| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೫. ಕತಿಛಿನ್ದಸುತ್ತವಣ್ಣನಾ
5. Katichindasuttavaṇṇanā
೫. ಛಿನ್ದನ್ತೋತಿ ಸಮುಚ್ಛಿನ್ದನ್ತೋ। ಕತಿ ಛಿನ್ದೇಯ್ಯಾತಿ ಕಿತ್ತಕೇ ಪಾಪಧಮ್ಮೇ ಸಮುಚ್ಛಿನ್ದೇಯ್ಯ, ಅನುಪ್ಪತ್ತಿಧಮ್ಮತಂ ಪಾಪೇಯ್ಯ। ಸೇಸಪದೇಸುಪೀತಿ ಸೇಸೇಸುಪಿ ದ್ವೀಸು ಪದೇಸು। ಜಹನ್ತೋ ಕತಿ ಜಹೇಯ್ಯ, ಭಾವೇನ್ತೋ ಕತಿ ಉತ್ತರಿ ಭಾವೇಯ್ಯಾತಿ ಇಮಮತ್ಥಂ ‘‘ಏಸೇವ ನಯೋ’’ತಿ ಇಮಿನಾ ಅತಿದಿಸತಿ। ಚತುತ್ಥಪದಸ್ಸ ಪನ ಅತ್ಥೋ ಸರೂಪೇನೇವ ದಸ್ಸಿತೋ। ಅತ್ಥತೋ ಏಕನ್ತಿ ಭಾವತ್ಥತೋ ಏಕಂ। ಯದಿ ಏವಂ ಕಿಮತ್ಥಂ ಪರಿಯಾಯನ್ತರಂ ಗಹಿತನ್ತಿ ಆಹ ‘‘ಗಾಥಾಬನ್ಧಸ್ಸ ಪನಾ’’ತಿಆದಿ। ಅತ್ಥತೋ ಏತ್ಥ ಪುನರುತ್ತಿ ಅತ್ಥೇವಾತಿ ಆಹ ‘‘ಸದ್ದಪುನರುತ್ತಿಂ ವಜ್ಜಯನ್ತೀ’’ತಿ। ಸಙ್ಗಂ ಅತಿಕ್ಕಮಯತೀತಿ ಸಙ್ಗಾತಿಗೋತಿ ಆಹ ‘‘ಅಯಮೇವತ್ಥೋ’’ತಿ।
5.Chindantoti samucchindanto. Kati chindeyyāti kittake pāpadhamme samucchindeyya, anuppattidhammataṃ pāpeyya. Sesapadesupīti sesesupi dvīsu padesu. Jahanto kati jaheyya, bhāvento kati uttari bhāveyyāti imamatthaṃ ‘‘eseva nayo’’ti iminā atidisati. Catutthapadassa pana attho sarūpeneva dassito. Atthato ekanti bhāvatthato ekaṃ. Yadi evaṃ kimatthaṃ pariyāyantaraṃ gahitanti āha ‘‘gāthābandhassa panā’’tiādi. Atthato ettha punarutti atthevāti āha ‘‘saddapunaruttiṃ vajjayantī’’ti. Saṅgaṃ atikkamayatīti saṅgātigoti āha ‘‘ayamevattho’’ti.
ಓರಂ ವುಚ್ಚತಿ ಕಾಮಧಾತು, ಪಟಿಸನ್ಧಿಯಾ ಪಚ್ಚಯಭಾವೇನ ತಞ್ಚ ಭಜನ್ತೀತಿ ಓರಮ್ಭಾಗಿಯಾನಿ। ತತ್ಥ ಚ ಕಮ್ಮಂ ತಬ್ಬಿಪಾಕಂ ಸತ್ತೇ ದುಕ್ಖಂ, ಕಮ್ಮುನಾ ವಿಪಾಕಂ, ಸತ್ತೇನ ದುಕ್ಖಂ ಸಂಯೋಜೇನ್ತೀತಿ ಸಂಯೋಜನಾನಿ, ಸಕ್ಕಾಯದಿಟ್ಠಿ-ವಿಚಿಕಿಚ್ಛಾ-ಸೀಲಬ್ಬತಪರಾಮಾಸ-ಕಾಮರಾಗ-ಪಟಿಘಾ। ಉದ್ಧಂ ವುಚ್ಚತಿ ಚತಸ್ಸೋ ಅರೂಪಧಾತುಯೋ, ವುತ್ತನಯೇನ ತಂ ಭಜನ್ತೀತಿ ಉದ್ಧಮ್ಭಾಗಿಯಾನಿ, ಸಂಯೋಜನಾನಿ ರೂಪಾರೂಪರಾಗಮಾನುದ್ಧಚ್ಚಾವಿಜ್ಜಾ। ಆರೋಪಿತವಚನಾನುರೂಪೇನೇವ ಏವಮಾಹಾತಿ ‘‘ಪಞ್ಚ ಛಿನ್ದೇ ಪಞ್ಚ ಜಹೇ’’ತಿ ಏವಂ ಕಥೇಸಿ ತಸ್ಸಾ ದೇವತಾಯ ಸುಖಗ್ಗಹಣತ್ಥಂ। ನ ಕೇವಲಂ ತಾಯ ದೇವತಾಯ ವುತ್ತವಚನಾನುರೂಪತೋ ಏವ, ಅಥ ಖೋ ತೇಸು ಸಂಯೋಜನೇಸು ವತ್ತಬ್ಬಾಕಾರತೋಪೀತಿ ದಸ್ಸೇತುಂ ‘‘ಅಥ ವಾ’’ತಿಆದಿ ವುತ್ತಂ। ತೇನ ಓರಮ್ಭಾಗಿಯಸಂಯೋಜನಾನಿ ನಾಮ ಗರೂನಿ ದುಚ್ಛೇದಾನಿ ಗಾಳ್ಹಬನ್ಧನಭಾವತೋ, ತಸ್ಮಾ ತಾನಿ ಸನ್ಧಾಯ ‘‘ಪಞ್ಚ ಛಿನ್ದೇ’’ತಿ ವುತ್ತಂ।
Oraṃ vuccati kāmadhātu, paṭisandhiyā paccayabhāvena tañca bhajantīti orambhāgiyāni. Tattha ca kammaṃ tabbipākaṃ satte dukkhaṃ, kammunā vipākaṃ, sattena dukkhaṃ saṃyojentīti saṃyojanāni, sakkāyadiṭṭhi-vicikicchā-sīlabbataparāmāsa-kāmarāga-paṭighā. Uddhaṃ vuccati catasso arūpadhātuyo, vuttanayena taṃ bhajantīti uddhambhāgiyāni, saṃyojanāni rūpārūparāgamānuddhaccāvijjā. Āropitavacanānurūpeneva evamāhāti ‘‘pañca chinde pañca jahe’’ti evaṃ kathesi tassā devatāya sukhaggahaṇatthaṃ. Na kevalaṃ tāya devatāya vuttavacanānurūpato eva, atha kho tesu saṃyojanesu vattabbākāratopīti dassetuṃ ‘‘atha vā’’tiādi vuttaṃ. Tena orambhāgiyasaṃyojanāni nāma garūni ducchedāni gāḷhabandhanabhāvato, tasmā tāni sandhāya ‘‘pañca chinde’’ti vuttaṃ.
ಉದ್ಧಮ್ಭಾಗಿಯಸಂಯೋಜನಾನಿ ಪನ ಲಹೂನಿ ಸುಚ್ಛೇದಾನಿ ಹೇಟ್ಠಾ ಪವತ್ತಿತಾನುಕ್ಕಮೇನ ಭಾವನಾನಯೇನ ಪಹಾತಬ್ಬತೋ, ತಸ್ಮಾ ತಾನಿ ಸನ್ಧಾಯ ‘‘ಪಞ್ಚ ಜಹೇ’’ತಿ ವುತ್ತಂ। ತೇನಾಹ ‘‘ಪಾದೇಸು ಬದ್ಧಪಾಸಸಕುಣೋ ವಿಯಾ’’ತಿಆದಿ। ವಿಸೇಸನ್ತಿ ಭಾವನಾನಂ ವಿಸೇಸಂ ವಿಪಸ್ಸನಾಭಾವನಂ ಭಾವೇನ್ತೋ ಉಪ್ಪಾದೇನ್ತೋ ವಿಪಚ್ಚೇನ್ತೋ ವಡ್ಢೇನ್ತೋ ಚ। ಸಂಸಾರಪಙ್ಕೇ ಸಞ್ಜನಟ್ಠೇನ ರಾಗೋ ಏವ ಸಙ್ಗೋ ‘‘ರಾಗಸಙ್ಗೋ’’। ಏಸ ನಯೋ ಸೇಸೇಸುಪಿ। ಯಸ್ಮಾ ಏತ್ಥ ರಾಗ-ಮೋಹ-ದಿಟ್ಠಿ-ತಬ್ಭಾಗಿಯಸಕ್ಕಾಯದಿಟ್ಠಿ-ಸೀಲಬ್ಬತಪರಾಮಾಸ-ಕಾಮರಾಗಾವಿಜ್ಜಾ ಅತ್ಥತೋ ಓಘಾ ಏವ, ಇತರೇ ತದೇಕಟ್ಠಾ, ತಸ್ಮಾ ಭಗವಾ ಸಂಯೋಜನಪ್ಪಹಾನಸಙ್ಗಾತಿಕ್ಕಮೇಹಿ ಓಘತರಣಂ ಕಥೇಸಿ। ಲೋಕಿಯಲೋಕುತ್ತರಾನಿ ಕಥಿತಾನಿ ‘‘ಭಾವಯೇ’’ತಿ ಪುಬ್ಬಭಾಗಾಯ ಮಗ್ಗಭಾವನಾಯ ಅಧಿಪ್ಪೇತತ್ತಾ।
Uddhambhāgiyasaṃyojanāni pana lahūni succhedāni heṭṭhā pavattitānukkamena bhāvanānayena pahātabbato, tasmā tāni sandhāya ‘‘pañca jahe’’ti vuttaṃ. Tenāha ‘‘pādesu baddhapāsasakuṇo viyā’’tiādi. Visesanti bhāvanānaṃ visesaṃ vipassanābhāvanaṃ bhāvento uppādento vipaccento vaḍḍhento ca. Saṃsārapaṅke sañjanaṭṭhena rāgo eva saṅgo ‘‘rāgasaṅgo’’. Esa nayo sesesupi. Yasmā ettha rāga-moha-diṭṭhi-tabbhāgiyasakkāyadiṭṭhi-sīlabbataparāmāsa-kāmarāgāvijjā atthato oghā eva, itare tadekaṭṭhā, tasmā bhagavā saṃyojanappahānasaṅgātikkamehi oghataraṇaṃ kathesi. Lokiyalokuttarāni kathitāni ‘‘bhāvaye’’ti pubbabhāgāya maggabhāvanāya adhippetattā.
ಕತಿಛಿನ್ದಸುತ್ತವಣ್ಣನಾ ನಿಟ್ಠಿತಾ।
Katichindasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೫. ಕತಿಛಿನ್ದಸುತ್ತಂ • 5. Katichindasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೫. ಕತಿಛಿನ್ದಸುತ್ತವಣ್ಣನಾ • 5. Katichindasuttavaṇṇanā
