| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
৭. কথিনক্খন্ধকং
7. Kathinakkhandhakaṃ
কথিনানুজাননকথা
Kathinānujānanakathā
৩০৬. কথিনক্খন্ধকে – পাৰেয্যকাতি পাৰেয্যরট্ঠৰাসিনো। পাৰেয্যং নাম কোসলেসু পচ্ছিমদিসাভাগে রট্ঠং; তত্থ ৰাসিনোতি ৰুত্তং হোতি। কোসলরঞ্ঞো একপিতুকভাতূনং ভদ্দৰগ্গিযত্থেরানং এতং অধিৰচনং। তেসু সব্বজেট্ঠকো অনাগামী, সব্বপচ্ছিমকো সোতাপন্নো, একোপি অরহা ৰা পুথুজ্জনো ৰা নত্থি। আরঞ্ঞিকাতি ধুতঙ্গসমাদানৰসেন আরঞ্ঞিকা; ন অরঞ্ঞৰাসমত্তেন। পিণ্ডপাতিকাদিভাৰেপি তেসং এসেৰ নযো। সীসৰসেন চেতং ৰুত্তং। ইমে পন তেরসাপি ধুতঙ্গানি সমাদাযেৰ ৰত্তন্তি। উদকসঙ্গহেতি উদকেন সঙ্গহিতে ঘটিতে সংসট্ঠে; থলে চ নিন্নে চ একোদকীভূতেতি অত্থো।
306. Kathinakkhandhake – pāveyyakāti pāveyyaraṭṭhavāsino. Pāveyyaṃ nāma kosalesu pacchimadisābhāge raṭṭhaṃ; tattha vāsinoti vuttaṃ hoti. Kosalarañño ekapitukabhātūnaṃ bhaddavaggiyattherānaṃ etaṃ adhivacanaṃ. Tesu sabbajeṭṭhako anāgāmī, sabbapacchimako sotāpanno, ekopi arahā vā puthujjano vā natthi. Āraññikāti dhutaṅgasamādānavasena āraññikā; na araññavāsamattena. Piṇḍapātikādibhāvepi tesaṃ eseva nayo. Sīsavasena cetaṃ vuttaṃ. Ime pana terasāpi dhutaṅgāni samādāyeva vattanti. Udakasaṅgaheti udakena saṅgahite ghaṭite saṃsaṭṭhe; thale ca ninne ca ekodakībhūteti attho.
উদকচিক্খল্লেতি অক্কন্তঅক্কন্তট্ঠানে উদকচিক্খল্লো উট্ঠহিত্ৰা যাৰ আনিসদা পহরতি, ঈদিসে চিক্খল্লেতি অত্থো। ওকপুণ্ণেহীতি উদকপুণ্ণেহি। তেসং কির চীৰরানি ঘনানি, তেসু পতিতং উদকং ন পগ্ঘরতি ঘনত্তা পুটবদ্ধং ৰিয তিট্ঠতি। তেন ৰুত্তং – ‘‘ওকপুণ্ণেহি চীৰরেহী’’তি। ‘‘ওঘপুণ্ণেহী’’তিপি পাঠো।
Udakacikkhalleti akkantaakkantaṭṭhāne udakacikkhallo uṭṭhahitvā yāva ānisadā paharati, īdise cikkhalleti attho. Okapuṇṇehīti udakapuṇṇehi. Tesaṃ kira cīvarāni ghanāni, tesu patitaṃ udakaṃ na paggharati ghanattā puṭabaddhaṃ viya tiṭṭhati. Tena vuttaṃ – ‘‘okapuṇṇehi cīvarehī’’ti. ‘‘Oghapuṇṇehī’’tipi pāṭho.
অৰিৰদমানা ৰস্সং ৰসিম্হাতি এত্থ আগন্তুকট্ঠানে সেনাসনফাসুতায অভাৰেন চ ভগৰতো দস্সনালাভেন উক্কণ্ঠিততায চ তে ভিক্খূ ফাসুং ন ৰসিংসু, তস্মা ‘‘অৰিৰদমানা ফাসুকং ৰস্সং ৰসিম্হা’’তি নাৰোচুং। ধম্মিং কথং কত্ৰাতি ভগৰা তেসং ভিক্খূনং অনমতগ্গিযকথং কথেসি। তে সব্বেপি কথাপরিযোসানে অরহত্তং পাপুণিত্ৰা নিসিন্নট্ঠানতোযেৰ আকাসে উপ্পতিত্ৰা অগমংসু, তং সন্ধায ৰুত্তং – ‘‘ধম্মিং কথং কত্ৰা’’তি। ততো ভগৰা ‘‘সচে কথিনত্থারো পঞ্ঞত্তো অভৰিস্স, এতে ভিক্খূ একং চীৰরং ঠপেত্ৰা সন্তরুত্তরেন আগচ্ছন্তা ন এৰং কিলন্তা অস্সু, কথিনত্থারো চ নামেস সব্ববুদ্ধেহি অনুঞ্ঞাতো’’তি চিন্তেত্ৰা কথিনত্থারং অনুজানিতুকামো ভিক্খূ আমন্তেসি, আমন্তেত্ৰা চ পন ‘‘অনুজানামি ভিক্খৰে’’তিআদিমাহ।
Avivadamānā vassaṃ vasimhāti ettha āgantukaṭṭhāne senāsanaphāsutāya abhāvena ca bhagavato dassanālābhena ukkaṇṭhitatāya ca te bhikkhū phāsuṃ na vasiṃsu, tasmā ‘‘avivadamānā phāsukaṃ vassaṃ vasimhā’’ti nāvocuṃ. Dhammiṃ kathaṃ katvāti bhagavā tesaṃ bhikkhūnaṃ anamataggiyakathaṃ kathesi. Te sabbepi kathāpariyosāne arahattaṃ pāpuṇitvā nisinnaṭṭhānatoyeva ākāse uppatitvā agamaṃsu, taṃ sandhāya vuttaṃ – ‘‘dhammiṃ kathaṃ katvā’’ti. Tato bhagavā ‘‘sace kathinatthāro paññatto abhavissa, ete bhikkhū ekaṃ cīvaraṃ ṭhapetvā santaruttarena āgacchantā na evaṃ kilantā assu, kathinatthāro ca nāmesa sabbabuddhehi anuññāto’’ti cintetvā kathinatthāraṃ anujānitukāmo bhikkhū āmantesi, āmantetvā ca pana ‘‘anujānāmi bhikkhave’’tiādimāha.
তত্থ অত্থতকথিনানং ৰোতি নিপাতমত্তং ৰোকারো; অত্থতকথিনানন্তি অত্থো। এৰঞ্হি সতি পরতো ‘‘সো নেসং ভৰিস্সতী’’তি যুজ্জতি। অথ ৰা ৰোতি সামিৰচনমেৰেতং। সো নেসন্তি এত্থ পন সো চীৰরুপ্পাদো যে অত্থতকথিনা, তেসং ভৰিস্সতীতি অত্থো।
Tattha atthatakathinānaṃ voti nipātamattaṃ vokāro; atthatakathinānanti attho. Evañhi sati parato ‘‘so nesaṃ bhavissatī’’ti yujjati. Atha vā voti sāmivacanamevetaṃ. So nesanti ettha pana so cīvaruppādo ye atthatakathinā, tesaṃ bhavissatīti attho.
তত্থ অনামন্তচারোতি যাৰ কথিনং ন উদ্ধরিযতি, তাৰ অনামন্তেত্ৰা চরণং কপ্পিস্সতি , চারিত্তসিক্খাপদেন অনাপত্তি ভৰিস্সতীতি অত্থো। অসমাদানচারোতি তিচীৰরং অসমাদায চরণং; চীৰরৰিপ্পৰাসো কপ্পিস্সতীতি অত্থো। গণভোজনন্তি গণভোজনম্পি কপ্পিস্সতি। যাৰদত্থচীৰরন্তি যাৰত্তকেন চীৰরেন অত্থো, তাৰত্তকং অনধিট্ঠিতং অৰিকপ্পিতং কপ্পিস্সতীতি অত্থো। যো চ তত্থ চীৰরুপ্পাদোতি তত্থ কথিনত্থতসীমাযং মতকচীৰরং ৰা হোতু সঙ্ঘং উদ্দিস্স দিন্নং ৰা সঙ্ঘিকেন তত্রুপ্পাদেন আভতং ৰা, যেন কেনচি আকারেন যং সঙ্ঘিকচীৰরং উপ্পজ্জতি, তং তেসং ভৰিস্সতীতি অত্থো।
Tattha anāmantacāroti yāva kathinaṃ na uddhariyati, tāva anāmantetvā caraṇaṃ kappissati , cārittasikkhāpadena anāpatti bhavissatīti attho. Asamādānacāroti ticīvaraṃ asamādāya caraṇaṃ; cīvaravippavāso kappissatīti attho. Gaṇabhojananti gaṇabhojanampi kappissati. Yāvadatthacīvaranti yāvattakena cīvarena attho, tāvattakaṃ anadhiṭṭhitaṃ avikappitaṃ kappissatīti attho. Yo ca tattha cīvaruppādoti tattha kathinatthatasīmāyaṃ matakacīvaraṃ vā hotu saṅghaṃ uddissa dinnaṃ vā saṅghikena tatruppādena ābhataṃ vā, yena kenaci ākārena yaṃ saṅghikacīvaraṃ uppajjati, taṃ tesaṃ bhavissatīti attho.
এৰঞ্চ পন ভিক্খৰে কথিনং অত্থরিতব্বন্তি এত্থ কথিনত্থারং কে লভন্তি, কে ন লভন্তীতি? গণনৰসেন তাৰ পচ্ছিমকোটিযা পঞ্চ জনা লভন্তি, উদ্ধং সতসহস্সম্পি, পঞ্চন্নং হেট্ঠা ন লভন্তি। ৰুত্থৰস্সৰসেন পুরিমিকায ৰস্সং উপগন্ত্ৰা পঠমপৰারণায পৰারিতা লভন্তি, ছিন্নৰস্সা ৰা পচ্ছিমিকায উপগতা ৰা ন লভন্তি, অঞ্ঞস্মিং ৰিহারে ৰুত্থৰস্সাপি ন লভন্তীতি মহাপচ্চরিযং ৰুত্তং। পুরিমিকায উপগতানং পন সব্বে গণপূরকা হোন্তি, আনিসংসং ন লভন্তি, আনিসংসো ইতরেসংযেৰ হোতি। সচে পুরিমিকায উপগতা চত্তারো ৰা হোন্তি তযো ৰা দ্ৰে ৰা একো ৰা, ইতরে গণপূরকে কত্ৰা কথিনং অত্থরিতব্বং। অথ চত্তারো ভিক্খূ উপগতা, একো পরিপুণ্ণৰস্সো সামণেরো, সো চে পচ্ছিমিকায উপসম্পজ্জতি, গণপূরকো চেৰ হোতি, আনিসংসঞ্চ লভতি। তযো ভিক্খূ দ্ৰে সামণেরা, দ্ৰে ভিক্খূ তযো সামণেরা, একো ভিক্খু চত্তারো সামণেরাতি এত্থাপি এসেৰ নযো। সচে পুরিমিকায উপগতা কথিনত্থারকুসলা ন হোন্তি, অত্থারকুসলা খন্ধকভাণকথেরা পরিযেসিত্ৰা আনেতব্বা। কম্মৰাচং সাৰেত্ৰা কথিনং অত্থরাপেত্ৰা দানঞ্চ ভুঞ্জিত্ৰা গমিস্সন্তি। আনিসংসো পন ইতরেসংযেৰ হোতি।
Evañca pana bhikkhave kathinaṃ attharitabbanti ettha kathinatthāraṃ ke labhanti, ke na labhantīti? Gaṇanavasena tāva pacchimakoṭiyā pañca janā labhanti, uddhaṃ satasahassampi, pañcannaṃ heṭṭhā na labhanti. Vutthavassavasena purimikāya vassaṃ upagantvā paṭhamapavāraṇāya pavāritā labhanti, chinnavassā vā pacchimikāya upagatā vā na labhanti, aññasmiṃ vihāre vutthavassāpi na labhantīti mahāpaccariyaṃ vuttaṃ. Purimikāya upagatānaṃ pana sabbe gaṇapūrakā honti, ānisaṃsaṃ na labhanti, ānisaṃso itaresaṃyeva hoti. Sace purimikāya upagatā cattāro vā honti tayo vā dve vā eko vā, itare gaṇapūrake katvā kathinaṃ attharitabbaṃ. Atha cattāro bhikkhū upagatā, eko paripuṇṇavasso sāmaṇero, so ce pacchimikāya upasampajjati, gaṇapūrako ceva hoti, ānisaṃsañca labhati. Tayo bhikkhū dve sāmaṇerā, dve bhikkhū tayo sāmaṇerā, eko bhikkhu cattāro sāmaṇerāti etthāpi eseva nayo. Sace purimikāya upagatā kathinatthārakusalā na honti, atthārakusalā khandhakabhāṇakatherā pariyesitvā ānetabbā. Kammavācaṃ sāvetvā kathinaṃ attharāpetvā dānañca bhuñjitvā gamissanti. Ānisaṃso pana itaresaṃyeva hoti.
কথিনং কেন দিন্নং ৰট্টতি? যেন কেনচি দেৰেন ৰা মনুস্সেন ৰা পঞ্চন্নং ৰা সহধম্মিকানং অঞ্ঞতরেন দিন্নং ৰট্টতি। কথিনদাযকস্স ৰত্তং অত্থি, সচে সো তং অজানন্তো পুচ্ছতি – ‘‘ভন্তে কথং কথিনং দাতব্ব’’ন্তি তস্স এৰং আচিক্খিতব্বং – ‘‘তিণ্ণং চীৰরানং অঞ্ঞতরপ্পহোনকং সূরিযুগ্গমনসমযে ৰত্থং ‘কথিনচীৰরং দেমা’তি দাতুং ৰট্টতি , তস্স পরিকম্মত্থং এত্তকা নাম সূচিযো, এত্তকং সুত্তং, এত্তকং রজনং, পরিকম্মং করোন্তানং এত্তকানং ভিক্খূনং যাগুভত্তঞ্চ দাতুং ৰট্টতী’’তি।
Kathinaṃ kena dinnaṃ vaṭṭati? Yena kenaci devena vā manussena vā pañcannaṃ vā sahadhammikānaṃ aññatarena dinnaṃ vaṭṭati. Kathinadāyakassa vattaṃ atthi, sace so taṃ ajānanto pucchati – ‘‘bhante kathaṃ kathinaṃ dātabba’’nti tassa evaṃ ācikkhitabbaṃ – ‘‘tiṇṇaṃ cīvarānaṃ aññatarappahonakaṃ sūriyuggamanasamaye vatthaṃ ‘kathinacīvaraṃ demā’ti dātuṃ vaṭṭati , tassa parikammatthaṃ ettakā nāma sūciyo, ettakaṃ suttaṃ, ettakaṃ rajanaṃ, parikammaṃ karontānaṃ ettakānaṃ bhikkhūnaṃ yāgubhattañca dātuṃ vaṭṭatī’’ti.
কথিনত্থারকেনাপি ধম্মেন সমেন উপ্পন্নং কথিনং অত্থরন্তেন ৰত্তং জানিতব্বং। তন্তৰাযগেহতো হি আভতসন্তানেনেৰ খলিমক্খিতসাটকো ন ৰট্টতি, মলীনসাটকোপি ন ৰট্টতি, তস্মা কথিনত্থারসাটকং লভিত্ৰা সুট্ঠু ধোৰিত্ৰা সূচিআদীনি চীৰরকম্মূপকরণানি সজ্জেত্ৰা বহূহি ভিক্খূহি সদ্ধিং তদহেৰ সিব্বিত্ৰা নিট্ঠিতসূচিকম্মং রজিত্ৰা কপ্পবিন্দুং দত্ৰা কথিনং অত্থরিতব্বং। সচে তস্মিং অনত্থতেযেৰ অঞ্ঞং কথিনসাটকং আহরতি, অঞ্ঞানি চ বহূনি কথিনানিসংসৰত্থানি দেতি, যো আনিসংসং বহুং দেতি, তস্স সন্তকেনেৰ অত্থরিতব্বং। ইতরো যথা তথা ওৰদিত্ৰা সঞ্ঞাপেতব্বো।
Kathinatthārakenāpi dhammena samena uppannaṃ kathinaṃ attharantena vattaṃ jānitabbaṃ. Tantavāyagehato hi ābhatasantāneneva khalimakkhitasāṭako na vaṭṭati, malīnasāṭakopi na vaṭṭati, tasmā kathinatthārasāṭakaṃ labhitvā suṭṭhu dhovitvā sūciādīni cīvarakammūpakaraṇāni sajjetvā bahūhi bhikkhūhi saddhiṃ tadaheva sibbitvā niṭṭhitasūcikammaṃ rajitvā kappabinduṃ datvā kathinaṃ attharitabbaṃ. Sace tasmiṃ anatthateyeva aññaṃ kathinasāṭakaṃ āharati, aññāni ca bahūni kathinānisaṃsavatthāni deti, yo ānisaṃsaṃ bahuṃ deti, tassa santakeneva attharitabbaṃ. Itaro yathā tathā ovaditvā saññāpetabbo.
কথিনং পন কেন অত্থরিতব্বং? যস্স সঙ্ঘো কথিনচীৰরং দেতি। সঙ্ঘেন পন কস্স দাতব্বং? যো জিণ্ণচীৰরো হোতি। সচে বহূ জিণ্ণচীৰরা হোন্তি, ৰুড্ঢস্স দাতব্বং। ৰুড্ঢেসুপি যো মহাপরিসো তদহেৰ চীৰরং কত্ৰা অত্থরিতুং সক্কোতি, তস্স দাতব্বং। সচে ৰুড্ঢো ন সক্কোতি নৰকতরো সক্কোতি, তস্স দাতব্বং। অপিচ সঙ্ঘেন মহাথেরস্স সঙ্গহং কাতুং ৰট্টতি, তস্মা ‘‘তুম্হে ভন্তে গণ্হথ, মযং কত্ৰা দস্সামা’’তি ৰত্তব্বং। তীসু চীৰরেসু যং জিণ্ণং হোতি, তদত্থায দাতব্বং। পকতিযা দুপট্টচীৰরস্স দুপট্টত্থাযেৰ দাতব্বং। সচেপিস্স একপট্টচীৰরং ঘনং হোতি, কথিনসাটকো চ পেলৰো, সারুপ্পত্থায দুপট্টপ্পহোনকমেৰ দাতব্বং, ‘‘অহং অলভন্তো একপট্টং পারুপামী’’তি ৰদন্তস্সাপি দুপট্টং দাতুং ৰট্টতি। যো পন লোভপকতিকো হোতি, তস্স ন দাতব্বং। তেনাপি ‘‘কথিনং অত্থরিত্ৰা পচ্ছা সিব্বিত্ৰা দ্ৰে চীৰরানি করিস্সামী’’তি ন গহেতব্বং। যস্স পন দীযতি, তস্স যেন ৰিধিনা দাতব্বং, তং দস্সেতুং ‘‘এৰঞ্চ পন ভিক্খৰে কথিনং অত্থরিতব্ব’’ন্তি আরভিত্ৰা সুণাতু মে ভন্তেতিআদিকা দানকম্মৰাচা তাৰ ৰুত্তা।
Kathinaṃ pana kena attharitabbaṃ? Yassa saṅgho kathinacīvaraṃ deti. Saṅghena pana kassa dātabbaṃ? Yo jiṇṇacīvaro hoti. Sace bahū jiṇṇacīvarā honti, vuḍḍhassa dātabbaṃ. Vuḍḍhesupi yo mahāpariso tadaheva cīvaraṃ katvā attharituṃ sakkoti, tassa dātabbaṃ. Sace vuḍḍho na sakkoti navakataro sakkoti, tassa dātabbaṃ. Apica saṅghena mahātherassa saṅgahaṃ kātuṃ vaṭṭati, tasmā ‘‘tumhe bhante gaṇhatha, mayaṃ katvā dassāmā’’ti vattabbaṃ. Tīsu cīvaresu yaṃ jiṇṇaṃ hoti, tadatthāya dātabbaṃ. Pakatiyā dupaṭṭacīvarassa dupaṭṭatthāyeva dātabbaṃ. Sacepissa ekapaṭṭacīvaraṃ ghanaṃ hoti, kathinasāṭako ca pelavo, sāruppatthāya dupaṭṭappahonakameva dātabbaṃ, ‘‘ahaṃ alabhanto ekapaṭṭaṃ pārupāmī’’ti vadantassāpi dupaṭṭaṃ dātuṃ vaṭṭati. Yo pana lobhapakatiko hoti, tassa na dātabbaṃ. Tenāpi ‘‘kathinaṃ attharitvā pacchā sibbitvā dve cīvarāni karissāmī’’ti na gahetabbaṃ. Yassa pana dīyati, tassa yena vidhinā dātabbaṃ, taṃ dassetuṃ ‘‘evañca pana bhikkhave kathinaṃ attharitabba’’nti ārabhitvā suṇātu me bhantetiādikā dānakammavācā tāva vuttā.
এৰং দিন্নে পন কথিনে সচে তং কথিনদুস্সং নিট্ঠিতপরিকম্মমেৰ হোতি , ইচ্চেতং কুসলং। নো চে নিট্ঠিতপরিকম্মং হোতি, ‘‘অহং থেরো’’তি ৰা ‘‘বহুস্সুতো’’তি ৰা একেনাপি অকাতুং ন লব্ভতি, সব্বেহেৰ সন্নিপতিত্ৰা ধোৰনসিব্বনরজনানি নিট্ঠাপেতব্বানি। ইদঞ্হি কথিনৰত্তং নাম বুদ্ধপ্পসত্থং। অতীতে পদুমুত্তরোপি ভগৰা কথিনৰত্তং অকাসি। তস্স কির অগ্গসাৰকো সুজাতত্থেরো নাম কথিনং গণ্হি, তং সত্থা অট্ঠসট্ঠিযা ভিক্খুসতসহস্সেহি সদ্ধিং নিসীদিত্ৰা অকাসি।
Evaṃ dinne pana kathine sace taṃ kathinadussaṃ niṭṭhitaparikammameva hoti , iccetaṃ kusalaṃ. No ce niṭṭhitaparikammaṃ hoti, ‘‘ahaṃ thero’’ti vā ‘‘bahussuto’’ti vā ekenāpi akātuṃ na labbhati, sabbeheva sannipatitvā dhovanasibbanarajanāni niṭṭhāpetabbāni. Idañhi kathinavattaṃ nāma buddhappasatthaṃ. Atīte padumuttaropi bhagavā kathinavattaṃ akāsi. Tassa kira aggasāvako sujātatthero nāma kathinaṃ gaṇhi, taṃ satthā aṭṭhasaṭṭhiyā bhikkhusatasahassehi saddhiṃ nisīditvā akāsi.
কতপরিযোসিতং পন কথিনং গহেত্ৰা অত্থারকেন ভিক্খুনা ‘‘সচে সঙ্ঘাটিযা কথিনং অত্থরিতুকামো হোতি, পোরাণিকা সঙ্ঘাটি পচ্চুদ্ধরিতব্বা, নৰা সঙ্ঘাটি অধিট্ঠাতব্বা। ‘ইমায সঙ্ঘাটিযা কথিনং অত্থরামী’তি ৰাচা ভিন্দিতব্বা’’তিআদিনা পরিৰারে ৰুত্তৰিধানেন কথিনং অত্থরিতব্বং। অত্থরিত্ৰা চ পন ‘‘তেন কথিনত্থারকেন ভিক্খুনা সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা অঞ্জলিং পগ্গহেত্ৰা এৰমস্স ৰচনীযো – ‘অত্থতং ভন্তে সঙ্ঘস্স কথিনং, ধম্মিকো কথিনত্থারো, অনুমোদথা’তি তেহি অনুমোদকেহি ভিক্খূহি একংসং উত্তরাসঙ্গং করিত্ৰা অঞ্জলিং পগ্গহেত্ৰা এৰমস্স ৰচনীযো – ‘অত্থতং আৰুসো সঙ্ঘস্স কথিনং, ধম্মিকো কথিনত্থারো, অনুমোদামা’’তি এৰমাদিনা পরিৰারে ৰুত্তৰিধানেনেৰ অনুমোদাপেতব্বং, ইতরেহি চ অনুমোদিতব্বং। এৰং সব্বেসং অত্থতং হোতি কথিনং। ৰুত্তঞ্হেতং পরিৰারে ‘‘দ্ৰিন্নং পুগ্গলানং অত্থতং হোতি কথিনং – অত্থারকস্স চ অনুমোদকস্স চা’’তি (পরি॰ ৪০৩)। পুনপি ৰুত্তং – ‘‘ন সঙ্ঘো কথিনং অত্থরতি, ন গণো কথিনং অত্থরতি, পুগ্গলো কথিনং অত্থরতি, সঙ্ঘস্স অনুমোদনা গণস্স অনুমোদনা পুগ্গলস্স অত্থারা সঙ্ঘস্স অত্থতং হোতি কথিনং, গণস্স অত্থতং হোতি কথিনং, পুগ্গলস্স অত্থতং হোতি কথিনং’’তি (পরি॰ ৪১৪)।
Katapariyositaṃ pana kathinaṃ gahetvā atthārakena bhikkhunā ‘‘sace saṅghāṭiyā kathinaṃ attharitukāmo hoti, porāṇikā saṅghāṭi paccuddharitabbā, navā saṅghāṭi adhiṭṭhātabbā. ‘Imāya saṅghāṭiyā kathinaṃ attharāmī’ti vācā bhinditabbā’’tiādinā parivāre vuttavidhānena kathinaṃ attharitabbaṃ. Attharitvā ca pana ‘‘tena kathinatthārakena bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā añjaliṃ paggahetvā evamassa vacanīyo – ‘atthataṃ bhante saṅghassa kathinaṃ, dhammiko kathinatthāro, anumodathā’ti tehi anumodakehi bhikkhūhi ekaṃsaṃ uttarāsaṅgaṃ karitvā añjaliṃ paggahetvā evamassa vacanīyo – ‘atthataṃ āvuso saṅghassa kathinaṃ, dhammiko kathinatthāro, anumodāmā’’ti evamādinā parivāre vuttavidhāneneva anumodāpetabbaṃ, itarehi ca anumoditabbaṃ. Evaṃ sabbesaṃ atthataṃ hoti kathinaṃ. Vuttañhetaṃ parivāre ‘‘dvinnaṃ puggalānaṃ atthataṃ hoti kathinaṃ – atthārakassa ca anumodakassa cā’’ti (pari. 403). Punapi vuttaṃ – ‘‘na saṅgho kathinaṃ attharati, na gaṇo kathinaṃ attharati, puggalo kathinaṃ attharati, saṅghassa anumodanā gaṇassa anumodanā puggalassa atthārā saṅghassa atthataṃ hoti kathinaṃ, gaṇassa atthataṃ hoti kathinaṃ, puggalassa atthataṃ hoti kathinaṃ’’ti (pari. 414).
এৰং অত্থতে পন কথিনে সচে কথিনচীৰরেন সদ্ধিং আভতং আনিসংসং দাযকা ‘‘যেন অম্হাকং কথিনং গহিতং, তস্সেৰ দেমা’’তি দেন্তি , ভিক্খুসঙ্ঘো অনিস্সরো। অথ অৰিচারেত্ৰাৰ দত্ৰা গচ্ছন্তি, ভিক্খুসঙ্ঘো ইস্সরো। তস্মা সচে কথিনত্থারকস্স সেসচীৰরানিপি দুব্বলানি হোন্তি, সঙ্ঘেন অপলোকেত্ৰা তেসম্পি অত্থায ৰত্থানি দাতব্বানি। কম্মৰাচা পন একাযেৰ ৰট্টতি। অৰসেসে কথিনানিসংসে বলৰৰত্থানি ৰস্সাৰাসিকট্ঠিতিকায দাতব্বানি, ঠিতিকায অভাৰে থেরাসনতো পট্ঠায দাতব্বানি, গরুভণ্ডং ন ভাজেতব্বং। সচে পন একসীমায বহূ ৰিহারা হোন্তি, সব্বে ভিক্খূ সন্নিপাতেত্ৰা একত্থ কথিনং অত্থরিতব্বং, ৰিসুং ৰিসুং অত্থরিতুং ন ৰট্টতি।
Evaṃ atthate pana kathine sace kathinacīvarena saddhiṃ ābhataṃ ānisaṃsaṃ dāyakā ‘‘yena amhākaṃ kathinaṃ gahitaṃ, tasseva demā’’ti denti , bhikkhusaṅgho anissaro. Atha avicāretvāva datvā gacchanti, bhikkhusaṅgho issaro. Tasmā sace kathinatthārakassa sesacīvarānipi dubbalāni honti, saṅghena apaloketvā tesampi atthāya vatthāni dātabbāni. Kammavācā pana ekāyeva vaṭṭati. Avasese kathinānisaṃse balavavatthāni vassāvāsikaṭṭhitikāya dātabbāni, ṭhitikāya abhāve therāsanato paṭṭhāya dātabbāni, garubhaṇḍaṃ na bhājetabbaṃ. Sace pana ekasīmāya bahū vihārā honti, sabbe bhikkhū sannipātetvā ekattha kathinaṃ attharitabbaṃ, visuṃ visuṃ attharituṃ na vaṭṭati.
৩০৮. ইদানি যথা চ কথিনং অত্থতং হোতি, যথা চ অনত্থতং, তং ৰিধিং ৰিত্থারতো দস্সেতুং এৰঞ্চ পন ভিক্খৰে অত্থতং হোতি কথিনং এৰং অনত্থতন্তি ৰত্ৰা অকরণীযঞ্চেৰ মহাভূমিকঞ্চ অনত্থতলক্খণং তাৰ দস্সেন্তো ন উল্লিখিতমত্তেনাতিআদিকে চতুৰীসতি আকারে দস্সেসি। ততো পরং অত্থতলক্খণং দস্সেন্তো অহতেন অত্থতন্তিআদিকে সত্তরস আকারে দস্সেসি। পরিৰারেপি হি ‘‘চতুৰীসতিযা আকারেহি অনত্থতং হোতি কথিনং, সত্তরসহি আকারেহি অত্থতং হোতি কথিন’’ন্তি ইদমেৰ লক্খণং ৰুত্তং।
308. Idāni yathā ca kathinaṃ atthataṃ hoti, yathā ca anatthataṃ, taṃ vidhiṃ vitthārato dassetuṃ evañca pana bhikkhave atthataṃ hoti kathinaṃ evaṃ anatthatanti vatvā akaraṇīyañceva mahābhūmikañca anatthatalakkhaṇaṃ tāva dassento na ullikhitamattenātiādike catuvīsati ākāre dassesi. Tato paraṃ atthatalakkhaṇaṃ dassento ahatena atthatantiādike sattarasa ākāre dassesi. Parivārepi hi ‘‘catuvīsatiyā ākārehi anatthataṃ hoti kathinaṃ, sattarasahi ākārehi atthataṃ hoti kathina’’nti idameva lakkhaṇaṃ vuttaṃ.
তত্থ উল্লিখিতমত্তেনাতি দীঘতো চ পুথুলতো চ পমাণগ্গহণমত্তেন। পমাণঞ্হি গণ্হন্তো তস্স তস্স পদেসস্স সঞ্জাননত্থং নখাদীহি ৰা পরিচ্ছেদং দস্সেন্তো উল্লিখতি, নলাটাদীসু ৰা ঘংসতি, তস্মা তং পমাণগ্গহণং ‘‘উল্লিখিতমত্ত’’ন্তি ৰুচ্চতি। ধোৰনমত্তেনাতি কথিনদুস্সধোৰনমত্তেন। চীৰরৰিচারণমত্তেনাতি ‘‘পঞ্চকং ৰা সত্তকং ৰা নৰকং ৰা একাদসকং ৰা হোতূ’’তি এৰং ৰিচারিতমত্তেন। ছেদনমত্তেনাতি যথাৰিচারিতস্স ৰত্থস্স ছেদনমত্তেন। বন্ধনমত্তেনাতি মোঘসুত্তকারোপনমত্তেন। ওৰট্টিযকরণমত্তেনাতি মোঘসুত্তকানুসারেন দীঘসিব্বিতমত্তেন। কণ্ডুসকরণমত্তেনাতি মুদ্ধিযপত্তবন্ধনমত্তেন। দল়্হীকম্মকরণমত্তেনাতি দ্ৰে চিমিলিকাযো একতো কত্ৰা সিব্বিতমত্তেন। অথ ৰা পঠমচিমিলিকা ঘটেত্ৰা ঠপিতা হোতি, কথিনসাটকং তস্সা কুচ্ছিচিমিলিকং কত্ৰা সিব্বিতমত্তেনাতিপি অত্থো। মহাপচ্চরিযং ‘‘পকতিচীৰরস্স উপস্সযদানেনা’’তি ৰুত্তং। কুরুন্দিযং পন ‘‘পকতিপত্তবদ্ধচীৰরং দুপট্টং কাতুং কুচ্ছিচিমিলিকং অল্লিযাপনমত্তেনা’’তি ৰুত্তং। অনুৰাতকরণমত্তেনাতি পিট্ঠিঅনুৰাতারোপনমত্তেন। পরিভণ্ডকরণমত্তেনাতি কুচ্ছিঅনউৰাতারোপনমত্তেন। ওৰদ্ধেয্যকরণমত্তেনাতি আগন্তুকপত্তারোপনমত্তেন । কথিনচীৰরতো ৰা পত্তং গহেত্ৰা অঞ্ঞস্মিং অকথিনচীৰরে পত্তারোপনমত্তেন।
Tattha ullikhitamattenāti dīghato ca puthulato ca pamāṇaggahaṇamattena. Pamāṇañhi gaṇhanto tassa tassa padesassa sañjānanatthaṃ nakhādīhi vā paricchedaṃ dassento ullikhati, nalāṭādīsu vā ghaṃsati, tasmā taṃ pamāṇaggahaṇaṃ ‘‘ullikhitamatta’’nti vuccati. Dhovanamattenāti kathinadussadhovanamattena. Cīvaravicāraṇamattenāti ‘‘pañcakaṃ vā sattakaṃ vā navakaṃ vā ekādasakaṃ vā hotū’’ti evaṃ vicāritamattena. Chedanamattenāti yathāvicāritassa vatthassa chedanamattena. Bandhanamattenāti moghasuttakāropanamattena. Ovaṭṭiyakaraṇamattenāti moghasuttakānusārena dīghasibbitamattena. Kaṇḍusakaraṇamattenāti muddhiyapattabandhanamattena. Daḷhīkammakaraṇamattenāti dve cimilikāyo ekato katvā sibbitamattena. Atha vā paṭhamacimilikā ghaṭetvā ṭhapitā hoti, kathinasāṭakaṃ tassā kucchicimilikaṃ katvā sibbitamattenātipi attho. Mahāpaccariyaṃ ‘‘pakaticīvarassa upassayadānenā’’ti vuttaṃ. Kurundiyaṃ pana ‘‘pakatipattabaddhacīvaraṃ dupaṭṭaṃ kātuṃ kucchicimilikaṃ alliyāpanamattenā’’ti vuttaṃ. Anuvātakaraṇamattenāti piṭṭhianuvātāropanamattena. Paribhaṇḍakaraṇamattenāti kucchianauvātāropanamattena. Ovaddheyyakaraṇamattenāti āgantukapattāropanamattena . Kathinacīvarato vā pattaṃ gahetvā aññasmiṃ akathinacīvare pattāropanamattena.
কম্বলমদ্দনমত্তেনাতি একৰারংযেৰ রজনে পক্খিত্তেন দন্তৰণ্ণেন পণ্ডুপলাসৰণ্ণেন ৰা। সচে পন সকিং ৰা দ্ৰিক্খত্তুং ৰা রত্তম্পি সারুপ্পং হোতি, ৰট্টতি। নিমিত্তকতেনাতি ‘‘ইমিনা দুস্সেন কথিনং অত্থরিস্সামী’’তি এৰং নিমিত্তকতেন। এত্তকমেৰ হি পরিৰারে ৰুত্তং। অট্ঠকথাসু পন ‘‘অযং সাটকো সুন্দরো, সক্কা ইমিনা কথিনং অত্থরিতু’ন্তি এৰং নিমিত্তকম্মং কত্ৰা লদ্ধেনা’’তি ৰুত্তং। পরিকথাকতেনাতি ‘‘কথিনং নাম দাতুং ৰট্টতি, কথিনদাযকো বহুং পুঞ্ঞং পসৰতী’’তি এৰং পরিকথায উপ্পাদিতেন। কথিনং নাম অতিউক্কট্ঠং ৰট্টতি, মাতরম্পি ৰিঞ্ঞাপেতুং ন ৰট্টতি, আকাসতো ওতিণ্ণসদিসমেৰ ৰট্টতীতি। কুক্কুকতেনাতি তাৰকালিকেন। সন্নিধিকতেনাতি এত্থ দুৰিধো সন্নিধি করণসন্নিধি চ নিচযসন্নিধি চ। তত্থ তদহেৰ অকত্ৰা ঠপেত্ৰা করণং করণসন্নিধি। সঙ্ঘো অজ্জ কথিনদুস্সং লভিত্ৰা পুনদিৰসে দেতি, অযং নিচযসন্নিধি।
Kambalamaddanamattenāti ekavāraṃyeva rajane pakkhittena dantavaṇṇena paṇḍupalāsavaṇṇena vā. Sace pana sakiṃ vā dvikkhattuṃ vā rattampi sāruppaṃ hoti, vaṭṭati. Nimittakatenāti ‘‘iminā dussena kathinaṃ attharissāmī’’ti evaṃ nimittakatena. Ettakameva hi parivāre vuttaṃ. Aṭṭhakathāsu pana ‘‘ayaṃ sāṭako sundaro, sakkā iminā kathinaṃ attharitu’nti evaṃ nimittakammaṃ katvā laddhenā’’ti vuttaṃ. Parikathākatenāti ‘‘kathinaṃ nāma dātuṃ vaṭṭati, kathinadāyako bahuṃ puññaṃ pasavatī’’ti evaṃ parikathāya uppāditena. Kathinaṃ nāma atiukkaṭṭhaṃ vaṭṭati, mātarampi viññāpetuṃ na vaṭṭati, ākāsato otiṇṇasadisameva vaṭṭatīti. Kukkukatenāti tāvakālikena. Sannidhikatenāti ettha duvidho sannidhi karaṇasannidhi ca nicayasannidhi ca. Tattha tadaheva akatvā ṭhapetvā karaṇaṃ karaṇasannidhi. Saṅgho ajja kathinadussaṃ labhitvā punadivase deti, ayaṃ nicayasannidhi.
নিস্সগ্গিযেনাতি রত্তিনিস্সগ্গিযেন। পরিৰারেপি ৰুত্তং – ‘‘নিস্সগ্গিযং নাম করিযমানে অরুণং উট্ঠহতী’’তি। অকপ্পকতেনাতি অনাদিন্নকপ্পবিন্দুনা। অঞ্ঞত্র সঙ্ঘাটিযাতিআদীসু ঠপেত্ৰা সঙ্ঘাটিউত্তরাসঙ্গঅন্তরৰাসকে অঞ্ঞেন পচ্চত্থরণাদিনা অত্থতং অনত্থতং হোতীতি। অঞ্ঞত্র পঞ্চকেন ৰা অতিরেকপঞ্চকেন ৰাতি পঞ্চ ৰা অতিরেকানি ৰা খণ্ডানি কত্ৰা মহামণ্ডলঅড্ঢমণ্ডলানি দস্সেত্ৰা কতেনেৰ ৰট্টতি। এৰঞ্হি সমণ্ডলিকতং হোতি, তং ঠপেত্ৰা অঞ্ঞেন অচ্ছিন্নকেন ৰা দ্ৰত্তিচতুখণ্ডেন ৰা ন ৰট্টতি। অঞ্ঞত্র পুগ্গলস্স অত্থারাতি পুগ্গলস্স অত্থারং ঠপেত্ৰা ন অঞ্ঞেন সঙ্ঘস্স ৰা গণস্স ৰা অত্থারেন অত্থতং হোতি। নিস্সীমট্ঠো অনুমোদতীতি বহিউপচারসীমায ঠিতো অনুমোদতি।
Nissaggiyenāti rattinissaggiyena. Parivārepi vuttaṃ – ‘‘nissaggiyaṃ nāma kariyamāne aruṇaṃ uṭṭhahatī’’ti. Akappakatenāti anādinnakappabindunā. Aññatra saṅghāṭiyātiādīsu ṭhapetvā saṅghāṭiuttarāsaṅgaantaravāsake aññena paccattharaṇādinā atthataṃ anatthataṃ hotīti. Aññatra pañcakena vā atirekapañcakena vāti pañca vā atirekāni vā khaṇḍāni katvā mahāmaṇḍalaaḍḍhamaṇḍalāni dassetvā kateneva vaṭṭati. Evañhi samaṇḍalikataṃ hoti, taṃ ṭhapetvā aññena acchinnakena vā dvatticatukhaṇḍena vā na vaṭṭati. Aññatra puggalassa atthārāti puggalassa atthāraṃ ṭhapetvā na aññena saṅghassa vā gaṇassa vā atthārena atthataṃ hoti. Nissīmaṭṭho anumodatīti bahiupacārasīmāya ṭhito anumodati.
৩০৯. অহতেনাতি অপরিভুত্তেন। অহতকপ্পেনাতি অহতসদিসেন একৰারং ৰা দ্ৰিক্খত্তুং ৰা ধোতেন। পিলোতিকাযাতি হতৰত্থকসাটকেন । পংসুকূলেনাতি তেৰীসতিযা খেত্তেসু উপ্পন্নপংসুকূলেন। পংসুকূলিকভিক্খুনা চোল়কভিক্খং আহিণ্ডিত্ৰা লদ্ধচোল়কেহি কতচীৰরেনাতিপি কুরুন্দিমহাপচ্চরীসু ৰুত্তং। পাপণিকেনাতি আপণদ্ৰারে পতিতপিলোতিকং গহেত্ৰা কথিনত্থায দেতি, তেনাপি ৰট্টতীতি অত্থো। সেসং ৰুত্তৰিপল্লাসেনেৰ ৰেদিতব্বং। ইমস্মিং পন ঠানে ‘‘সহ কথিনস্স অত্থারা কতি ধম্মা জাযন্তী’’তিআদি বহুঅট্ঠকথাসু ৰুত্তং, তং সব্বং পরিৰারে পাল়িআরূল়্হমেৰ, তস্মা তত্থ আগতনযেনেৰ ৰেদিতব্বং। ন হি তেন ইধ অৰুচ্চমানেন কথিনত্থারকস্স কিঞ্চি পরিহাযতি।
309.Ahatenāti aparibhuttena. Ahatakappenāti ahatasadisena ekavāraṃ vā dvikkhattuṃ vā dhotena. Pilotikāyāti hatavatthakasāṭakena . Paṃsukūlenāti tevīsatiyā khettesu uppannapaṃsukūlena. Paṃsukūlikabhikkhunā coḷakabhikkhaṃ āhiṇḍitvā laddhacoḷakehi katacīvarenātipi kurundimahāpaccarīsu vuttaṃ. Pāpaṇikenāti āpaṇadvāre patitapilotikaṃ gahetvā kathinatthāya deti, tenāpi vaṭṭatīti attho. Sesaṃ vuttavipallāseneva veditabbaṃ. Imasmiṃ pana ṭhāne ‘‘saha kathinassa atthārā kati dhammā jāyantī’’tiādi bahuaṭṭhakathāsu vuttaṃ, taṃ sabbaṃ parivāre pāḷiārūḷhameva, tasmā tattha āgatanayeneva veditabbaṃ. Na hi tena idha avuccamānena kathinatthārakassa kiñci parihāyati.
৩১০. এৰং কথিনত্থারং দস্সেত্ৰা ইদানি উব্ভারং দস্সেতুং কথঞ্চ ভিক্খৰে উব্ভতং হোতি কথিনন্তিআদিমাহ। তত্থ মাতিকাতি মাতরো; জনেত্তিযোতি অত্থো। কথিনুব্ভারঞ্হি এতা অট্ঠ জনেত্তিযো। তাসু পক্কমনং অন্তো অস্সাতি পক্কমনন্তিকা। এৰং সেসাপি ৰেদিতব্বা।
310. Evaṃ kathinatthāraṃ dassetvā idāni ubbhāraṃ dassetuṃ kathañca bhikkhave ubbhataṃ hoti kathinantiādimāha. Tattha mātikāti mātaro; janettiyoti attho. Kathinubbhārañhi etā aṭṭha janettiyo. Tāsu pakkamanaṃ anto assāti pakkamanantikā. Evaṃ sesāpi veditabbā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ১৮৭. কথিনানুজাননা • 187. Kathinānujānanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / কথিনানুজাননকথাৰণ্ণনা • Kathinānujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / কথিনানুজাননকথাৰণ্ণনা • Kathinānujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / কথিনানুজাননকথাৰণ্ণনা • Kathinānujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১৮৭. কথিনানুজাননকথা • 187. Kathinānujānanakathā
