| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
කථිනත්‌ථාරවග්‌ගවණ්‌ණනා
Kathinatthāravaggavaṇṇanā
467. කථිනත්‌ථාරවග්‌ගෙ ඔතමසිකොති එත්‌ථ අවතමං ගතො ඔතමසිකොති දස්‌සෙන්‌තො ආහ ‘‘අන්‌ධකාරගතො’’ති. අන්‌ධකාරසද්‌දෙන තමසද්‌දො අන්‌ධකාරපරියායොති දස්‌සෙති. තන්‌ති ඔතමසිකං . අසමන්‌නාහරන්‌තොති තං අසමන්‌නාහරන්‌තො, කස්‌මා අසමන්‌නාහරන්‌තොති ආහ ‘‘කිච්‌චයපසුතත්‌තා වන්‌දන’’න්‌ති. එකතොති කොපෙන සද්‌ධිං. වෙරී විසභාගපුග්‌ගලො එකතො ආකොධෙන වත්‌තනට්‌ඨෙන එකාවත්‌තොති වුච්‌චති. පහරෙය්‍යාති වන්‌දන්‌තං පහරෙය්‍ය. ‘‘අඤ්‌ඤං චින්‌තයමානො’’ති ඉමිනා අඤ්‌ඤස්‌මිං ආරම්‌මණෙ චිත්‌තං විදහති ඨපෙතීති අඤ්‌ඤවිහිතොති දස්‌සෙති.
467. Kathinatthāravagge otamasikoti ettha avatamaṃ gato otamasikoti dassento āha ‘‘andhakāragato’’ti. Andhakārasaddena tamasaddo andhakārapariyāyoti dasseti. Tanti otamasikaṃ . Asamannāharantoti taṃ asamannāharanto, kasmā asamannāharantoti āha ‘‘kiccayapasutattā vandana’’nti. Ekatoti kopena saddhiṃ. Verī visabhāgapuggalo ekato ākodhena vattanaṭṭhena ekāvattoti vuccati. Pahareyyāti vandantaṃ pahareyya. ‘‘Aññaṃ cintayamāno’’ti iminā aññasmiṃ ārammaṇe cittaṃ vidahati ṭhapetīti aññavihitoti dasseti.
සඞ්‌ඝතො උද්‌ධරිත්‌වා ඛිපිතබ්‌බො අපනෙතබ්‌බොති උක්‌ඛිත්‌තො, සොයෙව උක්‌ඛිත්‌තකො. තෙහීති චතූහි. අවන්‌දියෙසු පන්‌නරසපුග්‌ගලෙසූති සම්‌බන්‌ධො. අන්‌තරා වුත්‌තකාරණෙන චාති අන්‌තරෙ වුත්‌තෙන ‘‘තඤ්‌හි වන්‌දන්‌තස්‌ස මඤ්‌චපාදාදීසුපි නලාටං පටිහඤ්‌ඤෙය්‍යා’’තිආදිනා කාරණෙන ච. ඉතොති පන්‌නරසපුග්‌ගලම්‌හා . ඉතීති එවං. සචෙ උද්‌දෙසාචරියො ච ඔවාදාචරියො ච නවකො හොති, න වන්‌දනීයො. සබ්‌බත්‌ථාති කථිනත්‌ථාරවග්‌ගෙ.
Saṅghato uddharitvā khipitabbo apanetabboti ukkhitto, soyeva ukkhittako. Tehīti catūhi. Avandiyesu pannarasapuggalesūti sambandho. Antarā vuttakāraṇena cāti antare vuttena ‘‘tañhi vandantassa mañcapādādīsupi nalāṭaṃ paṭihaññeyyā’’tiādinā kāraṇena ca. Itoti pannarasapuggalamhā . Itīti evaṃ. Sace uddesācariyo ca ovādācariyo ca navako hoti, na vandanīyo. Sabbatthāti kathinatthāravagge.
ඉති කථිනත්‌ථාරවග්‌ගවණ්‌ණනාය යොජනා සමත්‌තා.
Iti kathinatthāravaggavaṇṇanāya yojanā samattā.
නිට්‌ඨිතා ච උපාලිපඤ්‌චකවණ්‌ණනාය යොජනා.
Niṭṭhitā ca upālipañcakavaṇṇanāya yojanā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 14. කථිනත්‌ථාරවග්‌ගො • 14. Kathinatthāravaggo
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / කථිනත්‌ථාරවග්‌ගවණ්‌ණනා • Kathinatthāravaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / කථිනත්‌ථාරවග්‌ගවණ්‌ණනා • Kathinatthāravaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / කථිනත්‌ථාරවග්‌ගවණ්‌ණනා • Kathinatthāravaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / වොහාරවග්‌ගාදිවණ්‌ණනා • Vohāravaggādivaṇṇanā
