| Library / Tipiṭaka / திபிடக • Tipiṭaka / பரிவார-அட்ட²கதா² • Parivāra-aṭṭhakathā |
அந்தரபெய்யாலங்
Antarapeyyālaṃ
கதிபுச்சா²வாரவண்ணனா
Katipucchāvāravaṇṇanā
271. இதா³னி ஆபத்திஆதி³கொட்டா²ஸேஸு கோஸல்லஜனநத்த²ங் ‘‘கதி ஆபத்தியோ’’திஆதி³னா நயேன மாதிகங் ட²பெத்வா நித்³தே³ஸப்படினித்³தே³ஸவஸேன விப⁴ங்கோ³ வுத்தோ.
271. Idāni āpattiādikoṭṭhāsesu kosallajananatthaṃ ‘‘kati āpattiyo’’tiādinā nayena mātikaṃ ṭhapetvā niddesappaṭiniddesavasena vibhaṅgo vutto.
தத்த² கதி ஆபத்தியோதி மாதிகாய ச விப⁴ங்கே³ ச ஆக³தாபத்திபுச்சா². ஏஸ நயோ து³தியபதே³பி. கேவலஞ்ஹெத்த² ஆபத்தியோ ஏவ ராஸிவஸேன க²ந்தா⁴தி வுத்தா. வினீதவத்தூ²னீதி தாஸங் ஆபத்தீனங் வினயபுச்சா²; ‘‘வினீதங் வினயோ வூபஸமோ’’தி இத³ஞ்ஹி அத்த²தோ ஏகங், வினீதானியேவ வினீதவத்தூ²னீதி அயமெத்த² பத³த்தோ². இதா³னி யேஸு ஸதி ஆபத்தியோ ஹொந்தி, அஸதி ந ஹொந்தி, தே த³ஸ்ஸேதுங் ‘‘கதி அகா³ரவா’’தி புச்சா²த்³வயங். வினீதவத்தூ²னீதி அயங் பன தேஸங் அகா³ரவானங் வினயபுச்சா². யஸ்மா பன தா ஆபத்தியோ விபத்திங் ஆபத்தா நாம நத்தி², தஸ்மா ‘‘கதி விபத்தியோ’’தி அயங் ஆபத்தீனங் விபத்திபா⁴வபுச்சா². கதி ஆபத்திஸமுட்டா²னானீதி தாஸங்யேவ ஆபத்தீனங் ஸமுட்டா²னபுச்சா². விவாத³மூலானி அனுவாத³மூலானீதி இமா ‘‘விவாதா³தி⁴கரணங் அனுவாதா³தி⁴கரண’’ந்தி ஆக³தானங் விவாதா³னுவாதா³னங் மூலபுச்சா². ஸாரணீயா த⁴ம்மாதி விவாதா³னுவாத³மூலானங் அபா⁴வகரத⁴ம்மபுச்சா². பே⁴த³கரவத்தூ²னீதி அயங் ‘‘பே⁴த³னஸங்வத்தனிகங் வா அதி⁴கரண’’ந்திஆதீ³ஸு வுத்தபே⁴த³கரணபுச்சா². அதி⁴கரணானீதி பே⁴த³கரவத்தூ²ஸு ஸதி உப்பஜ்ஜனத⁴ம்மபுச்சா². ஸமதா²தி தேஸங்யேவ வூபஸமனத⁴ம்மபுச்சா². பஞ்ச ஆபத்தியோதி மாதிகாய ஆக³தவஸேன வுத்தா. ஸத்தாதி விப⁴ங்கே³ ஆக³தவஸேன.
Tattha kati āpattiyoti mātikāya ca vibhaṅge ca āgatāpattipucchā. Esa nayo dutiyapadepi. Kevalañhettha āpattiyo eva rāsivasena khandhāti vuttā. Vinītavatthūnīti tāsaṃ āpattīnaṃ vinayapucchā; ‘‘vinītaṃ vinayo vūpasamo’’ti idañhi atthato ekaṃ, vinītāniyeva vinītavatthūnīti ayamettha padattho. Idāni yesu sati āpattiyo honti, asati na honti, te dassetuṃ ‘‘kati agāravā’’ti pucchādvayaṃ. Vinītavatthūnīti ayaṃ pana tesaṃ agāravānaṃ vinayapucchā. Yasmā pana tā āpattiyo vipattiṃ āpattā nāma natthi, tasmā ‘‘kati vipattiyo’’ti ayaṃ āpattīnaṃ vipattibhāvapucchā. Kati āpattisamuṭṭhānānīti tāsaṃyeva āpattīnaṃ samuṭṭhānapucchā. Vivādamūlāni anuvādamūlānīti imā ‘‘vivādādhikaraṇaṃ anuvādādhikaraṇa’’nti āgatānaṃ vivādānuvādānaṃ mūlapucchā. Sāraṇīyā dhammāti vivādānuvādamūlānaṃ abhāvakaradhammapucchā. Bhedakaravatthūnīti ayaṃ ‘‘bhedanasaṃvattanikaṃ vā adhikaraṇa’’ntiādīsu vuttabhedakaraṇapucchā. Adhikaraṇānīti bhedakaravatthūsu sati uppajjanadhammapucchā. Samathāti tesaṃyeva vūpasamanadhammapucchā. Pañca āpattiyoti mātikāya āgatavasena vuttā. Sattāti vibhaṅge āgatavasena.
ஆரகா ஏதேஹி ரமதீதி ஆரதி; பு⁴ஸா வா ரதி ஆரதி. வினா ஏதேஹி ரமதீதி விரதி . பச்சேகங் பச்சேகங் விரமதீதி படிவிரதி. வேரங் மணதி வினாஸேதீதி வேரமணீ. ந ஏதாய ஏதே ஆபத்திக்க²ந்தா⁴ கரீயந்தீதி அகிரியா. யங் ஏதாய அஸதி ஆபத்திக்க²ந்த⁴கரணங் உப்பஜ்ஜெய்ய, தஸ்ஸ படிபக்க²தோ அகரணங். ஆபத்திக்க²ந்த⁴அஜ்ஜா²பத்தியா படிபக்க²தோ அனஜ்ஜா²பத்தி. வேலனதோ வேலா; சலயனதோ வினாஸனதோதி அத்தோ² . நிய்யானங் ஸினோதி ப³ந்த⁴தி நிவாரேதீதி ஸேது. ஆபத்திக்க²ந்தா⁴னமேதங் அதி⁴வசனங். ஸோ ஸேது ஏதாய பஞ்ஞத்தியா ஹஞ்ஞதீதி ஸேதுகா⁴தோ. ஸேஸவினீதவத்து²னித்³தே³ஸேஸுபி ஏஸேவ நயோ.
Ārakā etehi ramatīti ārati; bhusā vā rati ārati. Vinā etehi ramatīti virati. Paccekaṃ paccekaṃ viramatīti paṭivirati. Veraṃ maṇati vināsetīti veramaṇī. Na etāya ete āpattikkhandhā karīyantīti akiriyā. Yaṃ etāya asati āpattikkhandhakaraṇaṃ uppajjeyya, tassa paṭipakkhato akaraṇaṃ. Āpattikkhandhaajjhāpattiyā paṭipakkhato anajjhāpatti. Velanato velā; calayanato vināsanatoti attho . Niyyānaṃ sinoti bandhati nivāretīti setu. Āpattikkhandhānametaṃ adhivacanaṃ. So setu etāya paññattiyā haññatīti setughāto. Sesavinītavatthuniddesesupi eseva nayo.
பு³த்³தே⁴ அகா³ரவாதீ³ஸு யோ பு³த்³தே⁴ த⁴ரமானே உபட்டா²னங் ந க³ச்ச²தி, பரினிப்³பு³தே சேதியட்டா²னங் போ³தி⁴ட்டா²னங் ந க³ச்ச²தி, சேதியங் வா போ³தி⁴ங் வா ந வந்த³தி, சேதியங்க³ணே ஸச²த்தோ ஸஉபாஹனோ சரதி, நத்தே²தஸ்ஸ பு³த்³தே⁴ கா³ரவோதி வேதி³தப்³போ³. யோ பன ஸக்கொந்தோயேவ த⁴ம்மஸ்ஸவனங் ந க³ச்ச²தி, ஸரப⁴ஞ்ஞங் ந ப⁴ணதி, த⁴ம்மகத²ங் ந கதே²தி, த⁴ம்மஸ்ஸவனக்³க³ங் பி⁴ந்தி³த்வா க³ச்ச²தி, விக்கி²த்தோ வா அனாத³ரோ வா நிஸீத³தி, நத்தே²தஸ்ஸ த⁴ம்மே கா³ரவோ. யோ தே²ரனவமஜ்ஜி²மேஸு சித்தீகாரங் ந பச்சுபட்டா²பேதி, உபோஸதா²கா³ரவிதக்கமாளகாதீ³ஸு காயப்பாக³ப்³பி⁴யங் த³ஸ்ஸேதி, யதா²வுட்³ட⁴ங் ந வந்த³தி, நத்தே²தஸ்ஸ ஸங்கே⁴ கா³ரவோ. திஸ்ஸோ ஸிக்கா² ஸமாதா³ய அஸிக்க²மானோயேவ பன ஸிக்கா²ய அகா³ரவோதி வேதி³தப்³போ³. பமாதே³ ச ஸதிவிப்பவாஸே திட்ட²மானோயேவ அப்பமாத³லக்க²ணங் அப்³ரூஹயமானோ அப்பமாதே³ அகா³ரவோதி வேதி³தப்³போ³. ததா² ஆமிஸப்படிஸந்தா²ரங் த⁴ம்மப்படிஸந்தா²ரந்தி இமங் து³வித⁴ங் படிஸந்தா²ரங் அகரொந்தோயேவ படிஸந்தா²ரே அகா³ரவோதி வேதி³தப்³போ³. கா³ரவனித்³தே³ஸே வுத்தவிபரியாயேன அத்தோ² வேதி³தப்³போ³.
Buddhe agāravādīsu yo buddhe dharamāne upaṭṭhānaṃ na gacchati, parinibbute cetiyaṭṭhānaṃ bodhiṭṭhānaṃ na gacchati, cetiyaṃ vā bodhiṃ vā na vandati, cetiyaṅgaṇe sachatto saupāhano carati, natthetassa buddhe gāravoti veditabbo. Yo pana sakkontoyeva dhammassavanaṃ na gacchati, sarabhaññaṃ na bhaṇati, dhammakathaṃ na katheti, dhammassavanaggaṃ bhinditvā gacchati, vikkhitto vā anādaro vā nisīdati, natthetassa dhamme gāravo. Yo theranavamajjhimesu cittīkāraṃ na paccupaṭṭhāpeti, uposathāgāravitakkamāḷakādīsu kāyappāgabbhiyaṃ dasseti, yathāvuḍḍhaṃ na vandati, natthetassa saṅghe gāravo. Tisso sikkhā samādāya asikkhamānoyeva pana sikkhāya agāravoti veditabbo. Pamāde ca sativippavāse tiṭṭhamānoyeva appamādalakkhaṇaṃ abrūhayamāno appamāde agāravoti veditabbo. Tathā āmisappaṭisanthāraṃ dhammappaṭisanthāranti imaṃ duvidhaṃ paṭisanthāraṃ akarontoyeva paṭisanthāre agāravoti veditabbo. Gāravaniddese vuttavipariyāyena attho veditabbo.
272. விவாத³மூலனித்³தே³ஸே ‘‘ஸத்த²ரிபி அகா³ரவோ’’திஆதீ³னங் பு³த்³தே⁴ அகா³ரவாதீ³ஸு வுத்தனயேனேவ அத்தோ² வேதி³தப்³போ³. அப்பதிஸ்ஸோதி அனீசவுத்தி; ந ஸத்தா²ரங் ஜெட்ட²கங் கத்வா விஹரதி. அஜ்ஜ²த்தங் வாதி அத்தனோ ஸந்தானே வா அத்தனோ பக்கே² வா; ஸகாய பரிஸாயாதி அத்தோ². ப³ஹித்³தா⁴ வாதி பரஸந்தானே வா பரபக்கே² வா. தத்ர தும்ஹேதி தஸ்மிங் அஜ்ஜ²த்தப³ஹித்³தா⁴பே⁴தே³ ஸபரஸந்தானே வா ஸபரபரிஸாய வா. பஹானாய வாயமெய்யாதா²தி மெத்தாபா⁴வனாதீ³ஹி நயேஹி பஹானத்த²ங் வாயமெய்யாத²; மெத்தாபா⁴வனாதி³னயேன ஹி தங் அஜ்ஜ²த்தம்பி ப³ஹித்³தா⁴பி பஹீயதி. அனவஸ்ஸவாயாதி அப்பவத்திபா⁴வாய.
272. Vivādamūlaniddese ‘‘sattharipi agāravo’’tiādīnaṃ buddhe agāravādīsu vuttanayeneva attho veditabbo. Appatissoti anīcavutti; na satthāraṃ jeṭṭhakaṃ katvā viharati. Ajjhattaṃ vāti attano santāne vā attano pakkhe vā; sakāya parisāyāti attho. Bahiddhā vāti parasantāne vā parapakkhe vā. Tatra tumheti tasmiṃ ajjhattabahiddhābhede saparasantāne vā saparaparisāya vā. Pahānāya vāyameyyāthāti mettābhāvanādīhi nayehi pahānatthaṃ vāyameyyātha; mettābhāvanādinayena hi taṃ ajjhattampi bahiddhāpi pahīyati. Anavassavāyāti appavattibhāvāya.
ஸந்தி³ட்டி²பராமாஸீதி ஸகமேவ தி³ட்டி²ங் பராமஸதி; யங் அத்தனா தி³ட்டி²க³தங் க³ஹிதங், இத³மேவ ஸச்சந்தி க³ண்ஹாதி . ஆதா⁴னக்³கா³ஹீதி த³ள்ஹக்³கா³ஹீ.
Sandiṭṭhiparāmāsīti sakameva diṭṭhiṃ parāmasati; yaṃ attanā diṭṭhigataṃ gahitaṃ, idameva saccanti gaṇhāti . Ādhānaggāhīti daḷhaggāhī.
273. அனுவாத³மூலனித்³தே³ஸோ கிஞ்சாபி விவாத³மூலனித்³தே³ஸேனேவ ஸமானோ, அத² கோ² அட்டா²ரஸ பே⁴த³கரவத்தூ²னி நிஸ்ஸாய விவத³ந்தானங் கோதூ⁴பனாஹாத³யோ விவாத³மூலானி. ததா² விவத³ந்தா பன ஸீலவிபத்திஆதீ³ஸு அஞ்ஞதரவிபத்திங் ஆபஜ்ஜித்வா ‘‘அஸுகோ பி⁴க்கு² அஸுகங் நாம விபத்திங் ஆபன்னோ’’தி வா, ‘‘பாராஜிகங் ஆபன்னோஸி, ஸங்கா⁴தி³ஸேஸங் ஆபன்னோஸீ’’தி வா அனுவத³ந்தி. ஏவங் அனுவத³ந்தானங் கோதூ⁴பனாஹாத³யோ அனுவாத³மூலானீதி அயமெத்த² விஸேஸோ.
273. Anuvādamūlaniddeso kiñcāpi vivādamūlaniddeseneva samāno, atha kho aṭṭhārasa bhedakaravatthūni nissāya vivadantānaṃ kodhūpanāhādayo vivādamūlāni. Tathā vivadantā pana sīlavipattiādīsu aññataravipattiṃ āpajjitvā ‘‘asuko bhikkhu asukaṃ nāma vipattiṃ āpanno’’ti vā, ‘‘pārājikaṃ āpannosi, saṅghādisesaṃ āpannosī’’ti vā anuvadanti. Evaṃ anuvadantānaṃ kodhūpanāhādayo anuvādamūlānīti ayamettha viseso.
274. ஸாரணீயத⁴ம்மனித்³தே³ஸே மெத்தசித்தேன கதங் காயகம்மங் மெத்தங் காயகம்மங் நாம. ஆவி சேவ ரஹோ சாதி ஸம்முகா² ச பரம்முகா² ச. தத்த² நவகானங் சீவரகம்மாதீ³ஸு ஸஹாயபா⁴வக³மனங் ஸம்முகா² மெத்தங் காயகம்மங் நாம. தே²ரானங் பன பாத³தோ⁴வனபீ³ஜனவாததா³னாதி³பே⁴த³ம்பி ஸப்³ப³ங் ஸாமீசிகம்மங் ஸம்முகா² மெத்தங் காயகம்மங் நாம. உப⁴யேஹிபி து³ன்னிக்கி²த்தானங் தா³ருப⁴ண்டா³தீ³னங் தேஸு அவமஞ்ஞங் அகத்வா அத்தனா து³ன்னிக்கி²த்தானங் விய படிஸாமனங் பரம்முகா² மெத்தங் காயகம்மங் நாம. அயம்பி த⁴ம்மோ ஸாரணீயோதி அயங் மெத்தாகாயகம்மஸங்கா²தோ த⁴ம்மோ ஸரிதப்³போ³ ஸதிஜனகோ; யோ நங் கரோதி, தங் புக்³க³லங்; யேஸங் கதோ ஹோதி, தே பஸன்னசித்தா ‘‘அஹோ ஸப்புரிஸோ’’தி அனுஸ்ஸரந்தீதி அதி⁴ப்பாயோ. பியகரணோதி தங் புக்³க³லங் ஸப்³ரஹ்மசாரீனங் பியங் கரோதி. க³ருகரணோதி தங் புக்³க³லங் ஸப்³ரஹ்மசாரீனங் க³ருங் கரோதி. ஸங்க³ஹாயாதிஆதீ³ஸு ஸப்³ரஹ்மசாரீஹி ஸங்க³ஹேதப்³ப³பா⁴வாய. தேஹி ஸத்³தி⁴ங் அவிவாதா³ய ஸமக்³க³பா⁴வாய ஏகீபா⁴வாய ச ஸங்வத்ததி.
274. Sāraṇīyadhammaniddese mettacittena kataṃ kāyakammaṃ mettaṃ kāyakammaṃ nāma. Āvi ceva raho cāti sammukhā ca parammukhā ca. Tattha navakānaṃ cīvarakammādīsu sahāyabhāvagamanaṃ sammukhā mettaṃ kāyakammaṃ nāma. Therānaṃ pana pādadhovanabījanavātadānādibhedampi sabbaṃ sāmīcikammaṃ sammukhā mettaṃ kāyakammaṃ nāma. Ubhayehipi dunnikkhittānaṃ dārubhaṇḍādīnaṃ tesu avamaññaṃ akatvā attanā dunnikkhittānaṃ viya paṭisāmanaṃ parammukhā mettaṃ kāyakammaṃ nāma. Ayampi dhammo sāraṇīyoti ayaṃ mettākāyakammasaṅkhāto dhammo saritabbo satijanako; yo naṃ karoti, taṃ puggalaṃ; yesaṃ kato hoti, te pasannacittā ‘‘aho sappuriso’’ti anussarantīti adhippāyo. Piyakaraṇoti taṃ puggalaṃ sabrahmacārīnaṃ piyaṃ karoti. Garukaraṇoti taṃ puggalaṃ sabrahmacārīnaṃ garuṃ karoti. Saṅgahāyātiādīsu sabrahmacārīhi saṅgahetabbabhāvāya. Tehi saddhiṃ avivādāya samaggabhāvāya ekībhāvāya ca saṃvattati.
மெத்தங் வசீகம்மந்திஆதீ³ஸு தே³வத்தே²ரோ திஸ்ஸத்தே²ரோதி ஏவங் பக்³க³ய்ஹ வசனங் ஸம்முகா² மெத்தங் வசீகம்மங் நாம. விஹாரே அஸந்தே பன தங் படிபுச்ச²ந்தஸ்ஸ ‘‘குஹிங் அம்ஹாகங் தே³வத்தே²ரோ, குஹிங் அம்ஹாகங் திஸ்ஸத்தே²ரோ, கதா³ நு கோ² ஆக³மிஸ்ஸதீ’’தி ஏவங் மமாயனவசனங் பரம்முகா² மெத்தங் வசீகம்மங் நாம. மெத்தாஸினேஹஸினித்³தா⁴னி பன நயனானி உம்மீலெத்வா பஸன்னேன முகே²ன ஓலோகனங் ஸம்முகா² மெத்தங் மனோகம்மங் நாம. ‘‘தே³வத்தே²ரோ திஸ்ஸத்தே²ரோ அரோகோ³ ஹோது, அப்பாபா³தோ⁴’’தி ஸமன்னாஹரணங் பரம்முகா² மெத்தங் மனோகம்மங் நாம.
Mettaṃ vacīkammantiādīsu devatthero tissattheroti evaṃ paggayha vacanaṃ sammukhā mettaṃ vacīkammaṃ nāma. Vihāre asante pana taṃ paṭipucchantassa ‘‘kuhiṃ amhākaṃ devatthero, kuhiṃ amhākaṃ tissatthero, kadā nu kho āgamissatī’’ti evaṃ mamāyanavacanaṃ parammukhā mettaṃ vacīkammaṃ nāma. Mettāsinehasiniddhāni pana nayanāni ummīletvā pasannena mukhena olokanaṃ sammukhā mettaṃ manokammaṃ nāma. ‘‘Devatthero tissatthero arogo hotu, appābādho’’ti samannāharaṇaṃ parammukhā mettaṃ manokammaṃ nāma.
அப்படிவிப⁴த்தபோ⁴கீ³தி நேவ ஆமிஸங் படிவிப⁴ஜித்வா பு⁴ஞ்ஜதி, ந புக்³க³லங். யோ ஹி ‘‘எத்தகங் பரேஸங் த³ஸ்ஸாமி, எத்தகங் அத்தனா பு⁴ஞ்ஜிஸ்ஸாமி, எத்தகங் வா அஸுகஸ்ஸ ச அஸுகஸ்ஸ ச த³ஸ்ஸாமி, எத்தகங் அத்தனா பு⁴ஞ்ஜிஸ்ஸாமீ’’தி விப⁴ஜித்வா பு⁴ஞ்ஜதி, அயங் படிவிப⁴த்தபோ⁴கீ³ நாம. அயங் பன ஏவங் அகத்வா ஆப⁴தங் பிண்ட³பாதங் தே²ராஸனதோ பட்டா²ய த³த்வா க³ஹிதாவஸேஸங் பு⁴ஞ்ஜதி. ‘‘ஸீலவந்தேஹீ’’தி வசனதோ து³ஸ்ஸீலஸ்ஸ அதா³தும்பி வட்டதி, ஸாரணீயத⁴ம்மபூரகேன பன ஸப்³பே³ஸங் தா³தப்³ப³மேவாதி வுத்தங். கி³லான-கி³லானுபட்டா²க-ஆக³ந்துக-க³மிகசீவரகம்மாதி³பஸுதானங் விசெய்ய தா³தும்பி வட்டதி. ந ஹி ஏதே விசினித்வா தெ³ந்தேன புக்³க³லவிபா⁴கோ³ கதோ ஹோதி, ஈதி³ஸானஞ்ஹி கிச்ச²லாப⁴த்தா விஸேஸோ காதப்³போ³யேவாதி அயங் கரோதி.
Appaṭivibhattabhogīti neva āmisaṃ paṭivibhajitvā bhuñjati, na puggalaṃ. Yo hi ‘‘ettakaṃ paresaṃ dassāmi, ettakaṃ attanā bhuñjissāmi, ettakaṃ vā asukassa ca asukassa ca dassāmi, ettakaṃ attanā bhuñjissāmī’’ti vibhajitvā bhuñjati, ayaṃ paṭivibhattabhogī nāma. Ayaṃ pana evaṃ akatvā ābhataṃ piṇḍapātaṃ therāsanato paṭṭhāya datvā gahitāvasesaṃ bhuñjati. ‘‘Sīlavantehī’’ti vacanato dussīlassa adātumpi vaṭṭati, sāraṇīyadhammapūrakena pana sabbesaṃ dātabbamevāti vuttaṃ. Gilāna-gilānupaṭṭhāka-āgantuka-gamikacīvarakammādipasutānaṃ viceyya dātumpi vaṭṭati. Na hi ete vicinitvā dentena puggalavibhāgo kato hoti, īdisānañhi kicchalābhattā viseso kātabboyevāti ayaṃ karoti.
அக²ண்டா³னீதிஆதீ³ஸு யஸ்ஸ ஸத்தஸு ஆபத்திக்க²ந்தே⁴ஸு ஆதி³ம்ஹி வா அந்தே வா ஸிக்கா²பத³ங் பி⁴ன்னங் ஹோதி, தஸ்ஸ ஸீலங் பரியந்தே சி²ன்னஸாடகோ விய க²ண்ட³ங் நாம. யஸ்ஸ பன வேமஜ்ஜே² பி⁴ன்னங், தஸ்ஸ மஜ்ஜே² சி²த்³த³ஸாடகோ விய சி²த்³த³ங் நாம ஹோதி. யஸ்ஸ படிபாடியா த்³வே தீணி பி⁴ன்னானி, தஸ்ஸ பிட்டி²யங் வா குச்சி²யங் வா உட்டி²தேன விஸபா⁴க³வண்ணேன காளரத்தாதீ³னங் அஞ்ஞதரஸரீரவண்ணா கா³வீ விய ஸப³லங் நாம ஹோதி. யஸ்ஸ அந்தரந்தரா பி⁴ன்னானி, தஸ்ஸ அந்தரந்தரா விஸபா⁴க³வண்ணபி³ந்து³விசித்ரா கா³வீ விய கம்மாஸங் நாம ஹோதி. யஸ்ஸ பன ஸப்³பே³ன ஸப்³ப³ங் அபி⁴ன்னானி ஸீலானி, தஸ்ஸ தானி ஸீலானி அக²ண்டா³னி அச்சி²த்³தா³னி அஸப³லானி அகம்மாஸானி நாம ஹொந்தி. தானி பனேதானி பு⁴ஜிஸ்ஸபா⁴வகரணதோ பு⁴ஜிஸ்ஸானி. விஞ்ஞூஹி பஸத்த²த்தா விஞ்ஞுப்பஸத்தா²னி. தண்ஹாதி³ட்டீ²ஹி அபராமட்ட²த்தா அபராமட்டா²னி. உபசாரஸமாதி⁴ங் அப்பனாஸமாதி⁴ங் வா ஸங்வத்தயந்தீதி ஸமாதி⁴ஸங்வத்தனிகானீதி வுச்சந்தி. ஸீலஸாமஞ்ஞக³தோ விஹரதீதி தேஸு தேஸு தி³ஸாபா⁴கே³ஸு விஹரந்தேஹி கல்யாணஸீலேஹி பி⁴க்கூ²ஹி ஸத்³தி⁴ங் ஸமானபா⁴வூபக³தஸீலோ விஹரதி.
Akhaṇḍānītiādīsu yassa sattasu āpattikkhandhesu ādimhi vā ante vā sikkhāpadaṃ bhinnaṃ hoti, tassa sīlaṃ pariyante chinnasāṭako viya khaṇḍaṃ nāma. Yassa pana vemajjhe bhinnaṃ, tassa majjhe chiddasāṭako viya chiddaṃ nāma hoti. Yassa paṭipāṭiyā dve tīṇi bhinnāni, tassa piṭṭhiyaṃ vā kucchiyaṃ vā uṭṭhitena visabhāgavaṇṇena kāḷarattādīnaṃ aññatarasarīravaṇṇā gāvī viya sabalaṃ nāma hoti. Yassa antarantarā bhinnāni, tassa antarantarā visabhāgavaṇṇabinduvicitrā gāvī viya kammāsaṃ nāma hoti. Yassa pana sabbena sabbaṃ abhinnāni sīlāni, tassa tāni sīlāni akhaṇḍāni acchiddāni asabalāni akammāsāni nāma honti. Tāni panetāni bhujissabhāvakaraṇato bhujissāni. Viññūhi pasatthattā viññuppasatthāni. Taṇhādiṭṭhīhi aparāmaṭṭhattā aparāmaṭṭhāni. Upacārasamādhiṃ appanāsamādhiṃ vā saṃvattayantīti samādhisaṃvattanikānīti vuccanti. Sīlasāmaññagato viharatīti tesu tesu disābhāgesu viharantehi kalyāṇasīlehi bhikkhūhi saddhiṃ samānabhāvūpagatasīlo viharati.
யாயங் தி³ட்டீ²தி மக்³க³ஸம்பயுத்தா ஸம்மாதி³ட்டி². அரியாதி நித்³தோ³ஸா. நிய்யாதீதி நிய்யானிகா. தக்கரஸ்ஸாதி யோ ததா²காரீ ஹோதி, தஸ்ஸ. து³க்க²க்க²யாயாதி ஸப்³ப³து³க்க²ஸ்ஸ க²யத்த²ங். ஸேஸங் யாவ ஸமத²பே⁴த³பரியோஸானா உத்தானத்த²மேவ.
Yāyaṃ diṭṭhīti maggasampayuttā sammādiṭṭhi. Ariyāti niddosā. Niyyātīti niyyānikā. Takkarassāti yo tathākārī hoti, tassa. Dukkhakkhayāyāti sabbadukkhassa khayatthaṃ. Sesaṃ yāva samathabhedapariyosānā uttānatthameva.
கதிபுச்சா²வாரவண்ணனா நிட்டி²தா.
Katipucchāvāravaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / கதிபுச்சா²வாரோ • Katipucchāvāro
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / கதிபுச்சா²வாரவண்ணனா • Katipucchāvāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / கதிபுச்சா²வாரவண்ணனா • Katipucchāvāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / கதிபுச்சா²வாரவண்ணனா • Katipucchāvāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / அந்தரபெய்யால கதிபுச்சா²வாரவண்ணனா • Antarapeyyāla katipucchāvāravaṇṇanā
