| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
152. கட்ட²பாது³காதி³படிக்கே²போ
152. Kaṭṭhapādukādipaṭikkhepo
250. தேன கோ² பன ஸமயேன ச²ப்³ப³க்³கி³யா பி⁴க்கூ² ரத்தியா பச்சூஸஸமயங் பச்சுட்டா²ய கட்ட²பாது³காயோ அபி⁴ருஹித்வா அஜ்ஜோ²காஸே சங்கமந்தி, உச்சாஸத்³தா³ மஹாஸத்³தா³ க²டக²டஸத்³தா³, அனேகவிஹிதங் திரச்சா²னகத²ங் கதெ²ந்தா, ஸெய்யதி²த³ங் 1 – ராஜகத²ங், சோரகத²ங், மஹாமத்தகத²ங், ஸேனாகத²ங், ப⁴யகத²ங், யுத்³த⁴கத²ங், அன்னகத²ங், பானகத²ங், வத்த²கத²ங், ஸயனகத²ங், மாலாகத²ங், க³ந்த⁴கத²ங், ஞாதிகத²ங், யானகத²ங், கா³மகத²ங், நிக³மகத²ங், நக³ரகத²ங், ஜனபத³கத²ங், இத்தி²கத²ங் 2, ஸூரகத²ங், விஸிகா²கத²ங், கும்ப⁴ட்டா²னகத²ங் , புப்³ப³பேதகத²ங், நானத்தகத²ங், லோகக்கா²யிகங், ஸமுத்³த³க்கா²யிகங், இதிப⁴வாப⁴வகத²ங் இதி வா; கீடகம்பி அக்கமித்வா மாரெந்தி, பி⁴க்கூ²பி ஸமாதி⁴ம்ஹா சாவெந்தி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² ரத்தியா பச்சூஸஸமயங் பச்சுட்டா²ய கட்ட²பாது³காயோ அபி⁴ருஹித்வா அஜ்ஜோ²காஸே சங்கமிஸ்ஸந்தி, உச்சாஸத்³தா³ மஹாஸத்³தா³ க²டக²டஸத்³தா³ அனேகவிஹிதங் திரச்சா²னகத²ங் கதெ²ந்தா, ஸெய்யதி²த³ங் – ராஜகத²ங், சோரகத²ங்…பே॰… இதிப⁴வாப⁴வகத²ங் இதி வா, கீடகம்பி அக்கமித்வா மாரெஸ்ஸந்தி, பி⁴க்கூ²பி ஸமாதி⁴ம்ஹா சாவெஸ்ஸந்தீ’’தி. அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர, பி⁴க்க²வே, ச²ப்³ப³க்³கி³யா பி⁴க்கூ² ரத்தியா பச்சூஸஸமயங் பச்சுட்டா²ய கட்ட²பாது³காயோ அபி⁴ருஹித்வா அஜ்ஜோ²காஸே சங்கமந்தி, உச்சாஸத்³தா³ மஹாஸத்³தா³ க²டக²டஸத்³தா³, அனேகவிஹிதங் திரச்சா²னகத²ங் கதெ²ந்தா, ஸெய்யதி²த³ங், – ராஜகத²ங், சோரகத²ங்…பே॰… இதிப⁴வாப⁴வகத²ங் இதி வா, கீடகம்பி அக்கமித்வா மாரெந்தி, பி⁴க்கூ²பி ஸமாதி⁴ம்ஹா சாவெந்தீ’’தி? ‘‘ஸச்சங், ப⁴க³வா’’தி…பே॰… விக³ரஹித்வா த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே, கட்ட²பாது³கா தா⁴ரேதப்³பா³. யோ தா⁴ரெய்ய, ஆபத்தி து³க்கடஸ்ஸா’’தி.
250. Tena kho pana samayena chabbaggiyā bhikkhū rattiyā paccūsasamayaṃ paccuṭṭhāya kaṭṭhapādukāyo abhiruhitvā ajjhokāse caṅkamanti, uccāsaddā mahāsaddā khaṭakhaṭasaddā, anekavihitaṃ tiracchānakathaṃ kathentā, seyyathidaṃ 3 – rājakathaṃ, corakathaṃ, mahāmattakathaṃ, senākathaṃ, bhayakathaṃ, yuddhakathaṃ, annakathaṃ, pānakathaṃ, vatthakathaṃ, sayanakathaṃ, mālākathaṃ, gandhakathaṃ, ñātikathaṃ, yānakathaṃ, gāmakathaṃ, nigamakathaṃ, nagarakathaṃ, janapadakathaṃ, itthikathaṃ 4, sūrakathaṃ, visikhākathaṃ, kumbhaṭṭhānakathaṃ , pubbapetakathaṃ, nānattakathaṃ, lokakkhāyikaṃ, samuddakkhāyikaṃ, itibhavābhavakathaṃ iti vā; kīṭakampi akkamitvā mārenti, bhikkhūpi samādhimhā cāventi. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū rattiyā paccūsasamayaṃ paccuṭṭhāya kaṭṭhapādukāyo abhiruhitvā ajjhokāse caṅkamissanti, uccāsaddā mahāsaddā khaṭakhaṭasaddā anekavihitaṃ tiracchānakathaṃ kathentā, seyyathidaṃ – rājakathaṃ, corakathaṃ…pe… itibhavābhavakathaṃ iti vā, kīṭakampi akkamitvā māressanti, bhikkhūpi samādhimhā cāvessantī’’ti. Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave, chabbaggiyā bhikkhū rattiyā paccūsasamayaṃ paccuṭṭhāya kaṭṭhapādukāyo abhiruhitvā ajjhokāse caṅkamanti, uccāsaddā mahāsaddā khaṭakhaṭasaddā, anekavihitaṃ tiracchānakathaṃ kathentā, seyyathidaṃ, – rājakathaṃ, corakathaṃ…pe… itibhavābhavakathaṃ iti vā, kīṭakampi akkamitvā mārenti, bhikkhūpi samādhimhā cāventī’’ti? ‘‘Saccaṃ, bhagavā’’ti…pe… vigarahitvā dhammiṃ kathaṃ katvā bhikkhū āmantesi – ‘‘na, bhikkhave, kaṭṭhapādukā dhāretabbā. Yo dhāreyya, āpatti dukkaṭassā’’ti.
அத² கோ² ப⁴க³வா ராஜக³ஹே யதா²பி⁴ரந்தங் விஹரித்வா யேன பா³ராணஸீ தேன சாரிகங் பக்காமி. அனுபுப்³பே³ன சாரிகங் சரமானோ யேன பா³ராணஸீ தத³வஸரி. தத்ர ஸுத³ங் ப⁴க³வா பா³ராணஸியங் விஹரதி இஸிபதனே மிக³தா³யே. தேன கோ² பன ஸமயேன ச²ப்³ப³க்³கி³யா பி⁴க்கூ² – ப⁴க³வதா கட்ட²பாது³கா படிக்கி²த்தாதி – தாலதருணே சே²தா³பெத்வா தாலபத்தபாது³காயோ தா⁴ரெந்தி; தானி தாலதருணானி சி²ன்னானி மிலாயந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா ஸக்யபுத்தியா தாலதருணே சே²தா³பெத்வா தாலபத்தபாது³காயோ தா⁴ரெஸ்ஸந்தி; தானி தாலதருணானி சி²ன்னானி மிலாயந்தி; ஏகிந்த்³ரியங் ஸமணா ஸக்யபுத்தியா ஜீவங் விஹேடெ²ந்தீ’’தி. அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர, பி⁴க்க²வே, ச²ப்³ப³க்³கி³யா பி⁴க்கூ² தாலதருணே சே²தா³பெத்வா தாலபத்தபாது³காயோ தா⁴ரெந்தி; தானி தாலதருணானி சி²ன்னானி மிலாயந்தீ’’தி? ஸச்சங் ப⁴க³வாதி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம தே, பி⁴க்க²வே, மோக⁴புரிஸா தாலதருணே சே²தா³பெத்வா தாலபத்தபாது³காயோ தா⁴ரெஸ்ஸந்தி; தானி தாலதருணானி சி²ன்னானி மிலாயந்தி. ஜீவஸஞ்ஞினோ ஹி, பி⁴க்க²வே, மனுஸ்ஸா ருக்க²ஸ்மிங். நேதங், பி⁴க்க²வே, அப்பஸன்னானங் வா பஸாதா³ய…பே॰… விக³ரஹித்வா த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே, தாலபத்தபாது³கா தா⁴ரேதப்³பா³. யோ தா⁴ரெய்ய, ஆபத்தி து³க்கடஸ்ஸா’’தி.
Atha kho bhagavā rājagahe yathābhirantaṃ viharitvā yena bārāṇasī tena cārikaṃ pakkāmi. Anupubbena cārikaṃ caramāno yena bārāṇasī tadavasari. Tatra sudaṃ bhagavā bārāṇasiyaṃ viharati isipatane migadāye. Tena kho pana samayena chabbaggiyā bhikkhū – bhagavatā kaṭṭhapādukā paṭikkhittāti – tālataruṇe chedāpetvā tālapattapādukāyo dhārenti; tāni tālataruṇāni chinnāni milāyanti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā tālataruṇe chedāpetvā tālapattapādukāyo dhāressanti; tāni tālataruṇāni chinnāni milāyanti; ekindriyaṃ samaṇā sakyaputtiyā jīvaṃ viheṭhentī’’ti. Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave, chabbaggiyā bhikkhū tālataruṇe chedāpetvā tālapattapādukāyo dhārenti; tāni tālataruṇāni chinnāni milāyantī’’ti? Saccaṃ bhagavāti. Vigarahi buddho bhagavā…pe… kathañhi nāma te, bhikkhave, moghapurisā tālataruṇe chedāpetvā tālapattapādukāyo dhāressanti; tāni tālataruṇāni chinnāni milāyanti. Jīvasaññino hi, bhikkhave, manussā rukkhasmiṃ. Netaṃ, bhikkhave, appasannānaṃ vā pasādāya…pe… vigarahitvā dhammiṃ kathaṃ katvā bhikkhū āmantesi – ‘‘na, bhikkhave, tālapattapādukā dhāretabbā. Yo dhāreyya, āpatti dukkaṭassā’’ti.
தேன கோ² பன ஸமயேன ச²ப்³ப³க்³கி³யா பி⁴க்கூ² ‘ப⁴க³வதா தாலபத்தபாது³கா படிக்கி²த்தா’தி வேளுதருணே சே²தா³பெத்வா வேளுபத்தபாது³காயோ தா⁴ரெந்தி. தானி வேளுதருணானி சி²ன்னானி மிலாயந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா ஸக்யபுத்தியா வேளுதருணே சே²தா³பெத்வா வேளுபத்தபாது³காயோ தா⁴ரெஸ்ஸந்தி. தானி வேளுதருணானி சி²ன்னானி மிலாயந்தி. ஏகிந்த்³ரியங் ஸமணா ஸக்யபுத்தியா ஜீவங் விஹேடெ²ந்தீ’’தி. அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰… ஜீவஸஞ்ஞினோ ஹி, பி⁴க்க²வே, மனுஸ்ஸா ருக்க²ஸ்மிங்…பே॰… ந, பி⁴க்க²வே, வேளுபத்தபாது³கா தா⁴ரேதப்³பா³. யோ தா⁴ரெய்ய, ஆபத்தி து³க்கடஸ்ஸாதி.
Tena kho pana samayena chabbaggiyā bhikkhū ‘bhagavatā tālapattapādukā paṭikkhittā’ti veḷutaruṇe chedāpetvā veḷupattapādukāyo dhārenti. Tāni veḷutaruṇāni chinnāni milāyanti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā veḷutaruṇe chedāpetvā veḷupattapādukāyo dhāressanti. Tāni veḷutaruṇāni chinnāni milāyanti. Ekindriyaṃ samaṇā sakyaputtiyā jīvaṃ viheṭhentī’’ti. Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho te bhikkhū bhagavato etamatthaṃ ārocesuṃ…pe… jīvasaññino hi, bhikkhave, manussā rukkhasmiṃ…pe… na, bhikkhave, veḷupattapādukā dhāretabbā. Yo dhāreyya, āpatti dukkaṭassāti.
251. அத² கோ² ப⁴க³வா பா³ராணஸியங் யதா²பி⁴ரந்தங் விஹரித்வா யேன ப⁴த்³தி³யங் தேன சாரிகங் பக்காமி. அனுபுப்³பே³ன சாரிகங் சரமானோ யேன ப⁴த்³தி³யங் தத³வஸரி. தத்ர ஸுத³ங் ப⁴க³வா ப⁴த்³தி³யே விஹரதி ஜாதியா வனே. தேன கோ² பன ஸமயேன ப⁴த்³தி³யா பி⁴க்கூ² அனேகவிஹிதங் பாது³கமண்ட³னானுயோக³மனுயுத்தா விஹரந்தி, திணபாது³கங் கரொந்திபி காராபெந்திபி, முஞ்ஜபாது³கங் கரொந்திபி காராபெந்திபி, பப்³ப³ஜபாது³கங் கரொந்திபி காராபெந்திபி, ஹிந்தாலபாது³கங் கரொந்திபி காராபெந்திபி, கமலபாது³கங் கரொந்திபி காராபெந்திபி, கம்ப³லபாது³கங் கரொந்திபி காராபெந்திபி, ரிஞ்சந்தி உத்³தே³ஸங் பரிபுச்ச²ங் அதி⁴ஸீலங் அதி⁴சித்தங் அதி⁴பஞ்ஞங். யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ப⁴த்³தி³யா பி⁴க்கூ² அனேகவிஹிதங் பாது³கமண்ட³னானுயோக³மனுயுத்தா விஹரிஸ்ஸந்தி, திணபாது³கங் கரிஸ்ஸந்திபி காராபெஸ்ஸந்திபி, முஞ்ஜபாது³கங் கரிஸ்ஸந்திபி காராபெஸ்ஸந்திபி, பப்³ப³ஜபாது³கங் கரிஸ்ஸந்திபி காராபெஸ்ஸந்திபி, ஹிந்தாலபாது³கங் கரிஸ்ஸந்திபி காராபெஸ்ஸந்திபி, கமலபாது³கங் கரிஸ்ஸந்திபி காராபெஸ்ஸந்திபி, கம்ப³லபாது³கங் கரிஸ்ஸந்திபி காராபெஸ்ஸந்திபி, ரிஞ்சிஸ்ஸந்தி உத்³தே³ஸங் பரிபுச்ச²ங் அதி⁴ஸீலங் அதி⁴சித்தங் அதி⁴பஞ்ஞ’’ந்தி. அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர, பி⁴க்க²வே, ப⁴த்³தி³யா பி⁴க்கூ² அனேகவிஹிதங் பாது³கமண்ட³னானுயோக³மனுயுத்தா விஹரந்தி, திணபாது³கங் கரொந்திபி காராபெந்திபி…பே॰… ரிஞ்சந்தி உத்³தே³ஸங் பரிபுச்ச²ங் அதி⁴ஸீலங் அதி⁴சித்தங் அதி⁴பஞ்ஞ’’ந்தி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… ‘‘கத²ஞ்ஹி நாம தே, பி⁴க்க²வே, மோக⁴புரிஸா அனேகவிஹிதங் பாது³கமண்ட³னானுயோக³மனுயுத்தா விஹரிஸ்ஸந்தி, திணபாது³கங் கரிஸ்ஸந்திபி காராபெஸ்ஸந்திபி…பே॰… ரிஞ்சிஸ்ஸந்தி உத்³தே³ஸங் பரிபுச்ச²ங் அதி⁴ஸீலங் அதி⁴சித்தங் அதி⁴பஞ்ஞங். நேதங், பி⁴க்க²வே, அப்பஸன்னானங் வா பஸாதா³ய…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே, திணபாது³கா தா⁴ரேதப்³பா³, ந முஞ்ஜபாது³கா தா⁴ரேதப்³பா³, ந பப்³ப³ஜபாது³கா தா⁴ரேதப்³பா³, ந ஹிந்தாலபாது³கா தா⁴ரேதப்³பா³, ந கமலபாது³கா தா⁴ரேதப்³பா³ , ந கம்ப³லபாது³கா தா⁴ரேதப்³பா³, ந ஸோவண்ணமயா பாது³கா தா⁴ரேதப்³பா³, ந ரூபியமயா பாது³கா தா⁴ரேதப்³பா³, ந மணிமயா பாது³கா தா⁴ரேதப்³பா³, ந வேளுரியமயா பாது³கா தா⁴ரேதப்³பா³, ந ப²லிகமயா பாது³கா தா⁴ரேதப்³பா³, ந கங்ஸமயா பாது³கா தா⁴ரேதப்³பா³, ந காசமயா பாது³கா தா⁴ரேதப்³பா³, ந திபுமயா பாது³கா தா⁴ரேதப்³பா³, ந ஸீஸமயா பாது³கா தா⁴ரேதப்³பா³, ந தம்ப³லோஹமயா பாது³கா தா⁴ரேதப்³பா³. யோ தா⁴ரெய்ய, ஆபத்தி து³க்கடஸ்ஸ. ந ச, பி⁴க்க²வே, காசி ஸங்கமனியா பாது³கா தா⁴ரேதப்³பா³. யோ தா⁴ரெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, திஸ்ஸோ பாது³கா து⁴வட்டா²னியா அஸங்கமனியாயோ – வச்சபாது³கங், பஸ்ஸாவபாது³கங், ஆசமனபாது³க’’ந்தி.
251. Atha kho bhagavā bārāṇasiyaṃ yathābhirantaṃ viharitvā yena bhaddiyaṃ tena cārikaṃ pakkāmi. Anupubbena cārikaṃ caramāno yena bhaddiyaṃ tadavasari. Tatra sudaṃ bhagavā bhaddiye viharati jātiyā vane. Tena kho pana samayena bhaddiyā bhikkhū anekavihitaṃ pādukamaṇḍanānuyogamanuyuttā viharanti, tiṇapādukaṃ karontipi kārāpentipi, muñjapādukaṃ karontipi kārāpentipi, pabbajapādukaṃ karontipi kārāpentipi, hintālapādukaṃ karontipi kārāpentipi, kamalapādukaṃ karontipi kārāpentipi, kambalapādukaṃ karontipi kārāpentipi, riñcanti uddesaṃ paripucchaṃ adhisīlaṃ adhicittaṃ adhipaññaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhaddiyā bhikkhū anekavihitaṃ pādukamaṇḍanānuyogamanuyuttā viharissanti, tiṇapādukaṃ karissantipi kārāpessantipi, muñjapādukaṃ karissantipi kārāpessantipi, pabbajapādukaṃ karissantipi kārāpessantipi, hintālapādukaṃ karissantipi kārāpessantipi, kamalapādukaṃ karissantipi kārāpessantipi, kambalapādukaṃ karissantipi kārāpessantipi, riñcissanti uddesaṃ paripucchaṃ adhisīlaṃ adhicittaṃ adhipañña’’nti. Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave, bhaddiyā bhikkhū anekavihitaṃ pādukamaṇḍanānuyogamanuyuttā viharanti, tiṇapādukaṃ karontipi kārāpentipi…pe… riñcanti uddesaṃ paripucchaṃ adhisīlaṃ adhicittaṃ adhipañña’’nti? ‘‘Saccaṃ, bhagavā’’ti. Vigarahi buddho bhagavā…pe… ‘‘kathañhi nāma te, bhikkhave, moghapurisā anekavihitaṃ pādukamaṇḍanānuyogamanuyuttā viharissanti, tiṇapādukaṃ karissantipi kārāpessantipi…pe… riñcissanti uddesaṃ paripucchaṃ adhisīlaṃ adhicittaṃ adhipaññaṃ. Netaṃ, bhikkhave, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi – ‘‘na, bhikkhave, tiṇapādukā dhāretabbā, na muñjapādukā dhāretabbā, na pabbajapādukā dhāretabbā, na hintālapādukā dhāretabbā, na kamalapādukā dhāretabbā , na kambalapādukā dhāretabbā, na sovaṇṇamayā pādukā dhāretabbā, na rūpiyamayā pādukā dhāretabbā, na maṇimayā pādukā dhāretabbā, na veḷuriyamayā pādukā dhāretabbā, na phalikamayā pādukā dhāretabbā, na kaṃsamayā pādukā dhāretabbā, na kācamayā pādukā dhāretabbā, na tipumayā pādukā dhāretabbā, na sīsamayā pādukā dhāretabbā, na tambalohamayā pādukā dhāretabbā. Yo dhāreyya, āpatti dukkaṭassa. Na ca, bhikkhave, kāci saṅkamaniyā pādukā dhāretabbā. Yo dhāreyya, āpatti dukkaṭassa. Anujānāmi, bhikkhave, tisso pādukā dhuvaṭṭhāniyā asaṅkamaniyāyo – vaccapādukaṃ, passāvapādukaṃ, ācamanapāduka’’nti.
252. அத² கோ² ப⁴க³வா ப⁴த்³தி³யே யதா²பி⁴ரந்தங் விஹரித்வா யேன ஸாவத்தி² தேன சாரிகங் பக்காமி. அனுபுப்³பே³ன சாரிகங் சரமானோ யேன ஸாவத்தி² தத³வஸரி. தத்ர ஸுத³ங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கூ² அசிரவதியா நதி³யா கா³வீனங் தரந்தீனங் விஸாணேஸுபி க³ண்ஹந்தி, கண்ணேஸுபி க³ண்ஹந்தி, கீ³வாயபி க³ண்ஹந்தி, செ²ப்பாபி க³ண்ஹந்தி, பிட்டி²ம்பி அபி⁴ருஹந்தி, ரத்தசித்தாபி அங்க³ஜாதங் சு²பந்தி, வச்ச²தரிம்பி ஓகா³ஹெத்வா மாரெந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா ஸக்யபுத்தியா கா³வீனங் தரந்தீனங் விஸாணேஸுபி க³ஹெஸ்ஸந்தி…பே॰… ஸெய்யதா²பி கி³ஹீ காமபோ⁴கி³னோ’’தி. அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰… ஸச்சங் கிர, பி⁴க்க²வே,…பே॰… ஸச்சங் ப⁴க³வாதி…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே, கா³வீனங் விஸாணேஸு க³ஹேதப்³ப³ங், ந கண்ணேஸு க³ஹேதப்³ப³ங், ந கீ³வாய க³ஹேதப்³ப³ங், ந செ²ப்பாய க³ஹேதப்³ப³ங், ந பிட்டி² அபி⁴ருஹிதப்³பா³ . யோ அபி⁴ருஹெய்ய, ஆபத்தி து³க்கடஸ்ஸ. ந ச, பி⁴க்க²வே, ரத்தசித்தேன அங்க³ஜாதங் சு²பிதப்³ப³ங். யோ சு²பெய்ய, ஆபத்தி து²ல்லச்சயஸ்ஸ. ந வச்ச²தரீ மாரேதப்³பா³. யோ மாரெய்ய, யதா²த⁴ம்மோ காரேதப்³போ³’’தி.
252. Atha kho bhagavā bhaddiye yathābhirantaṃ viharitvā yena sāvatthi tena cārikaṃ pakkāmi. Anupubbena cārikaṃ caramāno yena sāvatthi tadavasari. Tatra sudaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhū aciravatiyā nadiyā gāvīnaṃ tarantīnaṃ visāṇesupi gaṇhanti, kaṇṇesupi gaṇhanti, gīvāyapi gaṇhanti, cheppāpi gaṇhanti, piṭṭhimpi abhiruhanti, rattacittāpi aṅgajātaṃ chupanti, vacchatarimpi ogāhetvā mārenti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā gāvīnaṃ tarantīnaṃ visāṇesupi gahessanti…pe… seyyathāpi gihī kāmabhogino’’ti. Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho te bhikkhū bhagavato etamatthaṃ ārocesuṃ…pe… saccaṃ kira, bhikkhave,…pe… saccaṃ bhagavāti…pe… vigarahitvā…pe… dhammiṃ kathaṃ katvā bhikkhū āmantesi – ‘‘na, bhikkhave, gāvīnaṃ visāṇesu gahetabbaṃ, na kaṇṇesu gahetabbaṃ, na gīvāya gahetabbaṃ, na cheppāya gahetabbaṃ, na piṭṭhi abhiruhitabbā . Yo abhiruheyya, āpatti dukkaṭassa. Na ca, bhikkhave, rattacittena aṅgajātaṃ chupitabbaṃ. Yo chupeyya, āpatti thullaccayassa. Na vacchatarī māretabbā. Yo māreyya, yathādhammo kāretabbo’’ti.
கட்ட²பாது³காதி³படிக்கே²போ நிட்டி²தோ.
Kaṭṭhapādukādipaṭikkhepo niṭṭhito.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / அஜ்ஜா²ராமேஉபாஹனபடிக்கே²பகதா² • Ajjhārāmeupāhanapaṭikkhepakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / கட்ட²பாது³காதி³படிக்கே²பகதா²வண்ணனா • Kaṭṭhapādukādipaṭikkhepakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அஜ்ஜா²ராமேஉபாஹனபடிக்கே²பகதா²தி³வண்ணனா • Ajjhārāmeupāhanapaṭikkhepakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 151. அஜ்ஜா²ராமே உபாஹனபடிக்கே²பகதா² • 151. Ajjhārāme upāhanapaṭikkhepakathā
