| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
33. காயப³ந்த⁴னநித்³தே³ஸவண்ணனா
33. Kāyabandhananiddesavaṇṇanā
235. ப³ந்தீ⁴யதி அனேனாதி ப³ந்த⁴னங், காயஸ்ஸ ப³ந்த⁴னங் காயப³ந்த⁴னங், நத்தி² காயப³ந்த⁴னமேதஸ்ஸாதி அகாயப³ந்த⁴னோ. து³க்கடந்தி ஸஞ்சிச்ச வா அஸஞ்சிச்ச வா பவிஸெய்ய சே, து³க்கடங். அஸதியா க³தோ யத்த² ஸரதி, தத்தே²வ ப³ந்தெ⁴ய்யாதி ஸம்ப³ந்தோ⁴. க³தோதி அந்தோகா³மங் க³தோ. ஸரித்வா யாவ ந ப³ந்த⁴தி, ந தாவ பிண்டா³ய சரிதப்³ப³ங்.
235. Bandhīyati anenāti bandhanaṃ, kāyassa bandhanaṃ kāyabandhanaṃ, natthi kāyabandhanametassāti akāyabandhano. Dukkaṭanti sañcicca vā asañcicca vā paviseyya ce, dukkaṭaṃ. Asatiyā gato yattha sarati, tattheva bandheyyāti sambandho. Gatoti antogāmaṃ gato. Saritvā yāva na bandhati, na tāva piṇḍāya caritabbaṃ.
236. ‘‘பட்டிகா’’திஆதி³னா ஸப்³ப³ஸங்கா³ஹகங் காயப³ந்த⁴னங் நித்³தி³ஸதி. பட்டிகாதி பகதிவீதா வா மச்ச²கண்டகக²ஜ்ஜூரிபத்தவாயிமா வா. ஸூகரானங் அந்தங் ஸூகரந்தங். இத⁴ பன தங்ஸதி³ஸங் வுச்சதி. சதுரஸ்ஸங் அகத்வா ஸஜ்ஜிதங் முத்³தி³ககாயப³ந்த⁴னம்பி ஸங்க³ஹெத்வா ‘‘ஏகா ரஜ்ஜூ’’தி வுத்தங். தங் பன ரஜ்ஜுகங் ப³ந்த⁴ந்தேன ஏககு³ணமேவ கத்வா ப³ந்தி⁴துங் வட்டதி, மஜ்ஜே² பி⁴ந்தி³த்வா தி³கு³ணங் கத்வா ப³ந்தி⁴துங் ந வட்டதி. தி³கு³ணங் பன அகத்வா ஸதவாரம்பி புனப்புனங் ஆவிஜ்ஜி²த்வா ப³ந்தி⁴துங் வட்டதி, பாமங்க³ஸண்டா²னங் பன ஏகம்பி ந வட்டதி . ப³ஹுரஜ்ஜுகே ஏகதோ கத்வா ஏகேன நிரந்தரங் வேடெ²த்வா கதங் ‘‘ப³ஹுரஜ்ஜுக’’ந்தி ந வத்தப்³ப³ங், தங் வட்டதி. தத³னுலோமிகாதி தேஸங் பட்டிகாஸூகரந்தானங் த்³வின்னங் த்³வே இமே யதா²க்கமமனுலோமிகா.
236.‘‘Paṭṭikā’’tiādinā sabbasaṅgāhakaṃ kāyabandhanaṃ niddisati. Paṭṭikāti pakativītā vā macchakaṇṭakakhajjūripattavāyimā vā. Sūkarānaṃ antaṃ sūkarantaṃ. Idha pana taṃsadisaṃ vuccati. Caturassaṃ akatvā sajjitaṃ muddikakāyabandhanampi saṅgahetvā ‘‘ekā rajjū’’ti vuttaṃ. Taṃ pana rajjukaṃ bandhantena ekaguṇameva katvā bandhituṃ vaṭṭati, majjhe bhinditvā diguṇaṃ katvā bandhituṃ na vaṭṭati. Diguṇaṃ pana akatvā satavārampi punappunaṃ āvijjhitvā bandhituṃ vaṭṭati, pāmaṅgasaṇṭhānaṃ pana ekampi na vaṭṭati . Bahurajjuke ekato katvā ekena nirantaraṃ veṭhetvā kataṃ ‘‘bahurajjuka’’nti na vattabbaṃ, taṃ vaṭṭati. Tadanulomikāti tesaṃ paṭṭikāsūkarantānaṃ dvinnaṃ dve ime yathākkamamanulomikā.
237-8. பட்டிகா கீதி³ஸீ வட்டதீதி ஆஹ ‘‘மச்சா²’’திஆதி³. பட்டிகா மச்ச²கண்டகக²ஜ்ஜூரிபத்தா வா மட்டா² வா லப்³பா⁴தி ஸம்ப³ந்தோ⁴. கண்டக-ஸத்³தே³ன பத்த-ஸத்³தே³ன ச ததா³காரோ வுச்சதி, உபசாரதோ ஹி மச்சா²னங் கண்டகாகாரோ ச க²ஜ்ஜூரீனங் பத்தாகாரோ ச ஏதிஸ்ஸாதி ஸமாஸோ. மட்டா²தி பகதிவீதா. டீகாயங் பன ‘‘ஏதே மச்ச²கண்டகாத³யோ மட்டா² விகாரரஹிதா பட்டிகா ச தத³ந்தோக³தா⁴தி அதி⁴ப்பாயோ’’தி வுத்தங். கத²ங் தேஸமந்தோக³த⁴தா? யதோ தானியேவ பட்டிகா நாமாதி. ததா² ச வுத்தங் அட்ட²கதா²யங் ‘‘பகதிவீதா வா மச்ச²கண்டகவாயிமா வா பட்டிகா வட்டதீ’’தி (சூளவ॰ அட்ட²॰ 278). எத்த² பன மச்ச²கண்டகேயேவ க²ஜ்ஜூரிபத்தங் பவிட்ட²ங். சதஸ்ஸோபி த³ஸா லப்³பா⁴தி ஸம்ப³ந்தோ⁴. சதஸ்ஸோதி உக்கட்ட²பரிச்சே²தே³ன வுத்தங், தஸ்மா ததோ ஊனாபி வட்டந்தி. அந்தேதி காயப³ந்த⁴னஸ்ஸ உப⁴யந்தே தி³கு³ணஸுத்தகங் லப்³ப⁴ந்தி ஸம்ப³ந்தோ⁴. கு³ணோ ப³ந்த⁴னபூ⁴தங் ஸுத்தகங் கு³ணஸுத்தகங். ‘‘கு³ணோ படலராஸீஸு, ஆனிஸங்ஸே ச ப³ந்த⁴னே’’தி ஹி அபி⁴தா⁴னப்பதீ³பிகா. த்³வின்னங் கு³ணஸுத்தகானங் ஸமாஹாரோ தி³கு³ணஸுத்தகங். தங் த³ஸாமுக²ஸ்ஸ தி²ரபா⁴வாய கொட்டேதுங் வட்டதி, ந ஸோப⁴னத்த²ங். தேனாஹ ‘‘மாலாதி³’’ந்திஆதி³.
237-8. Paṭṭikā kīdisī vaṭṭatīti āha ‘‘macchā’’tiādi. Paṭṭikā macchakaṇṭakakhajjūripattā vā maṭṭhā vā labbhāti sambandho. Kaṇṭaka-saddena patta-saddena ca tadākāro vuccati, upacārato hi macchānaṃ kaṇṭakākāro ca khajjūrīnaṃ pattākāro ca etissāti samāso. Maṭṭhāti pakativītā. Ṭīkāyaṃ pana ‘‘ete macchakaṇṭakādayo maṭṭhā vikārarahitā paṭṭikā ca tadantogadhāti adhippāyo’’ti vuttaṃ. Kathaṃ tesamantogadhatā? Yato tāniyeva paṭṭikā nāmāti. Tathā ca vuttaṃ aṭṭhakathāyaṃ ‘‘pakativītā vā macchakaṇṭakavāyimā vā paṭṭikā vaṭṭatī’’ti (cūḷava. aṭṭha. 278). Ettha pana macchakaṇṭakeyeva khajjūripattaṃ paviṭṭhaṃ. Catassopi dasā labbhāti sambandho. Catassoti ukkaṭṭhaparicchedena vuttaṃ, tasmā tato ūnāpi vaṭṭanti. Anteti kāyabandhanassa ubhayante diguṇasuttakaṃ labbhanti sambandho. Guṇo bandhanabhūtaṃ suttakaṃ guṇasuttakaṃ. ‘‘Guṇo paṭalarāsīsu, ānisaṃse ca bandhane’’ti hi abhidhānappadīpikā. Dvinnaṃ guṇasuttakānaṃ samāhāro diguṇasuttakaṃ. Taṃ dasāmukhassa thirabhāvāya koṭṭetuṃ vaṭṭati, na sobhanatthaṃ. Tenāha ‘‘mālādi’’ntiādi.
மாலாதி³ங் கக்கடச்சா²தி³ங் குஞ்ஜரச்சா²தி³ஞ்ச த³ஸ்ஸெத்வா கு³ணஸுத்தககொட்டிதா பட்டிகா ந கப்பதீதி ஸம்ப³ந்தோ⁴. ‘‘மாலாதி³’’ந்திஆதீ³ஸு ஆதி³-ஸத்³தே³ன தாதி³ஸங் யங் கிஞ்சி விகாரரூபங் க³ய்ஹதி. கக்கடானங் விய அச்சீ²னி, தானி ஆதீ³னி யஸ்ஸாதி ஸமாஸோ. ததா² குஞ்ஜரச்சா²தி³ந்தி.
Mālādiṃ kakkaṭacchādiṃ kuñjaracchādiñca dassetvā guṇasuttakakoṭṭitā paṭṭikā na kappatīti sambandho. ‘‘Mālādi’’ntiādīsu ādi-saddena tādisaṃ yaṃ kiñci vikārarūpaṃ gayhati. Kakkaṭānaṃ viya acchīni, tāni ādīni yassāti samāso. Tathā kuñjaracchādinti.
239. க⁴டகந்தி க⁴டகாகாரவட்டலேகா²ரூபங். மகரமுகா²தி³ந்தி எத்த² மகரமுக²ங் நாம மகரமுக²ஸண்டா²னங் . பி³ந்து³ பன ஆக³மவஸேன வுத்தோ. ஆதி³-ஸத்³தே³ன தெ³ட்³டு³ப⁴ஸீஸாதி³விகாரரூபங் யங் கிஞ்சி ஸங்க³ய்ஹதி. த³ஸாமுகே²தி த³ஸானங் முக²பூ⁴தே அந்தே ஏதானி ந கப்பந்தீதி ஸம்ப³ந்தோ⁴. விதே⁴ உப⁴ந்தே க⁴டகா லேகா² அஞ்ஞங் சித்தகஞ்ச ந கப்பந்தீதி ஸம்ப³ந்தோ⁴. க⁴டகாதி க⁴டகதோ. லேகா²தி லேகா²ய. பஞ்சமியா லோபோ. விதே⁴தி காயப³ந்த⁴னஸ்ஸ பாஸந்தே த³ஸாமூலே தஸ்ஸ தி²ரபா⁴வத்த²ங் கத்தப்³பே³ த³ந்தவிஸாணாதி³மயே விதே⁴.
239.Ghaṭakanti ghaṭakākāravaṭṭalekhārūpaṃ. Makaramukhādinti ettha makaramukhaṃ nāma makaramukhasaṇṭhānaṃ . Bindu pana āgamavasena vutto. Ādi-saddena deḍḍubhasīsādivikārarūpaṃ yaṃ kiñci saṅgayhati. Dasāmukheti dasānaṃ mukhabhūte ante etāni na kappantīti sambandho. Vidhe ubhante ghaṭakā lekhā aññaṃ cittakañca na kappantīti sambandho. Ghaṭakāti ghaṭakato. Lekhāti lekhāya. Pañcamiyā lopo. Vidheti kāyabandhanassa pāsante dasāmūle tassa thirabhāvatthaṃ kattabbe dantavisāṇādimaye vidhe.
240. தெ³ட்³டு³ப⁴கந்தி உத³கஸப்பஸீஸஸதி³ஸங். முரஜந்தி நானாவண்ணேஹி ஸுத்தேஹி முரஜவட்டிஸண்டா²னங் வேடெ²த்வா கதங். டீகாயங் பன ‘‘முரஜந்தி ப³ஹுரஜ்ஜுகே ஏகதோ ஸங்கட்³டி⁴த்வா ஏகாய ரஜ்ஜுயா பலிவேடெ²த்வா கதரஜ்ஜூ’’தி வுத்தங், தங் ‘‘ப³ஹுரஜ்ஜுகே ஏகதோ கத்வா’’திஆதி³னா ஹெட்டா² வுத்தஅட்ட²கதா²வசனேன விருஜ்ஜ²தி. மத்³த³வீணந்தி பாமங்க³ஸண்டா²னங். கலாபு³கந்தி ப³ஹுரஜ்ஜுகங். தேஸங் ‘‘ந கப்பதீ’’தி இமினா ஸம்ப³ந்தோ⁴. த்³வே மஜ்ஜி²மாதி மஜ்ஜே² ப⁴வா முரஜமத்³த³வீணஸங்கா²தா த்³வே.
240.Deḍḍubhakanti udakasappasīsasadisaṃ. Murajanti nānāvaṇṇehi suttehi murajavaṭṭisaṇṭhānaṃ veṭhetvā kataṃ. Ṭīkāyaṃ pana ‘‘murajanti bahurajjuke ekato saṅkaḍḍhitvā ekāya rajjuyā paliveṭhetvā katarajjū’’ti vuttaṃ, taṃ ‘‘bahurajjuke ekato katvā’’tiādinā heṭṭhā vuttaaṭṭhakathāvacanena virujjhati. Maddavīṇanti pāmaṅgasaṇṭhānaṃ. Kalābukanti bahurajjukaṃ. Tesaṃ ‘‘na kappatī’’ti iminā sambandho. Dve majjhimāti majjhe bhavā murajamaddavīṇasaṅkhātā dve.
241. க³ண்டி²யோ சாபீதி சீவரஸ்ஸ க³ண்டி²யோ சாபி. தம்மயாதி தேஹி வேளுஆதீ³ஹி நிப்³ப³த்தா. பஸங்கே³ன பனேதங் வுத்தந்தி.
241.Gaṇṭhiyo cāpīti cīvarassa gaṇṭhiyo cāpi. Tammayāti tehi veḷuādīhi nibbattā. Pasaṅgena panetaṃ vuttanti.
காயப³ந்த⁴னநித்³தே³ஸவண்ணனா நிட்டி²தா.
Kāyabandhananiddesavaṇṇanā niṭṭhitā.
ஸுமங்க³லப்பஸாத³னியா நாம டீகாய
Sumaṅgalappasādaniyā nāma ṭīkāya
பட²மபா⁴ணவாரவண்ணனா நிட்டி²தா.
Paṭhamabhāṇavāravaṇṇanā niṭṭhitā.
