| Library / Tipiṭaka / திபிடக • Tipiṭaka / பரிவார-அட்ட²கதா² • Parivāra-aṭṭhakathā |
கதி²னத்தா²ரவக்³க³வண்ணனா
Kathinatthāravaggavaṇṇanā
467. கதி²னத்தா²ரவக்³கே³ – ஓதமஸிகோதி அந்த⁴காரக³தோ; தஞ்ஹி வந்த³ந்தஸ்ஸ மஞ்சபாதா³தீ³ஸுபி நலாடங் படிஹஞ்ஞெய்ய. அஸமன்னாஹரந்தோதி கிச்சயபஸுதத்தா வந்த³னங் அஸமன்னாஹரந்தோ. ஸுத்தோதி நித்³த³ங் ஓக்கந்தோ. ஏகாவத்தோதி ஏகதோ ஆவத்தோ ஸபத்தபக்கே² டி²தோ வேரீ விஸபா⁴க³புக்³க³லோ வுச்சதி; அயங் அவந்தி³யோ. அயஞ்ஹி வந்தி³யமானோ பாதே³னபி பஹரெய்ய. அஞ்ஞவிஹிதோதி அஞ்ஞங் சிந்தயமானோ.
467. Kathinatthāravagge – otamasikoti andhakāragato; tañhi vandantassa mañcapādādīsupi nalāṭaṃ paṭihaññeyya. Asamannāharantoti kiccayapasutattā vandanaṃ asamannāharanto. Suttoti niddaṃ okkanto. Ekāvattoti ekato āvatto sapattapakkhe ṭhito verī visabhāgapuggalo vuccati; ayaṃ avandiyo. Ayañhi vandiyamāno pādenapi pahareyya. Aññavihitoti aññaṃ cintayamāno.
கா²த³ந்தோதி பிட்ட²க²ஜ்ஜகாதீ³னி கா²த³ந்தோ. உச்சாரஞ்ச பஸ்ஸாவஞ்ச கரொந்தோ அனோகாஸக³தத்தா அவந்தி³யோ. உக்கி²த்தகோதி திவிதே⁴னபி உக்கே²பனீயகம்மேன உக்கி²த்தகோ அவந்தி³யோ. தஜ்ஜனீயாதி³கம்மகதா பன சத்தாரோ வந்தி³தப்³பா³. உபோஸத²பவாரணாபி தேஹி ஸத்³தி⁴ங் லப்³ப⁴ந்தி. ஆதி³தோ பட்டா²ய ச வுத்தேஸு அவந்தி³யேஸு நக்³க³ஞ்ச உக்கி²த்தகஞ்ச வந்த³ந்தஸ்ஸேவ ஆபத்தி. இதரேஸங் பன அஸாருப்பட்டே²ன ச அந்தரா வுத்தகாரணேன ச வந்த³னா படிக்கி²த்தா. இதோ பரங் பச்சா²உபஸம்பன்னாத³யோ த³ஸபி ஆபத்திவத்து²பா⁴வேனேவ அவந்தி³யா. தே வந்த³ந்தஸ்ஸ ஹி நியமேனேவ ஆபத்தி. இதி இமேஸு பஞ்சஸு பஞ்சகேஸு தேரஸ ஜனே வந்த³ந்தஸ்ஸ அனாபத்தி, த்³வாத³ஸன்னங் வந்த³னாய ஆபத்தி.
Khādantoti piṭṭhakhajjakādīni khādanto. Uccārañca passāvañca karonto anokāsagatattā avandiyo. Ukkhittakoti tividhenapi ukkhepanīyakammena ukkhittako avandiyo. Tajjanīyādikammakatā pana cattāro vanditabbā. Uposathapavāraṇāpi tehi saddhiṃ labbhanti. Ādito paṭṭhāya ca vuttesu avandiyesu naggañca ukkhittakañca vandantasseva āpatti. Itaresaṃ pana asāruppaṭṭhena ca antarā vuttakāraṇena ca vandanā paṭikkhittā. Ito paraṃ pacchāupasampannādayo dasapi āpattivatthubhāveneva avandiyā. Te vandantassa hi niyameneva āpatti. Iti imesu pañcasu pañcakesu terasa jane vandantassa anāpatti, dvādasannaṃ vandanāya āpatti.
468. ஆசரியோ வந்தி³யோதி பப்³ப³ஜ்ஜாசரியோ உபஸம்பதா³சரியோ நிஸ்ஸயாசரியோ உத்³தே³ஸாசரியோ ஓவாதா³சரியோதி அயங் பஞ்சவிதோ⁴பி ஆசரியோ வந்தி³யோ. ஸேஸங் ஸப்³ப³த்த² உத்தானமேவாதி.
468.Ācariyovandiyoti pabbajjācariyo upasampadācariyo nissayācariyo uddesācariyo ovādācariyoti ayaṃ pañcavidhopi ācariyo vandiyo. Sesaṃ sabbattha uttānamevāti.
கதி²னத்தா²ரவக்³க³வண்ணனா நிட்டி²தா.
Kathinatthāravaggavaṇṇanā niṭṭhitā.
நிட்டி²தா ச உபாலிபஞ்சகவண்ணனா.
Niṭṭhitā ca upālipañcakavaṇṇanā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 14. கதி²னத்தா²ரவக்³கோ³ • 14. Kathinatthāravaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / கதி²னத்தா²ரவக்³க³வண்ணனா • Kathinatthāravaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / கதி²னத்தா²ரவக்³க³வண்ணனா • Kathinatthāravaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / வோஹாரவக்³கா³தி³வண்ணனா • Vohāravaggādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / கதி²னத்தா²ரவக்³க³வண்ணனா • Kathinatthāravaggavaṇṇanā
