| Library / Tipiṭaka / තිපිටක • Tipiṭaka / පරිවාර-අට්‌ඨකථා • Parivāra-aṭṭhakathā |
කථිනත්‌ථාරවග්‌ගවණ්‌ණනා
Kathinatthāravaggavaṇṇanā
467. කථිනත්‌ථාරවග්‌ගෙ – ඔතමසිකොති අන්‌ධකාරගතො; තඤ්‌හි වන්‌දන්‌තස්‌ස මඤ්‌චපාදාදීසුපි නලාටං පටිහඤ්‌ඤෙය්‍ය. අසමන්‌නාහරන්‌තොති කිච්‌චයපසුතත්‌තා වන්‌දනං අසමන්‌නාහරන්‌තො. සුත්‌තොති නිද්‌දං ඔක්‌කන්‌තො. එකාවත්‌තොති එකතො ආවත්‌තො සපත්‌තපක්‌ඛෙ ඨිතො වෙරී විසභාගපුග්‌ගලො වුච්‌චති; අයං අවන්‌දියො. අයඤ්‌හි වන්‌දියමානො පාදෙනපි පහරෙය්‍ය. අඤ්‌ඤවිහිතොති අඤ්‌ඤං චින්‌තයමානො.
467. Kathinatthāravagge – otamasikoti andhakāragato; tañhi vandantassa mañcapādādīsupi nalāṭaṃ paṭihaññeyya. Asamannāharantoti kiccayapasutattā vandanaṃ asamannāharanto. Suttoti niddaṃ okkanto. Ekāvattoti ekato āvatto sapattapakkhe ṭhito verī visabhāgapuggalo vuccati; ayaṃ avandiyo. Ayañhi vandiyamāno pādenapi pahareyya. Aññavihitoti aññaṃ cintayamāno.
ඛාදන්‌තොති පිට්‌ඨඛජ්‌ජකාදීනි ඛාදන්‌තො. උච්‌චාරඤ්‌ච පස්‌සාවඤ්‌ච කරොන්‌තො අනොකාසගතත්‌තා අවන්‌දියො. උක්‌ඛිත්‌තකොති තිවිධෙනපි උක්‌ඛෙපනීයකම්‌මෙන උක්‌ඛිත්‌තකො අවන්‌දියො. තජ්‌ජනීයාදිකම්‌මකතා පන චත්‌තාරො වන්‌දිතබ්‌බා. උපොසථපවාරණාපි තෙහි සද්‌ධිං ලබ්‌භන්‌ති. ආදිතො පට්‌ඨාය ච වුත්‌තෙසු අවන්‌දියෙසු නග්‌ගඤ්‌ච උක්‌ඛිත්‌තකඤ්‌ච වන්‌දන්‌තස්‌සෙව ආපත්‌ති. ඉතරෙසං පන අසාරුප්‌පට්‌ඨෙන ච අන්‌තරා වුත්‌තකාරණෙන ච වන්‌දනා පටික්‌ඛිත්‌තා. ඉතො පරං පච්‌ඡාඋපසම්‌පන්‌නාදයො දසපි ආපත්‌තිවත්‌ථුභාවෙනෙව අවන්‌දියා. තෙ වන්‌දන්‌තස්‌ස හි නියමෙනෙව ආපත්‌ති. ඉති ඉමෙසු පඤ්‌චසු පඤ්‌චකෙසු තෙරස ජනෙ වන්‌දන්‌තස්‌ස අනාපත්‌ති, ද්‌වාදසන්‌නං වන්‌දනාය ආපත්‌ති.
Khādantoti piṭṭhakhajjakādīni khādanto. Uccārañca passāvañca karonto anokāsagatattā avandiyo. Ukkhittakoti tividhenapi ukkhepanīyakammena ukkhittako avandiyo. Tajjanīyādikammakatā pana cattāro vanditabbā. Uposathapavāraṇāpi tehi saddhiṃ labbhanti. Ādito paṭṭhāya ca vuttesu avandiyesu naggañca ukkhittakañca vandantasseva āpatti. Itaresaṃ pana asāruppaṭṭhena ca antarā vuttakāraṇena ca vandanā paṭikkhittā. Ito paraṃ pacchāupasampannādayo dasapi āpattivatthubhāveneva avandiyā. Te vandantassa hi niyameneva āpatti. Iti imesu pañcasu pañcakesu terasa jane vandantassa anāpatti, dvādasannaṃ vandanāya āpatti.
468. ආචරියො වන්‌දියොති පබ්‌බජ්‌ජාචරියො උපසම්‌පදාචරියො නිස්‌සයාචරියො උද්‌දෙසාචරියො ඔවාදාචරියොති අයං පඤ්‌චවිධොපි ආචරියො වන්‌දියො. සෙසං සබ්‌බත්‌ථ උත්‌තානමෙවාති.
468.Ācariyovandiyoti pabbajjācariyo upasampadācariyo nissayācariyo uddesācariyo ovādācariyoti ayaṃ pañcavidhopi ācariyo vandiyo. Sesaṃ sabbattha uttānamevāti.
කථිනත්‌ථාරවග්‌ගවණ්‌ණනා නිට්‌ඨිතා.
Kathinatthāravaggavaṇṇanā niṭṭhitā.
නිට්‌ඨිතා ච උපාලිපඤ්‌චකවණ්‌ණනා.
Niṭṭhitā ca upālipañcakavaṇṇanā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 14. කථිනත්‌ථාරවග්‌ගො • 14. Kathinatthāravaggo
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / කථිනත්‌ථාරවග්‌ගවණ්‌ණනා • Kathinatthāravaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / කථිනත්‌ථාරවග්‌ගවණ්‌ණනා • Kathinatthāravaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / වොහාරවග්‌ගාදිවණ්‌ණනා • Vohāravaggādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / කථිනත්‌ථාරවග්‌ගවණ්‌ණනා • Kathinatthāravaggavaṇṇanā
