| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
8. කට්‌ඨහාරසුත්‌තවණ්‌ණනා
8. Kaṭṭhahārasuttavaṇṇanā
204. ධම්‌මන්‌තෙවාසිකාති කිඤ්‌චිපි ධනං අදත්‌වා කෙවලං අන්‌තෙවාසිකා. තෙනාහ ‘‘වෙය්‍යාවච්‌චං කත්‌වා සිප්‌පුග්‌ගණ්‌හනකා’’ති. ගම්‌භීරසභාවෙති සමන්‌තතො දූරතො ගහනසච්‌ඡන්‌නවිපුලතරරුක්‌ඛගච්‌ඡලතාය ච, තදා හිමපිණ්‌ඩසින්‌නභාවෙන මයූරයානෙහි පතිට්‌ඨාතුං අසක්‌කුණෙය්‍යතාය ච ගම්‌භීරභාවෙ.
204.Dhammantevāsikāti kiñcipi dhanaṃ adatvā kevalaṃ antevāsikā. Tenāha ‘‘veyyāvaccaṃ katvā sippuggaṇhanakā’’ti. Gambhīrasabhāveti samantato dūrato gahanasacchannavipulatararukkhagacchalatāya ca, tadā himapiṇḍasinnabhāvena mayūrayānehi patiṭṭhātuṃ asakkuṇeyyatāya ca gambhīrabhāve.
බහුභෙරවෙති බහුභයානකෙ. අනිඤ්‌ජමානෙනාති ඉත්‌ථම්‌භූතත්‌ථෙ කරණවචනං. අතිසුන්‌දරං වතාති එවං සන්‌තෙ නාම අරඤ්‌ඤෙ එවං නිච්‌චලකායො නිසින්‌නො ඣායන්‌තො අතිවිය සුන්‌දරඤ්‌ච ඣානං ඣායසීති වදති.
Bahubheraveti bahubhayānake. Aniñjamānenāti itthambhūtatthe karaṇavacanaṃ. Atisundaraṃ vatāti evaṃ sante nāma araññe evaṃ niccalakāyo nisinno jhāyanto ativiya sundarañca jhānaṃ jhāyasīti vadati.
අච්‌ඡෙරරූපන්‌ති අච්‌ඡරියභාවං. සෙට්‌ඨප්‌පත්‌තියාති සෙට්‌ඨභාවප්‌පත්‌තියා.
Accherarūpanti acchariyabhāvaṃ. Seṭṭhappattiyāti seṭṭhabhāvappattiyā.
‘‘ලොකාධිපතිසහබ්‍යතං ආකඞ්‌ඛමානො’’ති ඉමිනා බ්‍රාහ්‌මණො ලොකාධිපතිසහයොගං පුච්‌ඡති, ‘‘කස්‌මා භව’’න්‌තිආදිනා පන තදඤ්‌ඤවිසෙසාකඞ්‌ඛං පුච්‌ඡතීති ආහ ‘‘අපරෙනපි ආකාරෙන පුච්‌ඡතී’’ති.
‘‘Lokādhipatisahabyataṃ ākaṅkhamāno’’ti iminā brāhmaṇo lokādhipatisahayogaṃ pucchati, ‘‘kasmā bhava’’ntiādinā pana tadaññavisesākaṅkhaṃ pucchatīti āha ‘‘aparenapi ākārena pucchatī’’ti.
කඞ්‌ඛාති තණ්‌හා අභික්‌ඛණවසෙන පවත්‌තා. අනෙකසභාවෙසූති රූපාදිවසෙන අජ්‌ඣත්‌තිකාදිවසෙන එවං නානාසභාවෙසු ආරම්‌මණෙසු. අස්‌සාදරාගො ලොභො අභිජ්‌ඣාති නානප්‌පකාරා. සෙසකිලෙසා වා දිට්‌ඨිමානදොසාදයො. නිච්‌චකාලං අවස්‌සිතා සත්‌තානං අවස්‌සයභාවත්‌තා. පජප්‌පාපනවසෙනාති පකාරෙහි තණ්‌හායනවසෙන. නිරන්‌තාති අන්‌තරහිතා නිරවසෙසා.
Kaṅkhāti taṇhā abhikkhaṇavasena pavattā. Anekasabhāvesūti rūpādivasena ajjhattikādivasena evaṃ nānāsabhāvesu ārammaṇesu. Assādarāgo lobho abhijjhāti nānappakārā. Sesakilesā vā diṭṭhimānadosādayo. Niccakālaṃ avassitā sattānaṃ avassayabhāvattā. Pajappāpanavasenāti pakārehi taṇhāyanavasena. Nirantāti antarahitā niravasesā.
අනුපගමනොති අනුපාදානො. සබ්‌බඤ්‌ඤුතඤ්‌ඤාණං දීපෙති, තස්‌ස හි වසෙන එව නානාසභාවෙසු භගවා සමන්‌තචක්‌ඛුනා පස්‌සතීති ‘‘සබ්‌බෙ…පෙ.… දස්‌සනො’’ති වුච්‌චති. අරහත්‌තං සන්‌ධායාහ, තඤ්‌හි නිප්‌පරියායතො ‘‘අනුත්‌තර’’න්‌ති වුච්‌චති.
Anupagamanoti anupādāno. Sabbaññutaññāṇaṃ dīpeti, tassa hi vasena eva nānāsabhāvesu bhagavā samantacakkhunā passatīti ‘‘sabbe…pe… dassano’’ti vuccati. Arahattaṃ sandhāyāha, tañhi nippariyāyato ‘‘anuttara’’nti vuccati.
කට්‌ඨහාරසුත්‌තවණ්‌ණනා නිට්‌ඨිතා.
Kaṭṭhahārasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 8. කට්‌ඨහාරසුත්‌තං • 8. Kaṭṭhahārasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 8. කට්‌ඨහාරසුත්‌තවණ්‌ණනා • 8. Kaṭṭhahārasuttavaṇṇanā
