| Library / Tipiṭaka / ཏིཔིཊཀ • Tipiṭaka / ཝཛིརབུདྡྷི-ཊཱིཀཱ • Vajirabuddhi-ṭīkā |
ཨནྟརཔེཡྻཱལཾ
Antarapeyyālaṃ
ཀཏིཔུཙྪཱཝཱརཝཎྞནཱ
Katipucchāvāravaṇṇanā
༢༧༡. པཊིནིདྡེསནྟི པུནཔྤུནཾ ནིདྡིསནཾ། ཨཱཔཏྟིཀྑནྡྷེཧི ཝིནཱིཏཱནི སཾཝརཱནཱིཏི ཨཏྠོ། ཨེཏེཧི ཨཱཔཏྟིཀྑནྡྷེཧི། ‘‘ཨཱརཀཱ’’ཏི ནིཝཏྟིཨཏྠེན ཝུཏྟཏྟཱ ཏཾ པུན སརཱུཔེན ཝཏྟུཀཱམོ ‘‘བྷུསཱ ཝཱ’’ཏི ཨཱཧ། ‘‘གེཧཾ དྷཱུམེན པུཎྞཾ ཨཱདྷཱུམིཏ’’ནྟིཨཱདཱིསུ ཝིཡ རཱགཱདིཝེརཾ མཎཏི ཝིནཱསེཏི། ཨེཏཱཡཱཏི ཝིརཏིཡཱ། ཝེལ ཙལནེ། ནིཡྻཱནཾ མགྒཾ སིནོཏི བནྡྷཏཱིཏི སེཏུ། ‘‘སེཏུགྷཱཏོཏི ཝཱིཏིཀྐམཔཊིཔཀྑབྷཱུཏཱ ཝིརཏི, ཏདཏྠནིབྦཏྟིཀརཙིཏྟུཔྤཱདོ ཝཱ’’ཏི ཝུཏྟཾ། ‘‘དྷམྨསྶཝནགྒནྟི དྷམྨཾ སུཎནྟཱནཾ སམཱུཧ’’ནྟི ལིཁིཏཾ། སཙེ ན གཙྪཏི, ཝིཀྑིཏྟོ ཝཱ ནིསཱིདཏི། ཀཱཡཔྤཱགབྦྷིཡཾ ཀཱཡདུཙྩརིཏཾ། ‘‘པམཱདེ’’ཏི ཝཏྭཱ ཏདཏྠཾ དསྶེཏུཾ ‘‘སཏིཝིཔྤཝཱསེ’’ཏི ཝུཏྟཾ།
271.Paṭiniddesanti punappunaṃ niddisanaṃ. Āpattikkhandhehi vinītāni saṃvarānīti attho. Etehi āpattikkhandhehi. ‘‘Ārakā’’ti nivattiatthena vuttattā taṃ puna sarūpena vattukāmo ‘‘bhusā vā’’ti āha. ‘‘Gehaṃ dhūmena puṇṇaṃ ādhūmita’’ntiādīsu viya rāgādiveraṃ maṇati vināseti. Etāyāti viratiyā. Vela calane. Niyyānaṃ maggaṃ sinoti bandhatīti setu. ‘‘Setughātoti vītikkamapaṭipakkhabhūtā virati, tadatthanibbattikaracittuppādo vā’’ti vuttaṃ. ‘‘Dhammassavanagganti dhammaṃ suṇantānaṃ samūha’’nti likhitaṃ. Sace na gacchati, vikkhitto vā nisīdati. Kāyappāgabbhiyaṃ kāyaduccaritaṃ. ‘‘Pamāde’’ti vatvā tadatthaṃ dassetuṃ ‘‘sativippavāse’’ti vuttaṃ.
༢༧༢-༣. སཔརསནྟཱནེ ཝཱཏི སསནྟཱནེ ཝཱ པརསནྟཱནེ ཝཱ། ཏཐཱ ཝིཝདནྟཱ པནཱཏི བྷེདཀརཝཏྠཱུནི ནིསྶཱཡ ཝིཝདནྟཱ། ཨུབྷཡེཧིཔཱིཏི ཐེརནཝེཧི། ནནྟི མེཏྟཾ ཀཱཡཀམྨཾ། ཡེསཾ པུགྒལཱནཾ པིཡཾ ཀརོཏི, ཏེསཾ མེཏྟཱཀཱཡཀམྨསངྑཱཏོ དྷམྨོ། ཨེཏྟཀནྟི ཨཱམིསཝིབྷཏྟིདསྶནཾ། ཨསུཀསྶ ཙཱཏི པུགྒལཝིབྷཏྟིདསྶནཾ། ‘‘དུསྶཱིལསྶ ཨདཱཏུམྤི ཝཊྚཏཱི’’ཏི ཝུཏྟཏྟཱ ཨེཝ ཨལཛྫིཔརིབྷོགོ ཝཱརིཏོ། སབྦེསཾ དཱཏབྦམེཝཱཏི སནྣིཊྛཱནེན ཨཛཱནནྟེན ཝིབྷཱགཾ ཨཀཏྭཱ དཱཏབྦབྷཱཝཾ དཱིཔེཏཱིཏི ཨེཀེ། ‘‘སབྦེསཾ དཱཏབྦམེཝཱ’’ཏི ཝུཏྟཾ ཨཊྛཀཐཱསུ། ཏཏྠ ‘‘ཨལཛྫིཨུཀྑིཏྟཀཱནཾ པརིབྷོགསཱིསེན སཧཏྠཱ ན དཱཏབྦཾ, དཱཔེཏབྦནྟི ཨཔརེ’’ཏི ཝུཏྟཾ། ཝིཙིནིཏྭཱ དཱནཾ ཝིཙེཡྻ དཱནཾ། ཡསྨཱ ཨཡཾ ཝིསེསོ ཀཱཏབྦོཡེཝཱཏི ཨཡཾ ཀརོཏི, ཏསྨཱ པུགྒལཝིབྷཱགོ ན ཀཏོཏི སམྦནྡྷོ། པཀཏིཝཎྞེན ཝིསབྷཱགཝཎྞེན། ‘‘ཨིདཾ ནཱམ ཨཱཔནྣོ’’ཏི པརེཧི ཨཔརཱམསིཏབྦཏོ ཨཔརཱམཊྛཱནི། ཨནུལོམེཧི གཧིཏསངྑཱརཱརམྨཎེཧི ནིབྦཱནཱརམྨཎཾ ཀཏྭཱ ནིཡྻཱཏི།
272-3.Saparasantāne vāti sasantāne vā parasantāne vā. Tathā vivadantā panāti bhedakaravatthūni nissāya vivadantā. Ubhayehipīti theranavehi. Nanti mettaṃ kāyakammaṃ. Yesaṃ puggalānaṃ piyaṃ karoti, tesaṃ mettākāyakammasaṅkhāto dhammo. Ettakanti āmisavibhattidassanaṃ. Asukassa cāti puggalavibhattidassanaṃ. ‘‘Dussīlassa adātumpi vaṭṭatī’’ti vuttattā eva alajjiparibhogo vārito. Sabbesaṃ dātabbamevāti sanniṭṭhānena ajānantena vibhāgaṃ akatvā dātabbabhāvaṃ dīpetīti eke. ‘‘Sabbesaṃ dātabbamevā’’ti vuttaṃ aṭṭhakathāsu. Tattha ‘‘alajjiukkhittakānaṃ paribhogasīsena sahatthā na dātabbaṃ, dāpetabbanti apare’’ti vuttaṃ. Vicinitvā dānaṃ viceyya dānaṃ. Yasmā ayaṃ viseso kātabboyevāti ayaṃ karoti, tasmā puggalavibhāgo na katoti sambandho. Pakativaṇṇena visabhāgavaṇṇena. ‘‘Idaṃ nāma āpanno’’ti parehi aparāmasitabbato aparāmaṭṭhāni. Anulomehi gahitasaṅkhārārammaṇehi nibbānārammaṇaṃ katvā niyyāti.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / པརིཝཱརཔཱལི༹ • Parivārapāḷi / ཀཏིཔུཙྪཱཝཱརོ • Katipucchāvāro
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / པརིཝཱར-ཨཊྛཀཐཱ • Parivāra-aṭṭhakathā / ཀཏིཔུཙྪཱཝཱརཝཎྞནཱ • Katipucchāvāravaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ཀཏིཔུཙྪཱཝཱརཝཎྞནཱ • Katipucchāvāravaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཀཏིཔུཙྪཱཝཱརཝཎྞནཱ • Katipucchāvāravaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ཨནྟརཔེཡྻཱལ ཀཏིཔུཙྪཱཝཱརཝཎྞནཱ • Antarapeyyāla katipucchāvāravaṇṇanā
