| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
அந்தரபெய்யாலங்
Antarapeyyālaṃ
கதிபுச்சா²வாரவண்ணனா
Katipucchāvāravaṇṇanā
271. கதி ஆபத்தியோதி பாராஜிகாதீ³ஸு பஞ்சஸு ஆபத்தீஸு மேது²னாதி³ன்னாதா³னாதி³அந்தோக³த⁴பே⁴த³ங் அபெக்கி²த்வா ஜாதிவஸேன ஏகத்தங் ஆரோபெத்வா புச்சா² கதா. கதி ஆபத்திக்க²ந்தா⁴தி அந்தோக³த⁴பே⁴த³ங் அபெக்கி²த்வா பச்சேகங் ராஸட்டே²னாதி எத்தகமேவெத்த² பே⁴தோ³. வினீதானியேவ வினீதவத்தூ²னீதி ஆபத்திதோ விரமணானி ஏவ அவிப்படிஸாரபாமோஜ்ஜாதி³த⁴ம்மானங் காரணத்தா வத்தூ²னீதி வினீதவத்தூ²னி, தானி எத்த² அத்த²தோ விரதிஆதி³அனவஜ்ஜத⁴ம்மா ஏவ. வேரங் மணதீதி வேரஹேதுத்தா ‘‘வேர’’ந்தி லத்³த⁴னாமங் ராகா³தி³அகுஸலபக்க²ங் வினாஸேதி.
271.Katiāpattiyoti pārājikādīsu pañcasu āpattīsu methunādinnādānādiantogadhabhedaṃ apekkhitvā jātivasena ekattaṃ āropetvā pucchā katā. Kati āpattikkhandhāti antogadhabhedaṃ apekkhitvā paccekaṃ rāsaṭṭhenāti ettakamevettha bhedo. Vinītāniyevavinītavatthūnīti āpattito viramaṇāni eva avippaṭisārapāmojjādidhammānaṃ kāraṇattā vatthūnīti vinītavatthūni, tāni ettha atthato viratiādianavajjadhammā eva. Veraṃ maṇatīti verahetuttā ‘‘vera’’nti laddhanāmaṃ rāgādiakusalapakkhaṃ vināseti.
த⁴ம்மஸ்ஸவனக்³க³ங் பி⁴ந்தி³த்வா க³ச்ச²தீதி ப³ஹூஸு ஏகதோ நிஸீதி³த்வா த⁴ம்மங் ஸுணந்தேஸு தங் த⁴ம்மஸ்ஸவனஸமாக³மங் கோபெத்வா உட்டா²ய க³ச்ச²தி. அனாத³ரோவாதி துஸ்ஸிதப்³ப³ட்டா²னே துட்டி²ங், ஸங்விஜிதப்³ப³ட்டா²னே ஸங்வேக³ஞ்ச அபவேதெ³ந்தோ ஏவ. காயபாக³ப்³பி⁴யந்தி உன்னதிவஸேன பவத்தனகாயானாசாரங்.
Dhammassavanaggaṃ bhinditvā gacchatīti bahūsu ekato nisīditvā dhammaṃ suṇantesu taṃ dhammassavanasamāgamaṃ kopetvā uṭṭhāya gacchati. Anādarovāti tussitabbaṭṭhāne tuṭṭhiṃ, saṃvijitabbaṭṭhāne saṃvegañca apavedento eva. Kāyapāgabbhiyanti unnativasena pavattanakāyānācāraṃ.
274. மெத்தாய ஸம்பூ⁴தங் மெத்தங், காயகம்மங். உப⁴யேஹிபீதி நவகேஹி, தே²ரேஹி ச. பியங் கரோதீதி தங் புக்³க³லங் பேமட்டா²னங் கரோதி, கேஸந்தி ஆஹ ‘‘ஸப்³ரஹ்மசாரீன’’ந்தி.
274. Mettāya sambhūtaṃ mettaṃ, kāyakammaṃ. Ubhayehipīti navakehi, therehi ca. Piyaṃ karotīti taṃ puggalaṃ pemaṭṭhānaṃ karoti, kesanti āha ‘‘sabrahmacārīna’’nti.
புக்³க³லங் படிவிப⁴ஜித்வா பு⁴ஞ்ஜதீதி பகதேன ஸம்ப³ந்தோ⁴. தமேவ புக்³க³லபடிவிபா⁴க³ங் த³ஸ்ஸேதுங் ‘‘அஸுகஸ்ஸா’’திஆதி³ வுத்தங்.
Puggalaṃ paṭivibhajitvā bhuñjatīti pakatena sambandho. Tameva puggalapaṭivibhāgaṃ dassetuṃ ‘‘asukassā’’tiādi vuttaṃ.
பு⁴ஜிஸ்ஸபா⁴வகரணதோதி தண்ஹாதா³ஸப்³யதோ மோசெத்வா ஸமத²விபஸ்ஸனாஸு ஸேரிவிஹாரிதாகரணதோதி அத்தோ². நிய்யாதீதி பவத்ததி. ஸம்மாது³க்க²க்க²யாய ஸங்வத்ததீதி அத்தோ².
Bhujissabhāvakaraṇatoti taṇhādāsabyato mocetvā samathavipassanāsu serivihāritākaraṇatoti attho. Niyyātīti pavattati. Sammādukkhakkhayāya saṃvattatīti attho.
கதிபுச்சா²வாரவண்ணனா நிட்டி²தா.
Katipucchāvāravaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / கதிபுச்சா²வாரோ • Katipucchāvāro
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / கதிபுச்சா²வாரவண்ணனா • Katipucchāvāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / கதிபுச்சா²வாரவண்ணனா • Katipucchāvāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / கதிபுச்சா²வாரவண்ணனா • Katipucchāvāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / அந்தரபெய்யால கதிபுச்சா²வாரவண்ணனா • Antarapeyyāla katipucchāvāravaṇṇanā
