| Library / Tipiṭaka / तिपिटक • Tipiṭaka / पाचित्यादियोजनापाळि • Pācityādiyojanāpāḷi |
कथिनत्थारवग्गवण्णना
Kathinatthāravaggavaṇṇanā
४६७. कथिनत्थारवग्गे ओतमसिकोति एत्थ अवतमं गतो ओतमसिकोति दस्सेन्तो आह ‘‘अन्धकारगतो’’ति। अन्धकारसद्देन तमसद्दो अन्धकारपरियायोति दस्सेति। तन्ति ओतमसिकं । असमन्नाहरन्तोति तं असमन्नाहरन्तो, कस्मा असमन्नाहरन्तोति आह ‘‘किच्चयपसुतत्ता वन्दन’’न्ति। एकतोति कोपेन सद्धिं। वेरी विसभागपुग्गलो एकतो आकोधेन वत्तनट्ठेन एकावत्तोति वुच्चति। पहरेय्याति वन्दन्तं पहरेय्य। ‘‘अञ्ञं चिन्तयमानो’’ति इमिना अञ्ञस्मिं आरम्मणे चित्तं विदहति ठपेतीति अञ्ञविहितोति दस्सेति।
467. Kathinatthāravagge otamasikoti ettha avatamaṃ gato otamasikoti dassento āha ‘‘andhakāragato’’ti. Andhakārasaddena tamasaddo andhakārapariyāyoti dasseti. Tanti otamasikaṃ . Asamannāharantoti taṃ asamannāharanto, kasmā asamannāharantoti āha ‘‘kiccayapasutattā vandana’’nti. Ekatoti kopena saddhiṃ. Verī visabhāgapuggalo ekato ākodhena vattanaṭṭhena ekāvattoti vuccati. Pahareyyāti vandantaṃ pahareyya. ‘‘Aññaṃ cintayamāno’’ti iminā aññasmiṃ ārammaṇe cittaṃ vidahati ṭhapetīti aññavihitoti dasseti.
सङ्घतो उद्धरित्वा खिपितब्बो अपनेतब्बोति उक्खित्तो, सोयेव उक्खित्तको। तेहीति चतूहि। अवन्दियेसु पन्नरसपुग्गलेसूति सम्बन्धो। अन्तरा वुत्तकारणेन चाति अन्तरे वुत्तेन ‘‘तञ्हि वन्दन्तस्स मञ्चपादादीसुपि नलाटं पटिहञ्ञेय्या’’तिआदिना कारणेन च। इतोति पन्नरसपुग्गलम्हा । इतीति एवं। सचे उद्देसाचरियो च ओवादाचरियो च नवको होति, न वन्दनीयो। सब्बत्थाति कथिनत्थारवग्गे।
Saṅghato uddharitvā khipitabbo apanetabboti ukkhitto, soyeva ukkhittako. Tehīti catūhi. Avandiyesu pannarasapuggalesūti sambandho. Antarā vuttakāraṇena cāti antare vuttena ‘‘tañhi vandantassa mañcapādādīsupi nalāṭaṃ paṭihaññeyyā’’tiādinā kāraṇena ca. Itoti pannarasapuggalamhā . Itīti evaṃ. Sace uddesācariyo ca ovādācariyo ca navako hoti, na vandanīyo. Sabbatthāti kathinatthāravagge.
इति कथिनत्थारवग्गवण्णनाय योजना समत्ता।
Iti kathinatthāravaggavaṇṇanāya yojanā samattā.
निट्ठिता च उपालिपञ्चकवण्णनाय योजना।
Niṭṭhitā ca upālipañcakavaṇṇanāya yojanā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / परिवारपाळि • Parivārapāḷi / १४. कथिनत्थारवग्गो • 14. Kathinatthāravaggo
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / परिवार-अट्ठकथा • Parivāra-aṭṭhakathā / कथिनत्थारवग्गवण्णना • Kathinatthāravaggavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / कथिनत्थारवग्गवण्णना • Kathinatthāravaggavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / कथिनत्थारवग्गवण्णना • Kathinatthāravaggavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / वोहारवग्गादिवण्णना • Vohāravaggādivaṇṇanā
