| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၈. ကဋ္ဌဟာရသုတ္တဝဏ္ဏနာ
8. Kaṭṭhahārasuttavaṇṇanā
၂၀၄. ဓမ္မန္တေဝာသိကာတိ ကိဉ္စိပိ ဓနံ အဒတ္ဝာ ကေဝလံ အန္တေဝာသိကာ။ တေနာဟ ‘‘ဝေယ္ယာဝစ္စံ ကတ္ဝာ သိပ္ပုဂ္ဂဏ္ဟနကာ’’တိ။ ဂမ္ဘီရသဘာဝေတိ သမန္တတော ဒူရတော ဂဟနသစ္ဆန္နဝိပုလတရရုက္ခဂစ္ဆလတာယ စ, တဒာ ဟိမပိဏ္ဍသိန္နဘာဝေန မယူရယာနေဟိ ပတိဋ္ဌာတုံ အသက္ကုဏေယ္ယတာယ စ ဂမ္ဘီရဘာဝေ။
204.Dhammantevāsikāti kiñcipi dhanaṃ adatvā kevalaṃ antevāsikā. Tenāha ‘‘veyyāvaccaṃ katvā sippuggaṇhanakā’’ti. Gambhīrasabhāveti samantato dūrato gahanasacchannavipulatararukkhagacchalatāya ca, tadā himapiṇḍasinnabhāvena mayūrayānehi patiṭṭhātuṃ asakkuṇeyyatāya ca gambhīrabhāve.
ဗဟုဘေရဝေတိ ဗဟုဘယာနကေ။ အနိဉ္ဇမာနေနာတိ ဣတ္ထမ္ဘူတတ္ထေ ကရဏဝစနံ။ အတိသုန္ဒရံ ဝတာတိ ဧဝံ သန္တေ နာမ အရညေ ဧဝံ နိစ္စလကာယော နိသိန္နော ဈာယန္တော အတိဝိယ သုန္ဒရဉ္စ ဈာနံ ဈာယသီတိ ဝဒတိ။
Bahubheraveti bahubhayānake. Aniñjamānenāti itthambhūtatthe karaṇavacanaṃ. Atisundaraṃ vatāti evaṃ sante nāma araññe evaṃ niccalakāyo nisinno jhāyanto ativiya sundarañca jhānaṃ jhāyasīti vadati.
အစ္ဆေရရူပန္တိ အစ္ဆရိယဘာဝံ။ သေဋ္ဌပ္ပတ္တိယာတိ သေဋ္ဌဘာဝပ္ပတ္တိယာ။
Accherarūpanti acchariyabhāvaṃ. Seṭṭhappattiyāti seṭṭhabhāvappattiyā.
‘‘လောကာဓိပတိသဟဗ္ယတံ အာကင္ခမာနော’’တိ ဣမိနာ ဗ္ရာဟ္မဏော လောကာဓိပတိသဟယောဂံ ပုစ္ဆတိ, ‘‘ကသ္မာ ဘဝ’’န္တိအာဒိနာ ပန တဒညဝိသေသာကင္ခံ ပုစ္ဆတီတိ အာဟ ‘‘အပရေနပိ အာကာရေန ပုစ္ဆတီ’’တိ။
‘‘Lokādhipatisahabyataṃ ākaṅkhamāno’’ti iminā brāhmaṇo lokādhipatisahayogaṃ pucchati, ‘‘kasmā bhava’’ntiādinā pana tadaññavisesākaṅkhaṃ pucchatīti āha ‘‘aparenapi ākārena pucchatī’’ti.
ကင္ခာတိ တဏ္ဟာ အဘိက္ခဏဝသေန ပဝတ္တာ။ အနေကသဘာဝေသူတိ ရူပာဒိဝသေန အဇ္ဈတ္တိကာဒိဝသေန ဧဝံ နာနာသဘာဝေသု အာရမ္မဏေသု။ အသ္သာဒရာဂော လောဘော အဘိဇ္ဈာတိ နာနပ္ပကာရာ။ သေသကိလေသာ ဝာ ဒိဋ္ဌိမာနဒောသာဒယော။ နိစ္စကာလံ အဝသ္သိတာ သတ္တာနံ အဝသ္သယဘာဝတ္တာ။ ပဇပ္ပာပနဝသေနာတိ ပကာရေဟိ တဏ္ဟာယနဝသေန။ နိရန္တာတိ အန္တရဟိတာ နိရဝသေသာ။
Kaṅkhāti taṇhā abhikkhaṇavasena pavattā. Anekasabhāvesūti rūpādivasena ajjhattikādivasena evaṃ nānāsabhāvesu ārammaṇesu. Assādarāgo lobho abhijjhāti nānappakārā. Sesakilesā vā diṭṭhimānadosādayo. Niccakālaṃ avassitā sattānaṃ avassayabhāvattā. Pajappāpanavasenāti pakārehi taṇhāyanavasena. Nirantāti antarahitā niravasesā.
အနုပဂမနောတိ အနုပာဒာနော။ သဗ္ဗညုတညာဏံ ဒီပေတိ, တသ္သ ဟိ ဝသေန ဧဝ နာနာသဘာဝေသု ဘဂဝာ သမန္တစက္ခုနာ ပသ္သတီတိ ‘‘သဗ္ဗေ။ပေ.။ ဒသ္သနော’’တိ ဝုစ္စတိ။ အရဟတ္တံ သန္ဓာယာဟ, တဉ္ဟိ နိပ္ပရိယာယတော ‘‘အနုတ္တရ’’န္တိ ဝုစ္စတိ။
Anupagamanoti anupādāno. Sabbaññutaññāṇaṃ dīpeti, tassa hi vasena eva nānāsabhāvesu bhagavā samantacakkhunā passatīti ‘‘sabbe…pe… dassano’’ti vuccati. Arahattaṃ sandhāyāha, tañhi nippariyāyato ‘‘anuttara’’nti vuccati.
ကဋ္ဌဟာရသုတ္တဝဏ္ဏနာ နိဋ္ဌိတာ။
Kaṭṭhahārasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၈. ကဋ္ဌဟာရသုတ္တံ • 8. Kaṭṭhahārasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၈. ကဋ္ဌဟာရသုတ္တဝဏ္ဏနာ • 8. Kaṭṭhahārasuttavaṇṇanā
