| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৮. কট্ঠহারসুত্তৰণ্ণনা
8. Kaṭṭhahārasuttavaṇṇanā
২০৪. অট্ঠমে অন্তেৰাসিকাতি ৰেয্যাৰচ্চং কত্ৰা সিপ্পুগ্গণ্হনকা ধম্মন্তেৰাসিকা। নিসিন্নন্তি ছব্বণ্ণরস্মিযো ৰিস্সজ্জেত্ৰা নিসিন্নং। গম্ভীররূপেতি গম্ভীরসভাৰে।
204. Aṭṭhame antevāsikāti veyyāvaccaṃ katvā sippuggaṇhanakā dhammantevāsikā. Nisinnanti chabbaṇṇarasmiyo vissajjetvā nisinnaṃ. Gambhīrarūpeti gambhīrasabhāve.
বহুভেরৰেতি তত্রট্ঠকসৰিঞ্ঞাণকঅৰিঞ্ঞাণকভেরৰেহি বহুভেরৰে। ৰিগাহিযাতি অনুপৰিসিত্ৰা। অনিঞ্জমানেনাতিআদীনি কাযৰিসেসনানি, এৰরূপেন কাযেনাতি অত্থো। সুচারুরূপং ৰতাতি অতিসুন্দরং ৰত ঝানং ঝাযসীতি ৰদতি।
Bahubheraveti tatraṭṭhakasaviññāṇakaaviññāṇakabheravehi bahubherave. Vigāhiyāti anupavisitvā. Aniñjamānenātiādīni kāyavisesanāni, evarūpena kāyenāti attho. Sucārurūpaṃ vatāti atisundaraṃ vata jhānaṃ jhāyasīti vadati.
ৰনৰস্সিতো মুনীতি ৰনং অৰস্সিতো বুদ্ধমুনি। ইদন্তি ইদং তুম্হাকং এৰং ৰনে নিসিন্নকারণং ময্হং অচ্ছেররূপং পটিভাতি। পীতিমনোতি তুট্ঠচিত্তো। ৰনে ৰসেতি ৰনম্হি ৰসি।
Vanavassito munīti vanaṃ avassito buddhamuni. Idanti idaṃ tumhākaṃ evaṃ vane nisinnakāraṇaṃ mayhaṃ accherarūpaṃ paṭibhāti. Pītimanoti tuṭṭhacitto. Vane vaseti vanamhi vasi.
মঞ্ঞামহন্তি মঞ্ঞামি অহং। লোকাধিপতিসহব্যতন্তি লোকাধিপতিমহাব্রহ্মুনা সহভাৰং। আকঙ্খমানোতি ইচ্ছমানো। তিদিৰং অনুত্তরন্তি ইদং ব্রহ্মলোকমেৰ সন্ধাযাহ। কস্মা ভৰং ৰিজনমরঞ্ঞমস্সিতোতি অহং তাৰ ব্রহ্মলোকং আকঙ্খমানোতি মঞ্ঞামি। যদি এৰং ন হোতি, অথ মে আচিক্খ, কস্মা ভৰন্তি? পুচ্ছতি। ব্রহ্মপত্তিযাতি সেট্ঠপত্তিযা । ইধ ইদং তপো কস্মা করোসীতি অপরেনপি আকারেন পুচ্ছতি।
Maññāmahanti maññāmi ahaṃ. Lokādhipatisahabyatanti lokādhipatimahābrahmunā sahabhāvaṃ. Ākaṅkhamānoti icchamāno. Tidivaṃ anuttaranti idaṃ brahmalokameva sandhāyāha. Kasmā bhavaṃ vijanamaraññamassitoti ahaṃ tāva brahmalokaṃ ākaṅkhamānoti maññāmi. Yadi evaṃ na hoti, atha me ācikkha, kasmā bhavanti? Pucchati. Brahmapattiyāti seṭṭhapattiyā . Idha idaṃ tapo kasmā karosīti aparenapi ākārena pucchati.
কঙ্খাতি তণ্হা। অভিনন্দনাতি অভিনন্দনৰসেন তণ্হাৰ ৰুত্তা। অনেকধাতূসূতি অনেকসভাৰেসু আরম্মণেসু। পুথূতি নানপ্পকারা তণ্হা সেসকিলেসা ৰা। সদাসিতাতি নিচ্চকালং অৰস্সিতা। অঞ্ঞাণমূলপ্পভৰাতি অৰিজ্জামূলা হুত্ৰা জাতা। পজপ্পিতাতি তণ্হাৰ ‘‘ইদম্পি ময্হং, ইদম্পি ময্হ’’ন্তি পজপ্পাপনৰসেন পজপ্পিতা নামাতি ৰুত্তা। সব্বা মযা ব্যন্তিকতাতি সব্বা তণ্হা মযা অগ্গমগ্গেন ৰিগতন্তা নিরন্তা কতা। সমূলিকাতি সদ্ধিং অঞ্ঞাণমূলেন।
Kaṅkhāti taṇhā. Abhinandanāti abhinandanavasena taṇhāva vuttā. Anekadhātūsūti anekasabhāvesu ārammaṇesu. Puthūti nānappakārā taṇhā sesakilesā vā. Sadāsitāti niccakālaṃ avassitā. Aññāṇamūlappabhavāti avijjāmūlā hutvā jātā. Pajappitāti taṇhāva ‘‘idampi mayhaṃ, idampi mayha’’nti pajappāpanavasena pajappitā nāmāti vuttā. Sabbā mayā byantikatāti sabbā taṇhā mayā aggamaggena vigatantā nirantā katā. Samūlikāti saddhiṃ aññāṇamūlena.
অনূপযোতি অনুপগমনো। সব্বেসু ধম্মেসু ৰিসুদ্ধদস্সনোতি ইমিনা সব্বঞ্ঞুতঞ্ঞাণং দীপেতি। সম্বোধিমনুত্তরন্তি অরহত্তং সন্ধাযাহ। সিৰন্তি সেট্ঠং । ঝাযামীতি দ্ৰীহি ঝানেহি ঝাযামি। ৰিসারদোতি ৰিগতসারজ্জো। অট্ঠমং।
Anūpayoti anupagamano. Sabbesu dhammesu visuddhadassanoti iminā sabbaññutaññāṇaṃ dīpeti. Sambodhimanuttaranti arahattaṃ sandhāyāha. Sivanti seṭṭhaṃ . Jhāyāmīti dvīhi jhānehi jhāyāmi. Visāradoti vigatasārajjo. Aṭṭhamaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৮. কট্ঠহারসুত্তং • 8. Kaṭṭhahārasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৮. কট্ঠহারসুত্তৰণ্ণনা • 8. Kaṭṭhahārasuttavaṇṇanā
