| Library / Tipiṭaka / ತಿಪಿಟಕ • Tipiṭaka / ಖುದ್ದಸಿಕ್ಖಾ-ಮೂಲಸಿಕ್ಖಾ • Khuddasikkhā-mūlasikkhā |
೩೩. ಕಾಯಬನ್ಧನನಿದ್ದೇಸವಣ್ಣನಾ
33. Kāyabandhananiddesavaṇṇanā
೨೩೫. ಅಕಾಯಬನ್ಧನೋತಿ ಕಾಯಬನ್ಧನಂ ಅಬನ್ಧಿತ್ವಾತಿ ಅತ್ಥೋ। ತತೋ ಪಟ್ಠಾಯ ಚೀವರಂ ಪಾರುಪಿತಬ್ಬಂ, ತತೋ ಪಟ್ಠಾಯ ಏವ ಕಾಯಬನ್ಧನಂ ಬನ್ಧಿತಬ್ಬಂ। ‘‘ನ ಭಿಕ್ಖವೇ ಅಕಾಯಬನ್ಧನೇನ ಗಾಮೋ ಪವಿಸಿತಬ್ಬೋ। ಯೋ ಪವಿಸೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ (ಚೂಳವ॰ ೨೭೮) ಹಿ ವುತ್ತಂ। ತತ್ಥೇವಾಸತಿಯಾ ಗತೋತಿ ಅಸತಿಯಾ ಗತೋ ಯತ್ಥ ಸರತಿ, ತತ್ಥೇವ ಬನ್ಧಿತಬ್ಬಂ। ಸರಿತ್ವಾ ಪನ ಯಾವ ನ ಬನ್ಧತಿ, ತಾವ ಪಿಣ್ಡಾಯ ಚರಿತುಂ ನ ವಟ್ಟತಿ। ಯದಿ ಅನ್ತೋಗಾಮೇ ಸರತಿ, ಕಾಯಬನ್ಧನೇ ಸತಿ ಏಕಮನ್ತೇ ಠತ್ವಾ ಬನ್ಧಿತಬ್ಬಂ, ಅಸತಿ ಚೇ ನಿಕ್ಖಮಿತ್ವಾ ಬನ್ಧಿತ್ವಾ ಪುನ ಪಿಣ್ಡಾಯ ಪವಿಸಿತಬ್ಬನ್ತಿ ವದನ್ತಿ।
235.Akāyabandhanoti kāyabandhanaṃ abandhitvāti attho. Tato paṭṭhāya cīvaraṃ pārupitabbaṃ, tato paṭṭhāya eva kāyabandhanaṃ bandhitabbaṃ. ‘‘Na bhikkhave akāyabandhanena gāmo pavisitabbo. Yo paviseyya, āpatti dukkaṭassā’’ti (cūḷava. 278) hi vuttaṃ. Tatthevāsatiyā gatoti asatiyā gato yattha sarati, tattheva bandhitabbaṃ. Saritvā pana yāva na bandhati, tāva piṇḍāya carituṃ na vaṭṭati. Yadi antogāme sarati, kāyabandhane sati ekamante ṭhatvā bandhitabbaṃ, asati ce nikkhamitvā bandhitvā puna piṇḍāya pavisitabbanti vadanti.
೨೩೬. ‘‘ಅನುಜಾನಾಮಿ, ಭಿಕ್ಖವೇ, ದ್ವೇ ಕಾಯಬನ್ಧನಾನಿ ಪಟ್ಟಿಕಂ ಸೂಕರನ್ತಕ’’ನ್ತಿ (ಚೂಳವ॰ ೨೭೮) ವುತ್ತತ್ತಾ ‘‘ದುವಿಧ’’ನ್ತಿ ವುತ್ತಂ। ತತ್ಥ ಸೂಕರನ್ತಂ ನಾಮ ಕುಞ್ಚಿಕಾಕೋಸಕಾ ವಿಯ ಅನ್ತೇ ಸುಸಿರಂ ಕತ್ವಾ ಕೋಟ್ಟಿತಂ। ರಜ್ಜು ಚ ಏಕಾತಿ ಏಕವಟ್ಟಾ ರಜ್ಜು ಚ। ತದನುಲೋಮಿಕಾತಿ ತೇಸಂ ದ್ವಿನ್ನಂ ಅನುಲೋಮಿಕಾ।
236. ‘‘Anujānāmi, bhikkhave, dve kāyabandhanāni paṭṭikaṃ sūkarantaka’’nti (cūḷava. 278) vuttattā ‘‘duvidha’’nti vuttaṃ. Tattha sūkarantaṃ nāma kuñcikākosakā viya ante susiraṃ katvā koṭṭitaṃ. Rajju ca ekāti ekavaṭṭā rajju ca. Tadanulomikāti tesaṃ dvinnaṃ anulomikā.
೨೩೭. ಮಚ್ಛಕಣ್ಡಕಖಜ್ಜುರೀ-ಪತ್ತಾ ಮಟ್ಠಾ ಚ ಪಟ್ಟಿಕಾತಿ ಏತ್ಥ (ಚೂಳವ॰ ಅಟ್ಠ॰ ೨೭೮) ಏತೇ ಮಚ್ಛಕಣ್ಟಕಾದಯೋ ಮಟ್ಠಾ ವಿಕಾರರಹಿತಾ ಪಟ್ಟಿಕಾ ಚ ತದನ್ತೋಗಧಾತಿ ಅಧಿಪ್ಪಾಯೋ। ಲಬ್ಭಾ ದಸಾ ಚತಸ್ಸೋತಿ ಏಕಾಯ ವಾ ದ್ವೀಸು ವಾ ತೀಸು ವಾ ಕಥಾ ಏವ ನತ್ಥೀತಿ ಅಧಿಪ್ಪಾಯೋ, ತತೋ ಪರಂ ನ ವಟ್ಟತಿ। ಅನ್ತೇಸೂತಿ ಉಭೋಸು ಅನ್ತೇಸು। ಗುಣಸುತ್ತಕನ್ತಿ ದಿಗುಣಸುತ್ತಕಂ।
237.Macchakaṇḍakakhajjurī-pattā maṭṭhā ca paṭṭikāti ettha (cūḷava. aṭṭha. 278) ete macchakaṇṭakādayo maṭṭhā vikārarahitā paṭṭikā ca tadantogadhāti adhippāyo. Labbhā dasā catassoti ekāya vā dvīsu vā tīsu vā kathā eva natthīti adhippāyo, tato paraṃ na vaṭṭati. Antesūti ubhosu antesu. Guṇasuttakanti diguṇasuttakaṃ.
೨೩೯. ಮಕರಮುಖಾದಿನ್ತಿ ಆದಿ-ಸದ್ದೇನ ದೇಡ್ಡುಭಸೀಸಂ ಗಹಿತಂ। ಉಭನ್ತೇತಿ ಉಭೋಸು ಅನ್ತೇಸು। ಕಸ್ಸಾತಿ? ವಿಧಸ್ಸ। ಘಟಕಾತಿ ಘಟಕತೋ। ಲೇಖಾತಿ ಲೇಖಾಯ। ಘಟಕತೋ ಚ ಲೇಖಾಯ ಚ ಅಞ್ಞಂ ಚಿತ್ತಕಂ ನ ಕಪ್ಪತೀತಿ ಅತ್ಥೋ।
239.Makaramukhādinti ādi-saddena deḍḍubhasīsaṃ gahitaṃ. Ubhanteti ubhosu antesu. Kassāti? Vidhassa. Ghaṭakāti ghaṭakato. Lekhāti lekhāya. Ghaṭakato ca lekhāya ca aññaṃ cittakaṃ na kappatīti attho.
೨೪೦. ದೇಡ್ಡುಭಕನ್ತಿ (ಚೂಳವ॰ ೨೭೮; ಚೂಳವ॰ ಅಟ್ಠ॰ ೨೭೮) ಉದಕಸಪ್ಪಸಿರಸದಿಸಂ। ಮುರಜನ್ತಿ ಬಹುರಜ್ಜುಕೇ ಏಕತೋ ಸಙ್ಕಡ್ಢಿತ್ವಾ ಏಕಾಯ ರಜ್ಜುಯಾ ಪಲಿವೇಠೇತ್ವಾ ಕತರಜ್ಜು। ಮದ್ದವೀಣನ್ತಿ ಪಾಮಙ್ಗಸದಿಸಂ। ಕಲಾಬುಕನ್ತಿ ಅನೇಕವಟ್ಟಂ। ಏತಾನಿ ಪನ ಸಬ್ಬಾನಿ ನ ಕಪ್ಪನ್ತಿ। ದಸಾಸು ದ್ವೇ ಮಜ್ಝಿಮಾತಿ ಮುರಜಂ ಮದ್ದವೀಣನ್ತಿ ದ್ವೇ ಮಜ್ಝಿಮಾ ಏವ। ಕಪ್ಪರೇತಿ ಕಪ್ಪನ್ತೀತಿ ಅತ್ಥೋ।
240.Deḍḍubhakanti (cūḷava. 278; cūḷava. aṭṭha. 278) udakasappasirasadisaṃ. Murajanti bahurajjuke ekato saṅkaḍḍhitvā ekāya rajjuyā paliveṭhetvā katarajju. Maddavīṇanti pāmaṅgasadisaṃ. Kalābukanti anekavaṭṭaṃ. Etāni pana sabbāni na kappanti. Dasāsu dve majjhimāti murajaṃ maddavīṇanti dve majjhimā eva. Kappareti kappantīti attho.
೨೪೧. ಗಣ್ಠಿಯೋ ಚಾಪೀತಿ (ಚೂಳವ॰ ೨೭೯) ಚೀವರಗಣ್ಠಿಯೋಪಿ। ವೇಳುಆದಿಮಯಾ ಕಪ್ಪನ್ತೀತಿ ಪಸಙ್ಗೇನ ವುತ್ತಂ। ಕಾಯಬನ್ಧನವಿನಿಚ್ಛಯೋ।
241.Gaṇṭhiyocāpīti (cūḷava. 279) cīvaragaṇṭhiyopi. Veḷuādimayā kappantīti pasaṅgena vuttaṃ. Kāyabandhanavinicchayo.
ಕಾಯಬನ್ಧನನಿದ್ದೇಸವಣ್ಣನಾ ನಿಟ್ಠಿತಾ।
Kāyabandhananiddesavaṇṇanā niṭṭhitā.
ಪಠಮಭಾಣವಾರಂ।
Paṭhamabhāṇavāraṃ.
