| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
7. கதி²னக்க²ந்த⁴கங்
7. Kathinakkhandhakaṃ
187. கதி²னானுஜானநகதா²
187. Kathinānujānanakathā
306. கதி²னக்க²ந்த⁴கே பாவெய்யகாதி எத்த² பாவாரட்டே² நிவஸந்தீதி பாவெய்யகாதி வசனத்த²ங் த³ஸ்ஸெந்தோ ஆஹ ‘‘பாவாரட்ட²வாஸினோ’’தி. தத்தா²தி பாவானாமகே ரட்டே². ஏகோ பிதா ஏதேஸந்தி ஏகபிதுகா. தே ச தே பா⁴தரோ சேதி ஏகபிதுகபா⁴தரோ, தேஸங். ஏதந்தி ‘‘பாவெய்யகா’’தி ஏதங் நாமங். தேஸூதி பாவெய்யகேஸு. ‘‘து⁴தங்க³ஸமாதா³னவஸேனா’’தி விஸேஸனஸ்ஸ ப்³யவச்சே²த³பா⁴வங் த³ஸ்ஸேதுங் வுத்தங் ‘‘ந அரஞ்ஞவாஸமத்தேனா’’தி. விஸேஸனஞ்ஹி து³வித⁴ங் ப்³யவச்சே²த³ங், தப்பாகடிகரணஞ்சாதி. தேஸந்தி பாவெய்யகானங். பிண்ட³பாதிகாதி³பா⁴வேபீதி ஸம்ப³ந்தோ⁴. பிஸத்³தோ³ ஆரஞ்ஞகங் அபெக்க²தி. ஏதந்தி ‘‘ஸப்³பே³ ஆரஞ்ஞகா’’திஆதி³ ஏதங் வசனங். இமே பனாதி பாவெய்யகா பன. உத³கஸங்க³ஹேதி எத்த² உத³கேன ஸங்க³ஹேதப்³ப³ந்தி த³ஸ்ஸெந்தோ ஆஹ ‘‘உத³கேன ஸங்க³ஹிதே’’தி. ‘‘த²லே ச நின்னே சா’’தி இமினா ‘‘உத³கஸங்க³ஹே’’தி பத³ஸ்ஸ ஸரூபங் த³ஸ்ஸேதி.
306. Kathinakkhandhake pāveyyakāti ettha pāvāraṭṭhe nivasantīti pāveyyakāti vacanatthaṃ dassento āha ‘‘pāvāraṭṭhavāsino’’ti. Tatthāti pāvānāmake raṭṭhe. Eko pitā etesanti ekapitukā. Te ca te bhātaro ceti ekapitukabhātaro, tesaṃ. Etanti ‘‘pāveyyakā’’ti etaṃ nāmaṃ. Tesūti pāveyyakesu. ‘‘Dhutaṅgasamādānavasenā’’ti visesanassa byavacchedabhāvaṃ dassetuṃ vuttaṃ ‘‘na araññavāsamattenā’’ti. Visesanañhi duvidhaṃ byavacchedaṃ, tappākaṭikaraṇañcāti. Tesanti pāveyyakānaṃ. Piṇḍapātikādibhāvepīti sambandho. Pisaddo āraññakaṃ apekkhati. Etanti ‘‘sabbe āraññakā’’tiādi etaṃ vacanaṃ. Ime panāti pāveyyakā pana. Udakasaṃgaheti ettha udakena saṃgahetabbanti dassento āha ‘‘udakena saṃgahite’’ti. ‘‘Thale ca ninne cā’’ti iminā ‘‘udakasaṃgahe’’ti padassa sarūpaṃ dasseti.
உத³கசிக்க²ல்லோதி உத³கேன லோளிதோ சிக்க²ல்லோ உத³கசிக்க²ல்லோ. ஓகபுண்ணேஹீதி எத்த² ஓகஸத்³தோ³ உத³கவேவசனோதி ஆஹ ‘‘உத³கபுண்ணேஹீ’’தி. உத³கஞ்ஹி உசயதி ஸமவாயபா⁴வேன பவத்ததீதி ஓகந்தி வுச்சதி. தேஸந்தி பாவெய்யகானங். க⁴னானீதி நிரந்தரானி. தேஸூதி சீவரேஸு. தேனாதி சீவரானங் க⁴னத்தா, உத³கஸ்ஸ ச ந பக்³க⁴ரணத்தா. ப⁴க³வதா ‘‘அவிவத³மானா பா²ஸுகங் வஸ்ஸங் வஸித்தா²’’தி புச்சி²யமானாபி தே பி⁴க்கூ² யதா²புச்சி²தங் அவத்வா கஸ்மா பா²ஸுகபத³ங் அபனெத்வா ‘‘அவிவத³மானா வஸ்ஸங் வஸிம்ஹா’’தி அவோசுந்தி ஆஹ ‘‘அவிவத³மானா வஸ்ஸங் வஸிம்ஹாதி எத்தா²’’திஆதி³. உக்கண்டி²ததாய சாதி எத்த² சஸத்³தோ³ ‘‘பா²ஸுதாய அபா⁴வேனா’’தி எத்தா²பி யோஜேதப்³போ³. ஸேனாஸனபா²ஸுதாய அபா⁴வேன ச ப⁴க³வதோ த³ஸ்ஸனாலாபே⁴ன உக்கண்டி²ததாய சாதி ஹி அத்தோ². அனமதக்³கி³யகத²ந்தி ஸங்யுத்தனிகாயே அனமதக்³கி³யஸுத்தந்தகத²ங் (ஸங்॰ நி॰ 2.135). ஸப்³பே³வ தே பாவெய்யகா பி⁴க்கூ²தி யோஜனா. தந்தி அனமதக்³கி³யகத²ங். ததோதி த⁴ம்மகத²னதோ, பரந்தி ஸம்ப³ந்தோ⁴. ப⁴க³வா ஆமந்தேஸீதி ஸம்ப³ந்தோ⁴. ஏகங் சீவரந்தி ஸங்கா⁴டிங். ஸந்தருத்தரேனாதி ஸஹ அந்தரேனாதி ஸந்தரங், ஸந்தரஞ்ச தங் உத்தரஞ்சேதி ஸந்தருத்தரங், தேன. அஸ்ஸுதி ப⁴வெய்யுங். அப⁴விஸ்ஸங்ஸூதி ஹி அத்தோ². ஸத்தமீவிப⁴த்திகாலாதிபத்திவிப⁴த்தீனங் ஸமானத்த²பா⁴வோ ஸத்³த³ஸத்தே²ஸு வுத்தோயேவ. சஸத்³தோ³ உபன்யாஸத்தோ². ஏஸ கதி²னத்தா²ரோ நாமாதி யோஜனா. அனுஜானிதுகாமோ ஹுத்வாதி ஸம்ப³ந்தோ⁴.
Udakacikkhalloti udakena loḷito cikkhallo udakacikkhallo. Okapuṇṇehīti ettha okasaddo udakavevacanoti āha ‘‘udakapuṇṇehī’’ti. Udakañhi ucayati samavāyabhāvena pavattatīti okanti vuccati. Tesanti pāveyyakānaṃ. Ghanānīti nirantarāni. Tesūti cīvaresu. Tenāti cīvarānaṃ ghanattā, udakassa ca na paggharaṇattā. Bhagavatā ‘‘avivadamānā phāsukaṃ vassaṃ vasitthā’’ti pucchiyamānāpi te bhikkhū yathāpucchitaṃ avatvā kasmā phāsukapadaṃ apanetvā ‘‘avivadamānā vassaṃ vasimhā’’ti avocunti āha ‘‘avivadamānā vassaṃ vasimhāti etthā’’tiādi. Ukkaṇṭhitatāya cāti ettha casaddo ‘‘phāsutāya abhāvenā’’ti etthāpi yojetabbo. Senāsanaphāsutāya abhāvena ca bhagavato dassanālābhena ukkaṇṭhitatāya cāti hi attho. Anamataggiyakathanti saṃyuttanikāye anamataggiyasuttantakathaṃ (saṃ. ni. 2.135). Sabbeva te pāveyyakā bhikkhūti yojanā. Tanti anamataggiyakathaṃ. Tatoti dhammakathanato, paranti sambandho. Bhagavā āmantesīti sambandho. Ekaṃ cīvaranti saṅghāṭiṃ. Santaruttarenāti saha antarenāti santaraṃ, santarañca taṃ uttarañceti santaruttaraṃ, tena. Assuti bhaveyyuṃ. Abhavissaṃsūti hi attho. Sattamīvibhattikālātipattivibhattīnaṃ samānatthabhāvo saddasatthesu vuttoyeva. Casaddo upanyāsattho. Esa kathinatthāro nāmāti yojanā. Anujānitukāmo hutvāti sambandho.
தத்தா²தி ‘‘அனுஜானாமி பி⁴க்க²வே’’திஆதி³பாடே². வோகாரஸ்ஸ நிபாதமத்தே ஸதி கத²மத்தோ² ப⁴விஸ்ஸதீதி ஆஹ ‘‘அத்த²தகதி²னானந்தி அத்தோ²’’தி. அத்த²தகதி²னானங் பி⁴க்கூ²னந்தி ஸம்ப³ந்தோ⁴. லத்³த⁴கு³ணங் த³ஸ்ஸெந்தோ ஆஹ ‘‘ஏவஞ்ஹீ’’திஆதி³. ஹிஸத்³தோ³ லத்³த⁴கு³ணஜோதகோ. பரதோதி பரம்ஹி. ‘‘ஸோ தும்ஹாக’’ந்தி வா ‘‘ஸோ வோ’’தி வா அவத்வா ‘‘ஸோ நேஸங் ப⁴விஸ்ஸதீ’’தி வுத்தத்தா வோ-காரோ நிபாதமத்தோதி அதி⁴ப்பாயோ. ‘‘வோதி ஸாமிவசனமேவேத’’ந்தி இமினா வோ தும்ஹாகந்தி அத்த²ங் த³ஸ்ஸேதி. ஏவங் ஸதி ‘‘பரதோ ஸோ நேஸ’’ந்தி எத்த² கத²மத்தோ² ப⁴விஸ்ஸதீதி ஆஹ ‘‘ஸோ நேஸந்தி எத்த² பனா’’திஆதி³. யே தும்ஹே அத்த²தகதி²னா, தேஸங் தும்ஹாகந்தி யோஜனா. கதி²னஸத்³தோ³ தி²ரத்த²வாசகோ அனிப்ப²ன்னபாடிபதி³கோ . அனாமந்தசாராதி³கானங் பஞ்சானிஸங்ஸானங் அந்தோகரணஸமத்த²பா⁴வே தி²ரந்தி அத்தோ².
Tatthāti ‘‘anujānāmi bhikkhave’’tiādipāṭhe. Vokārassa nipātamatte sati kathamattho bhavissatīti āha ‘‘atthatakathinānanti attho’’ti. Atthatakathinānaṃ bhikkhūnanti sambandho. Laddhaguṇaṃ dassento āha ‘‘evañhī’’tiādi. Hisaddo laddhaguṇajotako. Paratoti paramhi. ‘‘So tumhāka’’nti vā ‘‘so vo’’ti vā avatvā ‘‘so nesaṃ bhavissatī’’ti vuttattā vo-kāro nipātamattoti adhippāyo. ‘‘Voti sāmivacanameveta’’nti iminā vo tumhākanti atthaṃ dasseti. Evaṃ sati ‘‘parato so nesa’’nti ettha kathamattho bhavissatīti āha ‘‘so nesanti ettha panā’’tiādi. Ye tumhe atthatakathinā, tesaṃ tumhākanti yojanā. Kathinasaddo thiratthavācako anipphannapāṭipadiko . Anāmantacārādikānaṃ pañcānisaṃsānaṃ antokaraṇasamatthabhāve thiranti attho.
தத்தா²தி அனாமந்தசாராதீ³ஸு பஞ்சானிஸங்ஸேஸு. அனாமந்தசாரோதி எத்த² சரணங் சாரோ, அனாமந்தெத்வா சாரோ அனாமந்தசாரோதி த³ஸ்ஸெந்தோ ஆஹ ‘‘அனாமந்தெத்வா சரண’’ந்தி. ‘‘அஸமாதா³ய சரண’’ந்தி இமினா அஸமாதா³னசாரோதி எத்த² புப்³ப³பதே³ த்வாபச்சயஸ்ஸ அனாதே³ஸங் கத்வா அஸமாதா³னசாரோதி வுத்தந்தி த³ஸ்ஸேதி. யாவதத்த²சீவரந்தி எத்த² ஆகாரலோபேன ஸந்தீ⁴தி ஆஹ ‘‘யாவதா சீவரேன அத்தோ²’’தி. ‘‘யாவத³த்த²சீவர’’ந்திபி பாடோ², ஏவங் ஸதி த³காரோ பத³ஸந்தி⁴மத்தோ. யாவஸத்³தோ³ பரிச்சே²த³த்த²வாசகோ, ந அபி⁴விஜ²த்த²வாசகோ. அத்த²ஸத்³தே³ன ஸமாஸோ ஹோதி. யோ ச தத்த² சீவருப்பாதோ³தி எத்த² தத்த²ஸத்³த³ஸ்ஸ விஸயங் த³ஸ்ஸெந்தோ ஆஹ ‘‘கதி²னத்தா²ரஸீமாய’’ந்தி. தத்ருப்பாதே³னாதி தத்ர கதி²னத்தா²ரஸீமாயங் உப்பாதே³ன மூலேன. ‘‘சீவரங் உப்பஜ்ஜதீ’’தி இமினா சீவருப்பாதோ³தி எத்த² சீவரமேவ உப்பாதோ³ சீவருப்பாதோ³தி விஸேஸனபரபத³த்தங் த³ஸ்ஸேதி.
Tatthāti anāmantacārādīsu pañcānisaṃsesu. Anāmantacāroti ettha caraṇaṃ cāro, anāmantetvā cāro anāmantacāroti dassento āha ‘‘anāmantetvā caraṇa’’nti. ‘‘Asamādāya caraṇa’’nti iminā asamādānacāroti ettha pubbapade tvāpaccayassa anādesaṃ katvā asamādānacāroti vuttanti dasseti. Yāvatatthacīvaranti ettha ākāralopena sandhīti āha ‘‘yāvatā cīvarena attho’’ti. ‘‘Yāvadatthacīvara’’ntipi pāṭho, evaṃ sati dakāro padasandhimatto. Yāvasaddo paricchedatthavācako, na abhivijhatthavācako. Atthasaddena samāso hoti. Yo ca tattha cīvaruppādoti ettha tatthasaddassa visayaṃ dassento āha ‘‘kathinatthārasīmāya’’nti. Tatruppādenāti tatra kathinatthārasīmāyaṃ uppādena mūlena. ‘‘Cīvaraṃ uppajjatī’’ti iminā cīvaruppādoti ettha cīvarameva uppādo cīvaruppādoti visesanaparapadattaṃ dasseti.
கேதி கித்தகா. இத³ங் ‘‘க³ணவஸேனா’’தி வசனங் ஸந்தா⁴ய வுத்தங். அத² வா கேதி கின்னாம வுத்த²வஸ்ஸா. இத³ங் ‘‘வுத்த²வஸ்ஸவஸேனா’’தி வசனங் ஸந்தா⁴ய வுத்தங். ஸதஸஹஸ்ஸம்பி ஜனா லப⁴ந்தீதி யோஜனா. பிஸத்³தே³ன ததோ அதி⁴கம்பி லப⁴ந்தீதி த³ஸ்ஸேதி. சி²ன்னவஸ்ஸா வாதி புரிமிகாய உபக³ந்த்வா சி²ன்னவஸ்ஸா வா. அஞ்ஞஸ்மிங் விஹாரேதி கதி²னத்தா²ரவிஹாரதோ அபரஸ்மிங் விஹாரே. ஸப்³பே³ சி²ன்னவஸ்ஸாதி³கா பி⁴க்கூ² புரிமிகாய வஸ்ஸூபக³தானங் பி⁴க்கூ²னங் க³ணபூரகா ஹொந்தீதி யோஜனா. இதரேஸங்யேவாதி புரிமிகாய வஸ்ஸங் உபக³ந்த்வா பட²மபவாரணாய பவாரிதானமேவ. பரிபுண்ணவஸ்ஸோதி பரிபுண்ணோ வீஸதிவஸ்ஸோ, அச்சி²ன்னவஸ்ஸோ வா. ஸோதி ஸாமணேரோ. இதி எத்தா²பீதி ஏவங் ஏதேஸு தீஸு வாரேஸுபி.
Keti kittakā. Idaṃ ‘‘gaṇavasenā’’ti vacanaṃ sandhāya vuttaṃ. Atha vā keti kinnāma vutthavassā. Idaṃ ‘‘vutthavassavasenā’’ti vacanaṃ sandhāya vuttaṃ. Satasahassampi janā labhantīti yojanā. Pisaddena tato adhikampi labhantīti dasseti. Chinnavassā vāti purimikāya upagantvā chinnavassā vā. Aññasmiṃ vihāreti kathinatthāravihārato aparasmiṃ vihāre. Sabbe chinnavassādikā bhikkhū purimikāya vassūpagatānaṃ bhikkhūnaṃ gaṇapūrakā hontīti yojanā. Itaresaṃyevāti purimikāya vassaṃ upagantvā paṭhamapavāraṇāya pavāritānameva. Paripuṇṇavassoti paripuṇṇo vīsativasso, acchinnavasso vā. Soti sāmaṇero. Iti etthāpīti evaṃ etesu tīsu vāresupi.
கேன தி³ன்னங் கதி²னசீவரங் வட்டதீதி யோஜனா. யேன கேனசி தி³ன்னங் சீவரங் வட்டதீதி ஸம்ப³ந்தோ⁴. தந்தி வத்தங். அஜானந்தோதி அஜானநஹேது. ஹெத்வத்தே² ஹி அந்தபச்சயோ. தஸ்ஸாதி கதி²னதா³யகஸ்ஸ. ஏவந்தி இமினா வக்க²மானநயேன. அஞ்ஞதரபஹோனகங் வத்த²ந்தி ஸம்ப³ந்தோ⁴. தஸ்ஸாதி கதி²னசீவரஸ்ஸ. எத்தகா நாம ஸூசியோ வட்டதீதி ஸம்ப³ந்தோ⁴. இதி ஆசிக்கி²தப்³ப³ந்தி யோஜனா.
Kena dinnaṃ kathinacīvaraṃ vaṭṭatīti yojanā. Yena kenaci dinnaṃ cīvaraṃ vaṭṭatīti sambandho. Tanti vattaṃ. Ajānantoti ajānanahetu. Hetvatthe hi antapaccayo. Tassāti kathinadāyakassa. Evanti iminā vakkhamānanayena. Aññatarapahonakaṃ vatthanti sambandho. Tassāti kathinacīvarassa. Ettakā nāma sūciyo vaṭṭatīti sambandho. Iti ācikkhitabbanti yojanā.
கதி²னத்தா²ரகேனாபி வத்தங் ஜானிதப்³ப³ந்தி ஸம்ப³ந்தோ⁴. பிஸத்³தோ³ கதி²னதா³யகங் அபெக்க²தி. வத்தங் வித்தா²ரெந்தோ ஆஹ ‘‘தந்தவாயகே³ஹதோ ஹீ’’திஆதி³. ஆப⁴தஸந்தானேனேவாதி ஆப⁴தஸந்ததியா ஏவ. க²லிமக்கி²தஸாடகோதி அஹதஸாடகோ. ஸோ ஹி க²லேன தக்கேன கஞ்ஜிகேன மக்கி²தஸாடகத்தா ‘‘க²லிமக்கி²தஸாடகோ’’தி வுச்சதி. கதி²னத்தா²ரஸாடகந்தி கதி²னத்தா²ரத்தா²ய தி³ன்னங் ஸாடகங். தத³ஹேவாதி தஸ்மிங் தி³ன்னஅஹனி ஏவ. தஸ்மிந்தி பட²மங் தி³ன்னே கதி²னத்தா²ரஸாடகே. அஞ்ஞானி சாதி கதி²னஸாடகதோ அஞ்ஞானி ச. சஸத்³தே³ன ந கதி²னஸாடகமேவ ஆஹரதி, அஞ்ஞானி சாதி த³ஸ்ஸேதி. யோதி கதி²னதா³யகோ. இதரோதி பட²மங் கதி²னதா³யகோ. யதா² ததா² ஓவதி³த்வாதி தவ ஸந்தகதோ ஏதஸ்ஸ ஸந்தகங் ஸங்க⁴ஸ்ஸ ப³ஹுபகாரங், ஸங்க⁴ஸ்ஸ ப³ஹுபகாரத்தங் தயாபி இச்சி²தப்³ப³ங், ஏவமிச்ச²ந்தஸ்ஸ ப³ஹுபுஞ்ஞந்தி யேன தேனாகாரேன ஓவதி³த்வா.
Kathinatthārakenāpi vattaṃ jānitabbanti sambandho. Pisaddo kathinadāyakaṃ apekkhati. Vattaṃ vitthārento āha ‘‘tantavāyagehato hī’’tiādi. Ābhatasantānenevāti ābhatasantatiyā eva. Khalimakkhitasāṭakoti ahatasāṭako. So hi khalena takkena kañjikena makkhitasāṭakattā ‘‘khalimakkhitasāṭako’’ti vuccati. Kathinatthārasāṭakanti kathinatthāratthāya dinnaṃ sāṭakaṃ. Tadahevāti tasmiṃ dinnaahani eva. Tasminti paṭhamaṃ dinne kathinatthārasāṭake. Aññāni cāti kathinasāṭakato aññāni ca. Casaddena na kathinasāṭakameva āharati, aññāni cāti dasseti. Yoti kathinadāyako. Itaroti paṭhamaṃ kathinadāyako. Yathā tathā ovaditvāti tava santakato etassa santakaṃ saṅghassa bahupakāraṃ, saṅghassa bahupakārattaṃ tayāpi icchitabbaṃ, evamicchantassa bahupuññanti yena tenākārena ovaditvā.
கேன பி⁴க்கு²னாதி ஸம்ப³ந்தோ⁴. யஸ்ஸ ஸங்கோ⁴ கதி²னசீவரங் தே³தி, தேன பி⁴க்கு²னா அத்த²ரிதப்³ப³ந்தி யோஜனா. கஸ்ஸ பி⁴க்கு²ஸ்ஸாதி ஸம்ப³ந்தோ⁴. யோ ஜிண்ணசீவரோ ஹோதி, தஸ்ஸ தா³தப்³ப³ந்தி யோஜனா. மஹதீ பரிஸா ஏதஸ்ஸாதி மஹாபரிஸோ தே²ரோ. ‘‘நவகதரோ ஸக்கோதி, தஸ்ஸ தா³தப்³ப³’’ந்தி வசனஸ்ஸ அனேகந்தபா⁴வங் த³ஸ்ஸெந்தோ ஆஹ ‘‘அபி சா’’திஆதி³. அபி சாதி ஏகந்தேன. தத³த்தா²யாதி தஸ்ஸ ஜிண்ணசீவரஸ்ஸ அத்தா²ய. அஸ்ஸாதி பி⁴க்கு²ஸ்ஸ. பேலவோதி விரளோ. தேனாபீதி கதி²னத்தா²ரகேனாபி. தந்தி விதி⁴ங். தா³னகம்மவாசாதி தா³னகாரணகம்மவாசா.
Kena bhikkhunāti sambandho. Yassa saṅgho kathinacīvaraṃ deti, tena bhikkhunā attharitabbanti yojanā. Kassa bhikkhussāti sambandho. Yo jiṇṇacīvaro hoti, tassa dātabbanti yojanā. Mahatī parisā etassāti mahāpariso thero. ‘‘Navakataro sakkoti, tassa dātabba’’nti vacanassa anekantabhāvaṃ dassento āha ‘‘api cā’’tiādi. Api cāti ekantena. Tadatthāyāti tassa jiṇṇacīvarassa atthāya. Assāti bhikkhussa. Pelavoti viraḷo. Tenāpīti kathinatthārakenāpi. Tanti vidhiṃ. Dānakammavācāti dānakāraṇakammavācā.
ஏவங் தி³ன்னே பன கதி²னே நிட்டா²பேதப்³பா³னீதி யோஜனா. ஏகேனாபீதி பிஸத்³தே³ன பகே³வ ப³ஹூஹி பனாதி த³ஸ்ஸேதி. பு³த்³த⁴ப்பஸத்த²ந்தி பு³த்³தே⁴ஹி பஸத்த²ங். அதீதே கப்பஸதஸஹஸ்ஸமத்த²கேதி யோஜனா. தஸ்ஸாதி பது³முத்தரஸ்ஸ . கதி²னங் க³ண்ஹி கிராதி யோஜனா. தந்தி கதி²னங், ஸத்தா² அகாஸீதி ஸம்ப³ந்தோ⁴.
Evaṃ dinne pana kathine niṭṭhāpetabbānīti yojanā. Ekenāpīti pisaddena pageva bahūhi panāti dasseti. Buddhappasatthanti buddhehi pasatthaṃ. Atīte kappasatasahassamatthaketi yojanā. Tassāti padumuttarassa . Kathinaṃ gaṇhi kirāti yojanā. Tanti kathinaṃ, satthā akāsīti sambandho.
கதபரியோஸிதங் கதி²னங் கிங் காதப்³ப³ந்தி ஆஹ ‘‘கதபரியோஸிதங் பனா’’திஆதி³. கதி²னங் க³ஹெத்வா அத்த²ரிதப்³ப³ந்தி ஸம்ப³ந்தோ⁴. ‘‘தேன கதி²னத்தா²ரகேன பி⁴க்கு²னா’’தி பத³ங் ‘‘வசனீயோ’’தி பதே³ ஸுத்³த⁴கத்தா, ‘‘அனுமோதா³பேதப்³ப³’’ந்தி பதே³ காரிதகத்தா. கிங் வசனீயோதி ஆஹ ‘‘அத்த²தங்…பே॰… அனுமோத³தா²’’தி. ‘‘தேஹி அனுமோத³கேஹி பி⁴க்கு²ஹீ’’தி பத³ங் ‘‘வசனீயோ’’தி பதே³ அவுத்தகத்தா, ‘‘அனுமோதா³பேதப்³ப³’’ந்தி பதே³ காரிதகம்மங் அவுத்தகம்மங், வா. ‘‘கதி²ன’’ந்தி தா⁴துகம்மங் வா வுத்தகம்மங் வா உபனேதப்³ப³ங். கிங் வசனீயோதி ஆஹ ‘‘அத்த²தங்…பே॰… அனுமோதா³மா’’தி. இதரேஹி சாதி அனுமோத³கேஹி ச. ஸப்³பே³ஸந்தி அத்தா²ரகஅனுமோத³கானங். ஹீதி ஸச்சங். ஏதந்தி ஸப்³பே³ஸங் அத்த²தபா⁴வங், ‘‘த்³வின்னங்…பே॰… அனுமோத³கஸ்ஸ சா’’தி வசனங் வா.
Katapariyositaṃ kathinaṃ kiṃ kātabbanti āha ‘‘katapariyositaṃ panā’’tiādi. Kathinaṃ gahetvā attharitabbanti sambandho. ‘‘Tena kathinatthārakena bhikkhunā’’ti padaṃ ‘‘vacanīyo’’ti pade suddhakattā, ‘‘anumodāpetabba’’nti pade kāritakattā. Kiṃ vacanīyoti āha ‘‘atthataṃ…pe… anumodathā’’ti. ‘‘Tehi anumodakehi bhikkhuhī’’ti padaṃ ‘‘vacanīyo’’ti pade avuttakattā, ‘‘anumodāpetabba’’nti pade kāritakammaṃ avuttakammaṃ, vā. ‘‘Kathina’’nti dhātukammaṃ vā vuttakammaṃ vā upanetabbaṃ. Kiṃ vacanīyoti āha ‘‘atthataṃ…pe… anumodāmā’’ti. Itarehi cāti anumodakehi ca. Sabbesanti atthārakaanumodakānaṃ. Hīti saccaṃ. Etanti sabbesaṃ atthatabhāvaṃ, ‘‘dvinnaṃ…pe… anumodakassa cā’’ti vacanaṃ vā.
ஏவங் கதி²னே அத்த²தே ஸதி பனாதி யோஜனா. யேனாதி பி⁴க்கு²னா. அவிசாரெத்வாவாதி ‘‘கதி²னத்தா²ரகஸ்ஸ தே³மா’’தி வா ‘‘ஸங்க⁴ஸ்ஸ தே³மா’’தி வா அவிசாரெத்வா ஏவ. ஸேஸசீவரானிபீதி கதி²னத்தா²ரசீவரதோ ஸேஸசீவரானிபி. ஸங்கே⁴ன தா³தப்³பா³னீதி ஸம்ப³ந்தோ⁴. ‘‘அபலோகெத்வா’’தி இமினா கம்மவாசாய கிச்சாபா⁴வங் த³ஸ்ஸேதி. வஸ்ஸாவாஸிகட்டி²திகாயாதி வஸ்ஸாவாஸகாலே பவத்தாய டி²திகாய. க³ருப⁴ண்ட³ந்தி மஞ்சபி³ப்³போ³ஹனாதி³க³ருப⁴ண்ட³ங். ஏகஸீமாயாதி ஏகாய உபசாரஸீமாய.
Evaṃ kathine atthate sati panāti yojanā. Yenāti bhikkhunā. Avicāretvāvāti ‘‘kathinatthārakassa demā’’ti vā ‘‘saṅghassa demā’’ti vā avicāretvā eva. Sesacīvarānipīti kathinatthāracīvarato sesacīvarānipi. Saṅghena dātabbānīti sambandho. ‘‘Apaloketvā’’ti iminā kammavācāya kiccābhāvaṃ dasseti. Vassāvāsikaṭṭhitikāyāti vassāvāsakāle pavattāya ṭhitikāya. Garubhaṇḍanti mañcabibbohanādigarubhaṇḍaṃ. Ekasīmāyāti ekāya upacārasīmāya.
308. யதா² சாதி எத்த² யதா²ஸத்³தோ³ யங்ஸத்³த³த்தோ². யேன விதி⁴னாதி ஹி அத்தோ². மஹாபூ⁴மிகந்தி மஹாவிஸயங். சதுவீஸதிஆகாரவந்ததாய மஹாவித்தா²ரிகந்தி வுத்தங் ஹோதி. ததோதி அனத்த²தலக்க²ணதோ. பரிவாரேபீதி பிஸத்³தோ³ ந இத⁴ ஏவாதி த³ஸ்ஸேதி.
308.Yathā cāti ettha yathāsaddo yaṃsaddattho. Yena vidhināti hi attho. Mahābhūmikanti mahāvisayaṃ. Catuvīsatiākāravantatāya mahāvitthārikanti vuttaṃ hoti. Tatoti anatthatalakkhaṇato. Parivārepīti pisaddo na idha evāti dasseti.
தத்தா²தி சதுவீஸதியா ஆகாரேஸு. உல்லிகி²தமத்தேனாதி எத்த² பமாணஸ்ஸ உக்³க³ஹணத்த²ங் நகா²தீ³ஹி லிக²னங் உல்லிகி²தங், உல்லிகி²தங் மத்தங் பமாணங் உல்லிகி²தமத்தந்தி த³ஸ்ஸெந்தோ ஆஹ ‘‘தீ³க⁴தோ ச புது²லதோ ச பமாணக³ஹணமத்தேனா’’தி. தமேவத்த²ங் வித்தா²ரெந்தோ ஆஹ ‘‘பமாணங் ஹீ’’திஆதி³. த³ஸ்ஸெந்தோ ஹுத்வா உல்லிக²தீதி யோஜனா. பஞ்சகந்தி பஞ்சபமாணங், பஞ்சஸமூஹங் வா க²ண்ட³ங். வாஸத்³தே³ன அஞ்ஞானிபி தேரஸகாதீ³னி ஸங்க³ண்ஹாதி. மோக⁴ஸுத்தகாரோபனமத்தேனாதி மோக⁴ஸுத்தஸ்ஸ சீவரஸ்ஸூபரி ஆரோபனமத்தேன. தீ³க⁴ஸிப்³பி³தமத்தேனாதி தீ³க⁴தோ ஸிப்³பி³தமத்தேன. முத்³தி³யபட்டப³ந்த⁴னமத்தேனாதி முத்³தி³யபட்டஸ்ஸ ப³ந்த⁴னமத்தேன. த்³வே சிமிலிகாயோதி த்³வே பிலோதிகாயோ. பட²மசிமிலிகாதி கதி²னசிமிலிகதோ அஞ்ஞா அத்தனோ பகதிசிமிலிகா க⁴டெத்வா ட²பிதா ஹோதீதி யோஜனா. ‘‘தங் பட²மசிமிலிக’’ந்தி பாட²ஸேஸங் அஜ்ஜா²ஹரித்வா கதி²னஸாடகஸ்ஸ குச்சி²சிமிலிகங் கத்வாதி இமினா ஸம்ப³ந்தி⁴தப்³ப³ங். பகதிசீவரஸ்ஸாதி அத்தனோ பகதிசீவரஸ்ஸ. பகதிபட்டப³ந்த⁴சீவரந்தி பகதிபட்டேன ப³ந்த⁴சீவரங். பிட்டி²அனுவாதாரோபனமத்தேனாதி தீ³க⁴தோ அனுவாதஸ்ஸ சீவரஸ்ஸூபரி ஆரோபனமத்தேன. தீ³கா⁴னுவாதஞ்ஹி பாருபனகாலே பிட்டி²யங் டி²தத்தா பிட்டி²அனுவாதந்தி வுச்சதி. குச்சி²அனுவாதாரோபனமத்தேனாதி புது²லதோ அனுவாதஸ்ஸ சீவரஸ்ஸூபரி ஆரோபனமத்தேன. புது²லானுவாதஞ்ஹி பாருபனகாலே குச்சி²யங் டி²தத்தா குச்சி²அனுவாதந்தி வுச்சதி. ஆக³ந்துகபட்டாரோபனமத்தேனாதி ஆக³ந்துகபட்டஸ்ஸ சீவரஸ்ஸூபரி ஆரோபனமத்தேன. வாதி அத²வா.
Tatthāti catuvīsatiyā ākāresu. Ullikhitamattenāti ettha pamāṇassa uggahaṇatthaṃ nakhādīhi likhanaṃ ullikhitaṃ, ullikhitaṃ mattaṃ pamāṇaṃ ullikhitamattanti dassento āha ‘‘dīghato ca puthulato ca pamāṇagahaṇamattenā’’ti. Tamevatthaṃ vitthārento āha ‘‘pamāṇaṃ hī’’tiādi. Dassento hutvā ullikhatīti yojanā. Pañcakanti pañcapamāṇaṃ, pañcasamūhaṃ vā khaṇḍaṃ. Vāsaddena aññānipi terasakādīni saṅgaṇhāti. Moghasuttakāropanamattenāti moghasuttassa cīvarassūpari āropanamattena. Dīghasibbitamattenāti dīghato sibbitamattena. Muddiyapaṭṭabandhanamattenāti muddiyapaṭṭassa bandhanamattena. Dve cimilikāyoti dve pilotikāyo. Paṭhamacimilikāti kathinacimilikato aññā attano pakaticimilikā ghaṭetvā ṭhapitā hotīti yojanā. ‘‘Taṃ paṭhamacimilika’’nti pāṭhasesaṃ ajjhāharitvā kathinasāṭakassa kucchicimilikaṃ katvāti iminā sambandhitabbaṃ. Pakaticīvarassāti attano pakaticīvarassa. Pakatipaṭṭabandhacīvaranti pakatipaṭṭena bandhacīvaraṃ. Piṭṭhianuvātāropanamattenāti dīghato anuvātassa cīvarassūpari āropanamattena. Dīghānuvātañhi pārupanakāle piṭṭhiyaṃ ṭhitattā piṭṭhianuvātanti vuccati. Kucchianuvātāropanamattenāti puthulato anuvātassa cīvarassūpari āropanamattena. Puthulānuvātañhi pārupanakāle kucchiyaṃ ṭhitattā kucchianuvātanti vuccati. Āgantukapaṭṭāropanamattenāti āgantukapaṭṭassa cīvarassūpari āropanamattena. Vāti athavā.
ஸாருப்பந்தி ஸமணானுச்ச²விகங். பரிகதா²யாதி பரியாயேன உப்பாதி³தாய கதா²ய. அதிஉக்கட்ட²ங் வட்டதீதி அதிஉக்கட்ட²ங் ஏவ வட்டதி. ஓதிண்ணஸதி³ஸமேவாதி ஓதிண்ணேன வத்தே²ன ஸதி³ஸமேவ கதி²னசீவரந்தி ஸம்ப³ந்தோ⁴. தத்தா²தி து³விதே⁴ஸு ஸன்னிதீ⁴ஸு. தத³ஹேவாதி தஸ்மிங் தி³ன்னஅஹனி ஏவ.
Sāruppanti samaṇānucchavikaṃ. Parikathāyāti pariyāyena uppāditāya kathāya. Atiukkaṭṭhaṃ vaṭṭatīti atiukkaṭṭhaṃ eva vaṭṭati. Otiṇṇasadisamevāti otiṇṇena vatthena sadisameva kathinacīvaranti sambandho. Tatthāti duvidhesu sannidhīsu. Tadahevāti tasmiṃ dinnaahani eva.
ரத்தினிஸ்ஸக்³கி³யேனாதி ரத்திஅதிக்கந்தங் ஹுத்வா நிஸ்ஸக்³கி³யேன. அஞ்ஞேனாதி திசீவரதோ அஞ்ஞேன. ஸமண்ட³லிகதந்தி ஸஹ மஹாமண்ட³லஅட்³ட⁴மண்ட³லேன கதங்.
Rattinissaggiyenāti rattiatikkantaṃ hutvā nissaggiyena. Aññenāti ticīvarato aññena. Samaṇḍalikatanti saha mahāmaṇḍalaaḍḍhamaṇḍalena kataṃ.
309. ஏவங் சதுவீஸதிஆகாரங் அனத்த²தலக்க²ணங் த³ஸ்ஸெத்வா இதா³னி ஸத்தரஸாகாரங் அத்த²தலக்க²ணங் த³ஸ்ஸெந்தோ ஆஹ ‘‘அஹதேனா’’திஆதி³ . தத்த² பரிபோ⁴க³ங் ந ஹனித்த² ந க³ச்சி²த்தா²தி அஹதங், பரிபோ⁴கே³ன ந ஹனிதப்³ப³ங் ந ஹிங்ஸிதப்³ப³ந்தி வா அஹதந்தி த³ஸ்ஸெந்தோ ஆஹ ‘‘அபரிபு⁴த்தேனா’’தி. ‘‘அஹதஸதி³ஸேனா’’தி இமினா அஹதகப்பேனாதி எத்த² கப்பஸத்³தோ³ ஸதி³ஸத்தோ²தி த³ஸ்ஸேதி. பாபணிகேனாதி எத்த² பஸாரிதோ ஆபணோ பாபணோ, தஸ்மிங் பதிதங் பாபணிகந்தி த³ஸ்ஸெந்தோ ஆஹ ‘‘ஆபணத்³வாரே பதித’’ந்தி. ‘‘பிலோதிக’’ந்தி இமினா ணிகபச்சயஸ்ஸ ஸரூபங் த³ஸ்ஸேதி. வுத்தவிபல்லாஸேனேவாதி வுத்தேஹி ‘‘நிமித்தகதேனா’’திஆதீ³ஹி விபல்லாஸேன ஏவ. தத்தா²தி பரிவாரே . ஹீதி ஸச்சங், யஸ்மா வா. இதா⁴தி கதி²னக்க²ந்த⁴கே. அவுச்சமானேன தேன வசனேன பரிஹாயதீதி ஸம்ப³ந்தோ⁴.
309. Evaṃ catuvīsatiākāraṃ anatthatalakkhaṇaṃ dassetvā idāni sattarasākāraṃ atthatalakkhaṇaṃ dassento āha ‘‘ahatenā’’tiādi . Tattha paribhogaṃ na hanittha na gacchitthāti ahataṃ, paribhogena na hanitabbaṃ na hiṃsitabbanti vā ahatanti dassento āha ‘‘aparibhuttenā’’ti. ‘‘Ahatasadisenā’’ti iminā ahatakappenāti ettha kappasaddo sadisatthoti dasseti. Pāpaṇikenāti ettha pasārito āpaṇo pāpaṇo, tasmiṃ patitaṃ pāpaṇikanti dassento āha ‘‘āpaṇadvāre patita’’nti. ‘‘Pilotika’’nti iminā ṇikapaccayassa sarūpaṃ dasseti. Vuttavipallāsenevāti vuttehi ‘‘nimittakatenā’’tiādīhi vipallāsena eva. Tatthāti parivāre . Hīti saccaṃ, yasmā vā. Idhāti kathinakkhandhake. Avuccamānena tena vacanena parihāyatīti sambandho.
310. தத்தா²தி ‘‘கத²ஞ்ச பி⁴க்க²வே உப்³ப⁴தங் ஹோதி கதி²ன’’ந்திஆதி³பாடே². ஜனெத்தியோ மாதரோதி யோஜனா. இமினா த⁴ம்மேன புத்தே மானேதீதி மாதா, த⁴ம்மேன புத்தேஹி மானியதீதி வா மாதா, ஸா விய ஹொந்தீதி மாதிகாதி த³ஸ்ஸேதி. கதி²னுப்³பா⁴ரந்தி ச கதி²னுத்³தா⁴ரந்தி ச அத்த²தோ ஸதி³ஸங். ஏதாதி ஏதா பத³ஜாதியோ. தாஸூதி அட்ட²ஸு மாதிகாஸு. அஸ்ஸாதி கதி²னுப்³பா⁴ரஸ்ஸ.
310.Tatthāti ‘‘kathañca bhikkhave ubbhataṃ hoti kathina’’ntiādipāṭhe. Janettiyo mātaroti yojanā. Iminā dhammena putte mānetīti mātā, dhammena puttehi māniyatīti vā mātā, sā viya hontīti mātikāti dasseti. Kathinubbhāranti ca kathinuddhāranti ca atthato sadisaṃ. Etāti etā padajātiyo. Tāsūti aṭṭhasu mātikāsu. Assāti kathinubbhārassa.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 187. கதி²னானுஜானநா • 187. Kathinānujānanā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / கதி²னானுஜானநகதா² • Kathinānujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / கதி²னானுஜானநகதா²வண்ணனா • Kathinānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / கதி²னானுஜானநகதா²வண்ணனா • Kathinānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / கதி²னானுஜானநகதா²வண்ணனா • Kathinānujānanakathāvaṇṇanā
