| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༡༠. ཀཋིནཏཔནཔཉྷོ
10. Kaṭhinatapanapañho
༡༠. ‘‘བྷནྟེ ནཱགསེན, ཀིསྶ ཧེམནྟེ སཱུརིཡོ ཀཋིནཾ ཏཔཏི, ནོ ཏཐཱ གིམྷེ’’ཏི? ‘‘གིམྷེ, མཧཱརཱཛ, ཨནུཔཧཏཾ ཧོཏི རཛོཛལླཾ, ཝཱཏཀྑུབྷིཏཱ རེཎཱུ གགནཱནུགཏཱ ཧོནྟི, ཨཱཀཱསེཔི ཨབྦྷཱ སུབཧལཱ ཧོནྟི, མཧཱཝཱཏོ ཙ ཨདྷིམཏྟཾ ཝཱཡཏི, ཏེ སབྦེ ནཱནཱཀུལཱ སམཱཡུཏཱ སཱུརིཡརཾསིཡོ པིདཧནྟི, ཏེན གིམྷེ སཱུརིཡོ མནྡཾ ཏཔཏི།
10. ‘‘Bhante nāgasena, kissa hemante sūriyo kaṭhinaṃ tapati, no tathā gimhe’’ti? ‘‘Gimhe, mahārāja, anupahataṃ hoti rajojallaṃ, vātakkhubhitā reṇū gaganānugatā honti, ākāsepi abbhā subahalā honti, mahāvāto ca adhimattaṃ vāyati, te sabbe nānākulā samāyutā sūriyaraṃsiyo pidahanti, tena gimhe sūriyo mandaṃ tapati.
‘‘ཧེམནྟེ པན, མཧཱརཱཛ, ཧེཊྛཱ པཐཝཱི ནིབྦུཏཱ ཧོཏི, ཨུཔརི མཧཱམེགྷོ ཨུཔཊྛིཏོ ཧོཏི, ཨུཔསནྟཾ ཧོཏི རཛོཛལླཾ, རེཎུ ཙ སནྟསནྟཾ གགནེ ཙརཏི, ཝིགཏཝལཱཧཀོ ཙ ཧོཏི ཨཱཀཱསོ, ཝཱཏོ ཙ མནྡམནྡཾ ཝཱཡཏི, ཨེཏེསཾ ཨུཔརཏིཡཱ ཝིསུདྡྷཱ 1 ཧོནྟི སཱུརིཡརཾསིཡོ, ཨུཔགྷཱཏཝིམུཏྟསྶ སཱུརིཡསྶ ཏཱཔོ ཨཏི ཝིཡ ཏཔཏི། ཨིདམེཏྠ, མཧཱརཱཛ, ཀཱརཎཾ, ཡེན ཀཱརཎེན སཱུརིཡོ ཧེམནྟེ ཀཋིནཾ ཏཔཏི, ནོ ཏཐཱ གིམྷེ’’ཏི། ‘‘སབྦཱིཏིམུཏྟོ, བྷནྟེ, སཱུརིཡོ ཀཋིནཾ ཏཔཏི, མེགྷཱདིསཧགཏོ ཀཋིནཾ ན ཏཔཏཱི’’ཏི།
‘‘Hemante pana, mahārāja, heṭṭhā pathavī nibbutā hoti, upari mahāmegho upaṭṭhito hoti, upasantaṃ hoti rajojallaṃ, reṇu ca santasantaṃ gagane carati, vigatavalāhako ca hoti ākāso, vāto ca mandamandaṃ vāyati, etesaṃ uparatiyā visuddhā 2 honti sūriyaraṃsiyo, upaghātavimuttassa sūriyassa tāpo ati viya tapati. Idamettha, mahārāja, kāraṇaṃ, yena kāraṇena sūriyo hemante kaṭhinaṃ tapati, no tathā gimhe’’ti. ‘‘Sabbītimutto, bhante, sūriyo kaṭhinaṃ tapati, meghādisahagato kaṭhinaṃ na tapatī’’ti.
ཀཋིནཏཔནཔཉྷོ དསམོ།
Kaṭhinatapanapañho dasamo.
ནིཔྤཔཉྩཝགྒོ དུཏིཡོ།
Nippapañcavaggo dutiyo.
ཨིམསྨིཾ ཝགྒེ དས པཉྷཱ།
Imasmiṃ vagge dasa pañhā.
Footnotes:
