| Library / Tipiṭaka / திபிடக • Tipiṭaka / வினயஸங்க³ஹ-அட்ட²கதா² • Vinayasaṅgaha-aṭṭhakathā |
29. கதி²னத்தா²ரவினிச்ச²யகதா²
29. Kathinatthāravinicchayakathā
226. கதி²னந்தி எத்த² (மஹாவ॰ அட்ட²॰ 306) பன கதி²னங் அத்த²ரிதுங் கே லப⁴ந்தி, கே ந லப⁴ந்தி? க³ணனவஸேன தாவ பச்சி²மகோடியா பஞ்ச ஜனா லப⁴ந்தி, உத்³த⁴ங் ஸதஸஹஸ்ஸம்பி, பஞ்சன்னங் ஹெட்டா² ந லப⁴ந்தி. வுட்ட²வஸ்ஸவஸேன புரிமிகாய வஸ்ஸங் உபக³ந்த்வா பட²மபவாரணாய பவாரிதா லப⁴ந்தி. சி²ன்னவஸ்ஸா வா பச்சி²மிகாய உபக³தா வா ந லப⁴ந்தி. ‘‘அஞ்ஞஸ்மிங் விஹாரே வுட்ட²வஸ்ஸாபி ந லப⁴ந்தீ’’தி மஹாபச்சரியங் வுத்தங். புரிமிகாய உபக³தானங் பன ஸப்³பே³ க³ணபூரகா ஹொந்தி, ஆனிஸங்ஸங் ந லப⁴ந்தி, ஆனிஸங்ஸோ இதரேஸங்யேவ ஹோதி. ஸசே புரிமிகாய உபக³தா சத்தாரோ வா ஹொந்தி தயோ வா த்³வே வா ஏகோ வா, இதரே க³ணபூரகே கத்வா கதி²னங் அத்த²ரிதப்³ப³ங். அத² சத்தாரோ பி⁴க்கூ² உபக³தா, ஏகோ பரிபுண்ணவஸ்ஸோ ஸாமணேரோ, ஸோ சே பச்சி²மிகாய உபஸம்பஜ்ஜதி, க³ணபூரகோ சேவ ஹோதி ஆனிஸங்ஸஞ்ச லப⁴தி. தயோ பி⁴க்கூ² த்³வே ஸாமணேரா, த்³வே பி⁴க்கூ² தயோ ஸாமணேரா, ஏகோ பி⁴க்கு² சத்தாரோ ஸாமணேராதி எத்தா²பி ஏஸேவ நயோ. ஸசே புரிமிகாய உபக³தா கதி²னத்தா²ரகுஸலா ந ஹொந்தி, அத்தா²ரகுஸலா க²ந்த⁴கபா⁴ணகத்தே²ரா பரியேஸித்வா ஆனேதப்³பா³. கம்மவாசங் ஸாவெத்வா கதி²னங் அத்த²ராபெத்வா தா³னஞ்ச பு⁴ஞ்ஜித்வா க³மிஸ்ஸந்தி, ஆனிஸங்ஸோ பன இதரேஸங்யேவ ஹோதி.
226.Kathinanti ettha (mahāva. aṭṭha. 306) pana kathinaṃ attharituṃ ke labhanti, ke na labhanti? Gaṇanavasena tāva pacchimakoṭiyā pañca janā labhanti, uddhaṃ satasahassampi, pañcannaṃ heṭṭhā na labhanti. Vuṭṭhavassavasena purimikāya vassaṃ upagantvā paṭhamapavāraṇāya pavāritā labhanti. Chinnavassā vā pacchimikāya upagatā vā na labhanti. ‘‘Aññasmiṃ vihāre vuṭṭhavassāpi na labhantī’’ti mahāpaccariyaṃ vuttaṃ. Purimikāya upagatānaṃ pana sabbe gaṇapūrakā honti, ānisaṃsaṃ na labhanti, ānisaṃso itaresaṃyeva hoti. Sace purimikāya upagatā cattāro vā honti tayo vā dve vā eko vā, itare gaṇapūrake katvā kathinaṃ attharitabbaṃ. Atha cattāro bhikkhū upagatā, eko paripuṇṇavasso sāmaṇero, so ce pacchimikāya upasampajjati, gaṇapūrako ceva hoti ānisaṃsañca labhati. Tayo bhikkhū dve sāmaṇerā, dve bhikkhū tayo sāmaṇerā, eko bhikkhu cattāro sāmaṇerāti etthāpi eseva nayo. Sace purimikāya upagatā kathinatthārakusalā na honti, atthārakusalā khandhakabhāṇakattherā pariyesitvā ānetabbā. Kammavācaṃ sāvetvā kathinaṃ attharāpetvā dānañca bhuñjitvā gamissanti, ānisaṃso pana itaresaṃyeva hoti.
கதி²னங் கேன தி³ன்னங் வட்டதி? யேன கேனசி தே³வேன வா மனுஸ்ஸேன வா பஞ்சன்னங் வா ஸஹத⁴ம்மிகானங் அஞ்ஞதரேன தி³ன்னங் வட்டதி. கதி²னதா³யகஸ்ஸ வத்தங் அத்தி², ஸசே ஸோ தங் அஜானந்தோ புச்ச²தி – ‘‘ப⁴ந்தே, கத²ங் கதி²னங் தா³தப்³ப³’’ந்தி, தஸ்ஸ ஏவங் ஆசிக்கி²தப்³ப³ங் ‘‘திண்ணங் சீவரானங் அஞ்ஞதரப்பஹோனகங் ஸூரியுக்³க³மனஸமயே வத்த²ங் ‘கதி²னசீவரங் தே³மா’தி தா³துங் வட்டதி. தஸ்ஸ பரிகம்மத்த²ங் எத்தகா நாம ஸூசியோ, எத்தகங் ஸுத்தங், எத்தகங் ரஜனங், பரிகம்மங் கரொந்தானங் எத்தகானங் பி⁴க்கூ²னங் யாகு³ப⁴த்தஞ்ச தா³துங் வட்டதீ’’தி.
Kathinaṃ kena dinnaṃ vaṭṭati? Yena kenaci devena vā manussena vā pañcannaṃ vā sahadhammikānaṃ aññatarena dinnaṃ vaṭṭati. Kathinadāyakassa vattaṃ atthi, sace so taṃ ajānanto pucchati – ‘‘bhante, kathaṃ kathinaṃ dātabba’’nti, tassa evaṃ ācikkhitabbaṃ ‘‘tiṇṇaṃ cīvarānaṃ aññatarappahonakaṃ sūriyuggamanasamaye vatthaṃ ‘kathinacīvaraṃ demā’ti dātuṃ vaṭṭati. Tassa parikammatthaṃ ettakā nāma sūciyo, ettakaṃ suttaṃ, ettakaṃ rajanaṃ, parikammaṃ karontānaṃ ettakānaṃ bhikkhūnaṃ yāgubhattañca dātuṃ vaṭṭatī’’ti.
கதி²னத்தா²ரகேனபி த⁴ம்மேன ஸமேன உப்பன்னங் கதி²னங் அத்த²ரந்தேன வத்தங் ஜானிதப்³ப³ங். தந்தவாயகே³ஹதோ ஹி ஆப⁴தஸந்தானேனேவ க²லிமக்கி²தஸாடகோ ந வட்டதி, மலீனஸாடகோபி ந வட்டதி, தஸ்மா கதி²னத்தா²ரஸாடகங் லபி⁴த்வா ஸுட்டு² தோ⁴வித்வா ஸூசிஆதீ³னி சீவரகம்மூபகரணானி ஸஜ்ஜெத்வா ப³ஹூஹி பி⁴க்கூ²ஹி ஸத்³தி⁴ங் தத³ஹேவ ஸிப்³பி³த்வா நிட்டி²தஸூசிகம்மங் ரஜித்வா கப்பபி³ந்து³ங் த³த்வா கதி²னங் அத்த²ரிதப்³ப³ங். ஸசே தஸ்மிங் அனத்த²தேயேவ அஞ்ஞங் கதி²னஸாடகங் ஆஹரதி, அஞ்ஞானி ச ப³ஹூனி கதி²னானிஸங்ஸவத்தா²னி தே³தி, யோ ஆனிஸங்ஸங் ப³ஹுங் தே³தி, தஸ்ஸ ஸந்தகேன அத்த²ரிதப்³ப³ங். இதரோ ததா² ததா² ஓவதி³த்வா ஸஞ்ஞாபேதப்³போ³.
Kathinatthārakenapi dhammena samena uppannaṃ kathinaṃ attharantena vattaṃ jānitabbaṃ. Tantavāyagehato hi ābhatasantāneneva khalimakkhitasāṭako na vaṭṭati, malīnasāṭakopi na vaṭṭati, tasmā kathinatthārasāṭakaṃ labhitvā suṭṭhu dhovitvā sūciādīni cīvarakammūpakaraṇāni sajjetvā bahūhi bhikkhūhi saddhiṃ tadaheva sibbitvā niṭṭhitasūcikammaṃ rajitvā kappabinduṃ datvā kathinaṃ attharitabbaṃ. Sace tasmiṃ anatthateyeva aññaṃ kathinasāṭakaṃ āharati, aññāni ca bahūni kathinānisaṃsavatthāni deti, yo ānisaṃsaṃ bahuṃ deti, tassa santakena attharitabbaṃ. Itaro tathā tathā ovaditvā saññāpetabbo.
கதி²னங் பன கேன அத்த²ரிதப்³ப³ங்? யஸ்ஸ ஸங்கோ⁴ கதி²னசீவரங் தே³தி. ஸங்கே⁴ன பன கஸ்ஸ தா³தப்³ப³ங்? யோ ஜிண்ணசீவரோ ஹோதி. ஸசே ப³ஹூ ஜிண்ணசீவரா, வுட்³ட⁴ஸ்ஸ தா³தப்³ப³ங். வுட்³டே⁴ஸுபி யோ மஹாபரிஸோ தத³ஹேவ சீவரங் கத்வா அத்த²ரிதுங் ஸக்கோதி, தஸ்ஸ தா³தப்³ப³ங். ஸசே வுட்³டோ⁴ ந ஸக்கோதி, நவகதரோ ஸக்கோதி, தஸ்ஸ தா³தப்³ப³ங். அபிச ஸங்கே⁴ன மஹாதே²ரஸ்ஸ ஸங்க³ஹங் காதுங் வட்டதி, தஸ்மா ‘‘தும்ஹே, ப⁴ந்தே, க³ண்ஹத², மயங் கத்வா த³ஸ்ஸாமா’’தி வத்தப்³ப³ங். தீஸு சீவரேஸு யங் ஜிண்ணங் ஹோதி, தத³த்தா²ய தா³தப்³ப³ங். பகதியா து³பட்டசீவரஸ்ஸ து³பட்டத்தா²யேவ தா³தப்³ப³ங். ஸசேபிஸ்ஸ ஏகபட்டசீவரங் க⁴னங் ஹோதி, கதி²னஸாடகா ச பேலவா, ஸாருப்பத்தா²ய து³பட்டப்பஹோனகமேவ தா³தப்³ப³ங், ‘‘அஹங் அலப⁴ந்தோ ஏகபட்டங் பாருபாமீ’’தி வத³ந்தஸ்ஸபி து³பட்டங் தா³துங் வட்டதி. யோ பன லோப⁴பகதிகோ ஹோதி, தஸ்ஸ ந தா³தப்³ப³ங். தேனபி ‘‘கதி²னங் அத்த²ரித்வா பச்சா² விஸிப்³பி³த்வா த்³வே சீவரானி கரிஸ்ஸாமீ’’தி ந க³ஹேதப்³ப³ங். யஸ்ஸ பன தீ³யதி, தஸ்ஸ –
Kathinaṃ pana kena attharitabbaṃ? Yassa saṅgho kathinacīvaraṃ deti. Saṅghena pana kassa dātabbaṃ? Yo jiṇṇacīvaro hoti. Sace bahū jiṇṇacīvarā, vuḍḍhassa dātabbaṃ. Vuḍḍhesupi yo mahāpariso tadaheva cīvaraṃ katvā attharituṃ sakkoti, tassa dātabbaṃ. Sace vuḍḍho na sakkoti, navakataro sakkoti, tassa dātabbaṃ. Apica saṅghena mahātherassa saṅgahaṃ kātuṃ vaṭṭati, tasmā ‘‘tumhe, bhante, gaṇhatha, mayaṃ katvā dassāmā’’ti vattabbaṃ. Tīsu cīvaresu yaṃ jiṇṇaṃ hoti, tadatthāya dātabbaṃ. Pakatiyā dupaṭṭacīvarassa dupaṭṭatthāyeva dātabbaṃ. Sacepissa ekapaṭṭacīvaraṃ ghanaṃ hoti, kathinasāṭakā ca pelavā, sāruppatthāya dupaṭṭappahonakameva dātabbaṃ, ‘‘ahaṃ alabhanto ekapaṭṭaṃ pārupāmī’’ti vadantassapi dupaṭṭaṃ dātuṃ vaṭṭati. Yo pana lobhapakatiko hoti, tassa na dātabbaṃ. Tenapi ‘‘kathinaṃ attharitvā pacchā visibbitvā dve cīvarāni karissāmī’’ti na gahetabbaṃ. Yassa pana dīyati, tassa –
‘‘ஸுணாது மே, ப⁴ந்தே, ஸங்கோ⁴, இத³ங் ஸங்க⁴ஸ்ஸ கதி²னது³ஸ்ஸங் உப்பன்னங், யதி³ ஸங்க⁴ஸ்ஸ பத்தகல்லங், ஸங்கோ⁴ இமங் கதி²னது³ஸ்ஸங் இத்த²ன்னாமஸ்ஸ பி⁴க்கு²னோ த³தெ³ய்ய கதி²னங் அத்த²ரிதுங், ஏஸா ஞத்தி.
‘‘Suṇātu me, bhante, saṅgho, idaṃ saṅghassa kathinadussaṃ uppannaṃ, yadi saṅghassa pattakallaṃ, saṅgho imaṃ kathinadussaṃ itthannāmassa bhikkhuno dadeyya kathinaṃ attharituṃ, esā ñatti.
‘‘ஸுணாது மே, ப⁴ந்தே, ஸங்கோ⁴, இத³ங் ஸங்க⁴ஸ்ஸ கதி²னது³ஸ்ஸங் உப்பன்னங், ஸங்கோ⁴ இமங் கதி²னது³ஸ்ஸங் இத்த²ன்னாமஸ்ஸ பி⁴க்கு²னோ தே³தி கதி²னங் அத்த²ரிதுங், யஸ்ஸாயஸ்மதோ க²மதி இமஸ்ஸ கதி²னது³ஸ்ஸஸ்ஸ இத்த²ன்னாமஸ்ஸ பி⁴க்கு²னோ தா³னங் கதி²னங் அத்த²ரிதுங், ஸோ துண்ஹஸ்ஸ. யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho, idaṃ saṅghassa kathinadussaṃ uppannaṃ, saṅgho imaṃ kathinadussaṃ itthannāmassa bhikkhuno deti kathinaṃ attharituṃ, yassāyasmato khamati imassa kathinadussassa itthannāmassa bhikkhuno dānaṃ kathinaṃ attharituṃ, so tuṇhassa. Yassa nakkhamati, so bhāseyya.
‘‘தி³ன்னங் இத³ங் ஸங்கே⁴ன கதி²னது³ஸ்ஸங் இத்த²ன்னாமஸ்ஸ பி⁴க்கு²னோ கதி²னங் அத்த²ரிதுங், க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி (மஹாவ॰ 307) –
‘‘Dinnaṃ idaṃ saṅghena kathinadussaṃ itthannāmassa bhikkhuno kathinaṃ attharituṃ, khamati saṅghassa, tasmā tuṇhī, evametaṃ dhārayāmī’’ti (mahāva. 307) –
ஏவங் து³தியகம்மவாசாய தா³தப்³ப³ங்.
Evaṃ dutiyakammavācāya dātabbaṃ.
ஏவங் தி³ன்னே பன கதி²னே ஸசே தங் கதி²னது³ஸ்ஸங் நிட்டி²தபரிகம்மமேவ ஹோதி, இச்சேதங் குஸலங். நோ சே நிட்டி²தபரிகம்மங் ஹோதி, ‘‘அஹங் தே²ரோ’’தி வா ‘‘ப³ஹுஸ்ஸுதோ’’தி வா ஏகேனபி அகாதுங் ந லப்³ப⁴தி , ஸப்³பே³ஹேவ ஸன்னிபதித்வா தோ⁴வனஸிப்³ப³னரஜனானி நிட்டா²பேதப்³பா³னி. இத³ஞ்ஹி கதி²னவத்தங் நாம பு³த்³த⁴ப்பஸத்த²ங். அதீதே பது³முத்தரோபி ப⁴க³வா கதி²னவத்தங் அகாஸி. தஸ்ஸ கிர அக்³க³ஸாவகோ ஸுஜாதத்தே²ரோ நாம கதி²னங் க³ண்ஹி. தங் ஸத்தா² அட்ட²ஸட்டி²யா பி⁴க்கு²ஸதஸஹஸ்ஸேஹி ஸத்³தி⁴ங் நிஸீதி³த்வா அகாஸி.
Evaṃ dinne pana kathine sace taṃ kathinadussaṃ niṭṭhitaparikammameva hoti, iccetaṃ kusalaṃ. No ce niṭṭhitaparikammaṃ hoti, ‘‘ahaṃ thero’’ti vā ‘‘bahussuto’’ti vā ekenapi akātuṃ na labbhati , sabbeheva sannipatitvā dhovanasibbanarajanāni niṭṭhāpetabbāni. Idañhi kathinavattaṃ nāma buddhappasatthaṃ. Atīte padumuttaropi bhagavā kathinavattaṃ akāsi. Tassa kira aggasāvako sujātatthero nāma kathinaṃ gaṇhi. Taṃ satthā aṭṭhasaṭṭhiyā bhikkhusatasahassehi saddhiṃ nisīditvā akāsi.
கதபரியோஸிதங் பன கதி²னங் க³ஹெத்வா அத்தா²ரகேன பி⁴க்கு²னா ஸசே ஸங்கா⁴டியா கதி²னங் அத்த²ரிதுகாமோ ஹோதி, போராணிகா ஸங்கா⁴டி பச்சுத்³த⁴ரிதப்³பா³, நவா ஸங்கா⁴டி அதி⁴ட்டா²தப்³பா³, ‘‘இமாய ஸங்கா⁴டியா கதி²னங் அத்த²ராமீ’’தி வாசா பி⁴ந்தி³தப்³பா³. ஸசே உத்தராஸங்கே³ன கதி²னங் அத்த²ரிதுகாமோ ஹோதி, போராணகோ உத்தராஸங்கோ³ பச்சுத்³த⁴ரிதப்³போ³, நவோ உத்தராஸங்கோ³ அதி⁴ட்டா²தப்³போ³, ‘‘இமினா உத்தராஸங்கே³ன கதி²னங் அத்த²ராமீ’’தி வாசா பி⁴ந்தி³தப்³பா³. ஸசே அந்தரவாஸகேன கதி²னங் அத்த²ரிதுகாமோ ஹோதி, போராணகோ அந்தரவாஸகோ பச்சுத்³த⁴ரிதப்³போ³, நவோ அந்தரவாஸகோ அதி⁴ட்டா²தப்³போ³, ‘‘இமினா அந்தரவாஸகேன கதி²னங் அத்த²ராமீ’’தி வாசா பி⁴ந்தி³தப்³பா³.
Katapariyositaṃ pana kathinaṃ gahetvā atthārakena bhikkhunā sace saṅghāṭiyā kathinaṃ attharitukāmo hoti, porāṇikā saṅghāṭi paccuddharitabbā, navā saṅghāṭi adhiṭṭhātabbā, ‘‘imāya saṅghāṭiyā kathinaṃ attharāmī’’ti vācā bhinditabbā. Sace uttarāsaṅgena kathinaṃ attharitukāmo hoti, porāṇako uttarāsaṅgo paccuddharitabbo, navo uttarāsaṅgo adhiṭṭhātabbo, ‘‘iminā uttarāsaṅgena kathinaṃ attharāmī’’ti vācā bhinditabbā. Sace antaravāsakena kathinaṃ attharitukāmo hoti, porāṇako antaravāsako paccuddharitabbo, navo antaravāsako adhiṭṭhātabbo, ‘‘iminā antaravāsakena kathinaṃ attharāmī’’ti vācā bhinditabbā.
தேன (பரி॰ 413) கதி²னத்தா²ரகேன பி⁴க்கு²னா ஸங்க⁴ங் உபஸங்கமித்வா ஏகங்ஸங் உத்தராஸங்க³ங் கரித்வா அஞ்ஜலிங் பக்³க³ஹெத்வா ஏவமஸ்ஸ வசனீயோ ‘‘அத்த²தங், ப⁴ந்தே, ஸங்க⁴ஸ்ஸ கதி²னங், த⁴ம்மிகோ கதி²னத்தா²ரோ, அனுமோத³தா²’’தி. தேஹி அனுமோத³கேஹி பி⁴க்கூ²ஹி ஏகங்ஸங் உத்தராஸங்க³ங் கரித்வா அஞ்ஜலிங் பக்³க³ஹெத்வா ஏவமஸ்ஸ வசனீயோ ‘‘அத்த²தங், ஆவுஸோ, ஸங்க⁴ஸ்ஸ கதி²னங், த⁴ம்மிகோ கதி²னத்தா²ரோ, அனுமோதா³மா’’தி. தேன கதி²னத்தா²ரகேன பி⁴க்கு²னா ஸம்ப³ஹுலே பி⁴க்கூ² உபஸங்கமித்வா ஏகங்ஸங் உத்தராஸங்க³ங் கரித்வா அஞ்ஜலிங் பக்³க³ஹெத்வா ஏவமஸ்ஸ வசனீயோ ‘‘அத்த²தங், ப⁴ந்தே, ஸங்க⁴ஸ்ஸ கதி²னங், த⁴ம்மிகோ கதி²னத்தா²ரோ, அனுமோத³தா²’’தி. தேஹி அனுமோத³கேஹி பி⁴க்கூ²ஹி ஏகங்ஸங் உத்தராஸங்க³ங் கரித்வா அஞ்ஜலிங் பக்³க³ஹெத்வா ஏவமஸ்ஸ வசனீயோ ‘‘அத்த²தங், ஆவுஸோ, ஸங்க⁴ஸ்ஸ கதி²னங், த⁴ம்மிகோ கதி²னத்தா²ரோ, அனுமோதா³மா’’தி. தேன கதி²னத்தா²ரகேன பி⁴க்கு²னா ஏகங் பி⁴க்கு²ங் உபஸங்கமித்வா ஏகங்ஸங் உத்தராஸங்க³ங் கரித்வா அஞ்ஜலிங் பக்³க³ஹெத்வா ஏவமஸ்ஸ வசனீயோ ‘‘அத்த²தங், ஆவுஸோ, ஸங்க⁴ஸ்ஸ கதி²னங், த⁴ம்மிகோ கதி²னத்தா²ரோ, அனுமோதா³ஹீ’’தி. தேன அனுமோத³கேன பி⁴க்கு²னா ஏகங்ஸங் உத்தராஸங்க³ங் கரித்வா அஞ்ஜலிங் பக்³க³ஹெத்வா ஏவமஸ்ஸ வசனீயோ ‘‘அத்த²தங், ஆவுஸோ, ஸங்க⁴ஸ்ஸ கதி²னங், த⁴ம்மிகோ கதி²னத்தா²ரோ, அனுமோதா³மீ’’தி. ஏவங் ஸப்³பே³ஸங் அத்த²தங் ஹோதி கதி²னங். வுத்தஞ்ஹேதங் பரிவாரே ‘‘த்³வின்னங் புக்³க³லானங் அத்த²தங் ஹோதி கதி²னங் அத்தா²ரகஸ்ஸ ச அனுமோத³கஸ்ஸ சா’’தி (பரி॰ 403). புனபி வுத்தங் ‘‘ந ஸங்கோ⁴ கதி²னங் அத்த²ரதி, ந க³ணோ கதி²னங் அத்த²ரதி, புக்³க³லோ கதி²னங் அத்த²ரதி, ஸங்க⁴ஸ்ஸ அனுமோத³னாய க³ணஸ்ஸ அனுமோத³னாய புக்³க³லஸ்ஸ அத்த²ராய ஸங்க⁴ஸ்ஸ அத்த²தங் ஹோதி கதி²னங், க³ணஸ்ஸ அத்த²தங் ஹோதி கதி²னங், புக்³க³லஸ்ஸ அத்த²தங் ஹோதி கதி²ன’’ந்தி (பரி॰ 414).
Tena (pari. 413) kathinatthārakena bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā añjaliṃ paggahetvā evamassa vacanīyo ‘‘atthataṃ, bhante, saṅghassa kathinaṃ, dhammiko kathinatthāro, anumodathā’’ti. Tehi anumodakehi bhikkhūhi ekaṃsaṃ uttarāsaṅgaṃ karitvā añjaliṃ paggahetvā evamassa vacanīyo ‘‘atthataṃ, āvuso, saṅghassa kathinaṃ, dhammiko kathinatthāro, anumodāmā’’ti. Tena kathinatthārakena bhikkhunā sambahule bhikkhū upasaṅkamitvā ekaṃsaṃ uttarāsaṅgaṃ karitvā añjaliṃ paggahetvā evamassa vacanīyo ‘‘atthataṃ, bhante, saṅghassa kathinaṃ, dhammiko kathinatthāro, anumodathā’’ti. Tehi anumodakehi bhikkhūhi ekaṃsaṃ uttarāsaṅgaṃ karitvā añjaliṃ paggahetvā evamassa vacanīyo ‘‘atthataṃ, āvuso, saṅghassa kathinaṃ, dhammiko kathinatthāro, anumodāmā’’ti. Tena kathinatthārakena bhikkhunā ekaṃ bhikkhuṃ upasaṅkamitvā ekaṃsaṃ uttarāsaṅgaṃ karitvā añjaliṃ paggahetvā evamassa vacanīyo ‘‘atthataṃ, āvuso, saṅghassa kathinaṃ, dhammiko kathinatthāro, anumodāhī’’ti. Tena anumodakena bhikkhunā ekaṃsaṃ uttarāsaṅgaṃ karitvā añjaliṃ paggahetvā evamassa vacanīyo ‘‘atthataṃ, āvuso, saṅghassa kathinaṃ, dhammiko kathinatthāro, anumodāmī’’ti. Evaṃ sabbesaṃ atthataṃ hoti kathinaṃ. Vuttañhetaṃ parivāre ‘‘dvinnaṃ puggalānaṃ atthataṃ hoti kathinaṃ atthārakassa ca anumodakassa cā’’ti (pari. 403). Punapi vuttaṃ ‘‘na saṅgho kathinaṃ attharati, na gaṇo kathinaṃ attharati, puggalo kathinaṃ attharati, saṅghassa anumodanāya gaṇassa anumodanāya puggalassa attharāya saṅghassa atthataṃ hoti kathinaṃ, gaṇassa atthataṃ hoti kathinaṃ, puggalassa atthataṃ hoti kathina’’nti (pari. 414).
ஏவங் அத்த²தே பன கதி²னே ஸசே கதி²னசீவரேன ஸத்³தி⁴ங் ஆப⁴தங் ஆனிஸங்ஸங் தா³யகா ‘‘யேன அம்ஹாகங் கதி²னங் க³ஹிதங், தஸ்ஸேவ தே³மா’’தி தெ³ந்தி, பி⁴க்கு²ஸங்கோ⁴ அனிஸ்ஸரோ. அத² அவிசாரெத்வாவ த³த்வா க³ச்ச²ந்தி, பி⁴க்கு²ஸங்கோ⁴ இஸ்ஸரோ. தஸ்மா ஸசே கதி²னத்தா²ரகஸ்ஸ ஸேஸசீவரானிபி து³ப்³ப³லானி ஹொந்தி, ஸங்கே⁴ன அபலோகெத்வா தேஸம்பி அத்தா²ய வத்தா²னி தா³தப்³பா³னி, கம்மவாசா பன ஏகாயேவ வட்டதி. அவஸேஸகதி²னானிஸங்ஸே ப³லவவத்தா²னி வஸ்ஸாவாஸிகடி²திகாய தா³தப்³பா³னி, டி²திகாய அபா⁴வே தே²ராஸனதோ பட்டா²ய தா³தப்³பா³னி, க³ருப⁴ண்ட³ங் ந பா⁴ஜேதப்³ப³ங். ஸசே பன ஏகஸீமாய ப³ஹூ விஹாரா ஹொந்தி, ஸப்³பே³ஹி பி⁴க்கூ²ஹி ஸன்னிபாதாபெத்வா ஏகத்த² கதி²னங் அத்த²ரிதப்³ப³ங், விஸுங் விஸுங் அத்த²ரிதுங் ந வட்டதி.
Evaṃ atthate pana kathine sace kathinacīvarena saddhiṃ ābhataṃ ānisaṃsaṃ dāyakā ‘‘yena amhākaṃ kathinaṃ gahitaṃ, tasseva demā’’ti denti, bhikkhusaṅgho anissaro. Atha avicāretvāva datvā gacchanti, bhikkhusaṅgho issaro. Tasmā sace kathinatthārakassa sesacīvarānipi dubbalāni honti, saṅghena apaloketvā tesampi atthāya vatthāni dātabbāni, kammavācā pana ekāyeva vaṭṭati. Avasesakathinānisaṃse balavavatthāni vassāvāsikaṭhitikāya dātabbāni, ṭhitikāya abhāve therāsanato paṭṭhāya dātabbāni, garubhaṇḍaṃ na bhājetabbaṃ. Sace pana ekasīmāya bahū vihārā honti, sabbehi bhikkhūhi sannipātāpetvā ekattha kathinaṃ attharitabbaṃ, visuṃ visuṃ attharituṃ na vaṭṭati.
‘‘அத்த²தகதி²னானங் வோ, பி⁴க்க²வே, பஞ்ச கப்பிஸ்ஸந்தி, அனாமந்தசாரோ அஸமாதா³னசாரோ க³ணபோ⁴ஜனங் யாவத³த்த²சீவரங் யோ ச தத்த² சீவருப்பாதோ³. ஸோ நேஸங் ப⁴விஸ்ஸதீ’’தி (மஹாவ॰ 306) வசனதோ அத்த²தகதி²னானங் பி⁴க்கூ²னங் அனாமந்தசாராத³யோ பன பஞ்சானிஸங்ஸா லப்³ப⁴ந்தி. தத்த² அனாமந்தசாரோதி அனாமந்தெத்வா சரணங், யாவ கதி²னங் ந உத்³த⁴ரீயதி, தாவ சாரித்தஸிக்கா²பதே³ன அனாபத்தீதி வுத்தங் ஹோதி. அஸமாதா³னசாரோதி சீவரங் அஸமாதா³ய சரணங், சீவரவிப்பவாஸோதி அத்தோ². க³ணபோ⁴ஜனந்தி க³ணபோ⁴ஜனஸிக்கா²பதே³ன அனாபத்தி வுத்தா. யாவத³த்த²சீவரந்தி யாவதா சீவரேன அத்தோ², தாவதகங் அனதி⁴ட்டி²தங் அவிகப்பிதங் வட்டதீதி அத்தோ². யோ ச தத்த² சீவருப்பாதோ³தி தத்த² கதி²னத்த²தஸீமாய மதகசீவரங் வா ஹோது ஸங்க⁴ங் உத்³தி³ஸ்ஸ தி³ன்னங் வா ஸங்கி⁴கேன தத்ருப்பாதே³ன ஆப⁴தங் வா, யேன கேனசி ஆகாரேன யங் ஸங்கி⁴கங் சீவரங் உப்பஜ்ஜதி, தங் தேஸங் ப⁴விஸ்ஸதீதி அத்தோ².
‘‘Atthatakathinānaṃ vo, bhikkhave, pañca kappissanti, anāmantacāro asamādānacāro gaṇabhojanaṃ yāvadatthacīvaraṃ yo ca tattha cīvaruppādo. So nesaṃ bhavissatī’’ti (mahāva. 306) vacanato atthatakathinānaṃ bhikkhūnaṃ anāmantacārādayo pana pañcānisaṃsā labbhanti. Tattha anāmantacāroti anāmantetvā caraṇaṃ, yāva kathinaṃ na uddharīyati, tāva cārittasikkhāpadena anāpattīti vuttaṃ hoti. Asamādānacāroti cīvaraṃ asamādāya caraṇaṃ, cīvaravippavāsoti attho. Gaṇabhojananti gaṇabhojanasikkhāpadena anāpatti vuttā. Yāvadatthacīvaranti yāvatā cīvarena attho, tāvatakaṃ anadhiṭṭhitaṃ avikappitaṃ vaṭṭatīti attho. Yo ca tattha cīvaruppādoti tattha kathinatthatasīmāya matakacīvaraṃ vā hotu saṅghaṃ uddissa dinnaṃ vā saṅghikena tatruppādena ābhataṃ vā, yena kenaci ākārena yaṃ saṅghikaṃ cīvaraṃ uppajjati, taṃ tesaṃ bhavissatīti attho.
இதி பாளிமுத்தகவினயவினிச்ச²யஸங்க³ஹே
Iti pāḷimuttakavinayavinicchayasaṅgahe
கதி²னத்தா²ரவினிச்ச²யகதா² ஸமத்தா.
Kathinatthāravinicchayakathā samattā.
