| Library / Tipiṭaka / တိပိဋက • Tipiṭaka / ဝိမတိဝိနောဒနီ-ဋီကာ • Vimativinodanī-ṭīkā |
အန္တရပေယ္ယာလံ
Antarapeyyālaṃ
ကတိပုစ္ဆာဝာရဝဏ္ဏနာ
Katipucchāvāravaṇṇanā
၂၇၁. ကတိ အာပတ္တိယောတိ ပာရာဇိကာဒီသု ပဉ္စသု အာပတ္တီသု မေထုနာဒိန္နာဒာနာဒိအန္တောဂဓဘေဒံ အပေက္ခိတ္ဝာ ဇာတိဝသေန ဧကတ္တံ အာရောပေတ္ဝာ ပုစ္ဆာ ကတာ။ ကတိ အာပတ္တိက္ခန္ဓာတိ အန္တောဂဓဘေဒံ အပေက္ခိတ္ဝာ ပစ္စေကံ ရာသဋ္ဌေနာတိ ဧတ္တကမေဝေတ္ထ ဘေဒော။ ဝိနီတာနိယေဝ ဝိနီတဝတ္ထူနီတိ အာပတ္တိတော ဝိရမဏာနိ ဧဝ အဝိပ္ပဋိသာရပာမောဇ္ဇာဒိဓမ္မာနံ ကာရဏတ္တာ ဝတ္ထူနီတိ ဝိနီတဝတ္ထူနိ, တာနိ ဧတ္ထ အတ္ထတော ဝိရတိအာဒိအနဝဇ္ဇဓမ္မာ ဧဝ။ ဝေရံ မဏတီတိ ဝေရဟေတုတ္တာ ‘‘ဝေရ’’န္တိ လဒ္ဓနာမံ ရာဂာဒိအကုသလပက္ခံ ဝိနာသေတိ။
271.Katiāpattiyoti pārājikādīsu pañcasu āpattīsu methunādinnādānādiantogadhabhedaṃ apekkhitvā jātivasena ekattaṃ āropetvā pucchā katā. Kati āpattikkhandhāti antogadhabhedaṃ apekkhitvā paccekaṃ rāsaṭṭhenāti ettakamevettha bhedo. Vinītāniyevavinītavatthūnīti āpattito viramaṇāni eva avippaṭisārapāmojjādidhammānaṃ kāraṇattā vatthūnīti vinītavatthūni, tāni ettha atthato viratiādianavajjadhammā eva. Veraṃ maṇatīti verahetuttā ‘‘vera’’nti laddhanāmaṃ rāgādiakusalapakkhaṃ vināseti.
ဓမ္မသ္သဝနဂ္ဂံ ဘိန္ဒိတ္ဝာ ဂစ္ဆတီတိ ဗဟူသု ဧကတော နိသီဒိတ္ဝာ ဓမ္မံ သုဏန္တေသု တံ ဓမ္မသ္သဝနသမာဂမံ ကောပေတ္ဝာ ဥဋ္ဌာယ ဂစ္ဆတိ။ အနာဒရောဝာတိ တုသ္သိတဗ္ဗဋ္ဌာနေ တုဋ္ဌိံ, သံဝိဇိတဗ္ဗဋ္ဌာနေ သံဝေဂဉ္စ အပဝေဒေန္တော ဧဝ။ ကာယပာဂဗ္ဘိယန္တိ ဥန္နတိဝသေန ပဝတ္တနကာယာနာစာရံ။
Dhammassavanaggaṃ bhinditvā gacchatīti bahūsu ekato nisīditvā dhammaṃ suṇantesu taṃ dhammassavanasamāgamaṃ kopetvā uṭṭhāya gacchati. Anādarovāti tussitabbaṭṭhāne tuṭṭhiṃ, saṃvijitabbaṭṭhāne saṃvegañca apavedento eva. Kāyapāgabbhiyanti unnativasena pavattanakāyānācāraṃ.
၂၇၄. မေတ္တာယ သမ္ဘူတံ မေတ္တံ, ကာယကမ္မံ။ ဥဘယေဟိပီတိ နဝကေဟိ, ထေရေဟိ စ။ ပိယံ ကရောတီတိ တံ ပုဂ္ဂလံ ပေမဋ္ဌာနံ ကရောတိ, ကေသန္တိ အာဟ ‘‘သဗ္ရဟ္မစာရီန’’န္တိ။
274. Mettāya sambhūtaṃ mettaṃ, kāyakammaṃ. Ubhayehipīti navakehi, therehi ca. Piyaṃ karotīti taṃ puggalaṃ pemaṭṭhānaṃ karoti, kesanti āha ‘‘sabrahmacārīna’’nti.
ပုဂ္ဂလံ ပဋိဝိဘဇိတ္ဝာ ဘုဉ္ဇတီတိ ပကတေန သမ္ဗန္ဓော။ တမေဝ ပုဂ္ဂလပဋိဝိဘာဂံ ဒသ္သေတုံ ‘‘အသုကသ္သာ’’တိအာဒိ ဝုတ္တံ။
Puggalaṃ paṭivibhajitvā bhuñjatīti pakatena sambandho. Tameva puggalapaṭivibhāgaṃ dassetuṃ ‘‘asukassā’’tiādi vuttaṃ.
ဘုဇိသ္သဘာဝကရဏတောတိ တဏ္ဟာဒာသဗ္ယတော မောစေတ္ဝာ သမထဝိပသ္သနာသု သေရိဝိဟာရိတာကရဏတောတိ အတ္ထော။ နိယ္ယာတီတိ ပဝတ္တတိ။ သမ္မာဒုက္ခက္ခယာယ သံဝတ္တတီတိ အတ္ထော။
Bhujissabhāvakaraṇatoti taṇhādāsabyato mocetvā samathavipassanāsu serivihāritākaraṇatoti attho. Niyyātīti pavattati. Sammādukkhakkhayāya saṃvattatīti attho.
ကတိပုစ္ဆာဝာရဝဏ္ဏနာ နိဋ္ဌိတာ။
Katipucchāvāravaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / ပရိဝာရပာဠိ • Parivārapāḷi / ကတိပုစ္ဆာဝာရော • Katipucchāvāro
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ပရိဝာရ-အဋ္ဌကထာ • Parivāra-aṭṭhakathā / ကတိပုစ္ဆာဝာရဝဏ္ဏနာ • Katipucchāvāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ကတိပုစ္ဆာဝာရဝဏ္ဏနာ • Katipucchāvāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ကတိပုစ္ဆာဝာရဝဏ္ဏနာ • Katipucchāvāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / အန္တရပေယ္ယာလ ကတိပုစ္ဆာဝာရဝဏ္ဏနာ • Antarapeyyāla katipucchāvāravaṇṇanā
