| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
7. கதி²னக்க²ந்த⁴கோ
7. Kathinakkhandhako
கதி²னானுஜானநகதா²வண்ணனா
Kathinānujānanakathāvaṇṇanā
306. கதி²னக்க²ந்த⁴கே ஸீஸவஸேனாதி பதா⁴னவஸேன. கதி²னந்தி பஞ்சானிஸங்ஸே அந்தோகரணஸமத்த²தாய தி²ரந்தி அத்தோ². ஸோ நேஸங் ப⁴விஸ்ஸதீதி யுஜ்ஜதீதி ‘‘ஸோ தும்ஹாக’’ந்தி அவத்வா ‘‘நேஸ’’ந்தி வசனங் யுஜ்ஜதி. யே அத்த²தகதி²னாதி ந கேவலங் தும்ஹாகமேவ, யே அஞ்ஞேபி அத்த²தகதி²னா, தேஸங் ப⁴விஸ்ஸதீதி அத்தோ². அத² வா வோதி ததா³ ஸம்முகீ²பூ⁴தேஹி ஸத்³தி⁴ங் அஸம்முகீ²பூ⁴தே ச அனாக³தே ச பி⁴க்கூ² ஸப்³பே³ ஏகதோ ஸம்பிண்டெ³த்வா வுத்தங், தும்ஹாகந்தி அத்தோ². ஸோ நேஸந்தி எத்த² ஸோ தேஸந்தி யோஜேதப்³ப³ங். தேனாஹ ‘‘அத்த²தகதி²னானங் வோ, பி⁴க்க²வே, இமானி பஞ்ச கப்பிஸ்ஸந்தீ’’தி. மதகசீவரந்தி மதஸ்ஸ சீவரங். ‘‘வுத்த²வஸ்ஸவஸேனா’’தி இத³ங் பச்சி²மவஸ்ஸங்வுத்தா²னம்பி ஸாதா⁴ரணந்தி ஆஹ ‘‘புரிமிகாய வஸ்ஸங் உபக³ந்த்வா பட²மபவாரணாய பவாரிதா லப⁴ந்தீ’’தி. உபக³தா வா ந லப⁴ந்தீதி பச்சி²மிகாய வுத்த²வஸ்ஸேபி ஸந்தா⁴ய வுத்தங்.
306. Kathinakkhandhake sīsavasenāti padhānavasena. Kathinanti pañcānisaṃse antokaraṇasamatthatāya thiranti attho. So nesaṃ bhavissatīti yujjatīti ‘‘so tumhāka’’nti avatvā ‘‘nesa’’nti vacanaṃ yujjati. Ye atthatakathināti na kevalaṃ tumhākameva, ye aññepi atthatakathinā, tesaṃ bhavissatīti attho. Atha vā voti tadā sammukhībhūtehi saddhiṃ asammukhībhūte ca anāgate ca bhikkhū sabbe ekato sampiṇḍetvā vuttaṃ, tumhākanti attho. So nesanti ettha so tesanti yojetabbaṃ. Tenāha ‘‘atthatakathinānaṃ vo, bhikkhave, imāni pañca kappissantī’’ti. Matakacīvaranti matassa cīvaraṃ. ‘‘Vutthavassavasenā’’ti idaṃ pacchimavassaṃvutthānampi sādhāraṇanti āha ‘‘purimikāya vassaṃ upagantvā paṭhamapavāraṇāya pavāritā labhantī’’ti. Upagatā vā na labhantīti pacchimikāya vutthavassepi sandhāya vuttaṃ.
க²லிமக்கி²தஸாடகோதி அஹதவத்த²ங் ஸந்தா⁴ய வுத்தங். ‘‘அகாதுங் ந லப்³ப⁴தீ’’தி இமினா அனாத³ரியே ஸதி து³க்கடந்தி தீ³பேதி.
Khalimakkhitasāṭakoti ahatavatthaṃ sandhāya vuttaṃ. ‘‘Akātuṃ na labbhatī’’ti iminā anādariye sati dukkaṭanti dīpeti.
‘‘அபலோகெத்வா’’தி இத³ங் அஞ்ஞேஸங் வஸ்ஸங்வுத்த²பி⁴க்கூ²னங் அத³த்வா தா³துகாமேஹி கத்தப்³ப³விதி⁴த³ஸ்ஸனங். யதி³ ஏவங் கம்மவாசாய ஏவ தா³னங் அவுத்தந்தி ஆஹ ‘‘கம்மவாசா பனா’’திஆதி³. கதி²னசீவரங் விய கம்மவாசாய தா³துங் ந வட்டதீதி அபலோகெத்வாவ தா³தப்³ப³ந்தி அதி⁴ப்பாயோ.
‘‘Apaloketvā’’ti idaṃ aññesaṃ vassaṃvutthabhikkhūnaṃ adatvā dātukāmehi kattabbavidhidassanaṃ. Yadi evaṃ kammavācāya eva dānaṃ avuttanti āha ‘‘kammavācā panā’’tiādi. Kathinacīvaraṃ viya kammavācāya dātuṃ na vaṭṭatīti apaloketvāva dātabbanti adhippāyo.
308. மஹாபூ⁴மிகந்தி மஹாவிஸயங், சதுவீஸதிஆகாரவந்ததாய மஹாவித்தா²ரிகந்தி வுத்தங் ஹோதி. பஞ்சகந்தி பஞ்சக²ண்ட³ங். ஏஸேவ நயோ ஸேஸேஸுபி. பட²மசிமிலிகாதி கதி²னவத்த²தோ அஞ்ஞா அத்தனோ பகதிசிமிலிகா. குச்சி²சிமிலிகங் கத்வா ஸிப்³பி³தமத்தேனாதி தி²ரஜிண்ணானங் சிமிலிகானங் ஏகதோ கத்வா ஸிப்³ப³னஸ்ஸேதங் அதி⁴வசனந்தி வத³ந்தி. மஹாபச்சரியங், குருந்தி³யஞ்ச வுத்தவசனந்தி த³ஸ்ஸனங், ப்³யஞ்ஜனதோ ஏவ பே⁴தோ³, ந அத்த²தோதி த³ஸ்ஸனத்த²ங் கதந்திபி வத³ந்தி. பிட்டி²அனுவாதாரோபனமத்தேனாதி தீ³க⁴தோ அனுவாதஸ்ஸ ஆரோபனமத்தேன. குச்சி²அனுவாதாரோபனமத்தேனாதி புது²லதோ அனுவாதஸ்ஸ ஆரோபனமத்தேன. ரத்தினிஸ்ஸக்³கி³யேனாதி ரத்திஅதிக்கந்தேன.
308.Mahābhūmikanti mahāvisayaṃ, catuvīsatiākāravantatāya mahāvitthārikanti vuttaṃ hoti. Pañcakanti pañcakhaṇḍaṃ. Eseva nayo sesesupi. Paṭhamacimilikāti kathinavatthato aññā attano pakaticimilikā. Kucchicimilikaṃ katvā sibbitamattenāti thirajiṇṇānaṃ cimilikānaṃ ekato katvā sibbanassetaṃ adhivacananti vadanti. Mahāpaccariyaṃ, kurundiyañca vuttavacananti dassanaṃ, byañjanato eva bhedo, na atthatoti dassanatthaṃ katantipi vadanti. Piṭṭhianuvātāropanamattenāti dīghato anuvātassa āropanamattena. Kucchianuvātāropanamattenāti puthulato anuvātassa āropanamattena. Rattinissaggiyenāti rattiatikkantena.
309. ஹதவத்த²கஸாடகேனாதி அதிஜிண்ணஸாடகோ. ந ஹி தேனாதிஆதீ³ஸு தேன பரிவாராக³தபாடே²ன இத⁴ ஆனெத்வா அவுச்சமானேன கதி²னத்தா²ரகஸ்ஸ ஜானிதப்³பே³ஸு ந கிஞ்சி பரிஹாயதி, தஸ்ஸ ஸப்³ப³ஸ்ஸ இதே⁴வ வுத்தத்தாதி அதி⁴ப்பாயோ.
309.Hatavatthakasāṭakenāti atijiṇṇasāṭako. Na hi tenātiādīsu tena parivārāgatapāṭhena idha ānetvā avuccamānena kathinatthārakassa jānitabbesu na kiñci parihāyati, tassa sabbassa idheva vuttattāti adhippāyo.
310. மாதா வியாதி மாதிகா, இவத்தே² க-பச்சயோ த³ட்ட²ப்³போ³. தேன ஸித்³த⁴மத்த²ங் த³ஸ்ஸெந்தோ ஆஹ ‘‘மாதிகாதி மாதரோ’’திஆதி³. அஸ்ஸாதி ஏதிஸ்ஸா மாதிகாய. பக்கமனந்திகோ கதி²னுப்³பா⁴ரோ ஏவ ஹி ஸயங் அத்தனோ உப்பஜ்ஜதீதி ஏவமபே⁴தூ³பசாரேன ‘‘மாதிகா’’தி வுத்தோ உப்³பா⁴ரஸ்ஸேவ பக்கமனந்தே ஸமுப்பத்திதோ, தப்³பி³னிமுத்தாய ச மாதிகாய அபா⁴வா, தப்பகாஸிகாபி செத்த² பாளி ‘‘மாதிகா’’தி வத்துங் யுஜ்ஜதி. ஸாபி ஹி பக்கமனந்திகுப்³பா⁴ரப்பகாஸனேன ‘‘பக்கமனந்திகா’’தி வுத்தா. ஏஸேவ நயோ ஸேஸுப்³பா⁴ரேஸுபி. பக்கமனந்தி செத்த² உபசாரஸீமாதிக்கமனங் த³ட்ட²ப்³ப³ங்.
310. Mātā viyāti mātikā, ivatthe ka-paccayo daṭṭhabbo. Tena siddhamatthaṃ dassento āha ‘‘mātikāti mātaro’’tiādi. Assāti etissā mātikāya. Pakkamanantiko kathinubbhāro eva hi sayaṃ attano uppajjatīti evamabhedūpacārena ‘‘mātikā’’ti vutto ubbhārasseva pakkamanante samuppattito, tabbinimuttāya ca mātikāya abhāvā, tappakāsikāpi cettha pāḷi ‘‘mātikā’’ti vattuṃ yujjati. Sāpi hi pakkamanantikubbhārappakāsanena ‘‘pakkamanantikā’’ti vuttā. Eseva nayo sesubbhāresupi. Pakkamananti cettha upacārasīmātikkamanaṃ daṭṭhabbaṃ.
கதி²னானுஜானநகதா²வண்ணனா நிட்டி²தா.
Kathinānujānanakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 187. கதி²னானுஜானநா • 187. Kathinānujānanā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / கதி²னானுஜானநகதா² • Kathinānujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / கதி²னானுஜானநகதா²வண்ணனா • Kathinānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / கதி²னானுஜானநகதா²வண்ணனா • Kathinānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 187. கதி²னானுஜானநகதா² • 187. Kathinānujānanakathā
