| Library / Tipiṭaka / ติปิฎก • Tipiṭaka / มิลินฺทปญฺหปาฬิ • Milindapañhapāḷi |
๑๐. กฐินตปนปโญฺห
10. Kaṭhinatapanapañho
๑๐. ‘‘ภเนฺต นาคเสน, กิสฺส เหมเนฺต สูริโย กฐินํ ตปติ, โน ตถา คิเมฺห’’ติ? ‘‘คิเมฺห, มหาราช, อนุปหตํ โหติ รโชชลฺลํ, วาตกฺขุภิตา เรณู คคนานุคตา โหนฺติ, อากาเสปิ อพฺภา สุพหลา โหนฺติ, มหาวาโต จ อธิมตฺตํ วายติ, เต สเพฺพ นานากุลา สมายุตา สูริยรํสิโย ปิทหนฺติ, เตน คิเมฺห สูริโย มนฺทํ ตปติฯ
10. ‘‘Bhante nāgasena, kissa hemante sūriyo kaṭhinaṃ tapati, no tathā gimhe’’ti? ‘‘Gimhe, mahārāja, anupahataṃ hoti rajojallaṃ, vātakkhubhitā reṇū gaganānugatā honti, ākāsepi abbhā subahalā honti, mahāvāto ca adhimattaṃ vāyati, te sabbe nānākulā samāyutā sūriyaraṃsiyo pidahanti, tena gimhe sūriyo mandaṃ tapati.
‘‘เหมเนฺต ปน, มหาราช, เหฎฺฐา ปถวี นิพฺพุตา โหติ, อุปริ มหาเมโฆ อุปฎฺฐิโต โหติ, อุปสนฺตํ โหติ รโชชลฺลํ, เรณุ จ สนฺตสนฺตํ คคเน จรติ, วิคตวลาหโก จ โหติ อากาโส, วาโต จ มนฺทมนฺทํ วายติ, เอเตสํ อุปรติยา วิสุทฺธา 1 โหนฺติ สูริยรํสิโย, อุปฆาตวิมุตฺตสฺส สูริยสฺส ตาโป อติ วิย ตปติฯ อิทเมตฺถ, มหาราช, การณํ, เยน การเณน สูริโย เหมเนฺต กฐินํ ตปติ, โน ตถา คิเมฺห’’ติฯ ‘‘สพฺพีติมุโตฺต, ภเนฺต, สูริโย กฐินํ ตปติ, เมฆาทิสหคโต กฐินํ น ตปตี’’ติฯ
‘‘Hemante pana, mahārāja, heṭṭhā pathavī nibbutā hoti, upari mahāmegho upaṭṭhito hoti, upasantaṃ hoti rajojallaṃ, reṇu ca santasantaṃ gagane carati, vigatavalāhako ca hoti ākāso, vāto ca mandamandaṃ vāyati, etesaṃ uparatiyā visuddhā 2 honti sūriyaraṃsiyo, upaghātavimuttassa sūriyassa tāpo ati viya tapati. Idamettha, mahārāja, kāraṇaṃ, yena kāraṇena sūriyo hemante kaṭhinaṃ tapati, no tathā gimhe’’ti. ‘‘Sabbītimutto, bhante, sūriyo kaṭhinaṃ tapati, meghādisahagato kaṭhinaṃ na tapatī’’ti.
กฐินตปนปโญฺห ทสโมฯ
Kaṭhinatapanapañho dasamo.
นิปฺปปญฺจวโคฺค ทุติโยฯ
Nippapañcavaggo dutiyo.
อิมสฺมิํ วเคฺค ทส ปญฺหาฯ
Imasmiṃ vagge dasa pañhā.
Footnotes:
