| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) |
೮. ಕಟ್ಠಹಾರಸುತ್ತವಣ್ಣನಾ
8. Kaṭṭhahārasuttavaṇṇanā
೨೦೪. ಅಟ್ಠಮೇ ಅನ್ತೇವಾಸಿಕಾತಿ ವೇಯ್ಯಾವಚ್ಚಂ ಕತ್ವಾ ಸಿಪ್ಪುಗ್ಗಣ್ಹನಕಾ ಧಮ್ಮನ್ತೇವಾಸಿಕಾ। ನಿಸಿನ್ನನ್ತಿ ಛಬ್ಬಣ್ಣರಸ್ಮಿಯೋ ವಿಸ್ಸಜ್ಜೇತ್ವಾ ನಿಸಿನ್ನಂ। ಗಮ್ಭೀರರೂಪೇತಿ ಗಮ್ಭೀರಸಭಾವೇ।
204. Aṭṭhame antevāsikāti veyyāvaccaṃ katvā sippuggaṇhanakā dhammantevāsikā. Nisinnanti chabbaṇṇarasmiyo vissajjetvā nisinnaṃ. Gambhīrarūpeti gambhīrasabhāve.
ಬಹುಭೇರವೇತಿ ತತ್ರಟ್ಠಕಸವಿಞ್ಞಾಣಕಅವಿಞ್ಞಾಣಕಭೇರವೇಹಿ ಬಹುಭೇರವೇ। ವಿಗಾಹಿಯಾತಿ ಅನುಪವಿಸಿತ್ವಾ। ಅನಿಞ್ಜಮಾನೇನಾತಿಆದೀನಿ ಕಾಯವಿಸೇಸನಾನಿ, ಏವರೂಪೇನ ಕಾಯೇನಾತಿ ಅತ್ಥೋ। ಸುಚಾರುರೂಪಂ ವತಾತಿ ಅತಿಸುನ್ದರಂ ವತ ಝಾನಂ ಝಾಯಸೀತಿ ವದತಿ।
Bahubheraveti tatraṭṭhakasaviññāṇakaaviññāṇakabheravehi bahubherave. Vigāhiyāti anupavisitvā. Aniñjamānenātiādīni kāyavisesanāni, evarūpena kāyenāti attho. Sucārurūpaṃ vatāti atisundaraṃ vata jhānaṃ jhāyasīti vadati.
ವನವಸ್ಸಿತೋ ಮುನೀತಿ ವನಂ ಅವಸ್ಸಿತೋ ಬುದ್ಧಮುನಿ। ಇದನ್ತಿ ಇದಂ ತುಮ್ಹಾಕಂ ಏವಂ ವನೇ ನಿಸಿನ್ನಕಾರಣಂ ಮಯ್ಹಂ ಅಚ್ಛೇರರೂಪಂ ಪಟಿಭಾತಿ। ಪೀತಿಮನೋತಿ ತುಟ್ಠಚಿತ್ತೋ। ವನೇ ವಸೇತಿ ವನಮ್ಹಿ ವಸಿ।
Vanavassito munīti vanaṃ avassito buddhamuni. Idanti idaṃ tumhākaṃ evaṃ vane nisinnakāraṇaṃ mayhaṃ accherarūpaṃ paṭibhāti. Pītimanoti tuṭṭhacitto. Vane vaseti vanamhi vasi.
ಮಞ್ಞಾಮಹನ್ತಿ ಮಞ್ಞಾಮಿ ಅಹಂ। ಲೋಕಾಧಿಪತಿಸಹಬ್ಯತನ್ತಿ ಲೋಕಾಧಿಪತಿಮಹಾಬ್ರಹ್ಮುನಾ ಸಹಭಾವಂ। ಆಕಙ್ಖಮಾನೋತಿ ಇಚ್ಛಮಾನೋ। ತಿದಿವಂ ಅನುತ್ತರನ್ತಿ ಇದಂ ಬ್ರಹ್ಮಲೋಕಮೇವ ಸನ್ಧಾಯಾಹ। ಕಸ್ಮಾ ಭವಂ ವಿಜನಮರಞ್ಞಮಸ್ಸಿತೋತಿ ಅಹಂ ತಾವ ಬ್ರಹ್ಮಲೋಕಂ ಆಕಙ್ಖಮಾನೋತಿ ಮಞ್ಞಾಮಿ। ಯದಿ ಏವಂ ನ ಹೋತಿ, ಅಥ ಮೇ ಆಚಿಕ್ಖ, ಕಸ್ಮಾ ಭವನ್ತಿ? ಪುಚ್ಛತಿ। ಬ್ರಹ್ಮಪತ್ತಿಯಾತಿ ಸೇಟ್ಠಪತ್ತಿಯಾ । ಇಧ ಇದಂ ತಪೋ ಕಸ್ಮಾ ಕರೋಸೀತಿ ಅಪರೇನಪಿ ಆಕಾರೇನ ಪುಚ್ಛತಿ।
Maññāmahanti maññāmi ahaṃ. Lokādhipatisahabyatanti lokādhipatimahābrahmunā sahabhāvaṃ. Ākaṅkhamānoti icchamāno. Tidivaṃ anuttaranti idaṃ brahmalokameva sandhāyāha. Kasmā bhavaṃ vijanamaraññamassitoti ahaṃ tāva brahmalokaṃ ākaṅkhamānoti maññāmi. Yadi evaṃ na hoti, atha me ācikkha, kasmā bhavanti? Pucchati. Brahmapattiyāti seṭṭhapattiyā . Idha idaṃ tapo kasmā karosīti aparenapi ākārena pucchati.
ಕಙ್ಖಾತಿ ತಣ್ಹಾ। ಅಭಿನನ್ದನಾತಿ ಅಭಿನನ್ದನವಸೇನ ತಣ್ಹಾವ ವುತ್ತಾ। ಅನೇಕಧಾತೂಸೂತಿ ಅನೇಕಸಭಾವೇಸು ಆರಮ್ಮಣೇಸು। ಪುಥೂತಿ ನಾನಪ್ಪಕಾರಾ ತಣ್ಹಾ ಸೇಸಕಿಲೇಸಾ ವಾ। ಸದಾಸಿತಾತಿ ನಿಚ್ಚಕಾಲಂ ಅವಸ್ಸಿತಾ। ಅಞ್ಞಾಣಮೂಲಪ್ಪಭವಾತಿ ಅವಿಜ್ಜಾಮೂಲಾ ಹುತ್ವಾ ಜಾತಾ। ಪಜಪ್ಪಿತಾತಿ ತಣ್ಹಾವ ‘‘ಇದಮ್ಪಿ ಮಯ್ಹಂ, ಇದಮ್ಪಿ ಮಯ್ಹ’’ನ್ತಿ ಪಜಪ್ಪಾಪನವಸೇನ ಪಜಪ್ಪಿತಾ ನಾಮಾತಿ ವುತ್ತಾ। ಸಬ್ಬಾ ಮಯಾ ಬ್ಯನ್ತಿಕತಾತಿ ಸಬ್ಬಾ ತಣ್ಹಾ ಮಯಾ ಅಗ್ಗಮಗ್ಗೇನ ವಿಗತನ್ತಾ ನಿರನ್ತಾ ಕತಾ। ಸಮೂಲಿಕಾತಿ ಸದ್ಧಿಂ ಅಞ್ಞಾಣಮೂಲೇನ।
Kaṅkhāti taṇhā. Abhinandanāti abhinandanavasena taṇhāva vuttā. Anekadhātūsūti anekasabhāvesu ārammaṇesu. Puthūti nānappakārā taṇhā sesakilesā vā. Sadāsitāti niccakālaṃ avassitā. Aññāṇamūlappabhavāti avijjāmūlā hutvā jātā. Pajappitāti taṇhāva ‘‘idampi mayhaṃ, idampi mayha’’nti pajappāpanavasena pajappitā nāmāti vuttā. Sabbā mayā byantikatāti sabbā taṇhā mayā aggamaggena vigatantā nirantā katā. Samūlikāti saddhiṃ aññāṇamūlena.
ಅನೂಪಯೋತಿ ಅನುಪಗಮನೋ। ಸಬ್ಬೇಸು ಧಮ್ಮೇಸು ವಿಸುದ್ಧದಸ್ಸನೋತಿ ಇಮಿನಾ ಸಬ್ಬಞ್ಞುತಞ್ಞಾಣಂ ದೀಪೇತಿ। ಸಮ್ಬೋಧಿಮನುತ್ತರನ್ತಿ ಅರಹತ್ತಂ ಸನ್ಧಾಯಾಹ। ಸಿವನ್ತಿ ಸೇಟ್ಠಂ । ಝಾಯಾಮೀತಿ ದ್ವೀಹಿ ಝಾನೇಹಿ ಝಾಯಾಮಿ। ವಿಸಾರದೋತಿ ವಿಗತಸಾರಜ್ಜೋ। ಅಟ್ಠಮಂ।
Anūpayoti anupagamano. Sabbesu dhammesu visuddhadassanoti iminā sabbaññutaññāṇaṃ dīpeti. Sambodhimanuttaranti arahattaṃ sandhāyāha. Sivanti seṭṭhaṃ . Jhāyāmīti dvīhi jhānehi jhāyāmi. Visāradoti vigatasārajjo. Aṭṭhamaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೮. ಕಟ್ಠಹಾರಸುತ್ತಂ • 8. Kaṭṭhahārasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೮. ಕಟ್ಠಹಾರಸುತ್ತವಣ್ಣನಾ • 8. Kaṭṭhahārasuttavaṇṇanā
