| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၁၀. ကဌိနတပနပဉ္ဟော
10. Kaṭhinatapanapañho
၁၀. ‘‘ဘန္တေ နာဂသေန, ကိသ္သ ဟေမန္တေ သူရိယော ကဌိနံ တပတိ, နော တထာ ဂိမ္ဟေ’’တိ? ‘‘ဂိမ္ဟေ, မဟာရာဇ, အနုပဟတံ ဟောတိ ရဇောဇလ္လံ, ဝာတက္ခုဘိတာ ရေဏူ ဂဂနာနုဂတာ ဟောန္တိ, အာကာသေပိ အဗ္ဘာ သုဗဟလာ ဟောန္တိ, မဟာဝာတော စ အဓိမတ္တံ ဝာယတိ, တေ သဗ္ဗေ နာနာကုလာ သမာယုတာ သူရိယရံသိယော ပိဒဟန္တိ, တေန ဂိမ္ဟေ သူရိယော မန္ဒံ တပတိ။
10. ‘‘Bhante nāgasena, kissa hemante sūriyo kaṭhinaṃ tapati, no tathā gimhe’’ti? ‘‘Gimhe, mahārāja, anupahataṃ hoti rajojallaṃ, vātakkhubhitā reṇū gaganānugatā honti, ākāsepi abbhā subahalā honti, mahāvāto ca adhimattaṃ vāyati, te sabbe nānākulā samāyutā sūriyaraṃsiyo pidahanti, tena gimhe sūriyo mandaṃ tapati.
‘‘ဟေမန္တေ ပန, မဟာရာဇ, ဟေဋ္ဌာ ပထဝီ နိဗ္ဗုတာ ဟောတိ, ဥပရိ မဟာမေဃော ဥပဋ္ဌိတော ဟောတိ, ဥပသန္တံ ဟောတိ ရဇောဇလ္လံ, ရေဏု စ သန္တသန္တံ ဂဂနေ စရတိ, ဝိဂတဝလာဟကော စ ဟောတိ အာကာသော, ဝာတော စ မန္ဒမန္ဒံ ဝာယတိ, ဧတေသံ ဥပရတိယာ ဝိသုဒ္ဓာ 1 ဟောန္တိ သူရိယရံသိယော, ဥပဃာတဝိမုတ္တသ္သ သူရိယသ္သ တာပော အတိ ဝိယ တပတိ။ ဣဒမေတ္ထ, မဟာရာဇ, ကာရဏံ, ယေန ကာရဏေန သူရိယော ဟေမန္တေ ကဌိနံ တပတိ, နော တထာ ဂိမ္ဟေ’’တိ။ ‘‘သဗ္ဗီတိမုတ္တော, ဘန္တေ, သူရိယော ကဌိနံ တပတိ, မေဃာဒိသဟဂတော ကဌိနံ န တပတီ’’တိ။
‘‘Hemante pana, mahārāja, heṭṭhā pathavī nibbutā hoti, upari mahāmegho upaṭṭhito hoti, upasantaṃ hoti rajojallaṃ, reṇu ca santasantaṃ gagane carati, vigatavalāhako ca hoti ākāso, vāto ca mandamandaṃ vāyati, etesaṃ uparatiyā visuddhā 2 honti sūriyaraṃsiyo, upaghātavimuttassa sūriyassa tāpo ati viya tapati. Idamettha, mahārāja, kāraṇaṃ, yena kāraṇena sūriyo hemante kaṭhinaṃ tapati, no tathā gimhe’’ti. ‘‘Sabbītimutto, bhante, sūriyo kaṭhinaṃ tapati, meghādisahagato kaṭhinaṃ na tapatī’’ti.
ကဌိနတပနပဉ္ဟော ဒသမော။
Kaṭhinatapanapañho dasamo.
နိပ္ပပဉ္စဝဂ္ဂော ဒုတိယော။
Nippapañcavaggo dutiyo.
ဣမသ္မိံ ဝဂ္ဂေ ဒသ ပဉ္ဟာ။
Imasmiṃ vagge dasa pañhā.
Footnotes:
