| Library / Tipiṭaka / តិបិដក • Tipiṭaka / វិមតិវិនោទនី-ដីកា • Vimativinodanī-ṭīkā |
អន្តរបេយ្យាលំ
Antarapeyyālaṃ
កតិបុច្ឆាវារវណ្ណនា
Katipucchāvāravaṇṇanā
២៧១. កតិ អាបត្តិយោតិ បារាជិកាទីសុ បញ្ចសុ អាបត្តីសុ មេថុនាទិន្នាទានាទិអន្តោគធភេទំ អបេក្ខិត្វា ជាតិវសេន ឯកត្តំ អារោបេត្វា បុច្ឆា កតា។ កតិ អាបត្តិក្ខន្ធាតិ អន្តោគធភេទំ អបេក្ខិត្វា បច្ចេកំ រាសដ្ឋេនាតិ ឯត្តកមេវេត្ថ ភេទោ។ វិនីតានិយេវ វិនីតវត្ថូនីតិ អាបត្តិតោ វិរមណានិ ឯវ អវិប្បដិសារបាមោជ្ជាទិធម្មានំ ការណត្តា វត្ថូនីតិ វិនីតវត្ថូនិ, តានិ ឯត្ថ អត្ថតោ វិរតិអាទិអនវជ្ជធម្មា ឯវ។ វេរំ មណតីតិ វេរហេតុត្តា ‘‘វេរ’’ន្តិ លទ្ធនាមំ រាគាទិអកុសលបក្ខំ វិនាសេតិ។
271.Katiāpattiyoti pārājikādīsu pañcasu āpattīsu methunādinnādānādiantogadhabhedaṃ apekkhitvā jātivasena ekattaṃ āropetvā pucchā katā. Kati āpattikkhandhāti antogadhabhedaṃ apekkhitvā paccekaṃ rāsaṭṭhenāti ettakamevettha bhedo. Vinītāniyevavinītavatthūnīti āpattito viramaṇāni eva avippaṭisārapāmojjādidhammānaṃ kāraṇattā vatthūnīti vinītavatthūni, tāni ettha atthato viratiādianavajjadhammā eva. Veraṃ maṇatīti verahetuttā ‘‘vera’’nti laddhanāmaṃ rāgādiakusalapakkhaṃ vināseti.
ធម្មស្សវនគ្គំ ភិន្ទិត្វា គច្ឆតីតិ ពហូសុ ឯកតោ និសីទិត្វា ធម្មំ សុណន្តេសុ តំ ធម្មស្សវនសមាគមំ កោបេត្វា ឧដ្ឋាយ គច្ឆតិ។ អនាទរោវាតិ តុស្សិតព្ពដ្ឋានេ តុដ្ឋិំ, សំវិជិតព្ពដ្ឋានេ សំវេគញ្ច អបវេទេន្តោ ឯវ។ កាយបាគព្ភិយន្តិ ឧន្នតិវសេន បវត្តនកាយានាចារំ។
Dhammassavanaggaṃ bhinditvā gacchatīti bahūsu ekato nisīditvā dhammaṃ suṇantesu taṃ dhammassavanasamāgamaṃ kopetvā uṭṭhāya gacchati. Anādarovāti tussitabbaṭṭhāne tuṭṭhiṃ, saṃvijitabbaṭṭhāne saṃvegañca apavedento eva. Kāyapāgabbhiyanti unnativasena pavattanakāyānācāraṃ.
២៧៤. មេត្តាយ សម្ភូតំ មេត្តំ, កាយកម្មំ។ ឧភយេហិបីតិ នវកេហិ, ថេរេហិ ច។ បិយំ ករោតីតិ តំ បុគ្គលំ បេមដ្ឋានំ ករោតិ, កេសន្តិ អាហ ‘‘សព្រហ្មចារីន’’ន្តិ។
274. Mettāya sambhūtaṃ mettaṃ, kāyakammaṃ. Ubhayehipīti navakehi, therehi ca. Piyaṃ karotīti taṃ puggalaṃ pemaṭṭhānaṃ karoti, kesanti āha ‘‘sabrahmacārīna’’nti.
បុគ្គលំ បដិវិភជិត្វា ភុញ្ជតីតិ បកតេន សម្ពន្ធោ។ តមេវ បុគ្គលបដិវិភាគំ ទស្សេតុំ ‘‘អសុកស្សា’’តិអាទិ វុត្តំ។
Puggalaṃ paṭivibhajitvā bhuñjatīti pakatena sambandho. Tameva puggalapaṭivibhāgaṃ dassetuṃ ‘‘asukassā’’tiādi vuttaṃ.
ភុជិស្សភាវករណតោតិ តណ្ហាទាសព្យតោ មោចេត្វា សមថវិបស្សនាសុ សេរិវិហារិតាករណតោតិ អត្ថោ។ និយ្យាតីតិ បវត្តតិ។ សម្មាទុក្ខក្ខយាយ សំវត្តតីតិ អត្ថោ។
Bhujissabhāvakaraṇatoti taṇhādāsabyato mocetvā samathavipassanāsu serivihāritākaraṇatoti attho. Niyyātīti pavattati. Sammādukkhakkhayāya saṃvattatīti attho.
កតិបុច្ឆាវារវណ្ណនា និដ្ឋិតា។
Katipucchāvāravaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / បរិវារបាឡិ • Parivārapāḷi / កតិបុច្ឆាវារោ • Katipucchāvāro
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / បរិវារ-អដ្ឋកថា • Parivāra-aṭṭhakathā / កតិបុច្ឆាវារវណ្ណនា • Katipucchāvāravaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / កតិបុច្ឆាវារវណ្ណនា • Katipucchāvāravaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / កតិបុច្ឆាវារវណ្ណនា • Katipucchāvāravaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / អន្តរបេយ្យាល កតិបុច្ឆាវារវណ្ណនា • Antarapeyyāla katipucchāvāravaṇṇanā
