| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
10. කඨිනතපනපඤ්‌හො
10. Kaṭhinatapanapañho
10. ‘‘භන්‌තෙ නාගසෙන, කිස්‌ස හෙමන්‌තෙ සූරියො කඨිනං තපති, නො තථා ගිම්‌හෙ’’ති? ‘‘ගිම්‌හෙ, මහාරාජ, අනුපහතං හොති රජොජල්‌ලං, වාතක්‌ඛුභිතා රෙණූ ගගනානුගතා හොන්‌ති, ආකාසෙපි අබ්‌භා සුබහලා හොන්‌ති, මහාවාතො ච අධිමත්‌තං වායති, තෙ සබ්‌බෙ නානාකුලා සමායුතා සූරියරංසියො පිදහන්‌ති, තෙන ගිම්‌හෙ සූරියො මන්‌දං තපති.
10. ‘‘Bhante nāgasena, kissa hemante sūriyo kaṭhinaṃ tapati, no tathā gimhe’’ti? ‘‘Gimhe, mahārāja, anupahataṃ hoti rajojallaṃ, vātakkhubhitā reṇū gaganānugatā honti, ākāsepi abbhā subahalā honti, mahāvāto ca adhimattaṃ vāyati, te sabbe nānākulā samāyutā sūriyaraṃsiyo pidahanti, tena gimhe sūriyo mandaṃ tapati.
‘‘හෙමන්‌තෙ පන, මහාරාජ, හෙට්‌ඨා පථවී නිබ්‌බුතා හොති, උපරි මහාමෙඝො උපට්‌ඨිතො හොති, උපසන්‌තං හොති රජොජල්‌ලං, රෙණු ච සන්‌තසන්‌තං ගගනෙ චරති, විගතවලාහකො ච හොති ආකාසො, වාතො ච මන්‌දමන්‌දං වායති, එතෙසං උපරතියා විසුද්‌ධා 1 හොන්‌ති සූරියරංසියො, උපඝාතවිමුත්‌තස්‌ස සූරියස්‌ස තාපො අති විය තපති. ඉදමෙත්‌ථ, මහාරාජ, කාරණං, යෙන කාරණෙන සූරියො හෙමන්‌තෙ කඨිනං තපති, නො තථා ගිම්‌හෙ’’ති. ‘‘සබ්‌බීතිමුත්‌තො, භන්‌තෙ, සූරියො කඨිනං තපති, මෙඝාදිසහගතො කඨිනං න තපතී’’ති.
‘‘Hemante pana, mahārāja, heṭṭhā pathavī nibbutā hoti, upari mahāmegho upaṭṭhito hoti, upasantaṃ hoti rajojallaṃ, reṇu ca santasantaṃ gagane carati, vigatavalāhako ca hoti ākāso, vāto ca mandamandaṃ vāyati, etesaṃ uparatiyā visuddhā 2 honti sūriyaraṃsiyo, upaghātavimuttassa sūriyassa tāpo ati viya tapati. Idamettha, mahārāja, kāraṇaṃ, yena kāraṇena sūriyo hemante kaṭhinaṃ tapati, no tathā gimhe’’ti. ‘‘Sabbītimutto, bhante, sūriyo kaṭhinaṃ tapati, meghādisahagato kaṭhinaṃ na tapatī’’ti.
කඨිනතපනපඤ්‌හො දසමො.
Kaṭhinatapanapañho dasamo.
නිප්‌පපඤ්‌චවග්‌ගො දුතියො.
Nippapañcavaggo dutiyo.
ඉමස්‌මිං වග්‌ගෙ දස පඤ්‌හා.
Imasmiṃ vagge dasa pañhā.
Footnotes:
