| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
অন্তরপেয্যালং
Antarapeyyālaṃ
কতিপুচ্ছাৰারো
Katipucchāvāro
২৭১. কতি আপত্তিযো? কতি আপত্তিক্খন্ধা? কতি ৰিনীতৰত্থূনি? কতি অগারৰা? কতি গারৰা? কতি ৰিনীতৰত্থূনি? কতি ৰিপত্তিযো? কতি আপত্তিসমুট্ঠানা? কতি ৰিৰাদমূলানি? কতি অনুৰাদমূলানি? কতি সারণীযা ধম্মা? কতি ভেদকরৰত্থূনি? কতি অধিকরণানি? কতি সমথা?
271. Kati āpattiyo? Kati āpattikkhandhā? Kati vinītavatthūni? Kati agāravā? Kati gāravā? Kati vinītavatthūni? Kati vipattiyo? Kati āpattisamuṭṭhānā? Kati vivādamūlāni? Kati anuvādamūlāni? Kati sāraṇīyā dhammā? Kati bhedakaravatthūni? Kati adhikaraṇāni? Kati samathā?
পঞ্চ আপত্তিযো। পঞ্চ আপত্তিক্খন্ধা। পঞ্চ ৰিনীতৰত্থূনি। সত্ত আপত্তিযো। সত্ত আপত্তিক্খন্ধা। সত্ত ৰিনীতৰত্থূনি। ছ অগারৰা। ছ গারৰা। ছ ৰিনীতৰত্থূনি। চতস্সো ৰিপত্তিযো। ছ আপত্তিসমুট্ঠানা। ছ ৰিৰাদমূলানি। ছ অনুৰাদমূলানি। ছ সারণীযা ধম্মা। অট্ঠারস ভেদকরৰত্থূনি। চত্তারি অধিকরণানি। সত্ত সমথা।
Pañca āpattiyo. Pañca āpattikkhandhā. Pañca vinītavatthūni. Satta āpattiyo. Satta āpattikkhandhā. Satta vinītavatthūni. Cha agāravā. Cha gāravā. Cha vinītavatthūni. Catasso vipattiyo. Cha āpattisamuṭṭhānā. Cha vivādamūlāni. Cha anuvādamūlāni. Cha sāraṇīyā dhammā. Aṭṭhārasa bhedakaravatthūni. Cattāri adhikaraṇāni. Satta samathā.
তত্থ কতমা পঞ্চ আপত্তিযো? পারাজিকাপত্তি, সঙ্ঘাদিসেসাপত্তি, পাচিত্তিযাপত্তি, পাটিদেসনীযাপত্তি, দুক্কটাপত্তি – ইমা পঞ্চ আপত্তিযো।
Tattha katamā pañca āpattiyo? Pārājikāpatti, saṅghādisesāpatti, pācittiyāpatti, pāṭidesanīyāpatti, dukkaṭāpatti – imā pañca āpattiyo.
তত্থ কতমে পঞ্চ আপত্তিক্খন্ধা? পারাজিকাপত্তিক্খন্ধো, সঙ্ঘাদিসেসাপত্তিক্খন্ধো, পাচিত্তিযাপত্তিক্খন্ধো, পাটিদেসনীযাপত্তিক্খন্ধো, দুক্কটাপত্তিক্খন্ধো – ইমে পঞ্চ আপত্তিক্খন্ধা।
Tattha katame pañca āpattikkhandhā? Pārājikāpattikkhandho, saṅghādisesāpattikkhandho, pācittiyāpattikkhandho, pāṭidesanīyāpattikkhandho, dukkaṭāpattikkhandho – ime pañca āpattikkhandhā.
তত্থ কতমানি পঞ্চ ৰিনীতৰত্থূনি? পঞ্চহি আপত্তিক্খন্ধেহি আরতি ৰিরতি পটিৰিরতি ৰেরমণী অকিরিযা অকরণং অনজ্ঝাপত্তি ৰেলাঅনতিক্কমো সেতুঘাতো – ইমানি পঞ্চ ৰিনীতৰত্থূনি।
Tattha katamāni pañca vinītavatthūni? Pañcahi āpattikkhandhehi ārati virati paṭivirati veramaṇī akiriyā akaraṇaṃ anajjhāpatti velāanatikkamo setughāto – imāni pañca vinītavatthūni.
তত্থ কতমা সত্ত আপত্তিযো? পারাজিকাপত্তি, সঙ্ঘাদিসেসাপত্তি, থুল্লচ্চযাপত্তি, পাচিত্তিযাপত্তি, পাটিদেসনীযাপত্তি, দুক্কটাপত্তি, দুব্ভাসিতাপত্তি – ইমা সত্ত আপত্তিযো।
Tattha katamā satta āpattiyo? Pārājikāpatti, saṅghādisesāpatti, thullaccayāpatti, pācittiyāpatti, pāṭidesanīyāpatti, dukkaṭāpatti, dubbhāsitāpatti – imā satta āpattiyo.
তত্থ কতমে সত্ত আপত্তিক্খন্ধা? পারাজিকাপত্তিক্খন্ধো, সঙ্ঘাদিসেসাপত্তিক্খন্ধো, থুল্লচ্চযাপত্তিক্খন্ধো, পাচিত্তিযাপত্তিক্খন্ধো, পাটিদেসনীযাপত্তিক্খন্ধো, দুক্কটাপত্তিক্খন্ধো, দুব্ভাসিতাপত্তিক্খন্ধো – ইমে সত্ত আপত্তিক্খন্ধা।
Tattha katame satta āpattikkhandhā? Pārājikāpattikkhandho, saṅghādisesāpattikkhandho, thullaccayāpattikkhandho, pācittiyāpattikkhandho, pāṭidesanīyāpattikkhandho, dukkaṭāpattikkhandho, dubbhāsitāpattikkhandho – ime satta āpattikkhandhā.
তত্থ কতমানি সত্ত ৰিনীতৰত্থূনি? সত্তহি আপত্তিক্খন্ধেহি আরতি ৰিরতি পটিৰিরতি ৰেরমণী অকিরিযা অকরণং অনজ্ঝাপত্তি ৰেলাঅনতিক্কমো সেতুঘাতো – ইমানি সত্ত ৰিনীতৰত্থূনি।
Tattha katamāni satta vinītavatthūni? Sattahi āpattikkhandhehi ārati virati paṭivirati veramaṇī akiriyā akaraṇaṃ anajjhāpatti velāanatikkamo setughāto – imāni satta vinītavatthūni.
তত্থ কতমে ছ অগারৰা? বুদ্ধে অগারৰো, ধম্মে অগারৰো, সঙ্ঘে অগারৰো, সিক্খায অগারৰো, অপ্পমাদে অগারৰো, পটিসন্ধারে অগারৰো – ইমে ছ অগারৰা।
Tattha katame cha agāravā? Buddhe agāravo, dhamme agāravo, saṅghe agāravo, sikkhāya agāravo, appamāde agāravo, paṭisandhāre agāravo – ime cha agāravā.
তত্থ কতমে ছ গারৰা? বুদ্ধে গারৰো, ধম্মে গারৰো, সঙ্ঘে গারৰো, সিক্খায গারৰো, অপ্পমাদে গারৰো, পটিসন্ধারে গারৰো – ইমে ছ গারৰা।
Tattha katame cha gāravā? Buddhe gāravo, dhamme gāravo, saṅghe gāravo, sikkhāya gāravo, appamāde gāravo, paṭisandhāre gāravo – ime cha gāravā.
তত্থ কতমানি ছ ৰিনীতৰত্থূনি? ছহি অগারৰেহি আরতি ৰিরতি পটিৰিরতি ৰেরমণী অকিরিযা অকরণং অনজ্ঝাপত্তি ৰেলাঅনতিক্কমো সেতুঘাতো – ইমানি ছ ৰিনীতৰত্থূনি।
Tattha katamāni cha vinītavatthūni? Chahi agāravehi ārati virati paṭivirati veramaṇī akiriyā akaraṇaṃ anajjhāpatti velāanatikkamo setughāto – imāni cha vinītavatthūni.
তত্থ কতমা চতস্সো ৰিপত্তিযো? সীলৰিপত্তি, আচারৰিপত্তি, দিট্ঠিৰিপত্তি, আজীৰৰিপত্তি – ইমা চতস্সো ৰিপত্তিযো।
Tattha katamā catasso vipattiyo? Sīlavipatti, ācāravipatti, diṭṭhivipatti, ājīvavipatti – imā catasso vipattiyo.
তত্থ কতমে ছ আপত্তিসমুট্ঠানা? অত্থাপত্তি কাযতো সমুট্ঠাতি, ন ৰাচতো ন চিত্ততো; অত্থাপত্তি ৰাচতো সমুট্ঠাতি, ন কাযতো ন চিত্ততো; অত্থাপত্তি কাযতো চ ৰাচতো চ সমুট্ঠাতি, ন চিত্ততো; অত্থাপত্তি কাযতো চ চিত্ততো চ সমুট্ঠাতি, ন ৰাচতো; অত্থাপত্তি ৰাচতো চ চিত্ততো চ সমুট্ঠাতি, ন কাযতো; অত্থাপত্তি কাযতো চ ৰাচতো চ চিত্ততো চ সমুট্ঠাতি – ইমে ছ আপত্তিসমুট্ঠানা।
Tattha katame cha āpattisamuṭṭhānā? Atthāpatti kāyato samuṭṭhāti, na vācato na cittato; atthāpatti vācato samuṭṭhāti, na kāyato na cittato; atthāpatti kāyato ca vācato ca samuṭṭhāti, na cittato; atthāpatti kāyato ca cittato ca samuṭṭhāti, na vācato; atthāpatti vācato ca cittato ca samuṭṭhāti, na kāyato; atthāpatti kāyato ca vācato ca cittato ca samuṭṭhāti – ime cha āpattisamuṭṭhānā.
২৭২. তত্থ 1 কতমানি ছ ৰিৰাদমূলানি? ইধ ভিক্খু কোধনো হোতি উপনাহী। যো সো ভিক্খু কোধনো হোতি উপনাহী সো সত্থরিপি অগারৰো ৰিহরতি অপ্পতিস্সো, ধম্মেপি অগারৰো ৰিহরতি অপ্পতিস্সো, সঙ্ঘেপি অগারৰো ৰিহরতি অপ্পতিস্সো, সিক্খাযপি ন পরিপূরকারী হোতি। যো সো ভিক্খু সত্থরি অগারৰো ৰিহরতি অপ্পতিস্সো, ধম্মে…পে॰… সঙ্ঘে…পে॰… সিক্খায ন পরিপূরকারী, সো সঙ্ঘে ৰিৰাদং জনেতি। যো হোতি ৰিৰাদো বহুজনাহিতায বহুজনাসুখায বহুনো জনস্স অনত্থায অহিতায দুক্খায দেৰমনুস্সানং। এৰরূপং চে তুম্হে ৰিৰাদমূলং অজ্ঝত্তং ৰা বহিদ্ধা ৰা সমনুপস্সেয্যাথ তত্র তুম্হে তস্সেৰ পাপকস্স ৰিৰাদমূলস্স পহানায ৰাযমেয্যাথ। এৰরূপং চে তুম্হে ৰিৰাদমূলং অজ্ঝত্তং ৰা বহিদ্ধা ৰা ন সমনুপস্সেয্যাথ তত্র তুম্হে তস্সেৰ পাপকস্স ৰিৰাদমূলস্স আযতিং অনৰস্সৰায পটিপজ্জেয্যাথ। এৰমেতস্স পাপকস্স ৰিৰাদমূলস্স পহানং হোতি। এৰমেতস্স পাপকস্স ৰিৰাদমূলস্স আযতিং অনৰস্সৰো হোতি।
272. Tattha 2 katamāni cha vivādamūlāni? Idha bhikkhu kodhano hoti upanāhī. Yo so bhikkhu kodhano hoti upanāhī so sattharipi agāravo viharati appatisso, dhammepi agāravo viharati appatisso, saṅghepi agāravo viharati appatisso, sikkhāyapi na paripūrakārī hoti. Yo so bhikkhu satthari agāravo viharati appatisso, dhamme…pe… saṅghe…pe… sikkhāya na paripūrakārī, so saṅghe vivādaṃ janeti. Yo hoti vivādo bahujanāhitāya bahujanāsukhāya bahuno janassa anatthāya ahitāya dukkhāya devamanussānaṃ. Evarūpaṃ ce tumhe vivādamūlaṃ ajjhattaṃ vā bahiddhā vā samanupasseyyātha tatra tumhe tasseva pāpakassa vivādamūlassa pahānāya vāyameyyātha. Evarūpaṃ ce tumhe vivādamūlaṃ ajjhattaṃ vā bahiddhā vā na samanupasseyyātha tatra tumhe tasseva pāpakassa vivādamūlassa āyatiṃ anavassavāya paṭipajjeyyātha. Evametassa pāpakassa vivādamūlassa pahānaṃ hoti. Evametassa pāpakassa vivādamūlassa āyatiṃ anavassavo hoti.
3 পুন চপরং ভিক্খু মক্খী হোতি পল়াসী…পে॰… ইস্সুকী হোতি মচ্ছরী, সঠো হোতি মাযাৰী, পাপিচ্ছো হোতি মিচ্ছাদিট্ঠি, সন্দিট্ঠিপরামাসী হোতি আধানগ্গাহী দুপ্পটিনিস্সগ্গী। যো সো ভিক্খু সন্দিট্ঠিপরামাসী হোতি আধানগ্গাহী দুপ্পটিনিস্সগ্গী সো সত্থরিপি অগারৰো ৰিহরতি অপ্পতিস্সো, ধম্মেপি অগারৰো ৰিহরতি অপ্পতিস্সো, সঙ্ঘেপি অগারৰো ৰিহরতি অপ্পতিস্সো, সিক্খাযপি ন পরিপূরকারী হোতি। যো সো ভিক্খু সত্থরি অগারৰো ৰিহরতি অপ্পতিস্সো ধম্মে…পে॰… সঙ্ঘে…পে॰… সিক্খায ন পরিপূরকারী, সো সঙ্ঘে ৰিৰাদং জনেতি। যো সো হোতি ৰিৰাদো বহুজনাহিতায বহুজনাসুখায বহুনো জনস্স অনত্থায অহিতায দুক্খায দেৰমনুস্সানং। এৰরূপং চে তুম্হে ৰিৰাদমূলং অজ্ঝত্তং ৰা বহিদ্ধা ৰা সমনুপস্সেয্যাথ তত্র তুম্হে তস্সেৰ পাপকস্স ৰিৰাদমূলস্স পহানায ৰাযমেয্যাথ। এৰরূপং চে তুম্হে ৰিৰাদমূলং অজ্ঝত্তং ৰা বহিদ্ধা ৰা ন সমনুপস্সেয্যাথ তত্র তুম্হে তস্সেৰ পাপকস্স ৰিৰাদমূলস্স আযতিং অনৰস্সৰায পটিপজ্জেয্যাথ। এৰমেতস্স পাপকস্স ৰিৰাদমূলস্স পহানং হোতি। এৰমেতস্স পাপকস্স ৰিৰাদমূলস্স আযতিং অনৰস্সৰো হোতি। ইমানি ছ ৰিৰাদমূলানি।
4 Puna caparaṃ bhikkhu makkhī hoti paḷāsī…pe… issukī hoti maccharī, saṭho hoti māyāvī, pāpiccho hoti micchādiṭṭhi, sandiṭṭhiparāmāsī hoti ādhānaggāhī duppaṭinissaggī. Yo so bhikkhu sandiṭṭhiparāmāsī hoti ādhānaggāhī duppaṭinissaggī so sattharipi agāravo viharati appatisso, dhammepi agāravo viharati appatisso, saṅghepi agāravo viharati appatisso, sikkhāyapi na paripūrakārī hoti. Yo so bhikkhu satthari agāravo viharati appatisso dhamme…pe… saṅghe…pe… sikkhāya na paripūrakārī, so saṅghe vivādaṃ janeti. Yo so hoti vivādo bahujanāhitāya bahujanāsukhāya bahuno janassa anatthāya ahitāya dukkhāya devamanussānaṃ. Evarūpaṃ ce tumhe vivādamūlaṃ ajjhattaṃ vā bahiddhā vā samanupasseyyātha tatra tumhe tasseva pāpakassa vivādamūlassa pahānāya vāyameyyātha. Evarūpaṃ ce tumhe vivādamūlaṃ ajjhattaṃ vā bahiddhā vā na samanupasseyyātha tatra tumhe tasseva pāpakassa vivādamūlassa āyatiṃ anavassavāya paṭipajjeyyātha. Evametassa pāpakassa vivādamūlassa pahānaṃ hoti. Evametassa pāpakassa vivādamūlassa āyatiṃ anavassavo hoti. Imāni cha vivādamūlāni.
২৭৩. 5 তত্থ কতমানি ছ অনুৰাদমূলানি? ইধ ভিক্খু কোধনো হোতি উপনাহী। যো সো ভিক্খু কোধনো হোতি উপনাহী সো সত্থরিপি অগারৰো ৰিহরতি অপ্পতিস্সো, ধম্মেপি অগারৰো ৰিহরতি অপ্পতিস্সো, সঙ্ঘেপি অগারৰো ৰিহরতি অপ্পতিস্সো, সিক্খাযপি ন পরিপূরকারী হোতি। যো সো ভিক্খু সত্থরি অগারৰো ৰিহরতি অপ্পতিস্সো ধম্মে…পে॰… সঙ্ঘে …পে॰… সিক্খায ন পরিপূরকারী সো সঙ্ঘে অনুৰাদং জনেতি। যো হোতি অনুৰাদো বহুজনাহিতায বহুজনাসুখায বহুনো জনস্স অনত্থায অহিতায দুক্খায দেৰমনুস্সানং। এৰরূপং চে তুম্হে অনুৰাদমূলং অজ্ঝত্তং ৰা বহিদ্ধা ৰা সমনুপস্সেয্যাথ তত্র তুম্হে তস্সেৰ পাপকস্স অনুৰাদমূলস্স পহানায ৰাযমেয্যাথ। এৰরূপং চে তুম্হে অনুৰাদমূলং অজ্ঝত্তং ৰা বহিদ্ধা ৰা ন সমনুপস্সেয্যাথ তত্র তুম্হে তস্সেৰ পাপকস্স অনুৰাদমূলস্স আযতিং অনৰস্সৰায পটিপজ্জেয্যাথ। এৰমেতস্স পাপকস্স অনুৰাদমূলস্স পহানং হোতি। এৰমেতস্স পাপকস্স অনুৰাদমূলস্স আযতিং অনৰস্সৰো হোতি।
273.6 Tattha katamāni cha anuvādamūlāni? Idha bhikkhu kodhano hoti upanāhī. Yo so bhikkhu kodhano hoti upanāhī so sattharipi agāravo viharati appatisso, dhammepi agāravo viharati appatisso, saṅghepi agāravo viharati appatisso, sikkhāyapi na paripūrakārī hoti. Yo so bhikkhu satthari agāravo viharati appatisso dhamme…pe… saṅghe …pe… sikkhāya na paripūrakārī so saṅghe anuvādaṃ janeti. Yo hoti anuvādo bahujanāhitāya bahujanāsukhāya bahuno janassa anatthāya ahitāya dukkhāya devamanussānaṃ. Evarūpaṃ ce tumhe anuvādamūlaṃ ajjhattaṃ vā bahiddhā vā samanupasseyyātha tatra tumhe tasseva pāpakassa anuvādamūlassa pahānāya vāyameyyātha. Evarūpaṃ ce tumhe anuvādamūlaṃ ajjhattaṃ vā bahiddhā vā na samanupasseyyātha tatra tumhe tasseva pāpakassa anuvādamūlassa āyatiṃ anavassavāya paṭipajjeyyātha. Evametassa pāpakassa anuvādamūlassa pahānaṃ hoti. Evametassa pāpakassa anuvādamūlassa āyatiṃ anavassavo hoti.
পুন চপরং ভিক্খু মক্খী হোতি পলাসী…পে॰… ইস্সুকী হোতি মচ্ছরী, সঠো হোতি মাযাৰী, পাপিচ্ছো হোতি মিচ্ছাদিট্ঠি, সন্দিট্ঠিপরামাসী হোতি আধানগ্গাহী দুপ্পটিনিস্সগ্গী। যো সো ভিক্খু সন্দিট্ঠিপরামাসী হোতি আধানগ্গাহী দুপ্পটিনিস্সগ্গী সো সত্থরিপি অগারৰো ৰিহরতি অপ্পতিস্সো, ধম্মেপি অগারৰো ৰিহরতি অপ্পতিস্সো, সঙ্ঘেপি অগারৰো ৰিহরতি অপ্পতিস্সো, সিক্খাযপি ন পরিপূরকারী হোতি। যো ভিক্খু সত্থরি অগারৰো ৰিহরতি অপ্পতিস্সো ধম্মে…পে॰… সঙ্ঘে…পে॰… সিক্খায ন পরিপূরকারী সো সঙ্ঘে অনুৰাদং জনেতি। যোএ হোতি অনুৰাদো বহুজনাহিতায বহুজনাসুখায বহুনো জনস্স অনত্থায অহিতায দুক্খায দেৰমনুস্সানং। এৰরূপং চে তুম্হে অনুৰাদমূলং অজ্ঝত্তং ৰা বহিদ্ধা ৰা সমনুপস্সেয্যাথ তত্র তুম্হে তস্সেৰ পাপকস্স অনুৰাদমূলস্স পহানায ৰাযমেয্যাথ। এৰরূপং চে তুম্হে অনুৰাদমূলং অজ্ঝত্তং ৰা বহিদ্ধা ৰা ন সমনুপস্সেয্যাথ তত্র তুম্হে তস্সেৰ পাপকস্স অনুৰাদমূলস্স আযতিং অনৰস্সৰায পটিপজ্জেয্যাথ। এৰমেতস্স পাপকস্স অনুৰাদমূলস্স পহানং হোতি। এৰমেতস্স পাপকস্স অনুৰাদমূলস্স আযতিং অনৰস্সৰো হোতি। ইমানি ছ অনুৰাদমূলানি।
Puna caparaṃ bhikkhu makkhī hoti palāsī…pe… issukī hoti maccharī, saṭho hoti māyāvī, pāpiccho hoti micchādiṭṭhi, sandiṭṭhiparāmāsī hoti ādhānaggāhī duppaṭinissaggī. Yo so bhikkhu sandiṭṭhiparāmāsī hoti ādhānaggāhī duppaṭinissaggī so sattharipi agāravo viharati appatisso, dhammepi agāravo viharati appatisso, saṅghepi agāravo viharati appatisso, sikkhāyapi na paripūrakārī hoti. Yo bhikkhu satthari agāravo viharati appatisso dhamme…pe… saṅghe…pe… sikkhāya na paripūrakārī so saṅghe anuvādaṃ janeti. Yoe hoti anuvādo bahujanāhitāya bahujanāsukhāya bahuno janassa anatthāya ahitāya dukkhāya devamanussānaṃ. Evarūpaṃ ce tumhe anuvādamūlaṃ ajjhattaṃ vā bahiddhā vā samanupasseyyātha tatra tumhe tasseva pāpakassa anuvādamūlassa pahānāya vāyameyyātha. Evarūpaṃ ce tumhe anuvādamūlaṃ ajjhattaṃ vā bahiddhā vā na samanupasseyyātha tatra tumhe tasseva pāpakassa anuvādamūlassa āyatiṃ anavassavāya paṭipajjeyyātha. Evametassa pāpakassa anuvādamūlassa pahānaṃ hoti. Evametassa pāpakassa anuvādamūlassa āyatiṃ anavassavo hoti. Imāni cha anuvādamūlāni.
২৭৪. 7 তত্থ কতমে ছ সারণীযা ধম্মা? ইধ ভিক্খুনো মেত্তং কাযকম্মং পচ্চুপট্ঠিতং হোতি সব্রহ্মচারীসু আৰি চেৰ রহো চ। অযম্পি ধম্মো সারণীযো পিযকরণো গরুকরণো সঙ্গহায অৰিৰাদায সামগ্গিযা একীভাৰায সংৰত্ততি।
274.8 Tattha katame cha sāraṇīyā dhammā? Idha bhikkhuno mettaṃ kāyakammaṃ paccupaṭṭhitaṃ hoti sabrahmacārīsu āvi ceva raho ca. Ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṃvattati.
পুন চপরং ভিক্খুনো মেত্তং ৰচীকম্মং পচ্চুপট্ঠিতং হোতি সব্রহ্মচারীসু আৰি চেৰ রহো চ। অযম্পি ধম্মো সারণীযো পিযকরণো গরুকরণো সঙ্গহায অৰিৰাদায সামগ্গিযা একীভাৰায সংৰত্ততি।
Puna caparaṃ bhikkhuno mettaṃ vacīkammaṃ paccupaṭṭhitaṃ hoti sabrahmacārīsu āvi ceva raho ca. Ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṃvattati.
পুন চপরং ভিক্খুনো মেত্তং মনোকম্মং পচ্চুপট্ঠিতং হোতি সব্রহ্মচারীসু আৰি চেৰ রহো চ। অযম্পি ধম্মো সারণীযো পিযকরণো গরুকরণো সঙ্গহায অৰিৰাদায সামগ্গিযা একীভাৰায সংৰত্ততি।
Puna caparaṃ bhikkhuno mettaṃ manokammaṃ paccupaṭṭhitaṃ hoti sabrahmacārīsu āvi ceva raho ca. Ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṃvattati.
পুন চপরং ভিক্খু যে তে লাভা ধম্মিকা ধম্মলদ্ধা অন্তমসো পত্তপরিযাপন্নমত্তম্পি তথারূপেহি লাভেহি অপ্পটিৰিভত্তভোগী হোতি সীলৰন্তেহি সব্রহ্মচারীহি সাধারণভোগী। অযম্পি ধম্মো সারণীযো পিযকরণো গরুকরণো সঙ্গহায অৰিৰাদায সামগ্গিযা একীভাৰায সংৰত্ততি।
Puna caparaṃ bhikkhu ye te lābhā dhammikā dhammaladdhā antamaso pattapariyāpannamattampi tathārūpehi lābhehi appaṭivibhattabhogī hoti sīlavantehi sabrahmacārīhi sādhāraṇabhogī. Ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṃvattati.
পুন চপরং ভিক্খু যানি তানি সীলানি অখণ্ডানি অচ্ছিদ্দানি অসবলানি অকম্মাসানি ভুজিস্সানি ৰিঞ্ঞুপসত্থানি অপরামট্ঠানি সমাধিসংৰত্তনিকানি , তথারূপেসু সীলেসু সীলসামঞ্ঞগতো ৰিহরতি সব্রহ্মচারীহি আৰি চেৰ রহো চ। অযম্পি ধম্মো সারণীযো পিযকরণো গরুকরণো সঙ্গহায অৰিৰাদায সামগ্গিযা একীভাৰায সংৰত্ততি।
Puna caparaṃ bhikkhu yāni tāni sīlāni akhaṇḍāni acchiddāni asabalāni akammāsāni bhujissāni viññupasatthāni aparāmaṭṭhāni samādhisaṃvattanikāni , tathārūpesu sīlesu sīlasāmaññagato viharati sabrahmacārīhi āvi ceva raho ca. Ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṃvattati.
পুন চপরং ভিক্খু যাযং দিট্ঠি অরিযা নিয্যানিকা নিয্যাতি তক্করস্স সম্মা দুক্খক্খযায তথারূপায দিট্ঠিযা দিট্ঠিসামঞ্ঞগতো ৰিহরতি সব্রহ্মচারীহি আৰি চেৰ রহো চ। অযম্পি ধম্মো সারণীযো পিযকরণো গরুকরণো সঙ্গহায অৰিৰাদায সামগ্গিযা একীভাৰায সংৰত্ততি। ইমে ছ সারণীযা ধম্মা।
Puna caparaṃ bhikkhu yāyaṃ diṭṭhi ariyā niyyānikā niyyāti takkarassa sammā dukkhakkhayāya tathārūpāya diṭṭhiyā diṭṭhisāmaññagato viharati sabrahmacārīhi āvi ceva raho ca. Ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṃvattati. Ime cha sāraṇīyā dhammā.
২৭৫. তত্থ কতমানি অট্ঠারস ভেদকরৰত্থূনি? ইধ ভিক্খু অধম্মং ‘‘ধম্মো’’তি দীপেতি, ধম্মং ‘‘অধম্মো’’তি দীপেতি, অৰিনযং ‘‘ৰিনযো’’তি দীপেতি, ৰিনযং ‘‘অৰিনযো’’তি দীপেতি, অভাসিতং অলপিতং তথাগতেন ‘‘ভাসিতং লপিতং তথাগতেনা’’তি দীপেতি, ভাসিতং লপিতং তথাগতেন ‘‘অভাসিতং অলপিতং তথাগতেনা’’তি দীপেতি, অনাচিণ্ণং তথাগতেন ‘‘আচিণ্ণং তথাগতেনা’’তি দীপেতি, আচিণ্ণং তথাগতেন ‘‘অনাচিণ্ণং তথাগতেনা’’তি দীপেতি, অপঞ্ঞত্তং তথাগতেন ‘‘পঞ্ঞত্তং তথাগতেনা’’তি দীপেতি, পঞ্ঞত্তং তথাগতেন ‘‘অপঞ্ঞত্তং তথাগতেনা’’তি দীপেতি, আপত্তিং ‘‘অনাপত্তী’’তি দীপেতি, অনাপত্তিং ‘‘আপত্তী’’তি দীপেতি, লহুকং আপত্তিং ‘‘গরুকা আপত্তী’’তি দীপেতি, গরুকং আপত্তিং ‘‘লহুকা আপত্তী’’তি দীপেতি, সাৰসেসং আপত্তিং ‘‘অনৰসেসা আপত্তী’’তি দীপেতি, অনৰসেসং আপত্তিং ‘‘সাৰসেসা আপত্তী’’তি দীপেতি, দুট্ঠুল্লং আপত্তিং ‘‘অদুট্ঠুল্লা আপত্তী’’তি দীপেতি, অদুট্ঠুল্লং আপত্তিং ‘‘দুট্ঠুল্লা আপত্তী’’তি দীপেতি। ইমানি অট্ঠারস ভেদকরৰত্থূনি।
275. Tattha katamāni aṭṭhārasa bhedakaravatthūni? Idha bhikkhu adhammaṃ ‘‘dhammo’’ti dīpeti, dhammaṃ ‘‘adhammo’’ti dīpeti, avinayaṃ ‘‘vinayo’’ti dīpeti, vinayaṃ ‘‘avinayo’’ti dīpeti, abhāsitaṃ alapitaṃ tathāgatena ‘‘bhāsitaṃ lapitaṃ tathāgatenā’’ti dīpeti, bhāsitaṃ lapitaṃ tathāgatena ‘‘abhāsitaṃ alapitaṃ tathāgatenā’’ti dīpeti, anāciṇṇaṃ tathāgatena ‘‘āciṇṇaṃ tathāgatenā’’ti dīpeti, āciṇṇaṃ tathāgatena ‘‘anāciṇṇaṃ tathāgatenā’’ti dīpeti, apaññattaṃ tathāgatena ‘‘paññattaṃ tathāgatenā’’ti dīpeti, paññattaṃ tathāgatena ‘‘apaññattaṃ tathāgatenā’’ti dīpeti, āpattiṃ ‘‘anāpattī’’ti dīpeti, anāpattiṃ ‘‘āpattī’’ti dīpeti, lahukaṃ āpattiṃ ‘‘garukā āpattī’’ti dīpeti, garukaṃ āpattiṃ ‘‘lahukā āpattī’’ti dīpeti, sāvasesaṃ āpattiṃ ‘‘anavasesā āpattī’’ti dīpeti, anavasesaṃ āpattiṃ ‘‘sāvasesā āpattī’’ti dīpeti, duṭṭhullaṃ āpattiṃ ‘‘aduṭṭhullā āpattī’’ti dīpeti, aduṭṭhullaṃ āpattiṃ ‘‘duṭṭhullā āpattī’’ti dīpeti. Imāni aṭṭhārasa bhedakaravatthūni.
9 তত্থ কতমানি চত্তারি অধিকরণানি? ৰিৰাদাধিকরণং, অনুৰাদাধিকরণং, আপত্তাধিকরণং, কিচ্চাধিকরণং – ইমানি চত্তারি অধিকরণানি।
10 Tattha katamāni cattāri adhikaraṇāni? Vivādādhikaraṇaṃ, anuvādādhikaraṇaṃ, āpattādhikaraṇaṃ, kiccādhikaraṇaṃ – imāni cattāri adhikaraṇāni.
তত্থ কতমে সত্ত সমথা? সম্মুখাৰিনযো, সতিৰিনযো, অমূল়্হৰিনযো, পটিঞ্ঞাতকরণং, যেভুয্যসিকা, তস্সপাপিযসিকা, তিণৰত্থারকো – ইমে সত্ত সমথা।
Tattha katame satta samathā? Sammukhāvinayo, sativinayo, amūḷhavinayo, paṭiññātakaraṇaṃ, yebhuyyasikā, tassapāpiyasikā, tiṇavatthārako – ime satta samathā.
কতিপুচ্ছাৰারো নিট্ঠিতো।
Katipucchāvāro niṭṭhito.
তস্সুদ্দানং –
Tassuddānaṃ –
আপত্তি আপত্তিক্খন্ধা, ৰিনীতা সত্তধা পুন।
Āpatti āpattikkhandhā, vinītā sattadhā puna;
ৰিনীতাগারৰা চেৰ, গারৰা মূলমেৰ চ॥
Vinītāgāravā ceva, gāravā mūlameva ca.
পুন ৰিনীতা ৰিপত্তি, সমুট্ঠানা ৰিৰাদনা।
Puna vinītā vipatti, samuṭṭhānā vivādanā;
অনুৰাদা সারণীযং, ভেদাধিকরণেন চ॥
Anuvādā sāraṇīyaṃ, bhedādhikaraṇena ca.
সত্তেৰ সমথা ৰুত্তা, পদা সত্তরসা ইমেতি॥
Satteva samathā vuttā, padā sattarasā imeti.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / কতিপুচ্ছাৰারৰণ্ণনা • Katipucchāvāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / কতিপুচ্ছাৰারৰণ্ণনা • Katipucchāvāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / কতিপুচ্ছাৰারৰণ্ণনা • Katipucchāvāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / কতিপুচ্ছাৰারৰণ্ণনা • Katipucchāvāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / অন্তরপেয্যাল কতিপুচ্ছাৰারৰণ্ণনা • Antarapeyyāla katipucchāvāravaṇṇanā
