| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
8. கட்ட²ஹாரஸுத்தவண்ணனா
8. Kaṭṭhahārasuttavaṇṇanā
204. அட்ட²மே அந்தேவாஸிகாதி வெய்யாவச்சங் கத்வா ஸிப்புக்³க³ண்ஹனகா த⁴ம்மந்தேவாஸிகா. நிஸின்னந்தி ச²ப்³ப³ண்ணரஸ்மியோ விஸ்ஸஜ்ஜெத்வா நிஸின்னங். க³ம்பீ⁴ரரூபேதி க³ம்பீ⁴ரஸபா⁴வே.
204. Aṭṭhame antevāsikāti veyyāvaccaṃ katvā sippuggaṇhanakā dhammantevāsikā. Nisinnanti chabbaṇṇarasmiyo vissajjetvā nisinnaṃ. Gambhīrarūpeti gambhīrasabhāve.
ப³ஹுபே⁴ரவேதி தத்ரட்ட²கஸவிஞ்ஞாணகஅவிஞ்ஞாணகபே⁴ரவேஹி ப³ஹுபே⁴ரவே. விகா³ஹியாதி அனுபவிஸித்வா. அனிஞ்ஜமானேனாதிஆதீ³னி காயவிஸேஸனானி, ஏவரூபேன காயேனாதி அத்தோ². ஸுசாருரூபங் வதாதி அதிஸுந்த³ரங் வத ஜா²னங் ஜா²யஸீதி வத³தி.
Bahubheraveti tatraṭṭhakasaviññāṇakaaviññāṇakabheravehi bahubherave. Vigāhiyāti anupavisitvā. Aniñjamānenātiādīni kāyavisesanāni, evarūpena kāyenāti attho. Sucārurūpaṃ vatāti atisundaraṃ vata jhānaṃ jhāyasīti vadati.
வனவஸ்ஸிதோ முனீதி வனங் அவஸ்ஸிதோ பு³த்³த⁴முனி. இத³ந்தி இத³ங் தும்ஹாகங் ஏவங் வனே நிஸின்னகாரணங் மய்ஹங் அச்சே²ரரூபங் படிபா⁴தி. பீதிமனோதி துட்ட²சித்தோ. வனே வஸேதி வனம்ஹி வஸி.
Vanavassito munīti vanaṃ avassito buddhamuni. Idanti idaṃ tumhākaṃ evaṃ vane nisinnakāraṇaṃ mayhaṃ accherarūpaṃ paṭibhāti. Pītimanoti tuṭṭhacitto. Vane vaseti vanamhi vasi.
மஞ்ஞாமஹந்தி மஞ்ஞாமி அஹங். லோகாதி⁴பதிஸஹப்³யதந்தி லோகாதி⁴பதிமஹாப்³ரஹ்முனா ஸஹபா⁴வங். ஆகங்க²மானோதி இச்ச²மானோ. திதி³வங் அனுத்தரந்தி இத³ங் ப்³ரஹ்மலோகமேவ ஸந்தா⁴யாஹ. கஸ்மா ப⁴வங் விஜனமரஞ்ஞமஸ்ஸிதோதி அஹங் தாவ ப்³ரஹ்மலோகங் ஆகங்க²மானோதி மஞ்ஞாமி. யதி³ ஏவங் ந ஹோதி, அத² மே ஆசிக்க², கஸ்மா ப⁴வந்தி? புச்ச²தி. ப்³ரஹ்மபத்தியாதி ஸெட்ட²பத்தியா . இத⁴ இத³ங் தபோ கஸ்மா கரோஸீதி அபரேனபி ஆகாரேன புச்ச²தி.
Maññāmahanti maññāmi ahaṃ. Lokādhipatisahabyatanti lokādhipatimahābrahmunā sahabhāvaṃ. Ākaṅkhamānoti icchamāno. Tidivaṃ anuttaranti idaṃ brahmalokameva sandhāyāha. Kasmā bhavaṃ vijanamaraññamassitoti ahaṃ tāva brahmalokaṃ ākaṅkhamānoti maññāmi. Yadi evaṃ na hoti, atha me ācikkha, kasmā bhavanti? Pucchati. Brahmapattiyāti seṭṭhapattiyā . Idha idaṃ tapo kasmā karosīti aparenapi ākārena pucchati.
கங்கா²தி தண்ஹா. அபி⁴னந்த³னாதி அபி⁴னந்த³னவஸேன தண்ஹாவ வுத்தா. அனேகதா⁴தூஸூதி அனேகஸபா⁴வேஸு ஆரம்மணேஸு. புதூ²தி நானப்பகாரா தண்ஹா ஸேஸகிலேஸா வா. ஸதா³ஸிதாதி நிச்சகாலங் அவஸ்ஸிதா. அஞ்ஞாணமூலப்பப⁴வாதி அவிஜ்ஜாமூலா ஹுத்வா ஜாதா. பஜப்பிதாதி தண்ஹாவ ‘‘இத³ம்பி மய்ஹங், இத³ம்பி மய்ஹ’’ந்தி பஜப்பாபனவஸேன பஜப்பிதா நாமாதி வுத்தா. ஸப்³பா³ மயா ப்³யந்திகதாதி ஸப்³பா³ தண்ஹா மயா அக்³க³மக்³கே³ன விக³தந்தா நிரந்தா கதா. ஸமூலிகாதி ஸத்³தி⁴ங் அஞ்ஞாணமூலேன.
Kaṅkhāti taṇhā. Abhinandanāti abhinandanavasena taṇhāva vuttā. Anekadhātūsūti anekasabhāvesu ārammaṇesu. Puthūti nānappakārā taṇhā sesakilesā vā. Sadāsitāti niccakālaṃ avassitā. Aññāṇamūlappabhavāti avijjāmūlā hutvā jātā. Pajappitāti taṇhāva ‘‘idampi mayhaṃ, idampi mayha’’nti pajappāpanavasena pajappitā nāmāti vuttā. Sabbā mayā byantikatāti sabbā taṇhā mayā aggamaggena vigatantā nirantā katā. Samūlikāti saddhiṃ aññāṇamūlena.
அனூபயோதி அனுபக³மனோ. ஸப்³பே³ஸு த⁴ம்மேஸு விஸுத்³த⁴த³ஸ்ஸனோதி இமினா ஸப்³ப³ஞ்ஞுதஞ்ஞாணங் தீ³பேதி. ஸம்போ³தி⁴மனுத்தரந்தி அரஹத்தங் ஸந்தா⁴யாஹ. ஸிவந்தி ஸெட்ட²ங் . ஜா²யாமீதி த்³வீஹி ஜா²னேஹி ஜா²யாமி. விஸாரதோ³தி விக³தஸாரஜ்ஜோ. அட்ட²மங்.
Anūpayoti anupagamano. Sabbesu dhammesu visuddhadassanoti iminā sabbaññutaññāṇaṃ dīpeti. Sambodhimanuttaranti arahattaṃ sandhāyāha. Sivanti seṭṭhaṃ . Jhāyāmīti dvīhi jhānehi jhāyāmi. Visāradoti vigatasārajjo. Aṭṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. கட்ட²ஹாரஸுத்தங் • 8. Kaṭṭhahārasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. கட்ட²ஹாரஸுத்தவண்ணனா • 8. Kaṭṭhahārasuttavaṇṇanā
