| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៨. កដ្ឋហារសុត្តវណ្ណនា
8. Kaṭṭhahārasuttavaṇṇanā
២០៤. ធម្មន្តេវាសិកាតិ កិញ្ចិបិ ធនំ អទត្វា កេវលំ អន្តេវាសិកា។ តេនាហ ‘‘វេយ្យាវច្ចំ កត្វា សិប្បុគ្គណ្ហនកា’’តិ។ គម្ភីរសភាវេតិ សមន្តតោ ទូរតោ គហនសច្ឆន្នវិបុលតររុក្ខគច្ឆលតាយ ច, តទា ហិមបិណ្ឌសិន្នភាវេន មយូរយានេហិ បតិដ្ឋាតុំ អសក្កុណេយ្យតាយ ច គម្ភីរភាវេ។
204.Dhammantevāsikāti kiñcipi dhanaṃ adatvā kevalaṃ antevāsikā. Tenāha ‘‘veyyāvaccaṃ katvā sippuggaṇhanakā’’ti. Gambhīrasabhāveti samantato dūrato gahanasacchannavipulatararukkhagacchalatāya ca, tadā himapiṇḍasinnabhāvena mayūrayānehi patiṭṭhātuṃ asakkuṇeyyatāya ca gambhīrabhāve.
ពហុភេរវេតិ ពហុភយានកេ។ អនិញ្ជមានេនាតិ ឥត្ថម្ភូតត្ថេ ករណវចនំ។ អតិសុន្ទរំ វតាតិ ឯវំ សន្តេ នាម អរញ្ញេ ឯវំ និច្ចលកាយោ និសិន្នោ ឈាយន្តោ អតិវិយ សុន្ទរញ្ច ឈានំ ឈាយសីតិ វទតិ។
Bahubheraveti bahubhayānake. Aniñjamānenāti itthambhūtatthe karaṇavacanaṃ. Atisundaraṃ vatāti evaṃ sante nāma araññe evaṃ niccalakāyo nisinno jhāyanto ativiya sundarañca jhānaṃ jhāyasīti vadati.
អច្ឆេររូបន្តិ អច្ឆរិយភាវំ។ សេដ្ឋប្បត្តិយាតិ សេដ្ឋភាវប្បត្តិយា។
Accherarūpanti acchariyabhāvaṃ. Seṭṭhappattiyāti seṭṭhabhāvappattiyā.
‘‘លោកាធិបតិសហព្យតំ អាកង្ខមានោ’’តិ ឥមិនា ព្រាហ្មណោ លោកាធិបតិសហយោគំ បុច្ឆតិ, ‘‘កស្មា ភវ’’ន្តិអាទិនា បន តទញ្ញវិសេសាកង្ខំ បុច្ឆតីតិ អាហ ‘‘អបរេនបិ អាការេន បុច្ឆតី’’តិ។
‘‘Lokādhipatisahabyataṃ ākaṅkhamāno’’ti iminā brāhmaṇo lokādhipatisahayogaṃ pucchati, ‘‘kasmā bhava’’ntiādinā pana tadaññavisesākaṅkhaṃ pucchatīti āha ‘‘aparenapi ākārena pucchatī’’ti.
កង្ខាតិ តណ្ហា អភិក្ខណវសេន បវត្តា។ អនេកសភាវេសូតិ រូបាទិវសេន អជ្ឈត្តិកាទិវសេន ឯវំ នានាសភាវេសុ អារម្មណេសុ។ អស្សាទរាគោ លោភោ អភិជ្ឈាតិ នានប្បការា។ សេសកិលេសា វា ទិដ្ឋិមានទោសាទយោ។ និច្ចកាលំ អវស្សិតា សត្តានំ អវស្សយភាវត្តា។ បជប្បាបនវសេនាតិ បការេហិ តណ្ហាយនវសេន។ និរន្តាតិ អន្តរហិតា និរវសេសា។
Kaṅkhāti taṇhā abhikkhaṇavasena pavattā. Anekasabhāvesūti rūpādivasena ajjhattikādivasena evaṃ nānāsabhāvesu ārammaṇesu. Assādarāgo lobho abhijjhāti nānappakārā. Sesakilesā vā diṭṭhimānadosādayo. Niccakālaṃ avassitā sattānaṃ avassayabhāvattā. Pajappāpanavasenāti pakārehi taṇhāyanavasena. Nirantāti antarahitā niravasesā.
អនុបគមនោតិ អនុបាទានោ។ សព្ពញ្ញុតញ្ញាណំ ទីបេតិ, តស្ស ហិ វសេន ឯវ នានាសភាវេសុ ភគវា សមន្តចក្ខុនា បស្សតីតិ ‘‘សព្ពេ…បេ.… ទស្សនោ’’តិ វុច្ចតិ។ អរហត្តំ សន្ធាយាហ, តញ្ហិ និប្បរិយាយតោ ‘‘អនុត្តរ’’ន្តិ វុច្ចតិ។
Anupagamanoti anupādāno. Sabbaññutaññāṇaṃ dīpeti, tassa hi vasena eva nānāsabhāvesu bhagavā samantacakkhunā passatīti ‘‘sabbe…pe… dassano’’ti vuccati. Arahattaṃ sandhāyāha, tañhi nippariyāyato ‘‘anuttara’’nti vuccati.
កដ្ឋហារសុត្តវណ្ណនា និដ្ឋិតា។
Kaṭṭhahārasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៨. កដ្ឋហារសុត្តំ • 8. Kaṭṭhahārasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៨. កដ្ឋហារសុត្តវណ្ណនា • 8. Kaṭṭhahārasuttavaṇṇanā
