1-11. гааяаг̇ад̇аасад̇исуд̇д̇аад̣̇иван̣н̣анаа

1-11. Kāyagatāsatisuttādivaṇṇanā

366-376. асан̇кад̇асам̣яуд̇д̇з асан̇кад̇анд̇и агад̇ам̣. хид̇зсинаад̇и хид̇ам̣ зсанд̇зна. анугамбагзнаад̇и анугамбамаанзна. анугамбам̣ убаад̣̇ааяаад̇и анугамбам̣ жид̇д̇зна бариг̇г̇ахзд̇ваа, бадижжаад̇иби вуд̇д̇ам̣ ход̇и. гад̇ам̣ во д̇ам̣ маяаад̇и д̇ам̣ маяаа имам̣ асан̇кад̇ан̃жа асан̇кад̇амаг̇г̇ан̃жа д̣̇зсзнд̇зна д̇умхаагам̣ гад̇ам̣. зд̇д̇агамзва хи анугамбагасса сад̇т̇у гижжам̣, яад̣̇ид̣̇ам̣ авибарийд̇ад̇хаммад̣̇зсанаа. ид̇о барам̣ бана бадибад̇д̇и наама саавагаанам̣ гижжам̣. д̇знааха зд̇аани, бхигкавз, ругкамуулаани…бз… амхаагам̣ анусаасанийд̇и иминаа ругкамууласзнаасанам̣ д̣̇ассзд̇и. сун̃н̃ааг̇аараанийд̇и иминаа ж̇анавивид̇д̇ам̣ таанам̣. убхаязна жа яог̇аануруубам̣ сзнаасанам̣ аажигкад̇и, д̣̇ааяаж̇ж̇ам̣ нияяаад̇зд̇и.

366-376. Asaṅkhatasaṃyutte asaṅkhatanti akataṃ. Hitesināti hitaṃ esantena. Anukampakenāti anukampamānena. Anukampaṃ upādāyāti anukampaṃ cittena pariggahetvā, paṭiccātipi vuttaṃ hoti. Kataṃ vo taṃ mayāti taṃ mayā imaṃ asaṅkhatañca asaṅkhatamaggañca desentena tumhākaṃ kataṃ. Ettakameva hi anukampakassa satthu kiccaṃ, yadidaṃ aviparītadhammadesanā. Ito paraṃ pana paṭipatti nāma sāvakānaṃ kiccaṃ. Tenāha etāni, bhikkhave, rukkhamūlāni…pe… amhākaṃ anusāsanīti iminā rukkhamūlasenāsanaṃ dasseti. Suññāgārānīti iminā janavivittaṃ ṭhānaṃ. Ubhayena ca yogānurūpaṃ senāsanaṃ ācikkhati, dāyajjaṃ niyyāteti.

жхааяат̇аад̇и аарамман̣уубаниж̇жхаанзна адтад̇им̣саарамман̣аани, лагкан̣уубаниж̇жхаанзна жа анижжаад̣̇ид̇о канд̇хааяад̇анаад̣̇ийни убаниж̇жхааяат̇а, самат̇ан̃жа вибассанан̃жа вад̣дхзт̇аад̇и вуд̇д̇ам̣ ход̇и. маа бамаад̣̇ад̇т̇аад̇и маа бамаж̇ж̇ид̇т̇а. маа бажчаа виббадисаарино ахувад̇т̇аад̇и яз хи буб̣б̣з д̣̇ахарагаалз арог̇агаалз сад̇д̇асаббааяаад̣̇исамбад̇д̇игаалз сад̇т̇у саммукийбхаавагаалз жа яонисоманасигаарарахид̇аа рад̇д̇инд̣̇ивам̣ ман̇гулабхад̇д̇ам̣ худ̇ваа сзяяасукам̣ мид̣̇д̇хасукам̣ анубхонд̇аа бамаж̇ж̇анд̇и, д̇з бажчаа ж̇араагаалз рог̇агаалз маран̣агаалз вибад̇д̇игаалз сад̇т̇у бариниб̣б̣уд̇агаалз жа д̇ам̣ буб̣б̣з бамаад̣̇авихаарам̣ ануссаранд̇аа саббадисанд̇хигаалагирияан̃жа бхаарияам̣ самбассамаанаа виббадисаарино хонд̇и. д̇умхз бана д̇аад̣̇исаа маа ахувад̇т̇аад̇и д̣̇ассзнд̇о ааха ‘‘маа бажчаа виббадисаарино ахувад̇т̇аа’’д̇и.

Jhāyathāti ārammaṇūpanijjhānena aṭṭhatiṃsārammaṇāni, lakkhaṇūpanijjhānena ca aniccādito khandhāyatanādīni upanijjhāyatha, samathañca vipassanañca vaḍḍhethāti vuttaṃ hoti. Mā pamādatthāti mā pamajjittha. Mā pacchā vippaṭisārino ahuvatthāti ye hi pubbe daharakāle arogakāle sattasappāyādisampattikāle satthu sammukhībhāvakāle ca yonisomanasikārarahitā rattindivaṃ maṅkulabhattaṃ hutvā seyyasukhaṃ middhasukhaṃ anubhontā pamajjanti, te pacchā jarākāle rogakāle maraṇakāle vipattikāle satthu parinibbutakāle ca taṃ pubbe pamādavihāraṃ anussarantā sappaṭisandhikālakiriyañca bhāriyaṃ sampassamānā vippaṭisārino honti. Tumhe pana tādisā mā ahuvatthāti dassento āha ‘‘mā pacchā vippaṭisārino ahuvatthā’’ti.

аяам̣ во амхаагам̣ анусаасанийд̇и аяам̣ амхаагам̣ санд̇игаа ‘‘жхааяат̇а маа бамаад̣̇ад̇т̇аа’’д̇и д̇умхаагам̣ анусаасаний, оваад̣̇од̇и вуд̇д̇ам̣ ход̇и.

Ayaṃ vo amhākaṃ anusāsanīti ayaṃ amhākaṃ santikā ‘‘jhāyatha mā pamādatthā’’ti tumhākaṃ anusāsanī, ovādoti vuttaṃ hoti.

Next: 2. д̣̇уд̇ияаваг̇г̇о • 2. Dutiyavaggo

дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 1-11. гааяаг̇ад̇аасад̇исуд̇д̇аад̣̇иван̣н̣анаа • 1-11. Kāyagatāsatisuttādivaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact