| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
33. காயப³ந்த⁴னநித்³தே³ஸவண்ணனா
33. Kāyabandhananiddesavaṇṇanā
235. அகாயப³ந்த⁴னோதி காயப³ந்த⁴னங் அப³ந்தி⁴த்வாதி அத்தோ². ததோ பட்டா²ய சீவரங் பாருபிதப்³ப³ங், ததோ பட்டா²ய ஏவ காயப³ந்த⁴னங் ப³ந்தி⁴தப்³ப³ங். ‘‘ந பி⁴க்க²வே அகாயப³ந்த⁴னேன கா³மோ பவிஸிதப்³போ³. யோ பவிஸெய்ய, ஆபத்தி து³க்கடஸ்ஸா’’தி (சூளவ॰ 278) ஹி வுத்தங். தத்தே²வாஸதியா க³தோதி அஸதியா க³தோ யத்த² ஸரதி, தத்தே²வ ப³ந்தி⁴தப்³ப³ங். ஸரித்வா பன யாவ ந ப³ந்த⁴தி, தாவ பிண்டா³ய சரிதுங் ந வட்டதி. யதி³ அந்தோகா³மே ஸரதி, காயப³ந்த⁴னே ஸதி ஏகமந்தே ட²த்வா ப³ந்தி⁴தப்³ப³ங், அஸதி சே நிக்க²மித்வா ப³ந்தி⁴த்வா புன பிண்டா³ய பவிஸிதப்³ப³ந்தி வத³ந்தி.
235.Akāyabandhanoti kāyabandhanaṃ abandhitvāti attho. Tato paṭṭhāya cīvaraṃ pārupitabbaṃ, tato paṭṭhāya eva kāyabandhanaṃ bandhitabbaṃ. ‘‘Na bhikkhave akāyabandhanena gāmo pavisitabbo. Yo paviseyya, āpatti dukkaṭassā’’ti (cūḷava. 278) hi vuttaṃ. Tatthevāsatiyā gatoti asatiyā gato yattha sarati, tattheva bandhitabbaṃ. Saritvā pana yāva na bandhati, tāva piṇḍāya carituṃ na vaṭṭati. Yadi antogāme sarati, kāyabandhane sati ekamante ṭhatvā bandhitabbaṃ, asati ce nikkhamitvā bandhitvā puna piṇḍāya pavisitabbanti vadanti.
236. ‘‘அனுஜானாமி, பி⁴க்க²வே, த்³வே காயப³ந்த⁴னானி பட்டிகங் ஸூகரந்தக’’ந்தி (சூளவ॰ 278) வுத்தத்தா ‘‘து³வித⁴’’ந்தி வுத்தங். தத்த² ஸூகரந்தங் நாம குஞ்சிகாகோஸகா விய அந்தே ஸுஸிரங் கத்வா கொட்டிதங். ரஜ்ஜு ச ஏகாதி ஏகவட்டா ரஜ்ஜு ச. தத³னுலோமிகாதி தேஸங் த்³வின்னங் அனுலோமிகா.
236. ‘‘Anujānāmi, bhikkhave, dve kāyabandhanāni paṭṭikaṃ sūkarantaka’’nti (cūḷava. 278) vuttattā ‘‘duvidha’’nti vuttaṃ. Tattha sūkarantaṃ nāma kuñcikākosakā viya ante susiraṃ katvā koṭṭitaṃ. Rajju ca ekāti ekavaṭṭā rajju ca. Tadanulomikāti tesaṃ dvinnaṃ anulomikā.
237. மச்ச²கண்ட³கக²ஜ்ஜுரீ-பத்தா மட்டா² ச பட்டிகாதி எத்த² (சூளவ॰ அட்ட²॰ 278) ஏதே மச்ச²கண்டகாத³யோ மட்டா² விகாரரஹிதா பட்டிகா ச தத³ந்தோக³தா⁴தி அதி⁴ப்பாயோ. லப்³பா⁴ த³ஸா சதஸ்ஸோதி ஏகாய வா த்³வீஸு வா தீஸு வா கதா² ஏவ நத்தீ²தி அதி⁴ப்பாயோ, ததோ பரங் ந வட்டதி. அந்தேஸூதி உபோ⁴ஸு அந்தேஸு. கு³ணஸுத்தகந்தி தி³கு³ணஸுத்தகங்.
237.Macchakaṇḍakakhajjurī-pattā maṭṭhā ca paṭṭikāti ettha (cūḷava. aṭṭha. 278) ete macchakaṇṭakādayo maṭṭhā vikārarahitā paṭṭikā ca tadantogadhāti adhippāyo. Labbhā dasā catassoti ekāya vā dvīsu vā tīsu vā kathā eva natthīti adhippāyo, tato paraṃ na vaṭṭati. Antesūti ubhosu antesu. Guṇasuttakanti diguṇasuttakaṃ.
239. மகரமுகா²தி³ந்தி ஆதி³-ஸத்³தே³ன தெ³ட்³டு³ப⁴ஸீஸங் க³ஹிதங். உப⁴ந்தேதி உபோ⁴ஸு அந்தேஸு. கஸ்ஸாதி? வித⁴ஸ்ஸ. க⁴டகாதி க⁴டகதோ. லேகா²தி லேகா²ய. க⁴டகதோ ச லேகா²ய ச அஞ்ஞங் சித்தகங் ந கப்பதீதி அத்தோ².
239.Makaramukhādinti ādi-saddena deḍḍubhasīsaṃ gahitaṃ. Ubhanteti ubhosu antesu. Kassāti? Vidhassa. Ghaṭakāti ghaṭakato. Lekhāti lekhāya. Ghaṭakato ca lekhāya ca aññaṃ cittakaṃ na kappatīti attho.
240. தெ³ட்³டு³ப⁴கந்தி (சூளவ॰ 278; சூளவ॰ அட்ட²॰ 278) உத³கஸப்பஸிரஸதி³ஸங். முரஜந்தி ப³ஹுரஜ்ஜுகே ஏகதோ ஸங்கட்³டி⁴த்வா ஏகாய ரஜ்ஜுயா பலிவேடெ²த்வா கதரஜ்ஜு. மத்³த³வீணந்தி பாமங்க³ஸதி³ஸங். கலாபு³கந்தி அனேகவட்டங். ஏதானி பன ஸப்³பா³னி ந கப்பந்தி. த³ஸாஸு த்³வே மஜ்ஜி²மாதி முரஜங் மத்³த³வீணந்தி த்³வே மஜ்ஜி²மா ஏவ. கப்பரேதி கப்பந்தீதி அத்தோ².
240.Deḍḍubhakanti (cūḷava. 278; cūḷava. aṭṭha. 278) udakasappasirasadisaṃ. Murajanti bahurajjuke ekato saṅkaḍḍhitvā ekāya rajjuyā paliveṭhetvā katarajju. Maddavīṇanti pāmaṅgasadisaṃ. Kalābukanti anekavaṭṭaṃ. Etāni pana sabbāni na kappanti. Dasāsu dve majjhimāti murajaṃ maddavīṇanti dve majjhimā eva. Kappareti kappantīti attho.
241. க³ண்டி²யோ சாபீதி (சூளவ॰ 279) சீவரக³ண்டி²யோபி. வேளுஆதி³மயா கப்பந்தீதி பஸங்கே³ன வுத்தங். காயப³ந்த⁴னவினிச்ச²யோ.
241.Gaṇṭhiyocāpīti (cūḷava. 279) cīvaragaṇṭhiyopi. Veḷuādimayā kappantīti pasaṅgena vuttaṃ. Kāyabandhanavinicchayo.
காயப³ந்த⁴னநித்³தே³ஸவண்ணனா நிட்டி²தா.
Kāyabandhananiddesavaṇṇanā niṭṭhitā.
பட²மபா⁴ணவாரங்.
Paṭhamabhāṇavāraṃ.
