| Library / Tipiṭaka / တိပိဋက • Tipiṭaka / ပရိဝာရ-အဋ္ဌကထာ • Parivāra-aṭṭhakathā |
ကထိနသမုဋ္ဌာနဝဏ္ဏနာ
Kathinasamuṭṭhānavaṇṇanā
၂၆၂. ဥဗ္ဘတံ ကထိနံ တီဏီတိ ‘‘နိဋ္ဌိတစီဝရသ္မိံ ဘိက္ခုနာ ဥဗ္ဘတသ္မိံ ကထိနေ’’တိ ဝုတ္တာနိ အာဒိတောဝ တီဏိ သိက္ခာပဒာနိ။ ပဌမံ ပတ္တဘေသဇ္ဇန္တိ ‘‘ဒသာဟပရမံ အတိရေကပတ္တော’’တိ ဝုတ္တံ ပဌမပတ္တသိက္ခာပဒဉ္စ ‘‘ပဋိသာယနီယာနိ ဘေသဇ္ဇာနီ’’တိ ဝုတ္တသိက္ခာပဒဉ္စ။ အစ္စေကဉ္စာပိ သာသင္ကန္တိ အစ္စေကစီဝရသိက္ခာပဒဉ္စ တဒနန္တရမေဝ သာသင္ကသိက္ခာပဒဉ္စ။ ပက္ကမန္တေန ဝာ ဒုဝေတိ ‘‘တံ ပက္ကမန္တော နေဝ ဥဒ္ဓရေယ္ယာ’’တိ ဘူတဂာမဝဂ္ဂေ ဝုတ္တသိက္ခာပဒဒ္ဝယံ။
262.Ubbhataṃkathinaṃ tīṇīti ‘‘niṭṭhitacīvarasmiṃ bhikkhunā ubbhatasmiṃ kathine’’ti vuttāni āditova tīṇi sikkhāpadāni. Paṭhamaṃ pattabhesajjanti ‘‘dasāhaparamaṃ atirekapatto’’ti vuttaṃ paṭhamapattasikkhāpadañca ‘‘paṭisāyanīyāni bhesajjānī’’ti vuttasikkhāpadañca. Accekañcāpi sāsaṅkanti accekacīvarasikkhāpadañca tadanantarameva sāsaṅkasikkhāpadañca. Pakkamantena vā duveti ‘‘taṃ pakkamanto neva uddhareyyā’’ti bhūtagāmavagge vuttasikkhāpadadvayaṃ.
ဥပသ္သယံ ပရမ္ပရာတိ ‘‘ဘိက္ခုနုပသ္သယံ ဂန္တ္ဝာ ဘိက္ခုနိယော ဩဝဒေယ္ယာ’’တိ စ ‘‘ပရမ္ပရဘောဇနေ ပာစိတ္တိယ’’န္တိ စ ဝုတ္တသိက္ခာပဒဒ္ဝယံ။ အနတိရိတ္တံ နိမန္တနာတိ ‘‘အနတိရိတ္တံ ခာဒနီယံ ဝာ ဘောဇနီယံ ဝာ’’တိ စ ‘‘နိမန္တိတော သဘတ္တော သမာနော’’တိ စ ဝုတ္တသိက္ခာပဒဒ္ဝယံ။ ဝိကပ္ပံ ရညော ဝိကာလေတိ ‘‘သာမံ စီဝရံ ဝိကပ္ပေတ္ဝာ’’တိ စ ‘‘ရညော ခတ္တိယသ္သာ’’တိ စ ‘‘ဝိကာလေ ဂာမံ ပဝိသေယ္ယာ’’တိ စ ဝုတ္တသိက္ခာပဒတ္တယံ။ ဝောသာသာရညကေန စာတိ ‘‘ဝောသာသမာနရူပာ ဌိတာ’’တိ စ ‘‘တထာရူပေသု အာရညကေသု သေနာသနေသု ပုဗ္ဗေ အပ္ပဋိသံဝိဒိတ’’န္တိ စ ဝုတ္တသိက္ခာပဒဒ္ဝယံ။
Upassayaṃ paramparāti ‘‘bhikkhunupassayaṃ gantvā bhikkhuniyo ovadeyyā’’ti ca ‘‘paramparabhojane pācittiya’’nti ca vuttasikkhāpadadvayaṃ. Anatirittaṃ nimantanāti ‘‘anatirittaṃ khādanīyaṃ vā bhojanīyaṃ vā’’ti ca ‘‘nimantito sabhatto samāno’’ti ca vuttasikkhāpadadvayaṃ. Vikappaṃ rañño vikāleti ‘‘sāmaṃ cīvaraṃ vikappetvā’’ti ca ‘‘rañño khattiyassā’’ti ca ‘‘vikāle gāmaṃ paviseyyā’’ti ca vuttasikkhāpadattayaṃ. Vosāsāraññakena cāti ‘‘vosāsamānarūpā ṭhitā’’ti ca ‘‘tathārūpesu āraññakesu senāsanesu pubbe appaṭisaṃvidita’’nti ca vuttasikkhāpadadvayaṃ.
ဥသ္သယာ သန္နိစယဉ္စာတိ ‘‘ဥသ္သယဝာဒိကာ’’တိ စ ‘‘ပတ္တသန္နိစယံ ကရေယ္ယာ’’တိ စ ဝုတ္တသိက္ခာပဒဒ္ဝယံ။ ပုရေ ပစ္ဆာ ဝိကာလေ စာတိ ‘‘ယာ ပန ဘိက္ခုနီ ပုရေဘတ္တံ ကုလာနိ ဥပသင္ကမိတ္ဝာ’’တိ စ, ‘‘ပစ္ဆာဘတ္တံ ကုလာနိ ဥပသင္ကမိတ္ဝာ’’တိ စ, ‘‘ဝိကာလေ ကုလာနိ ဥပသင္ကမိတ္ဝာ’’တိ စ ဝုတ္တသိက္ခာပဒတ္တယံ။ ပဉ္စာဟိကာ သင္ကမနီတိ ‘‘ပဉ္စာဟိကာ သင္ဃာဋိစာရံ အတိက္ကမေယ္ယာ’’တိ စ ‘‘စီဝရသင္ကမနီယံ ဓာရေယ္ယာ’’တိ စ ဝုတ္တသိက္ခာပဒဒ္ဝယံ။ ဒ္ဝေပိ အာဝသထေန စာတိ ‘‘အာဝသထစီဝရံ အနိသ္သဇ္ဇိတ္ဝာ ပရိဘုဉ္ဇေယ္ယ, အာဝသထံ အနိသ္သဇ္ဇိတ္ဝာ စာရိကံ ပက္ကမေယ္ယာ’’တိ စ ဧဝံ အာဝသထေန သဒ္ဓိံ ဝုတ္တသိက္ခာပဒာနိ စ ဒ္ဝေ။
Ussayā sannicayañcāti ‘‘ussayavādikā’’ti ca ‘‘pattasannicayaṃ kareyyā’’ti ca vuttasikkhāpadadvayaṃ. Pure pacchā vikāle cāti ‘‘yā pana bhikkhunī purebhattaṃ kulāni upasaṅkamitvā’’ti ca, ‘‘pacchābhattaṃ kulāni upasaṅkamitvā’’ti ca, ‘‘vikāle kulāni upasaṅkamitvā’’ti ca vuttasikkhāpadattayaṃ. Pañcāhikā saṅkamanīti ‘‘pañcāhikā saṅghāṭicāraṃ atikkameyyā’’ti ca ‘‘cīvarasaṅkamanīyaṃ dhāreyyā’’ti ca vuttasikkhāpadadvayaṃ. Dvepi āvasathena cāti ‘‘āvasathacīvaraṃ anissajjitvā paribhuñjeyya, āvasathaṃ anissajjitvā cārikaṃ pakkameyyā’’ti ca evaṃ āvasathena saddhiṃ vuttasikkhāpadāni ca dve.
ပသာခေ အာသနေ စေဝာတိ ‘‘ပသာခေ ဇာတံ ဂဏ္ဍံ ဝာ’’တိ စ ‘‘ဘိက္ခုသ္သ ပုရတော အနာပုစ္ဆာ အာသနေ နိသီဒေယ္ယာ’’တိ စ ဝုတ္တသိက္ခာပဒဒ္ဝယံ။
Pasākhe āsane cevāti ‘‘pasākhe jātaṃ gaṇḍaṃ vā’’ti ca ‘‘bhikkhussa purato anāpucchā āsane nisīdeyyā’’ti ca vuttasikkhāpadadvayaṃ.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / ပရိဝာရပာဠိ • Parivārapāḷi / ၅. ကထိနသမုဋ္ဌာနံ • 5. Kathinasamuṭṭhānaṃ
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ကထိနသမုဋ္ဌာနဝဏ္ဏနာ • Kathinasamuṭṭhānavaṇṇanā
