṃ puggalānaṃ atthataṃ hoti kathinaṃ – atthārakassa ca anumodakassa cā’’ti (pari. 403). Punapi vuttaṃ – ‘‘na saṅgho kathinaṃ attharati, na gaṇo kathinaṃ attharati, puggalo kathinaṃ attharati, saṅghassa anumodanā gaṇassa anumodanā puggalassa atthārā saṅghassa atthataṃ hoti kathinaṃ, gaṇassa atthataṃ hoti kathinaṃ, puggalassa atthataṃ hoti kathinaṃ’’ti (pari. 414).

ஏவங் அத்த²தே பன கதி²னே ஸசே கதி²னசீவரேன ஸத்³தி⁴ங் ஆப⁴தங் ஆனிஸங்ஸங் தா³யகா ‘‘யேன அம்ஹாகங் கதி²னங் க³ஹிதங், தஸ்ஸேவ தே³மா’’தி தெ³ந்தி , பி⁴க்கு²ஸங்கோ⁴ அனிஸ்ஸரோ. அத² அவிசாரெத்வாவ த³த்வா க³ச்ச²ந்தி, பி⁴க்கு²ஸங்கோ⁴ இஸ்ஸரோ. தஸ்மா ஸசே கதி²னத்தா²ரகஸ்ஸ ஸேஸசீவரானிபி து³ப்³ப³லானி ஹொந்தி, ஸங்கே⁴ன அபலோகெத்வா தேஸம்பி அத்தா²ய வத்தா²னி தா³தப்³பா³னி. கம்மவாசா பன ஏகாயேவ வட்டதி. அவஸேஸே கதி²னானிஸங்ஸே ப³லவவத்தா²னி வஸ்ஸாவாஸிகட்டி²திகாய தா³தப்³பா³னி, டி²திகாய அபா⁴வே தே²ராஸனதோ பட்டா²ய தா³தப்³பா³னி, க³ருப⁴ண்ட³ங் ந பா⁴ஜேதப்³ப³ங். ஸசே பன ஏகஸீமாய ப³ஹூ விஹாரா ஹொந்தி, ஸப்³பே³ பி⁴க்கூ² ஸன்னிபாதெத்வா ஏகத்த² கதி²னங் அத்த²ரிதப்³ப³ங், விஸுங் விஸுங் அத்த²ரிதுங் ந வட்டதி.

Evaṃ atthate pana kathine sace kathinacīvarena saddhiṃ ābhataṃ ānisaṃsaṃ dāyakā ‘‘yena amhākaṃ kathinaṃ gahitaṃ, tasseva demā’’ti denti , bhikkhusaṅgho anissaro. Atha avicāretvāva datvā gacchanti, bhikkhusaṅgho issaro. Tasmā sace kathinatthārakassa sesacīvarānipi dubbalāni honti, saṅghena apaloketvā tesampi atthāya vatthāni dātabbāni. Kammavācā pana ekāyeva vaṭṭati. Avasese kathinānisaṃse balavavatthāni vassāvāsikaṭṭhitikāya dātabbāni, ṭhitikāya abhāve therāsanato paṭṭhāya dātabbāni, garubhaṇḍaṃ na bhājetabbaṃ. Sace pana ekasīmāya bahū vihārā honti, sabbe bhikkhū sannipātetvā ekattha kathinaṃ attharitabbaṃ, visuṃ visuṃ attharituṃ na vaṭṭati.

308. இதா³னி யதா² ச கதி²னங் அத்த²தங் ஹோதி, யதா² ச அனத்த²தங், தங் விதி⁴ங் வித்தா²ரதோ த³ஸ்ஸேதுங் ஏவஞ்ச பன பி⁴க்க²வே அத்த²தங் ஹோதி கதி²னங் ஏவங் அனத்த²தந்தி வத்வா அகரணீயஞ்சேவ மஹாபூ⁴மிகஞ்ச அனத்த²தலக்க²ணங் தாவ த³ஸ்ஸெந்தோ ந உல்லிகி²தமத்தேனாதிஆதி³கே சதுவீஸதி ஆகாரே த³ஸ்ஸேஸி. ததோ பரங் அத்த²தலக்க²ணங் த³ஸ்ஸெந்தோ அஹதேன அத்த²தந்திஆதி³கே ஸத்தரஸ ஆகாரே த³ஸ்ஸேஸி. பரிவாரேபி ஹி ‘‘சதுவீஸதியா ஆகாரேஹி அனத்த²தங் ஹோதி கதி²னங், ஸத்தரஸஹி ஆகாரேஹி அத்த²தங் ஹோதி கதி²ன’’ந்தி இத³மேவ லக்க²ணங் வுத்தங்.

308. Idāni yathā ca kathinaṃ atthataṃ hoti, yathā ca anatthataṃ, taṃ vidhiṃ vitthārato dassetuṃ evañca pana bhikkhave atthataṃ hoti kathinaṃ evaṃ anatthatanti vatvā akaraṇīyañceva mahābhūmikañca anatthatalakkhaṇaṃ tāva dassento na ullikhitamattenātiādike catuvīsati ākāre dassesi. Tato paraṃ atthatalakkhaṇaṃ dassento ahatena atthatantiādike sattarasa ākāre dassesi. Parivārepi hi ‘‘catuvīsatiyā ākārehi anatthataṃ hoti kathinaṃ, sattarasahi ākārehi atthataṃ hoti kathina’’nti idameva lakkhaṇaṃ vuttaṃ.

தத்த² உல்லிகி²தமத்தேனாதி தீ³க⁴தோ ச புது²லதோ ச பமாணக்³க³ஹணமத்தேன. பமாணஞ்ஹி க³ண்ஹந்தோ தஸ்ஸ தஸ்ஸ பதே³ஸஸ்ஸ ஸஞ்ஜானநத்த²ங் நகா²தீ³ஹி வா பரிச்சே²த³ங் த³ஸ்ஸெந்தோ உல்லிக²தி, நலாடாதீ³ஸு வா க⁴ங்ஸதி, தஸ்மா தங் பமாணக்³க³ஹணங் ‘‘உல்லிகி²தமத்த’’ந்தி வுச்சதி. தோ⁴வனமத்தேனாதி கதி²னது³ஸ்ஸதோ⁴வனமத்தேன. சீவரவிசாரணமத்தேனாதி ‘‘பஞ்சகங் வா ஸத்தகங் வா நவகங் வா ஏகாத³ஸகங் வா ஹோதூ’’தி ஏவங் விசாரிதமத்தேன. சே²த³னமத்தேனாதி யதா²விசாரிதஸ்ஸ வத்த²ஸ்ஸ சே²த³னமத்தேன. ப³ந்த⁴னமத்தேனாதி மோக⁴ஸுத்தகாரோபனமத்தேன. ஓவட்டியகரணமத்தேனாதி மோக⁴ஸுத்தகானுஸாரேன தீ³க⁴ஸிப்³பி³தமத்தேன. கண்டு³ஸகரணமத்தேனாதி முத்³தி⁴யபத்தப³ந்த⁴னமத்தேன. த³ள்ஹீகம்மகரணமத்தேனாதி த்³வே சிமிலிகாயோ ஏகதோ கத்வா ஸிப்³பி³தமத்தேன. அத² வா பட²மசிமிலிகா க⁴டெத்வா ட²பிதா ஹோதி, கதி²னஸாடகங் தஸ்ஸா குச்சி²சிமிலிகங் கத்வா ஸிப்³பி³தமத்தேனாதிபி அத்தோ². மஹாபச்சரியங் ‘‘பகதிசீவரஸ்ஸ உபஸ்ஸயதா³னேனா’’தி வுத்தங். குருந்தி³யங் பன ‘‘பகதிபத்தப³த்³த⁴சீவரங் து³பட்டங் காதுங் குச்சி²சிமிலிகங் அல்லியாபனமத்தேனா’’தி வுத்தங். அனுவாதகரணமத்தேனாதி பிட்டி²அனுவாதாரோபனமத்தேன. பரிப⁴ண்ட³கரணமத்தேனாதி குச்சி²அனஉவாதாரோபனமத்தேன. ஓவத்³தெ⁴ய்யகரணமத்தேனாதி ஆக³ந்துகபத்தாரோபனமத்தேன . கதி²னசீவரதோ வா பத்தங் க³ஹெத்வா அஞ்ஞஸ்மிங் அகதி²னசீவரே பத்தாரோபனமத்தேன.

Tattha ullikhitamattenāti dīghato ca puthulato ca pamāṇaggahaṇamattena. Pamāṇañhi gaṇhanto tassa tassa padesassa sañjānanatthaṃ nakhādīhi vā paricchedaṃ dassento ullikhati, nalāṭādīsu vā ghaṃsati, tasmā taṃ pamāṇaggahaṇaṃ ‘‘ullikhitamatta’’nti vuccati. Dhovanamattenāti kathinadussadhovanamattena. Cīvaravicāraṇamattenāti ‘‘pañcakaṃ vā sattakaṃ vā navakaṃ vā ekādasakaṃ vā hotū’’ti evaṃ vicāritamattena. Chedanamattenāti yathāvicāritassa vatthassa chedanamattena. Bandhanamattenāti moghasuttakāropanamattena. Ovaṭṭiyakaraṇamattenāti moghasuttakānusārena dīghasibbitamattena. Kaṇḍusakaraṇamattenāti muddhiyapattabandhanamattena. Daḷhīkammakaraṇamattenāti dve cimilikāyo ekato katvā sibbitamattena. Atha vā paṭhamacimilikā ghaṭetvā ṭhapitā hoti, kathinasāṭakaṃ tassā kucchicimilikaṃ katvā sibbitamattenātipi attho. Mahāpaccariyaṃ ‘‘pakaticīvarassa upassayadānenā’’ti vuttaṃ. Kurundiyaṃ pana ‘‘pakatipattabaddhacīvaraṃ dupaṭṭaṃ kātuṃ kucchicimilikaṃ alliyāpanamattenā’’ti vuttaṃ. Anuvātakaraṇamattenāti piṭṭhianuvātāropanamattena. Paribhaṇḍakaraṇamattenāti kucchianauvātāropanamattena. Ovaddheyyakaraṇamattenāti āgantukapattāropanamattena . Kathinacīvarato vā pattaṃ gahetvā aññasmiṃ akathinacīvare pattāropanamattena.

கம்ப³லமத்³த³னமத்தேனாதி ஏகவாரங்யேவ ரஜனே பக்கி²த்தேன த³ந்தவண்ணேன பண்டு³பலாஸவண்ணேன வா. ஸசே பன ஸகிங் வா த்³விக்க²த்துங் வா ரத்தம்பி ஸாருப்பங் ஹோதி, வட்டதி. நிமித்தகதேனாதி ‘‘இமினா து³ஸ்ஸேன கதி²னங் அத்த²ரிஸ்ஸாமீ’’தி ஏவங் நிமித்தகதேன. எத்தகமேவ ஹி பரிவாரே வுத்தங். அட்ட²கதா²ஸு பன ‘‘அயங் ஸாடகோ ஸுந்த³ரோ, ஸக்கா இமினா கதி²னங் அத்த²ரிது’ந்தி ஏவங் நிமித்தகம்மங் கத்வா லத்³தே⁴னா’’தி வுத்தங். பரிகதா²கதேனாதி ‘‘கதி²னங் நாம தா³துங் வட்டதி, கதி²னதா³யகோ ப³ஹுங் புஞ்ஞங் பஸவதீ’’தி ஏவங் பரிகதா²ய உப்பாதி³தேன. கதி²னங் நாம அதிஉக்கட்ட²ங் வட்டதி, மாதரம்பி விஞ்ஞாபேதுங் ந வட்டதி, ஆகாஸதோ ஓதிண்ணஸதி³ஸமேவ வட்டதீதி. குக்குகதேனாதி தாவகாலிகேன. ஸன்னிதி⁴கதேனாதி எத்த² து³விதோ⁴ ஸன்னிதி⁴ கரணஸன்னிதி⁴ ச நிசயஸன்னிதி⁴ ச. தத்த² தத³ஹேவ அகத்வா ட²பெத்வா கரணங் கரணஸன்னிதி⁴. ஸங்கோ⁴ அஜ்ஜ கதி²னது³ஸ்ஸங் லபி⁴த்வா புனதி³வஸே தே³தி, அயங் நிசயஸன்னிதி⁴.

Kambalamaddanamattenāti ekavāraṃyeva rajane pakkhittena dantavaṇṇena paṇḍupalāsavaṇṇena vā. Sace pana sakiṃ vā dvikkhattuṃ vā rattampi sāruppaṃ hoti, vaṭṭati. Nimittakatenāti ‘‘iminā dussena kathinaṃ attharissāmī’’ti evaṃ nimittakatena. Ettakameva hi parivāre vuttaṃ. Aṭṭhakathāsu pana ‘‘ayaṃ sāṭako sundaro, sakkā iminā kathinaṃ attharitu’nti evaṃ nimittakammaṃ katvā laddhenā’’ti vuttaṃ. Parikathākatenāti ‘‘kathinaṃ nāma dātuṃ vaṭṭati, kathinadāyako bahuṃ puññaṃ pasavatī’’ti evaṃ parikathāya uppāditena. Kathinaṃ nāma atiukkaṭṭhaṃ vaṭṭati, mātarampi viññāpetuṃ na vaṭṭati, ākāsato otiṇṇasadisameva vaṭṭatīti. Kukkukatenāti tāvakālikena. Sannidhikatenāti ettha duvidho sannidhi karaṇasannidhi ca nicayasannidhi ca. Tattha tadaheva akatvā ṭhapetvā karaṇaṃ karaṇasannidhi. Saṅgho ajja kathinadussaṃ labhitvā punadivase deti, ayaṃ nicayasannidhi.

நிஸ்ஸக்³கி³யேனாதி ரத்தினிஸ்ஸக்³கி³யேன. பரிவாரேபி வுத்தங் – ‘‘நிஸ்ஸக்³கி³யங் நாம கரியமானே அருணங் உட்ட²ஹதீ’’தி. அகப்பகதேனாதி அனாதி³ன்னகப்பபி³ந்து³னா. அஞ்ஞத்ர ஸங்கா⁴டியாதிஆதீ³ஸு ட²பெத்வா ஸங்கா⁴டிஉத்தராஸங்க³அந்தரவாஸகே அஞ்ஞேன பச்சத்த²ரணாதி³னா அத்த²தங் அனத்த²தங் ஹோதீதி. அஞ்ஞத்ர பஞ்சகேன வா அதிரேகபஞ்சகேன வாதி பஞ்ச வா அதிரேகானி வா க²ண்டா³னி கத்வா மஹாமண்ட³லஅட்³ட⁴மண்ட³லானி த³ஸ்ஸெத்வா கதேனேவ வட்டதி. ஏவஞ்ஹி ஸமண்ட³லிகதங் ஹோதி, தங் ட²பெத்வா அஞ்ஞேன அச்சி²ன்னகேன வா த்³வத்திசதுக²ண்டே³ன வா ந வட்டதி. அஞ்ஞத்ர புக்³க³லஸ்ஸ அத்தா²ராதி புக்³க³லஸ்ஸ அத்தா²ரங் ட²பெத்வா ந அஞ்ஞேன ஸங்க⁴ஸ்ஸ வா க³ணஸ்ஸ வா அத்தா²ரேன அத்த²தங் ஹோதி. நிஸ்ஸீமட்டோ² அனுமோத³தீதி ப³ஹிஉபசாரஸீமாய டி²தோ அனுமோத³தி.

Nissaggiyenāti rattinissaggiyena. Parivārepi vuttaṃ – ‘‘nissaggiyaṃ nāma kariyamāne aruṇaṃ uṭṭhahatī’’ti. Akappakatenāti anādinnakappabindunā. Aññatra saṅghāṭiyātiādīsu ṭhapetvā saṅghāṭiuttarāsaṅgaantaravāsake aññena paccattharaṇādinā atthataṃ anatthataṃ hotīti. Aññatra pañcakena vā atirekapañcakena vāti pañca vā atirekāni vā khaṇḍāni katvā mahāmaṇḍalaaḍḍhamaṇḍalāni dassetvā kateneva vaṭṭati. Evañhi samaṇḍalikataṃ hoti, taṃ ṭhapetvā aññena acchinnakena vā dvatticatukhaṇḍena vā na vaṭṭati. Aññatra puggalassa atthārāti puggalassa atthāraṃ ṭhapetvā na aññena saṅghassa vā gaṇassa vā atthārena atthataṃ hoti. Nissīmaṭṭho anumodatīti bahiupacārasīmāya ṭhito anumodati.

309. அஹதேனாதி அபரிபு⁴த்தேன. அஹதகப்பேனாதி அஹதஸதி³ஸேன ஏகவாரங் வா த்³விக்க²த்துங் வா தோ⁴தேன. பிலோதிகாயாதி ஹதவத்த²கஸாடகேன . பங்ஸுகூலேனாதி தேவீஸதியா கெ²த்தேஸு உப்பன்னபங்ஸுகூலேன. பங்ஸுகூலிகபி⁴க்கு²னா சோளகபி⁴க்க²ங் ஆஹிண்டி³த்வா லத்³த⁴சோளகேஹி கதசீவரேனாதிபி குருந்தி³மஹாபச்சரீஸு வுத்தங். பாபணிகேனாதி ஆபணத்³வாரே பதிதபிலோதிகங் க³ஹெத்வா கதி²னத்தா²ய தே³தி, தேனாபி வட்டதீதி அத்தோ². ஸேஸங் வுத்தவிபல்லாஸேனேவ வேதி³தப்³ப³ங். இமஸ்மிங் பன டா²னே ‘‘ஸஹ கதி²னஸ்ஸ அத்தா²ரா கதி த⁴ம்மா ஜாயந்தீ’’திஆதி³ ப³ஹுஅட்ட²கதா²ஸு வுத்தங், தங் ஸப்³ப³ங் பரிவாரே பாளிஆரூள்ஹமேவ, தஸ்மா தத்த² ஆக³தனயேனேவ வேதி³தப்³ப³ங். ந ஹி தேன இத⁴ அவுச்சமானேன கதி²னத்தா²ரகஸ்ஸ கிஞ்சி பரிஹாயதி.

309.Ahatenāti aparibhuttena. Ahatakappenāti ahatasadisena ekavāraṃ vā dvikkhattuṃ vā dhotena. Pilotikāyāti hatavatthakasāṭakena . Paṃsukūlenāti tevīsatiyā khettesu uppannapaṃsukūlena. Paṃsukūlikabhikkhunā coḷakabhikkhaṃ āhiṇḍitvā laddhacoḷakehi katacīvarenātipi kurundimahāpaccarīsu vuttaṃ. Pāpaṇikenāti āpaṇadvāre patitapilotikaṃ gahetvā kathinatthāya deti, tenāpi vaṭṭatīti attho. Sesaṃ vuttavipallāseneva veditabbaṃ. Imasmiṃ pana ṭhāne ‘‘saha kathinassa atthārā kati dhammā jāyantī’’tiādi bahuaṭṭhakathāsu vuttaṃ, taṃ sabbaṃ parivāre pāḷiārūḷhameva, tasmā tattha āgatanayeneva veditabbaṃ. Na hi tena idha avuccamānena kathinatthārakassa kiñci parihāyati.

310. ஏவங் கதி²னத்தா²ரங் த³ஸ்ஸெத்வா இதா³னி உப்³பா⁴ரங் த³ஸ்ஸேதுங் கத²ஞ்ச பி⁴க்க²வே உப்³ப⁴தங் ஹோதி கதி²னந்திஆதி³மாஹ. தத்த² மாதிகாதி மாதரோ; ஜனெத்தியோதி அத்தோ². கதி²னுப்³பா⁴ரஞ்ஹி ஏதா அட்ட² ஜனெத்தியோ. தாஸு பக்கமனங் அந்தோ அஸ்ஸாதி பக்கமனந்திகா. ஏவங் ஸேஸாபி வேதி³தப்³பா³.

310. Evaṃ kathinatthāraṃ dassetvā idāni ubbhāraṃ dassetuṃ kathañca bhikkhave ubbhataṃ hoti kathinantiādimāha. Tattha mātikāti mātaro; janettiyoti attho. Kathinubbhārañhi etā aṭṭha janettiyo. Tāsu pakkamanaṃ anto assāti pakkamanantikā. Evaṃ sesāpi veditabbā.

Next: ஆதா³யஸத்தககதா² • Ādāyasattakakathā

Related texts:

திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 187. கதி²னானுஜானநா • 187. Kathinānujānanā

டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / கதி²னானுஜானநகதா²வண்ணனா • Kathinānujānanakathāvaṇṇanā

டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / கதி²னானுஜானநகதா²வண்ணனா • Kathinānujānanakathāvaṇṇanā

டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / கதி²னானுஜானநகதா²வண்ணனா • Kathinānujānanakathāvaṇṇanā

டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 187. கதி²னானுஜானநகதா² • 187. Kathinānujānanakathā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact