| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৮. কট্ঠহারসুত্তৰণ্ণনা
8. Kaṭṭhahārasuttavaṇṇanā
২০৪. ধম্মন্তেৰাসিকাতি কিঞ্চিপি ধনং অদত্ৰা কেৰলং অন্তেৰাসিকা। তেনাহ ‘‘ৰেয্যাৰচ্চং কত্ৰা সিপ্পুগ্গণ্হনকা’’তি। গম্ভীরসভাৰেতি সমন্ততো দূরতো গহনসচ্ছন্নৰিপুলতররুক্খগচ্ছলতায চ, তদা হিমপিণ্ডসিন্নভাৰেন মযূরযানেহি পতিট্ঠাতুং অসক্কুণেয্যতায চ গম্ভীরভাৰে।
204.Dhammantevāsikāti kiñcipi dhanaṃ adatvā kevalaṃ antevāsikā. Tenāha ‘‘veyyāvaccaṃ katvā sippuggaṇhanakā’’ti. Gambhīrasabhāveti samantato dūrato gahanasacchannavipulatararukkhagacchalatāya ca, tadā himapiṇḍasinnabhāvena mayūrayānehi patiṭṭhātuṃ asakkuṇeyyatāya ca gambhīrabhāve.
বহুভেরৰেতি বহুভযানকে। অনিঞ্জমানেনাতি ইত্থম্ভূতত্থে করণৰচনং। অতিসুন্দরং ৰতাতি এৰং সন্তে নাম অরঞ্ঞে এৰং নিচ্চলকাযো নিসিন্নো ঝাযন্তো অতিৰিয সুন্দরঞ্চ ঝানং ঝাযসীতি ৰদতি।
Bahubheraveti bahubhayānake. Aniñjamānenāti itthambhūtatthe karaṇavacanaṃ. Atisundaraṃ vatāti evaṃ sante nāma araññe evaṃ niccalakāyo nisinno jhāyanto ativiya sundarañca jhānaṃ jhāyasīti vadati.
অচ্ছেররূপন্তি অচ্ছরিযভাৰং। সেট্ঠপ্পত্তিযাতি সেট্ঠভাৰপ্পত্তিযা।
Accherarūpanti acchariyabhāvaṃ. Seṭṭhappattiyāti seṭṭhabhāvappattiyā.
‘‘লোকাধিপতিসহব্যতং আকঙ্খমানো’’তি ইমিনা ব্রাহ্মণো লোকাধিপতিসহযোগং পুচ্ছতি, ‘‘কস্মা ভৰ’’ন্তিআদিনা পন তদঞ্ঞৰিসেসাকঙ্খং পুচ্ছতীতি আহ ‘‘অপরেনপি আকারেন পুচ্ছতী’’তি।
‘‘Lokādhipatisahabyataṃ ākaṅkhamāno’’ti iminā brāhmaṇo lokādhipatisahayogaṃ pucchati, ‘‘kasmā bhava’’ntiādinā pana tadaññavisesākaṅkhaṃ pucchatīti āha ‘‘aparenapi ākārena pucchatī’’ti.
কঙ্খাতি তণ্হা অভিক্খণৰসেন পৰত্তা। অনেকসভাৰেসূতি রূপাদিৰসেন অজ্ঝত্তিকাদিৰসেন এৰং নানাসভাৰেসু আরম্মণেসু। অস্সাদরাগো লোভো অভিজ্ঝাতি নানপ্পকারা। সেসকিলেসা ৰা দিট্ঠিমানদোসাদযো। নিচ্চকালং অৰস্সিতা সত্তানং অৰস্সযভাৰত্তা। পজপ্পাপনৰসেনাতি পকারেহি তণ্হাযনৰসেন। নিরন্তাতি অন্তরহিতা নিরৰসেসা।
Kaṅkhāti taṇhā abhikkhaṇavasena pavattā. Anekasabhāvesūti rūpādivasena ajjhattikādivasena evaṃ nānāsabhāvesu ārammaṇesu. Assādarāgo lobho abhijjhāti nānappakārā. Sesakilesā vā diṭṭhimānadosādayo. Niccakālaṃ avassitā sattānaṃ avassayabhāvattā. Pajappāpanavasenāti pakārehi taṇhāyanavasena. Nirantāti antarahitā niravasesā.
অনুপগমনোতি অনুপাদানো। সব্বঞ্ঞুতঞ্ঞাণং দীপেতি, তস্স হি ৰসেন এৰ নানাসভাৰেসু ভগৰা সমন্তচক্খুনা পস্সতীতি ‘‘সব্বে…পে॰… দস্সনো’’তি ৰুচ্চতি। অরহত্তং সন্ধাযাহ, তঞ্হি নিপ্পরিযাযতো ‘‘অনুত্তর’’ন্তি ৰুচ্চতি।
Anupagamanoti anupādāno. Sabbaññutaññāṇaṃ dīpeti, tassa hi vasena eva nānāsabhāvesu bhagavā samantacakkhunā passatīti ‘‘sabbe…pe… dassano’’ti vuccati. Arahattaṃ sandhāyāha, tañhi nippariyāyato ‘‘anuttara’’nti vuccati.
কট্ঠহারসুত্তৰণ্ণনা নিট্ঠিতা।
Kaṭṭhahārasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৮. কট্ঠহারসুত্তং • 8. Kaṭṭhahārasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৮. কট্ঠহারসুত্তৰণ্ণনা • 8. Kaṭṭhahārasuttavaṇṇanā
