| Library / Tipiṭaka / তিপিটক • Tipiṭaka / পরিৰার-অট্ঠকথা • Parivāra-aṭṭhakathā |
কথিনসমুট্ঠানৰণ্ণনা
Kathinasamuṭṭhānavaṇṇanā
২৬২. উব্ভতং কথিনং তীণীতি ‘‘নিট্ঠিতচীৰরস্মিং ভিক্খুনা উব্ভতস্মিং কথিনে’’তি ৰুত্তানি আদিতোৰ তীণি সিক্খাপদানি। পঠমং পত্তভেসজ্জন্তি ‘‘দসাহপরমং অতিরেকপত্তো’’তি ৰুত্তং পঠমপত্তসিক্খাপদঞ্চ ‘‘পটিসাযনীযানি ভেসজ্জানী’’তি ৰুত্তসিক্খাপদঞ্চ। অচ্চেকঞ্চাপি সাসঙ্কন্তি অচ্চেকচীৰরসিক্খাপদঞ্চ তদনন্তরমেৰ সাসঙ্কসিক্খাপদঞ্চ। পক্কমন্তেন ৰা দুৰেতি ‘‘তং পক্কমন্তো নেৰ উদ্ধরেয্যা’’তি ভূতগামৰগ্গে ৰুত্তসিক্খাপদদ্ৰযং।
262.Ubbhataṃkathinaṃ tīṇīti ‘‘niṭṭhitacīvarasmiṃ bhikkhunā ubbhatasmiṃ kathine’’ti vuttāni āditova tīṇi sikkhāpadāni. Paṭhamaṃ pattabhesajjanti ‘‘dasāhaparamaṃ atirekapatto’’ti vuttaṃ paṭhamapattasikkhāpadañca ‘‘paṭisāyanīyāni bhesajjānī’’ti vuttasikkhāpadañca. Accekañcāpi sāsaṅkanti accekacīvarasikkhāpadañca tadanantarameva sāsaṅkasikkhāpadañca. Pakkamantena vā duveti ‘‘taṃ pakkamanto neva uddhareyyā’’ti bhūtagāmavagge vuttasikkhāpadadvayaṃ.
উপস্সযং পরম্পরাতি ‘‘ভিক্খুনুপস্সযং গন্ত্ৰা ভিক্খুনিযো ওৰদেয্যা’’তি চ ‘‘পরম্পরভোজনে পাচিত্তিয’’ন্তি চ ৰুত্তসিক্খাপদদ্ৰযং। অনতিরিত্তং নিমন্তনাতি ‘‘অনতিরিত্তং খাদনীযং ৰা ভোজনীযং ৰা’’তি চ ‘‘নিমন্তিতো সভত্তো সমানো’’তি চ ৰুত্তসিক্খাপদদ্ৰযং। ৰিকপ্পং রঞ্ঞো ৰিকালেতি ‘‘সামং চীৰরং ৰিকপ্পেত্ৰা’’তি চ ‘‘রঞ্ঞো খত্তিযস্সা’’তি চ ‘‘ৰিকালে গামং পৰিসেয্যা’’তি চ ৰুত্তসিক্খাপদত্তযং। ৰোসাসারঞ্ঞকেন চাতি ‘‘ৰোসাসমানরূপা ঠিতা’’তি চ ‘‘তথারূপেসু আরঞ্ঞকেসু সেনাসনেসু পুব্বে অপ্পটিসংৰিদিত’’ন্তি চ ৰুত্তসিক্খাপদদ্ৰযং।
Upassayaṃ paramparāti ‘‘bhikkhunupassayaṃ gantvā bhikkhuniyo ovadeyyā’’ti ca ‘‘paramparabhojane pācittiya’’nti ca vuttasikkhāpadadvayaṃ. Anatirittaṃ nimantanāti ‘‘anatirittaṃ khādanīyaṃ vā bhojanīyaṃ vā’’ti ca ‘‘nimantito sabhatto samāno’’ti ca vuttasikkhāpadadvayaṃ. Vikappaṃ rañño vikāleti ‘‘sāmaṃ cīvaraṃ vikappetvā’’ti ca ‘‘rañño khattiyassā’’ti ca ‘‘vikāle gāmaṃ paviseyyā’’ti ca vuttasikkhāpadattayaṃ. Vosāsāraññakena cāti ‘‘vosāsamānarūpā ṭhitā’’ti ca ‘‘tathārūpesu āraññakesu senāsanesu pubbe appaṭisaṃvidita’’nti ca vuttasikkhāpadadvayaṃ.
উস্সযা সন্নিচযঞ্চাতি ‘‘উস্সযৰাদিকা’’তি চ ‘‘পত্তসন্নিচযং করেয্যা’’তি চ ৰুত্তসিক্খাপদদ্ৰযং। পুরে পচ্ছা ৰিকালে চাতি ‘‘যা পন ভিক্খুনী পুরেভত্তং কুলানি উপসঙ্কমিত্ৰা’’তি চ, ‘‘পচ্ছাভত্তং কুলানি উপসঙ্কমিত্ৰা’’তি চ, ‘‘ৰিকালে কুলানি উপসঙ্কমিত্ৰা’’তি চ ৰুত্তসিক্খাপদত্তযং। পঞ্চাহিকা সঙ্কমনীতি ‘‘পঞ্চাহিকা সঙ্ঘাটিচারং অতিক্কমেয্যা’’তি চ ‘‘চীৰরসঙ্কমনীযং ধারেয্যা’’তি চ ৰুত্তসিক্খাপদদ্ৰযং। দ্ৰেপি আৰসথেন চাতি ‘‘আৰসথচীৰরং অনিস্সজ্জিত্ৰা পরিভুঞ্জেয্য, আৰসথং অনিস্সজ্জিত্ৰা চারিকং পক্কমেয্যা’’তি চ এৰং আৰসথেন সদ্ধিং ৰুত্তসিক্খাপদানি চ দ্ৰে।
Ussayā sannicayañcāti ‘‘ussayavādikā’’ti ca ‘‘pattasannicayaṃ kareyyā’’ti ca vuttasikkhāpadadvayaṃ. Pure pacchā vikāle cāti ‘‘yā pana bhikkhunī purebhattaṃ kulāni upasaṅkamitvā’’ti ca, ‘‘pacchābhattaṃ kulāni upasaṅkamitvā’’ti ca, ‘‘vikāle kulāni upasaṅkamitvā’’ti ca vuttasikkhāpadattayaṃ. Pañcāhikā saṅkamanīti ‘‘pañcāhikā saṅghāṭicāraṃ atikkameyyā’’ti ca ‘‘cīvarasaṅkamanīyaṃ dhāreyyā’’ti ca vuttasikkhāpadadvayaṃ. Dvepi āvasathena cāti ‘‘āvasathacīvaraṃ anissajjitvā paribhuñjeyya, āvasathaṃ anissajjitvā cārikaṃ pakkameyyā’’ti ca evaṃ āvasathena saddhiṃ vuttasikkhāpadāni ca dve.
পসাখে আসনে চেৰাতি ‘‘পসাখে জাতং গণ্ডং ৰা’’তি চ ‘‘ভিক্খুস্স পুরতো অনাপুচ্ছা আসনে নিসীদেয্যা’’তি চ ৰুত্তসিক্খাপদদ্ৰযং।
Pasākhe āsane cevāti ‘‘pasākhe jātaṃ gaṇḍaṃ vā’’ti ca ‘‘bhikkhussa purato anāpucchā āsane nisīdeyyā’’ti ca vuttasikkhāpadadvayaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ৫. কথিনসমুট্ঠানং • 5. Kathinasamuṭṭhānaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / কথিনসমুট্ঠানৰণ্ণনা • Kathinasamuṭṭhānavaṇṇanā
