| Library / Tipiṭaka / තිපිටක • Tipiṭaka / විමතිවිනොදනී-ටීකා • Vimativinodanī-ṭīkā |
අන්‌තරපෙය්‍යාලං
Antarapeyyālaṃ
කතිපුච්‌ඡාවාරවණ්‌ණනා
Katipucchāvāravaṇṇanā
271. කති ආපත්‌තියොති පාරාජිකාදීසු පඤ්‌චසු ආපත්‌තීසු මෙථුනාදින්‌නාදානාදිඅන්‌තොගධභෙදං අපෙක්‌ඛිත්‌වා ජාතිවසෙන එකත්‌තං ආරොපෙත්‌වා පුච්‌ඡා කතා. කති ආපත්‌තික්‌ඛන්‌ධාති අන්‌තොගධභෙදං අපෙක්‌ඛිත්‌වා පච්‌චෙකං රාසට්‌ඨෙනාති එත්‌තකමෙවෙත්‌ථ භෙදො. විනීතානියෙව විනීතවත්‌ථූනීති ආපත්‌තිතො විරමණානි එව අවිප්‌පටිසාරපාමොජ්‌ජාදිධම්‌මානං කාරණත්‌තා වත්‌ථූනීති විනීතවත්‌ථූනි, තානි එත්‌ථ අත්‌ථතො විරතිආදිඅනවජ්‌ජධම්‌මා එව. වෙරං මණතීති වෙරහෙතුත්‌තා ‘‘වෙර’’න්‌ති ලද්‌ධනාමං රාගාදිඅකුසලපක්‌ඛං විනාසෙති.
271.Katiāpattiyoti pārājikādīsu pañcasu āpattīsu methunādinnādānādiantogadhabhedaṃ apekkhitvā jātivasena ekattaṃ āropetvā pucchā katā. Kati āpattikkhandhāti antogadhabhedaṃ apekkhitvā paccekaṃ rāsaṭṭhenāti ettakamevettha bhedo. Vinītāniyevavinītavatthūnīti āpattito viramaṇāni eva avippaṭisārapāmojjādidhammānaṃ kāraṇattā vatthūnīti vinītavatthūni, tāni ettha atthato viratiādianavajjadhammā eva. Veraṃ maṇatīti verahetuttā ‘‘vera’’nti laddhanāmaṃ rāgādiakusalapakkhaṃ vināseti.
ධම්‌මස්‌සවනග්‌ගං භින්‌දිත්‌වා ගච්‌ඡතීති බහූසු එකතො නිසීදිත්‌වා ධම්‌මං සුණන්‌තෙසු තං ධම්‌මස්‌සවනසමාගමං කොපෙත්‌වා උට්‌ඨාය ගච්‌ඡති. අනාදරොවාති තුස්‌සිතබ්‌බට්‌ඨානෙ තුට්‌ඨිං, සංවිජිතබ්‌බට්‌ඨානෙ සංවෙගඤ්‌ච අපවෙදෙන්‌තො එව. කායපාගබ්‌භියන්‌ති උන්‌නතිවසෙන පවත්‌තනකායානාචාරං.
Dhammassavanaggaṃ bhinditvā gacchatīti bahūsu ekato nisīditvā dhammaṃ suṇantesu taṃ dhammassavanasamāgamaṃ kopetvā uṭṭhāya gacchati. Anādarovāti tussitabbaṭṭhāne tuṭṭhiṃ, saṃvijitabbaṭṭhāne saṃvegañca apavedento eva. Kāyapāgabbhiyanti unnativasena pavattanakāyānācāraṃ.
274. මෙත්‌තාය සම්‌භූතං මෙත්‌තං, කායකම්‌මං. උභයෙහිපීති නවකෙහි, ථෙරෙහි ච. පියං කරොතීති තං පුග්‌ගලං පෙමට්‌ඨානං කරොති, කෙසන්‌ති ආහ ‘‘සබ්‍රහ්‌මචාරීන’’න්‌ති.
274. Mettāya sambhūtaṃ mettaṃ, kāyakammaṃ. Ubhayehipīti navakehi, therehi ca. Piyaṃ karotīti taṃ puggalaṃ pemaṭṭhānaṃ karoti, kesanti āha ‘‘sabrahmacārīna’’nti.
පුග්‌ගලං පටිවිභජිත්‌වා භුඤ්‌ජතීති පකතෙන සම්‌බන්‌ධො. තමෙව පුග්‌ගලපටිවිභාගං දස්‌සෙතුං ‘‘අසුකස්‌සා’’තිආදි වුත්‌තං.
Puggalaṃ paṭivibhajitvā bhuñjatīti pakatena sambandho. Tameva puggalapaṭivibhāgaṃ dassetuṃ ‘‘asukassā’’tiādi vuttaṃ.
භුජිස්‌සභාවකරණතොති තණ්‌හාදාසබ්‍යතො මොචෙත්‌වා සමථවිපස්‌සනාසු සෙරිවිහාරිතාකරණතොති අත්‌ථො. නිය්‍යාතීති පවත්‌තති. සම්‌මාදුක්‌ඛක්‌ඛයාය සංවත්‌තතීති අත්‌ථො.
Bhujissabhāvakaraṇatoti taṇhādāsabyato mocetvā samathavipassanāsu serivihāritākaraṇatoti attho. Niyyātīti pavattati. Sammādukkhakkhayāya saṃvattatīti attho.
කතිපුච්‌ඡාවාරවණ්‌ණනා නිට්‌ඨිතා.
Katipucchāvāravaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / කතිපුච්‌ඡාවාරො • Katipucchāvāro
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / කතිපුච්‌ඡාවාරවණ්‌ණනා • Katipucchāvāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / කතිපුච්‌ඡාවාරවණ්‌ණනා • Katipucchāvāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / කතිපුච්‌ඡාවාරවණ්‌ණනා • Katipucchāvāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / අන්‌තරපෙය්‍යාල කතිපුච්‌ඡාවාරවණ්‌ණනා • Antarapeyyāla katipucchāvāravaṇṇanā
