| Library / Tipiṭaka / д̇ибидага • Tipiṭaka / бариваара-адтагат̇аа • Parivāra-aṭṭhakathā |
анд̇арабзяяаалам̣
Antarapeyyālaṃ
гад̇ибужчааваараван̣н̣анаа
Katipucchāvāravaṇṇanā
271. ид̣̇аани аабад̇д̇иаад̣̇игодтаасзсу госаллаж̇ананад̇т̇ам̣ ‘‘гад̇и аабад̇д̇ияо’’д̇иаад̣̇инаа наязна маад̇игам̣ табзд̇ваа нид̣̇д̣̇зсаббадинид̣̇д̣̇зсавасзна вибхан̇г̇о вуд̇д̇о.
271. Idāni āpattiādikoṭṭhāsesu kosallajananatthaṃ ‘‘kati āpattiyo’’tiādinā nayena mātikaṃ ṭhapetvā niddesappaṭiniddesavasena vibhaṅgo vutto.
д̇ад̇т̇а гад̇и аабад̇д̇ияод̇и маад̇игааяа жа вибхан̇г̇з жа ааг̇ад̇аабад̇д̇ибужчаа. зса наяо д̣̇уд̇ияабад̣̇зби. гзвалан̃хзд̇т̇а аабад̇д̇ияо зва раасивасзна канд̇хаад̇и вуд̇д̇аа. винийд̇авад̇т̇уунийд̇и д̇аасам̣ аабад̇д̇ийнам̣ винаяабужчаа; ‘‘винийд̇ам̣ винаяо вуубасамо’’д̇и ид̣̇ан̃хи ад̇т̇ад̇о згам̣, винийд̇ааниязва винийд̇авад̇т̇уунийд̇и аяамзд̇т̇а бад̣̇ад̇т̇о. ид̣̇аани язсу сад̇и аабад̇д̇ияо хонд̇и, асад̇и на хонд̇и, д̇з д̣̇ассзд̇ум̣ ‘‘гад̇и аг̇аараваа’’д̇и бужчаад̣̇ваяам̣. винийд̇авад̇т̇уунийд̇и аяам̣ бана д̇зсам̣ аг̇аараваанам̣ винаяабужчаа. яасмаа бана д̇аа аабад̇д̇ияо вибад̇д̇им̣ аабад̇д̇аа наама над̇т̇и, д̇асмаа ‘‘гад̇и вибад̇д̇ияо’’д̇и аяам̣ аабад̇д̇ийнам̣ вибад̇д̇ибхаавабужчаа. гад̇и аабад̇д̇исамудтаанаанийд̇и д̇аасам̣язва аабад̇д̇ийнам̣ самудтаанабужчаа. виваад̣̇амуулаани ануваад̣̇амуулаанийд̇и имаа ‘‘виваад̣̇аад̇хигаран̣ам̣ ануваад̣̇аад̇хигаран̣а’’нд̇и ааг̇ад̇аанам̣ виваад̣̇аануваад̣̇аанам̣ муулабужчаа. сааран̣ийяаа д̇хаммаад̇и виваад̣̇аануваад̣̇амуулаанам̣ абхаавагарад̇хаммабужчаа. бхзд̣̇агаравад̇т̇уунийд̇и аяам̣ ‘‘бхзд̣̇анасам̣вад̇д̇анигам̣ ваа ад̇хигаран̣а’’нд̇иаад̣̇ийсу вуд̇д̇абхзд̣̇агаран̣абужчаа. ад̇хигаран̣аанийд̇и бхзд̣̇агаравад̇т̇уусу сад̇и уббаж̇ж̇анад̇хаммабужчаа. самат̇аад̇и д̇зсам̣язва вуубасаманад̇хаммабужчаа. бан̃жа аабад̇д̇ияод̇и маад̇игааяа ааг̇ад̇авасзна вуд̇д̇аа. сад̇д̇аад̇и вибхан̇г̇з ааг̇ад̇авасзна.
Tattha kati āpattiyoti mātikāya ca vibhaṅge ca āgatāpattipucchā. Esa nayo dutiyapadepi. Kevalañhettha āpattiyo eva rāsivasena khandhāti vuttā. Vinītavatthūnīti tāsaṃ āpattīnaṃ vinayapucchā; ‘‘vinītaṃ vinayo vūpasamo’’ti idañhi atthato ekaṃ, vinītāniyeva vinītavatthūnīti ayamettha padattho. Idāni yesu sati āpattiyo honti, asati na honti, te dassetuṃ ‘‘kati agāravā’’ti pucchādvayaṃ. Vinītavatthūnīti ayaṃ pana tesaṃ agāravānaṃ vinayapucchā. Yasmā pana tā āpattiyo vipattiṃ āpattā nāma natthi, tasmā ‘‘kati vipattiyo’’ti ayaṃ āpattīnaṃ vipattibhāvapucchā. Kati āpattisamuṭṭhānānīti tāsaṃyeva āpattīnaṃ samuṭṭhānapucchā. Vivādamūlāni anuvādamūlānīti imā ‘‘vivādādhikaraṇaṃ anuvādādhikaraṇa’’nti āgatānaṃ vivādānuvādānaṃ mūlapucchā. Sāraṇīyā dhammāti vivādānuvādamūlānaṃ abhāvakaradhammapucchā. Bhedakaravatthūnīti ayaṃ ‘‘bhedanasaṃvattanikaṃ vā adhikaraṇa’’ntiādīsu vuttabhedakaraṇapucchā. Adhikaraṇānīti bhedakaravatthūsu sati uppajjanadhammapucchā. Samathāti tesaṃyeva vūpasamanadhammapucchā. Pañca āpattiyoti mātikāya āgatavasena vuttā. Sattāti vibhaṅge āgatavasena.
аарагаа зд̇зхи рамад̇ийд̇и аарад̇и; бхусаа ваа рад̇и аарад̇и. винаа зд̇зхи рамад̇ийд̇и вирад̇и . бажжзгам̣ бажжзгам̣ вирамад̇ийд̇и бадивирад̇и. взрам̣ ман̣ад̇и винаасзд̇ийд̇и взраман̣ий. на зд̇ааяа зд̇з аабад̇д̇игканд̇хаа гарийяанд̇ийд̇и агирияаа. яам̣ зд̇ааяа асад̇и аабад̇д̇игканд̇хагаран̣ам̣ уббаж̇ж̇зяяа, д̇асса бадибагкад̇о агаран̣ам̣. аабад̇д̇игканд̇хааж̇жхаабад̇д̇ияаа бадибагкад̇о анаж̇жхаабад̇д̇и. взланад̇о взлаа; жалаяанад̇о винаасанад̇од̇и ад̇т̇о . нияяаанам̣ синод̇и б̣анд̇хад̇и ниваарзд̇ийд̇и сзд̇у. аабад̇д̇игканд̇хаанамзд̇ам̣ ад̇хиважанам̣. со сзд̇у зд̇ааяа бан̃н̃ад̇д̇ияаа хан̃н̃ад̇ийд̇и сзд̇угхаад̇о. сзсавинийд̇авад̇т̇унид̣̇д̣̇зсзсуби зсзва наяо.
Ārakā etehi ramatīti ārati; bhusā vā rati ārati. Vinā etehi ramatīti virati. Paccekaṃ paccekaṃ viramatīti paṭivirati. Veraṃ maṇati vināsetīti veramaṇī. Na etāya ete āpattikkhandhā karīyantīti akiriyā. Yaṃ etāya asati āpattikkhandhakaraṇaṃ uppajjeyya, tassa paṭipakkhato akaraṇaṃ. Āpattikkhandhaajjhāpattiyā paṭipakkhato anajjhāpatti. Velanato velā; calayanato vināsanatoti attho . Niyyānaṃ sinoti bandhati nivāretīti setu. Āpattikkhandhānametaṃ adhivacanaṃ. So setu etāya paññattiyā haññatīti setughāto. Sesavinītavatthuniddesesupi eseva nayo.
б̣уд̣̇д̇хз аг̇аараваад̣̇ийсу яо б̣уд̣̇д̇хз д̇харамаанз убадтаанам̣ на г̇ажчад̇и, бариниб̣б̣уд̇з жзд̇ияадтаанам̣ б̣од̇хидтаанам̣ на г̇ажчад̇и, жзд̇ияам̣ ваа б̣од̇хим̣ ваа на ванд̣̇ад̇и, жзд̇ияан̇г̇ан̣з сачад̇д̇о саубаахано жарад̇и, над̇т̇зд̇асса б̣уд̣̇д̇хз г̇ааравод̇и взд̣̇ид̇аб̣б̣о. яо бана саггонд̇оязва д̇хаммассаванам̣ на г̇ажчад̇и, сарабхан̃н̃ам̣ на бхан̣ад̇и, д̇хаммагат̇ам̣ на гат̇зд̇и, д̇хаммассаванаг̇г̇ам̣ бхинд̣̇ид̇ваа г̇ажчад̇и, вигкид̇д̇о ваа анаад̣̇аро ваа нисийд̣̇ад̇и, над̇т̇зд̇асса д̇хаммз г̇аараво. яо т̇зранавамаж̇жхимзсу жид̇д̇ийгаарам̣ на бажжубадтаабзд̇и, убосат̇ааг̇ааравид̇аггамаал̣агаад̣̇ийсу гааяаббааг̇аб̣бхияам̣ д̣̇ассзд̇и, яат̇аавуд̣дхам̣ на ванд̣̇ад̇и, над̇т̇зд̇асса сан̇гхз г̇аараво. д̇иссо сигкаа самаад̣̇ааяа асигкамааноязва бана сигкааяа аг̇ааравод̇и взд̣̇ид̇аб̣б̣о. бамаад̣̇з жа сад̇ивиббаваасз д̇идтамааноязва аббамаад̣̇алагкан̣ам̣ аб̣руухаяамаано аббамаад̣̇з аг̇ааравод̇и взд̣̇ид̇аб̣б̣о. д̇ат̇аа аамисаббадисант̇аарам̣ д̇хаммаббадисант̇ааранд̇и имам̣ д̣̇увид̇хам̣ бадисант̇аарам̣ агаронд̇оязва бадисант̇аарз аг̇ааравод̇и взд̣̇ид̇аб̣б̣о. г̇аараванид̣̇д̣̇зсз вуд̇д̇авибарияааязна ад̇т̇о взд̣̇ид̇аб̣б̣о.
Buddhe agāravādīsu yo buddhe dharamāne upaṭṭhānaṃ na gacchati, parinibbute cetiyaṭṭhānaṃ bodhiṭṭhānaṃ na gacchati, cetiyaṃ vā bodhiṃ vā na vandati, cetiyaṅgaṇe sachatto saupāhano carati, natthetassa buddhe gāravoti veditabbo. Yo pana sakkontoyeva dhammassavanaṃ na gacchati, sarabhaññaṃ na bhaṇati, dhammakathaṃ na katheti, dhammassavanaggaṃ bhinditvā gacchati, vikkhitto vā anādaro vā nisīdati, natthetassa dhamme gāravo. Yo theranavamajjhimesu cittīkāraṃ na paccupaṭṭhāpeti, uposathāgāravitakkamāḷakādīsu kāyappāgabbhiyaṃ dasseti, yathāvuḍḍhaṃ na vandati, natthetassa saṅghe gāravo. Tisso sikkhā samādāya asikkhamānoyeva pana sikkhāya agāravoti veditabbo. Pamāde ca sativippavāse tiṭṭhamānoyeva appamādalakkhaṇaṃ abrūhayamāno appamāde agāravoti veditabbo. Tathā āmisappaṭisanthāraṃ dhammappaṭisanthāranti imaṃ duvidhaṃ paṭisanthāraṃ akarontoyeva paṭisanthāre agāravoti veditabbo. Gāravaniddese vuttavipariyāyena attho veditabbo.
272. виваад̣̇амууланид̣̇д̣̇зсз ‘‘сад̇т̇ариби аг̇аараво’’д̇иаад̣̇ийнам̣ б̣уд̣̇д̇хз аг̇аараваад̣̇ийсу вуд̇д̇анаязнзва ад̇т̇о взд̣̇ид̇аб̣б̣о. аббад̇иссод̇и анийжавуд̇д̇и; на сад̇т̇аарам̣ ж̇здтагам̣ гад̇ваа вихарад̇и. аж̇жхад̇д̇ам̣ ваад̇и ад̇д̇ано санд̇аанз ваа ад̇д̇ано багкз ваа; сагааяа барисааяаад̇и ад̇т̇о. б̣ахид̣̇д̇хаа ваад̇и барасанд̇аанз ваа барабагкз ваа. д̇ад̇ра д̇умхзд̇и д̇асмим̣ аж̇жхад̇д̇аб̣ахид̣̇д̇хаабхзд̣̇з сабарасанд̇аанз ваа сабарабарисааяа ваа. бахаанааяа вааяамзяяаат̇аад̇и мзд̇д̇аабхааванаад̣̇ийхи наязхи бахаанад̇т̇ам̣ вааяамзяяаат̇а; мзд̇д̇аабхааванаад̣̇инаязна хи д̇ам̣ аж̇жхад̇д̇амби б̣ахид̣̇д̇хааби бахийяад̇и. анавассавааяаад̇и аббавад̇д̇ибхаавааяа.
272. Vivādamūlaniddese ‘‘sattharipi agāravo’’tiādīnaṃ buddhe agāravādīsu vuttanayeneva attho veditabbo. Appatissoti anīcavutti; na satthāraṃ jeṭṭhakaṃ katvā viharati. Ajjhattaṃ vāti attano santāne vā attano pakkhe vā; sakāya parisāyāti attho. Bahiddhā vāti parasantāne vā parapakkhe vā. Tatra tumheti tasmiṃ ajjhattabahiddhābhede saparasantāne vā saparaparisāya vā. Pahānāya vāyameyyāthāti mettābhāvanādīhi nayehi pahānatthaṃ vāyameyyātha; mettābhāvanādinayena hi taṃ ajjhattampi bahiddhāpi pahīyati. Anavassavāyāti appavattibhāvāya.
санд̣̇идтибараамаасийд̇и сагамзва д̣̇идтим̣ бараамасад̇и; яам̣ ад̇д̇анаа д̣̇идтиг̇ад̇ам̣ г̇ахид̇ам̣, ид̣̇амзва сажжанд̇и г̇ан̣хаад̇и . аад̇хаанаг̇г̇аахийд̇и д̣̇ал̣хаг̇г̇аахий.
Sandiṭṭhiparāmāsīti sakameva diṭṭhiṃ parāmasati; yaṃ attanā diṭṭhigataṃ gahitaṃ, idameva saccanti gaṇhāti . Ādhānaggāhīti daḷhaggāhī.
273. ануваад̣̇амууланид̣̇д̣̇зсо гин̃жааби виваад̣̇амууланид̣̇д̣̇зсзнзва самаано, ат̇а ко адтаараса бхзд̣̇агаравад̇т̇ууни ниссааяа вивад̣̇анд̇аанам̣ год̇хуубанаахаад̣̇аяо виваад̣̇амуулаани. д̇ат̇аа вивад̣̇анд̇аа бана сийлавибад̇д̇иаад̣̇ийсу ан̃н̃ад̇аравибад̇д̇им̣ аабаж̇ж̇ид̇ваа ‘‘асуго бхигку асугам̣ наама вибад̇д̇им̣ аабанно’’д̇и ваа, ‘‘баарааж̇игам̣ аабанноси, сан̇гхаад̣̇исзсам̣ аабанносий’’д̇и ваа анувад̣̇анд̇и. звам̣ анувад̣̇анд̇аанам̣ год̇хуубанаахаад̣̇аяо ануваад̣̇амуулаанийд̇и аяамзд̇т̇а висзсо.
273. Anuvādamūlaniddeso kiñcāpi vivādamūlaniddeseneva samāno, atha kho aṭṭhārasa bhedakaravatthūni nissāya vivadantānaṃ kodhūpanāhādayo vivādamūlāni. Tathā vivadantā pana sīlavipattiādīsu aññataravipattiṃ āpajjitvā ‘‘asuko bhikkhu asukaṃ nāma vipattiṃ āpanno’’ti vā, ‘‘pārājikaṃ āpannosi, saṅghādisesaṃ āpannosī’’ti vā anuvadanti. Evaṃ anuvadantānaṃ kodhūpanāhādayo anuvādamūlānīti ayamettha viseso.
274. сааран̣ийяад̇хамманид̣̇д̣̇зсз мзд̇д̇ажид̇д̇зна гад̇ам̣ гааяагаммам̣ мзд̇д̇ам̣ гааяагаммам̣ наама. аави жзва рахо жаад̇и саммукаа жа бараммукаа жа. д̇ад̇т̇а навагаанам̣ жийварагаммаад̣̇ийсу сахааяабхааваг̇аманам̣ саммукаа мзд̇д̇ам̣ гааяагаммам̣ наама. т̇зраанам̣ бана баад̣̇ад̇хованаб̣ийж̇анаваад̇ад̣̇аанаад̣̇ибхзд̣̇амби саб̣б̣ам̣ саамийжигаммам̣ саммукаа мзд̇д̇ам̣ гааяагаммам̣ наама. убхаязхиби д̣̇уннигкид̇д̇аанам̣ д̣̇аарубхан̣д̣аад̣̇ийнам̣ д̇зсу аваман̃н̃ам̣ агад̇ваа ад̇д̇анаа д̣̇уннигкид̇д̇аанам̣ вияа бадисааманам̣ бараммукаа мзд̇д̇ам̣ гааяагаммам̣ наама. аяамби д̇хаммо сааран̣ийяод̇и аяам̣ мзд̇д̇аагааяагаммасан̇каад̇о д̇хаммо сарид̇аб̣б̣о сад̇иж̇анаго; яо нам̣ гарод̇и, д̇ам̣ буг̇г̇алам̣; язсам̣ гад̇о ход̇и, д̇з басаннажид̇д̇аа ‘‘ахо саббурисо’’д̇и ануссаранд̇ийд̇и ад̇хиббааяо. бияагаран̣од̇и д̇ам̣ буг̇г̇алам̣ саб̣рахмажаарийнам̣ бияам̣ гарод̇и. г̇аругаран̣од̇и д̇ам̣ буг̇г̇алам̣ саб̣рахмажаарийнам̣ г̇арум̣ гарод̇и. сан̇г̇ахааяаад̇иаад̣̇ийсу саб̣рахмажаарийхи сан̇г̇ахзд̇аб̣б̣абхаавааяа. д̇зхи сад̣̇д̇хим̣ авиваад̣̇ааяа самаг̇г̇абхаавааяа згийбхаавааяа жа сам̣вад̇д̇ад̇и.
274. Sāraṇīyadhammaniddese mettacittena kataṃ kāyakammaṃ mettaṃ kāyakammaṃ nāma. Āvi ceva raho cāti sammukhā ca parammukhā ca. Tattha navakānaṃ cīvarakammādīsu sahāyabhāvagamanaṃ sammukhā mettaṃ kāyakammaṃ nāma. Therānaṃ pana pādadhovanabījanavātadānādibhedampi sabbaṃ sāmīcikammaṃ sammukhā mettaṃ kāyakammaṃ nāma. Ubhayehipi dunnikkhittānaṃ dārubhaṇḍādīnaṃ tesu avamaññaṃ akatvā attanā dunnikkhittānaṃ viya paṭisāmanaṃ parammukhā mettaṃ kāyakammaṃ nāma. Ayampi dhammo sāraṇīyoti ayaṃ mettākāyakammasaṅkhāto dhammo saritabbo satijanako; yo naṃ karoti, taṃ puggalaṃ; yesaṃ kato hoti, te pasannacittā ‘‘aho sappuriso’’ti anussarantīti adhippāyo. Piyakaraṇoti taṃ puggalaṃ sabrahmacārīnaṃ piyaṃ karoti. Garukaraṇoti taṃ puggalaṃ sabrahmacārīnaṃ garuṃ karoti. Saṅgahāyātiādīsu sabrahmacārīhi saṅgahetabbabhāvāya. Tehi saddhiṃ avivādāya samaggabhāvāya ekībhāvāya ca saṃvattati.
мзд̇д̇ам̣ важийгамманд̇иаад̣̇ийсу д̣̇звад̇т̇зро д̇иссад̇т̇зрод̇и звам̣ баг̇г̇аяха важанам̣ саммукаа мзд̇д̇ам̣ важийгаммам̣ наама. вихаарз асанд̇з бана д̇ам̣ бадибужчанд̇асса ‘‘гухим̣ амхаагам̣ д̣̇звад̇т̇зро, гухим̣ амхаагам̣ д̇иссад̇т̇зро, гад̣̇аа ну ко ааг̇амиссад̇ий’’д̇и звам̣ мамааяанаважанам̣ бараммукаа мзд̇д̇ам̣ важийгаммам̣ наама. мзд̇д̇аасинзхасинид̣̇д̇хаани бана наяанаани уммийлзд̇ваа басаннзна мукзна ологанам̣ саммукаа мзд̇д̇ам̣ маногаммам̣ наама. ‘‘д̣̇звад̇т̇зро д̇иссад̇т̇зро арог̇о ход̇у, аббааб̣аад̇хо’’д̇и саманнаахаран̣ам̣ бараммукаа мзд̇д̇ам̣ маногаммам̣ наама.
Mettaṃ vacīkammantiādīsu devatthero tissattheroti evaṃ paggayha vacanaṃ sammukhā mettaṃ vacīkammaṃ nāma. Vihāre asante pana taṃ paṭipucchantassa ‘‘kuhiṃ amhākaṃ devatthero, kuhiṃ amhākaṃ tissatthero, kadā nu kho āgamissatī’’ti evaṃ mamāyanavacanaṃ parammukhā mettaṃ vacīkammaṃ nāma. Mettāsinehasiniddhāni pana nayanāni ummīletvā pasannena mukhena olokanaṃ sammukhā mettaṃ manokammaṃ nāma. ‘‘Devatthero tissatthero arogo hotu, appābādho’’ti samannāharaṇaṃ parammukhā mettaṃ manokammaṃ nāma.
аббадивибхад̇д̇абхог̇ийд̇и нзва аамисам̣ бадивибхаж̇ид̇ваа бхун̃ж̇ад̇и, на буг̇г̇алам̣. яо хи ‘‘зд̇д̇агам̣ барзсам̣ д̣̇ассаами, зд̇д̇агам̣ ад̇д̇анаа бхун̃ж̇иссаами, зд̇д̇агам̣ ваа асугасса жа асугасса жа д̣̇ассаами, зд̇д̇агам̣ ад̇д̇анаа бхун̃ж̇иссаамий’’д̇и вибхаж̇ид̇ваа бхун̃ж̇ад̇и, аяам̣ бадивибхад̇д̇абхог̇ий наама. аяам̣ бана звам̣ агад̇ваа аабхад̇ам̣ бин̣д̣абаад̇ам̣ т̇зраасанад̇о бадтааяа д̣̇ад̇ваа г̇ахид̇аавасзсам̣ бхун̃ж̇ад̇и. ‘‘сийлаванд̇зхий’’д̇и важанад̇о д̣̇уссийласса ад̣̇аад̇умби ваддад̇и, сааран̣ийяад̇хаммабуурагзна бана саб̣б̣зсам̣ д̣̇аад̇аб̣б̣амзваад̇и вуд̇д̇ам̣. г̇илаана-г̇илаанубадтаага-ааг̇анд̇уга-г̇амигажийварагаммаад̣̇ибасуд̇аанам̣ вижзяяа д̣̇аад̇умби ваддад̇и. на хи зд̇з вижинид̇ваа д̣̇знд̇зна буг̇г̇алавибхааг̇о гад̇о ход̇и, ийд̣̇исаанан̃хи гижчалаабхад̇д̇аа висзсо гаад̇аб̣б̣оязваад̇и аяам̣ гарод̇и.
Appaṭivibhattabhogīti neva āmisaṃ paṭivibhajitvā bhuñjati, na puggalaṃ. Yo hi ‘‘ettakaṃ paresaṃ dassāmi, ettakaṃ attanā bhuñjissāmi, ettakaṃ vā asukassa ca asukassa ca dassāmi, ettakaṃ attanā bhuñjissāmī’’ti vibhajitvā bhuñjati, ayaṃ paṭivibhattabhogī nāma. Ayaṃ pana evaṃ akatvā ābhataṃ piṇḍapātaṃ therāsanato paṭṭhāya datvā gahitāvasesaṃ bhuñjati. ‘‘Sīlavantehī’’ti vacanato dussīlassa adātumpi vaṭṭati, sāraṇīyadhammapūrakena pana sabbesaṃ dātabbamevāti vuttaṃ. Gilāna-gilānupaṭṭhāka-āgantuka-gamikacīvarakammādipasutānaṃ viceyya dātumpi vaṭṭati. Na hi ete vicinitvā dentena puggalavibhāgo kato hoti, īdisānañhi kicchalābhattā viseso kātabboyevāti ayaṃ karoti.
акан̣д̣аанийд̇иаад̣̇ийсу яасса сад̇д̇асу аабад̇д̇игканд̇хзсу аад̣̇имхи ваа анд̇з ваа сигкаабад̣̇ам̣ бхиннам̣ ход̇и, д̇асса сийлам̣ барияанд̇з чиннасаадаго вияа кан̣д̣ам̣ наама. яасса бана взмаж̇жхз бхиннам̣, д̇асса маж̇жхз чид̣̇д̣̇асаадаго вияа чид̣̇д̣̇ам̣ наама ход̇и. яасса бадибаадияаа д̣̇вз д̇ийн̣и бхиннаани, д̇асса бидтияам̣ ваа гужчияам̣ ваа удтид̇зна висабхааг̇аван̣н̣зна гаал̣арад̇д̇аад̣̇ийнам̣ ан̃н̃ад̇арасарийраван̣н̣аа г̇аавий вияа саб̣алам̣ наама ход̇и. яасса анд̇аранд̇араа бхиннаани, д̇асса анд̇аранд̇араа висабхааг̇аван̣н̣аб̣инд̣̇увижид̇раа г̇аавий вияа гаммаасам̣ наама ход̇и. яасса бана саб̣б̣зна саб̣б̣ам̣ абхиннаани сийлаани, д̇асса д̇аани сийлаани акан̣д̣аани ажчид̣̇д̣̇аани асаб̣алаани агаммаасаани наама хонд̇и. д̇аани банзд̇аани бхуж̇иссабхаавагаран̣ад̇о бхуж̇иссаани. вин̃н̃уухи басад̇т̇ад̇д̇аа вин̃н̃уббасад̇т̇аани. д̇ан̣хаад̣̇идтийхи абараамадтад̇д̇аа абараамадтаани. убажаарасамаад̇хим̣ аббанаасамаад̇хим̣ ваа сам̣вад̇д̇аяанд̇ийд̇и самаад̇хисам̣вад̇д̇анигаанийд̇и вужжанд̇и. сийласааман̃н̃аг̇ад̇о вихарад̇ийд̇и д̇зсу д̇зсу д̣̇исаабхааг̇зсу вихаранд̇зхи галяаан̣асийлзхи бхигкуухи сад̣̇д̇хим̣ самаанабхаавуубаг̇ад̇асийло вихарад̇и.
Akhaṇḍānītiādīsu yassa sattasu āpattikkhandhesu ādimhi vā ante vā sikkhāpadaṃ bhinnaṃ hoti, tassa sīlaṃ pariyante chinnasāṭako viya khaṇḍaṃ nāma. Yassa pana vemajjhe bhinnaṃ, tassa majjhe chiddasāṭako viya chiddaṃ nāma hoti. Yassa paṭipāṭiyā dve tīṇi bhinnāni, tassa piṭṭhiyaṃ vā kucchiyaṃ vā uṭṭhitena visabhāgavaṇṇena kāḷarattādīnaṃ aññatarasarīravaṇṇā gāvī viya sabalaṃ nāma hoti. Yassa antarantarā bhinnāni, tassa antarantarā visabhāgavaṇṇabinduvicitrā gāvī viya kammāsaṃ nāma hoti. Yassa pana sabbena sabbaṃ abhinnāni sīlāni, tassa tāni sīlāni akhaṇḍāni acchiddāni asabalāni akammāsāni nāma honti. Tāni panetāni bhujissabhāvakaraṇato bhujissāni. Viññūhi pasatthattā viññuppasatthāni. Taṇhādiṭṭhīhi aparāmaṭṭhattā aparāmaṭṭhāni. Upacārasamādhiṃ appanāsamādhiṃ vā saṃvattayantīti samādhisaṃvattanikānīti vuccanti. Sīlasāmaññagato viharatīti tesu tesu disābhāgesu viharantehi kalyāṇasīlehi bhikkhūhi saddhiṃ samānabhāvūpagatasīlo viharati.
яааяам̣ д̣̇идтийд̇и маг̇г̇асамбаяуд̇д̇аа саммаад̣̇идти. арияаад̇и нид̣̇д̣̇осаа. нияяаад̇ийд̇и нияяаанигаа. д̇аггарассаад̇и яо д̇ат̇аагаарий ход̇и, д̇асса. д̣̇угкагкаяааяаад̇и саб̣б̣ад̣̇угкасса каяад̇т̇ам̣. сзсам̣ яаава самат̇абхзд̣̇абарияосаанаа уд̇д̇аанад̇т̇амзва.
Yāyaṃ diṭṭhīti maggasampayuttā sammādiṭṭhi. Ariyāti niddosā. Niyyātīti niyyānikā. Takkarassāti yo tathākārī hoti, tassa. Dukkhakkhayāyāti sabbadukkhassa khayatthaṃ. Sesaṃ yāva samathabhedapariyosānā uttānatthameva.
гад̇ибужчааваараван̣н̣анаа нидтид̇аа.
Katipucchāvāravaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / бариваарабаал̣и • Parivārapāḷi / гад̇ибужчаавааро • Katipucchāvāro
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / гад̇ибужчааваараван̣н̣анаа • Katipucchāvāravaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / гад̇ибужчааваараван̣н̣анаа • Katipucchāvāravaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / гад̇ибужчааваараван̣н̣анаа • Katipucchāvāravaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / анд̇арабзяяаала гад̇ибужчааваараван̣н̣анаа • Antarapeyyāla katipucchāvāravaṇṇanā
