| Library / Tipiṭaka / ติปิฎก • Tipiṭaka / วชิรพุทฺธิ-ฎีกา • Vajirabuddhi-ṭīkā |
อนฺตรเปยฺยาลํ
Antarapeyyālaṃ
กติปุจฺฉาวารวณฺณนา
Katipucchāvāravaṇṇanā
๒๗๑. ปฎินิเทฺทสนฺติ ปุนปฺปุนํ นิทฺทิสนํฯ อาปตฺติกฺขเนฺธหิ วินีตานิ สํวรานีติ อโตฺถฯ เอเตหิ อาปตฺติกฺขเนฺธหิฯ ‘‘อารกา’’ติ นิวตฺติอเตฺถน วุตฺตตฺตา ตํ ปุน สรูเปน วตฺตุกาโม ‘‘ภุสา วา’’ติ อาหฯ ‘‘เคหํ ธูเมน ปุณฺณํ อาธูมิต’’นฺติอาทีสุ วิย ราคาทิเวรํ มณติ วินาเสติฯ เอตายาติ วิรติยาฯ เวล จลเนฯ นิยฺยานํ มคฺคํ สิโนติ พนฺธตีติ เสตุฯ ‘‘เสตุฆาโตติ วีติกฺกมปฎิปกฺขภูตา วิรติ, ตทตฺถนิพฺพตฺติกรจิตฺตุปฺปาโท วา’’ติ วุตฺตํฯ ‘‘ธมฺมสฺสวนคฺคนฺติ ธมฺมํ สุณนฺตานํ สมูห’’นฺติ ลิขิตํฯ สเจ น คจฺฉติ, วิกฺขิโตฺต วา นิสีทติฯ กายปฺปาคพฺภิยํ กายทุจฺจริตํฯ ‘‘ปมาเท’’ติ วตฺวา ตทตฺถํ ทเสฺสตุํ ‘‘สติวิปฺปวาเส’’ติ วุตฺตํฯ
271.Paṭiniddesanti punappunaṃ niddisanaṃ. Āpattikkhandhehi vinītāni saṃvarānīti attho. Etehi āpattikkhandhehi. ‘‘Ārakā’’ti nivattiatthena vuttattā taṃ puna sarūpena vattukāmo ‘‘bhusā vā’’ti āha. ‘‘Gehaṃ dhūmena puṇṇaṃ ādhūmita’’ntiādīsu viya rāgādiveraṃ maṇati vināseti. Etāyāti viratiyā. Vela calane. Niyyānaṃ maggaṃ sinoti bandhatīti setu. ‘‘Setughātoti vītikkamapaṭipakkhabhūtā virati, tadatthanibbattikaracittuppādo vā’’ti vuttaṃ. ‘‘Dhammassavanagganti dhammaṃ suṇantānaṃ samūha’’nti likhitaṃ. Sace na gacchati, vikkhitto vā nisīdati. Kāyappāgabbhiyaṃ kāyaduccaritaṃ. ‘‘Pamāde’’ti vatvā tadatthaṃ dassetuṃ ‘‘sativippavāse’’ti vuttaṃ.
๒๗๒-๓. สปรสนฺตาเน วาติ สสนฺตาเน วา ปรสนฺตาเน วาฯ ตถา วิวทนฺตา ปนาติ เภทกรวตฺถูนิ นิสฺสาย วิวทนฺตาฯ อุภเยหิปีติ เถรนเวหิฯ นนฺติ เมตฺตํ กายกมฺมํฯ เยสํ ปุคฺคลานํ ปิยํ กโรติ, เตสํ เมตฺตากายกมฺมสงฺขาโต ธโมฺมฯ เอตฺตกนฺติ อามิสวิภตฺติทสฺสนํฯ อสุกสฺส จาติ ปุคฺคลวิภตฺติทสฺสนํฯ ‘‘ทุสฺสีลสฺส อทาตุมฺปิ วฎฺฎตี’’ติ วุตฺตตฺตา เอว อลชฺชิปริโภโค วาริโตฯ สเพฺพสํ ทาตพฺพเมวาติ สนฺนิฎฺฐาเนน อชานเนฺตน วิภาคํ อกตฺวา ทาตพฺพภาวํ ทีเปตีติ เอเกฯ ‘‘สเพฺพสํ ทาตพฺพเมวา’’ติ วุตฺตํ อฎฺฐกถาสุฯ ตตฺถ ‘‘อลชฺชิอุกฺขิตฺตกานํ ปริโภคสีเสน สหตฺถา น ทาตพฺพํ, ทาเปตพฺพนฺติ อปเร’’ติ วุตฺตํฯ วิจินิตฺวา ทานํ วิเจยฺย ทานํฯ ยสฺมา อยํ วิเสโส กาตโพฺพเยวาติ อยํ กโรติ, ตสฺมา ปุคฺคลวิภาโค น กโตติ สมฺพโนฺธฯ ปกติวเณฺณน วิสภาควเณฺณนฯ ‘‘อิทํ นาม อาปโนฺน’’ติ ปเรหิ อปรามสิตพฺพโต อปรามฎฺฐานิฯ อนุโลเมหิ คหิตสงฺขารารมฺมเณหิ นิพฺพานารมฺมณํ กตฺวา นิยฺยาติฯ
272-3.Saparasantāne vāti sasantāne vā parasantāne vā. Tathā vivadantā panāti bhedakaravatthūni nissāya vivadantā. Ubhayehipīti theranavehi. Nanti mettaṃ kāyakammaṃ. Yesaṃ puggalānaṃ piyaṃ karoti, tesaṃ mettākāyakammasaṅkhāto dhammo. Ettakanti āmisavibhattidassanaṃ. Asukassa cāti puggalavibhattidassanaṃ. ‘‘Dussīlassa adātumpi vaṭṭatī’’ti vuttattā eva alajjiparibhogo vārito. Sabbesaṃ dātabbamevāti sanniṭṭhānena ajānantena vibhāgaṃ akatvā dātabbabhāvaṃ dīpetīti eke. ‘‘Sabbesaṃ dātabbamevā’’ti vuttaṃ aṭṭhakathāsu. Tattha ‘‘alajjiukkhittakānaṃ paribhogasīsena sahatthā na dātabbaṃ, dāpetabbanti apare’’ti vuttaṃ. Vicinitvā dānaṃ viceyya dānaṃ. Yasmā ayaṃ viseso kātabboyevāti ayaṃ karoti, tasmā puggalavibhāgo na katoti sambandho. Pakativaṇṇena visabhāgavaṇṇena. ‘‘Idaṃ nāma āpanno’’ti parehi aparāmasitabbato aparāmaṭṭhāni. Anulomehi gahitasaṅkhārārammaṇehi nibbānārammaṇaṃ katvā niyyāti.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / ปริวารปาฬิ • Parivārapāḷi / กติปุจฺฉาวาโร • Katipucchāvāro
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / ปริวาร-อฎฺฐกถา • Parivāra-aṭṭhakathā / กติปุจฺฉาวารวณฺณนา • Katipucchāvāravaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / กติปุจฺฉาวารวณฺณนา • Katipucchāvāravaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / กติปุจฺฉาวารวณฺณนา • Katipucchāvāravaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / อนฺตรเปยฺยาล กติปุจฺฉาวารวณฺณนา • Antarapeyyāla katipucchāvāravaṇṇanā
