| Library / Tipiṭaka / ཏིཔིཊཀ • Tipiṭaka / ཁུདྡསིཀྑཱ-མཱུལསིཀྑཱ • Khuddasikkhā-mūlasikkhā |
༣༣. ཀཱཡབནྡྷནནིདྡེསཝཎྞནཱ
33. Kāyabandhananiddesavaṇṇanā
༢༣༥. བནྡྷཱིཡཏི ཨནེནཱཏི བནྡྷནཾ, ཀཱཡསྶ བནྡྷནཾ ཀཱཡབནྡྷནཾ, ནཏྠི ཀཱཡབནྡྷནམེཏསྶཱཏི ཨཀཱཡབནྡྷནོ། དུཀྐཊནྟི སཉྩིཙྩ ཝཱ ཨསཉྩིཙྩ ཝཱ པཝིསེཡྻ ཙེ, དུཀྐཊཾ། ཨསཏིཡཱ གཏོ ཡཏྠ སརཏི, ཏཏྠེཝ བནྡྷེཡྻཱཏི སམྦནྡྷོ། གཏོཏི ཨནྟོགཱམཾ གཏོ། སརིཏྭཱ ཡཱཝ ན བནྡྷཏི, ན ཏཱཝ པིཎྜཱཡ ཙརིཏབྦཾ།
235. Bandhīyati anenāti bandhanaṃ, kāyassa bandhanaṃ kāyabandhanaṃ, natthi kāyabandhanametassāti akāyabandhano. Dukkaṭanti sañcicca vā asañcicca vā paviseyya ce, dukkaṭaṃ. Asatiyā gato yattha sarati, tattheva bandheyyāti sambandho. Gatoti antogāmaṃ gato. Saritvā yāva na bandhati, na tāva piṇḍāya caritabbaṃ.
༢༣༦. ‘‘པཊྚིཀཱ’’ཏིཨཱདིནཱ སབྦསངྒཱཧཀཾ ཀཱཡབནྡྷནཾ ནིདྡིསཏི། པཊྚིཀཱཏི པཀཏིཝཱིཏཱ ཝཱ མཙྪཀཎྚཀཁཛྫཱུརིཔཏྟཝཱཡིམཱ ཝཱ། སཱུཀརཱནཾ ཨནྟཾ སཱུཀརནྟཾ། ཨིདྷ པན ཏཾསདིསཾ ཝུཙྩཏི། ཙཏུརསྶཾ ཨཀཏྭཱ སཛྫིཏཾ མུདྡིཀཀཱཡབནྡྷནམྤི སངྒཧེཏྭཱ ‘‘ཨེཀཱ རཛྫཱུ’’ཏི ཝུཏྟཾ། ཏཾ པན རཛྫུཀཾ བནྡྷནྟེན ཨེཀགུཎམེཝ ཀཏྭཱ བནྡྷིཏུཾ ཝཊྚཏི, མཛ྄ཛྷེ བྷིནྡིཏྭཱ དིགུཎཾ ཀཏྭཱ བནྡྷིཏུཾ ན ཝཊྚཏི། དིགུཎཾ པན ཨཀཏྭཱ སཏཝཱརམྤི པུནཔྤུནཾ ཨཱཝིཛ྄ཛྷིཏྭཱ བནྡྷིཏུཾ ཝཊྚཏི, པཱམངྒསཎྛཱནཾ པན ཨེཀམྤི ན ཝཊྚཏི ། བཧུརཛྫུཀེ ཨེཀཏོ ཀཏྭཱ ཨེཀེན ནིརནྟརཾ ཝེཋེཏྭཱ ཀཏཾ ‘‘བཧུརཛྫུཀ’’ནྟི ན ཝཏྟབྦཾ, ཏཾ ཝཊྚཏི། ཏདནུལོམིཀཱཏི ཏེསཾ པཊྚིཀཱསཱུཀརནྟཱནཾ དྭིནྣཾ དྭེ ཨིམེ ཡཐཱཀྐམམནུལོམིཀཱ།
236.‘‘Paṭṭikā’’tiādinā sabbasaṅgāhakaṃ kāyabandhanaṃ niddisati. Paṭṭikāti pakativītā vā macchakaṇṭakakhajjūripattavāyimā vā. Sūkarānaṃ antaṃ sūkarantaṃ. Idha pana taṃsadisaṃ vuccati. Caturassaṃ akatvā sajjitaṃ muddikakāyabandhanampi saṅgahetvā ‘‘ekā rajjū’’ti vuttaṃ. Taṃ pana rajjukaṃ bandhantena ekaguṇameva katvā bandhituṃ vaṭṭati, majjhe bhinditvā diguṇaṃ katvā bandhituṃ na vaṭṭati. Diguṇaṃ pana akatvā satavārampi punappunaṃ āvijjhitvā bandhituṃ vaṭṭati, pāmaṅgasaṇṭhānaṃ pana ekampi na vaṭṭati . Bahurajjuke ekato katvā ekena nirantaraṃ veṭhetvā kataṃ ‘‘bahurajjuka’’nti na vattabbaṃ, taṃ vaṭṭati. Tadanulomikāti tesaṃ paṭṭikāsūkarantānaṃ dvinnaṃ dve ime yathākkamamanulomikā.
༢༣༧-༨. པཊྚིཀཱ ཀཱིདིསཱི ཝཊྚཏཱིཏི ཨཱཧ ‘‘མཙྪཱ’’ཏིཨཱདི། པཊྚིཀཱ མཙྪཀཎྚཀཁཛྫཱུརིཔཏྟཱ ཝཱ མཊྛཱ ཝཱ ལབྦྷཱཏི སམྦནྡྷོ། ཀཎྚཀ-སདྡེན པཏྟ-སདྡེན ཙ ཏདཱཀཱརོ ཝུཙྩཏི, ཨུཔཙཱརཏོ ཧི མཙྪཱནཾ ཀཎྚཀཱཀཱརོ ཙ ཁཛྫཱུརཱིནཾ པཏྟཱཀཱརོ ཙ ཨེཏིསྶཱཏི སམཱསོ། མཊྛཱཏི པཀཏིཝཱིཏཱ། ཊཱིཀཱཡཾ པན ‘‘ཨེཏེ མཙྪཀཎྚཀཱདཡོ མཊྛཱ ཝིཀཱརརཧིཏཱ པཊྚིཀཱ ཙ ཏདནྟོགདྷཱཏི ཨདྷིཔྤཱཡོ’’ཏི ཝུཏྟཾ། ཀཐཾ ཏེསམནྟོགདྷཏཱ? ཡཏོ ཏཱནིཡེཝ པཊྚིཀཱ ནཱམཱཏི། ཏཐཱ ཙ ཝུཏྟཾ ཨཊྛཀཐཱཡཾ ‘‘པཀཏིཝཱིཏཱ ཝཱ མཙྪཀཎྚཀཝཱཡིམཱ ཝཱ པཊྚིཀཱ ཝཊྚཏཱི’’ཏི (ཙཱུལ༹ཝ॰ ཨཊྛ॰ ༢༧༨)། ཨེཏྠ པན མཙྪཀཎྚཀེཡེཝ ཁཛྫཱུརིཔཏྟཾ པཝིཊྛཾ། ཙཏསྶོཔི དསཱ ལབྦྷཱཏི སམྦནྡྷོ། ཙཏསྶོཏི ཨུཀྐཊྛཔརིཙྪེདེན ཝུཏྟཾ, ཏསྨཱ ཏཏོ ཨཱུནཱཔི ཝཊྚནྟི། ཨནྟེཏི ཀཱཡབནྡྷནསྶ ཨུབྷཡནྟེ དིགུཎསུཏྟཀཾ ལབྦྷནྟི སམྦནྡྷོ། གུཎོ བནྡྷནབྷཱུཏཾ སུཏྟཀཾ གུཎསུཏྟཀཾ། ‘‘གུཎོ པཊལརཱསཱིསུ, ཨཱནིསཾསེ ཙ བནྡྷནེ’’ཏི ཧི ཨབྷིདྷཱནཔྤདཱིཔིཀཱ། དྭིནྣཾ གུཎསུཏྟཀཱནཾ སམཱཧཱརོ དིགུཎསུཏྟཀཾ། ཏཾ དསཱམུཁསྶ ཐིརབྷཱཝཱཡ ཀོཊྚེཏུཾ ཝཊྚཏི, ན སོབྷནཏྠཾ། ཏེནཱཧ ‘‘མཱལཱདི’’ནྟིཨཱདི།
237-8. Paṭṭikā kīdisī vaṭṭatīti āha ‘‘macchā’’tiādi. Paṭṭikā macchakaṇṭakakhajjūripattā vā maṭṭhā vā labbhāti sambandho. Kaṇṭaka-saddena patta-saddena ca tadākāro vuccati, upacārato hi macchānaṃ kaṇṭakākāro ca khajjūrīnaṃ pattākāro ca etissāti samāso. Maṭṭhāti pakativītā. Ṭīkāyaṃ pana ‘‘ete macchakaṇṭakādayo maṭṭhā vikārarahitā paṭṭikā ca tadantogadhāti adhippāyo’’ti vuttaṃ. Kathaṃ tesamantogadhatā? Yato tāniyeva paṭṭikā nāmāti. Tathā ca vuttaṃ aṭṭhakathāyaṃ ‘‘pakativītā vā macchakaṇṭakavāyimā vā paṭṭikā vaṭṭatī’’ti (cūḷava. aṭṭha. 278). Ettha pana macchakaṇṭakeyeva khajjūripattaṃ paviṭṭhaṃ. Catassopi dasā labbhāti sambandho. Catassoti ukkaṭṭhaparicchedena vuttaṃ, tasmā tato ūnāpi vaṭṭanti. Anteti kāyabandhanassa ubhayante diguṇasuttakaṃ labbhanti sambandho. Guṇo bandhanabhūtaṃ suttakaṃ guṇasuttakaṃ. ‘‘Guṇo paṭalarāsīsu, ānisaṃse ca bandhane’’ti hi abhidhānappadīpikā. Dvinnaṃ guṇasuttakānaṃ samāhāro diguṇasuttakaṃ. Taṃ dasāmukhassa thirabhāvāya koṭṭetuṃ vaṭṭati, na sobhanatthaṃ. Tenāha ‘‘mālādi’’ntiādi.
མཱལཱདིཾ ཀཀྐཊཙྪཱདིཾ ཀུཉྫརཙྪཱདིཉྩ དསྶེཏྭཱ གུཎསུཏྟཀཀོཊྚིཏཱ པཊྚིཀཱ ན ཀཔྤཏཱིཏི སམྦནྡྷོ། ‘‘མཱལཱདི’’ནྟིཨཱདཱིསུ ཨཱདི-སདྡེན ཏཱདིསཾ ཡཾ ཀིཉྩི ཝིཀཱརརཱུཔཾ གཡ྄ཧཏི། ཀཀྐཊཱནཾ ཝིཡ ཨཙྪཱིནི, ཏཱནི ཨཱདཱིནི ཡསྶཱཏི སམཱསོ། ཏཐཱ ཀུཉྫརཙྪཱདིནྟི།
Mālādiṃ kakkaṭacchādiṃ kuñjaracchādiñca dassetvā guṇasuttakakoṭṭitā paṭṭikā na kappatīti sambandho. ‘‘Mālādi’’ntiādīsu ādi-saddena tādisaṃ yaṃ kiñci vikārarūpaṃ gayhati. Kakkaṭānaṃ viya acchīni, tāni ādīni yassāti samāso. Tathā kuñjaracchādinti.
༢༣༩. གྷཊཀནྟི གྷཊཀཱཀཱརཝཊྚལེཁཱརཱུཔཾ། མཀརམུཁཱདིནྟི ཨེཏྠ མཀརམུཁཾ ནཱམ མཀརམུཁསཎྛཱནཾ ། བིནྡུ པན ཨཱགམཝསེན ཝུཏྟོ། ཨཱདི-སདྡེན དེཌྜུབྷསཱིསཱདིཝིཀཱརརཱུཔཾ ཡཾ ཀིཉྩི སངྒཡ྄ཧཏི། དསཱམུཁེཏི དསཱནཾ མུཁབྷཱུཏེ ཨནྟེ ཨེཏཱནི ན ཀཔྤནྟཱིཏི སམྦནྡྷོ། ཝིདྷེ ཨུབྷནྟེ གྷཊཀཱ ལེཁཱ ཨཉྙཾ ཙིཏྟཀཉྩ ན ཀཔྤནྟཱིཏི སམྦནྡྷོ། གྷཊཀཱཏི གྷཊཀཏོ། ལེཁཱཏི ལེཁཱཡ། པཉྩམིཡཱ ལོཔོ། ཝིདྷེཏི ཀཱཡབནྡྷནསྶ པཱསནྟེ དསཱམཱུལེ ཏསྶ ཐིརབྷཱཝཏྠཾ ཀཏྟབྦེ དནྟཝིསཱཎཱདིམཡེ ཝིདྷེ།
239.Ghaṭakanti ghaṭakākāravaṭṭalekhārūpaṃ. Makaramukhādinti ettha makaramukhaṃ nāma makaramukhasaṇṭhānaṃ . Bindu pana āgamavasena vutto. Ādi-saddena deḍḍubhasīsādivikārarūpaṃ yaṃ kiñci saṅgayhati. Dasāmukheti dasānaṃ mukhabhūte ante etāni na kappantīti sambandho. Vidhe ubhante ghaṭakā lekhā aññaṃ cittakañca na kappantīti sambandho. Ghaṭakāti ghaṭakato. Lekhāti lekhāya. Pañcamiyā lopo. Vidheti kāyabandhanassa pāsante dasāmūle tassa thirabhāvatthaṃ kattabbe dantavisāṇādimaye vidhe.
༢༤༠. དེཌྜུབྷཀནྟི ཨུདཀསཔྤསཱིསསདིསཾ། མུརཛནྟི ནཱནཱཝཎྞེཧི སུཏྟེཧི མུརཛཝཊྚིསཎྛཱནཾ ཝེཋེཏྭཱ ཀཏཾ། ཊཱིཀཱཡཾ པན ‘‘མུརཛནྟི བཧུརཛྫུཀེ ཨེཀཏོ སངྐཌྜྷིཏྭཱ ཨེཀཱཡ རཛྫུཡཱ པལིཝེཋེཏྭཱ ཀཏརཛྫཱུ’’ཏི ཝུཏྟཾ, ཏཾ ‘‘བཧུརཛྫུཀེ ཨེཀཏོ ཀཏྭཱ’’ཏིཨཱདིནཱ ཧེཊྛཱ ཝུཏྟཨཊྛཀཐཱཝཙནེན ཝིརུཛ྄ཛྷཏི། མདྡཝཱིཎནྟི པཱམངྒསཎྛཱནཾ། ཀལཱབུཀནྟི བཧུརཛྫུཀཾ། ཏེསཾ ‘‘ན ཀཔྤཏཱི’’ཏི ཨིམིནཱ སམྦནྡྷོ། དྭེ མཛ྄ཛྷིམཱཏི མཛ྄ཛྷེ བྷཝཱ མུརཛམདྡཝཱིཎསངྑཱཏཱ དྭེ།
240.Deḍḍubhakanti udakasappasīsasadisaṃ. Murajanti nānāvaṇṇehi suttehi murajavaṭṭisaṇṭhānaṃ veṭhetvā kataṃ. Ṭīkāyaṃ pana ‘‘murajanti bahurajjuke ekato saṅkaḍḍhitvā ekāya rajjuyā paliveṭhetvā katarajjū’’ti vuttaṃ, taṃ ‘‘bahurajjuke ekato katvā’’tiādinā heṭṭhā vuttaaṭṭhakathāvacanena virujjhati. Maddavīṇanti pāmaṅgasaṇṭhānaṃ. Kalābukanti bahurajjukaṃ. Tesaṃ ‘‘na kappatī’’ti iminā sambandho. Dve majjhimāti majjhe bhavā murajamaddavīṇasaṅkhātā dve.
༢༤༡. གཎྛིཡོ ཙཱཔཱིཏི ཙཱིཝརསྶ གཎྛིཡོ ཙཱཔི། ཏམྨཡཱཏི ཏེཧི ཝེལུ༹ཨཱདཱིཧི ནིབྦཏྟཱ། པསངྒེན པནེཏཾ ཝུཏྟནྟི།
241.Gaṇṭhiyo cāpīti cīvarassa gaṇṭhiyo cāpi. Tammayāti tehi veḷuādīhi nibbattā. Pasaṅgena panetaṃ vuttanti.
ཀཱཡབནྡྷནནིདྡེསཝཎྞནཱ ནིཊྛིཏཱ།
Kāyabandhananiddesavaṇṇanā niṭṭhitā.
སུམངྒལཔྤསཱདནིཡཱ ནཱམ ཊཱིཀཱཡ
Sumaṅgalappasādaniyā nāma ṭīkāya
པཋམབྷཱཎཝཱརཝཎྞནཱ ནིཊྛིཏཱ།
Paṭhamabhāṇavāravaṇṇanā niṭṭhitā.
